حسن سے مروی ہے کہ ابن عامر نے، جب وہ فارس یا اصطخر میں تھے، ایک قیدی کو حضرت ابن عمر رضی اللہ عنہما کے پاس بھیجا تاکہ وہ اس کو قتل کردیں، حضرت ابن عمر رضی اللہ عنہما نے ارشاد فرمایا: بہر حال وہ بندھا ہوا قیدی ہے تو پھر قتل نہیں ہوگا۔ [مصنف ابن ابي شيبه/كتاب السير/حدیث: 35491]

حضرت وکیع فرماتے ہیں کہ اس سے مراد بندھا ہوا ہے۔ [مصنف ابن ابي شيبه/كتاب السير/حدیث: 35492]

حضرت سفیان سے مروی ہے کہ حضرت عمر رضی اللہ عنہ بن خطاب کی خدمت میں قیدی لائے گئے تو آپ نے ان سب کو آزاد کردیا۔ [مصنف ابن ابي شيبه/كتاب السير/حدیث: 35493]

ابراہیم رحمہ اللہ فرماتے ہیں کہ امام کو قیدیوں کے متعلق مکمل اختیار ہے، اگر چاہے تو فدیہ لے کر آزاد کر دے، یا احسان کرتے ہوئے آزاد کر دے یا پھر قتل کر دے۔ [مصنف ابن ابي شيبه/كتاب السير/حدیث: 35494]

حضرت جعفر رحمہ اللہ اپنے والد سے روایت کرتے ہیں کہ حضرت علی رضی اللہ عنہ نے بصرہ کے دن منادی کو اعلان کرنے کا حکم فرمایا کہ: قیدی قتل نہیں کیا جائے گا۔ [مصنف ابن ابي شيبه/كتاب السير/حدیث: 35495]

حضرت حصین سے مروی ہے کہ آنحضرت صلی اللہ علیہ وسلم نے فتح مکہ کے دن اعلان فرمایا: خبردار پیٹھ پھیر کر بھاگنے والے کو قتل نہیں کیا جائے گا، اور زخمی کو قتل نہیں کیا جائے گا، اور جس نے اپنے گھر کا دروازہ بند کردیا وہ مامون ہے۔ [مصنف ابن ابي شيبه/كتاب السير/حدیث: 35496]

حضرت جعفر اپنے والد سے روایت کرتے ہیں کہ حضرت علی رضی اللہ عنہ نے بصرہ کے دن منادی کو یہ اعلان کرنے کو فرمایا کہ خبردار! بھاگنے والے کا پیچھا نہ کیا جائے، زخمی کو قتل نہ کیا جائے گا، قیدی کو قتل نہیں کیا جائے گا، اور جس نے اپنے گھر کا دروازہ بند کردیا وہ مامون ہے اور جس نے اپنا ہتھیار ڈال دیا وہ بھی مامون ہے اور ان کے سامان کو نہیں لوٹا جائے گا۔ [مصنف ابن ابي شيبه/كتاب السير/حدیث: 35497]

حضرت ابو امامہ رضی اللہ عنہ فرماتے ہیں کہ میں جنگ صفین میں حاضر تھا، زخمیوں قتل نہیں کیا جا رہا تھا، اور بھاگنے والوں کا پیچھا بھی نہیں کیا جا رہا تھا اور مقتولوں کا سامان بھی نہیں چھینا جا رہا تھا۔ [مصنف ابن ابي شيبه/كتاب السير/حدیث: 35498]

حضرت ابن سیرین سے مروی ہے کہ یمامہ والے دن حضرت زبیر رضی اللہ عنہ مقتولوں کو تلاش کر رہے تھے، جب کسی شخص کو دیکھتے کہ اس میں ابھی جان کی رمق باقی ہے تو زبیر اس کا کام تمام کردیتے۔ [مصنف ابن ابي شيبه/كتاب السير/حدیث: 35499]

حضرت عبد اللہ رضی اللہ عنہ فرماتے ہیں کہ جنگ احد کے دن عورتیں زخمیوں کا کام تمام کر رہی تھیں۔ [مصنف ابن ابي شيبه/كتاب السير/حدیث: 35500]