محمد رحمہ اللہ فرماتے ہیں کہ اللہ کا خمس، نبی کریم صلی اللہ علیہ وسلم کا حصہ اور صفی ہے۔ غنیمت میں سے خمس کے بعد آپ صلی اللہ علیہ وسلم کے لیے بہترین قیدی چنا جاتا اگر قیدی ہوتے، ورنہ کوئی اور چیز، پھر صفی کے بعد مسلمانوں کے ساتھ آپ صلی اللہ علیہ وسلم کا حصہ نکالا جاتا خواہ آپ حاضر ہوں یا غائب۔ راوی فرماتے ہیں کہ آپ صلی اللہ علیہ وسلم نے خیبر کے دن حضرت صفیہ بنت حیی رضی اللہ عنہا کو چنا۔ [مصنف ابن ابي شيبه/كتاب السير/حدیث: 35531]

حضرت اشعث فرماتے ہیں کہ حضرت ابو الزبیر، حضرت عمرو بن دینار اور حضرت زہری نے فرمایا کہ رسول اللہ صلی اللہ علیہ وسلم نے غزوہ بدر کے دن اپنی تلوار ذوالفقار کو چنا۔ [مصنف ابن ابي شيبه/كتاب السير/حدیث: 35532]

حضرت ابو الزناد سے مروی ہے کہ نبی کریم صلی اللہ علیہ وسلم نے غزوہ بدر کے دن بطور صفی کے عاص بن منبہ بن الحجاج کی تلوار کو چنا۔ [مصنف ابن ابي شيبه/كتاب السير/حدیث: 35533]

حضرت شعبی سے نبی کریم صلی اللہ علیہ وسلم کے حصہ غنیمت اور صفی کے متعلق دریافت کیا گیا؟ حضرت شعبی رحمہ اللہ نے فرمایا: جس طرح ایک عام مسلمان کا غنیمت میں حصہ تھا اسی طرح نبی کریم صلی اللہ علیہ وسلم کا حصہ تھا اور بہر حال صفی سے مراد وہ حصہ ہے جس کو اللہ کے نبی مسلمانوں کے غنیمت میں سے الگ فرما لیتے خواہ وہ باندی ہو، گھوڑا ہو یا اس کے علاوہ کوئی اور چیز ہو۔ [مصنف ابن ابي شيبه/كتاب السير/حدیث: 35534]

حضرت حسن بن صالح فرماتے ہیں کہ میں نے حضرت عطاء بن السائب سے اللہ کے ارشاد { وَاعْلَمُوا أَنَّمَا غَنِمْتُمْ مِنْ شَیْئٍ فَأَنَّ لِلَّہِ خُمُسَہُ } اور دوسری آیت { مَا أَفَائَ اللَّہُ عَلَی رَسُولِہِ } کے متعلق دریافت کیا کہ فیٔ اور غنیمت سے کیا مراد ہے؟ حضرت عطاء نے فرمایا: جب مسلمان مشرکین اور ان کی زمینوں پر بزور جنگ غالب ہوجائیں اور اس وقت جو مال ہاتھ آئے وہ غنیمت ہے، اور ان کی زمین فیٔ ہے اور ہمارا یہ سواد (عراق کی زرعی زمین) فیٔ ہے۔ [مصنف ابن ابي شيبه/كتاب السير/حدیث: 35535]

حضرت سفیان غنیمت کے متعلق فرماتے ہیں کہ جو مال مسلمان بزور جہاد لیں وہ ان کے لیے ہے جس کو اللہ نے نام لے کر متعین کیا ہے، اور چار خمس مجاہدین کے لیے ہیں۔ [مصنف ابن ابي شيبه/كتاب السير/حدیث: 35536]

حضرت ابن عون فرماتے ہیں کہ میں نے الصفی سے متعلق ایک کتاب میں پڑھا پھر میں نے حضرت محمد رحمہ اللہ سے الصفی کے متعلق دریافت کیا؟ حضرت محمد رحمہ اللہ نے فرمایا: ہر چیز سے قبل جو مال نبی کریم صلی اللہ علیہ وسلم کے لیے الگ کیا جاتا وہ مراد ہے، پھر بعد میں لوگوں کے ساتھ بھی ایک حصہ نکالا جاتا۔ [مصنف ابن ابي شيبه/كتاب السير/حدیث: 35537]

حضرت مجاہد قرآن کریم کی آیت { وَاعْلَمُوا أَنَّمَا غَنِمْتُمْ مِنْ شَیْئٍ } کی تفسیر میں فرماتے ہیں کہ ایک معمولی سی سوئی بھی من شئی میں داخل ہے۔ [مصنف ابن ابي شيبه/كتاب السير/حدیث: 35538]

حضرت مکحول رحمہ اللہ فرماتے ہیں کہ خمس بھی فئی کی طرح ہے، اس میں سے امام مالدار اور فقیر دونوں کو دے گا۔ [مصنف ابن ابي شيبه/كتاب السير/حدیث: 35539]

راوی فرماتے ہیں کہ مجھے لیث بن ابی رقیہ نے خبر دی کہ حضرت عمر بن عبدالعزیز نے تحریر فرمایا: جو عام فئی کا راستہ ہے وہ خمس کا بھی راستہ ہے۔ [مصنف ابن ابي شيبه/كتاب السير/حدیث: 35540]