حضرت یحییٰ بن جزار سے بھی اسی طرح مروی ہے۔ [مصنف ابن ابي شيبه/كتاب السير/حدیث: 35521]

حضرت عبد اللہ بن شقیق العقیلی سے مروی ہے کہ ایک شخص حضور صلی اللہ علیہ وسلم کی خدمت میں کھڑا ہوا اور عرض کیا اے اللہ کے رسول صلی اللہ علیہ وسلم مجھے غنیمت کے متعلق بتائیے؟ آپ صلی اللہ علیہ وسلم نے ارشاد فرمایا: ایک حصہ اللہ کے لیے اور چار حصے ان کیلئے۔ میں نے عرض کیا: کیا کوئی شخص کسی سے زیادہ حقدار بھی ہے؟ نبی کریم صلی اللہ علیہ وسلم نے ارشاد فرمایا: اگر تیرے پہلو میں تیر بھی مارا گیا پھر بھی تو اپنے بھائی سے زیادہ حقدار نہیں ہے۔ [مصنف ابن ابي شيبه/كتاب السير/حدیث: 35522]

حضرت ابراہیم رحمہ اللہ قرآن کریم کی آیت { فَأَنَّ لِلَّہِ خُمُسَہُ } کی تفسیر میں فرماتے ہیں کہ ہر چیز اللہ کے لیے ہی ہے۔ [مصنف ابن ابي شيبه/كتاب السير/حدیث: 35523]

حضرت عطاء سے مروی ہے کہ اللہ اور اس کے رسول صلی اللہ علیہ وسلم کا حصہ خمس میں ایک ہی ہے، اللہ کے نبی صلی اللہ علیہ وسلم اس خمس کو جہاں پسند فرماتے رکھتے، جو چاہتے اس میں کرتے اور جس کو چاہتے اس میں سے سواری دیتے۔ [مصنف ابن ابي شيبه/كتاب السير/حدیث: 35524]

حضرت شعبی قرآن کریم کی آیت { وَاعْلَمُوا أَنَّمَا غَنِمْتُمْ مِنْ شَیْئٍ فَأَنَّ لِلَّہِ خُمُسَہُ } کے متعلق فرماتے ہیں کہ اللہ اور اس کے رسول صلی اللہ علیہ وسلم کا حصہ خمس میں ایک ہی ہے۔ [مصنف ابن ابي شيبه/كتاب السير/حدیث: 35525]

حضرت حسن بن محمد بن علی رحمہ اللہ قرآن کریم کی آیت { وَاعْلَمُوا أَنَّمَا غَنِمْتُمْ مِنْ شَیْئٍ فَأَنَّ لِلَّہِ خُمُسَہُ } کی تفسیر میں فرماتے ہیں کہ یہ کلام کا آغاز ہے، اللہ کے لیے غنیمت میں کوئی حصہ نہیں ہے، دنیا اور آخرت ساری ہی اللہ کی ملکیت ہے۔ [مصنف ابن ابي شيبه/كتاب السير/حدیث: 35526]

حضرت محمد غنیمت کے بارے میں فرماتے ہیں کہ غنیمت میں خمس اللہ کے لیے ہے، اور اللہ کے نبی کا حصہ ہے اور غنیمت میں اللہ کے نبی صلی اللہ علیہ وسلم کے لیے صفی ہے۔ (صفی وہ خاص حصہ جس کو اللہ کے نبی صلی اللہ علیہ وسلم تقسیم غنیمت سے قبل ہی اپنے لیے الگ فرما لیں) [مصنف ابن ابي شيبه/كتاب السير/حدیث: 35527]

حضرت ابن سیرین رحمہ اللہ فرماتے ہیں کہ اللہ کے نبی صلی اللہ علیہ وسلم کے لیے بہترین قیدی کو الگ کیا جاتا، پھر خمس نکالا جاتا، پھر لوگوں کے ساتھ آپ صلی اللہ علیہ وسلم کا حصہ نکالا جاتا خواہ آپ غائب ہوں یا حاضر۔ [مصنف ابن ابي شيبه/كتاب السير/حدیث: 35528]

حضرت ابن سیرین فرماتے ہیں کہ خیبر کے دن صفی حضرت صفیہ بنت حیی رضی اللہ عنہا تھیں۔ [مصنف ابن ابي شيبه/كتاب السير/حدیث: 35529]

حضرت شعبی فرماتے ہیں کہ خیبر کے دن صفی حضرت صفیہ بنت حیی رضی اللہ عنہا تھیں، جن سے رسول اللہ صلی اللہ علیہ وسلم نے نکاح فرما لیا۔ [مصنف ابن ابي شيبه/كتاب السير/حدیث: 35530]