حضرت ثابت بن حجاج فرماتے ہیں کہ مجھے خبر پہنچی ہے کہ بنو عبدالمطلب کے دو شخص نبی کریم صلی اللہ علیہ وسلم کی خدمت میں حاضر ہوئے اور صدقہ کا مال مانگا۔ نبی کریم صلی اللہ علیہ وسلم نے ارشاد فرمایا: ابھی نہیں لیکن جب تم دیکھو میرے پاس خمس کا مال موجود ہے تو پھر تم میرے پاس آنا (میں عطا کر دوں گا)۔ [مصنف ابن ابي شيبه/كتاب السير/حدیث: 35541]

حضرت مجاہد فرماتے ہیں کہ آل محمد صلی اللہ علیہ وسلم کے لیے صدقہ حلال نہیں ہے۔ ان کو خمس کا خمس ملے گا۔ [مصنف ابن ابي شيبه/كتاب السير/حدیث: 35542]

حضرت حسن سے مروی ہے کہ حضرت عمر رضی اللہ عنہ نے مال فیٔ میں سے ایک شخص کو دس ہزار، نو ہزار، آٹھ ہزار اور سات ہزار عطا فرمائے۔ [مصنف ابن ابي شيبه/كتاب السير/حدیث: 35543]

حضرت جابر بن عبد اللہ رضی اللہ عنہ سے دریافت کیا گیا کہ نبی کریم صلی اللہ علیہ وسلم خمس کو کس طرح تقسیم فرماتے تھے؟ حضرت جابر رضی اللہ عنہ نے ارشاد فرمایا: اللہ کے نبی صلی اللہ علیہ وسلم اس میں سے اللہ کی راہ میں ایک آدمی کو سواری دیتے پھر دوسرے کو پھر تیسرے کو سواری عطا فرماتے۔ [مصنف ابن ابي شيبه/كتاب السير/حدیث: 35544]

حضرت جابر بن عبد اللہ رضی اللہ عنہ سے مروی ہے کہ نبی کریم صلی اللہ علیہ وسلم نے ارشاد فرمایا: میرے لیے غنیمت کا مال حلال کردیا گیا جب کہ مجھ سے قبل کسی کے لیے حلال نہیں کیا گیا تھا۔ [مصنف ابن ابي شيبه/كتاب السير/حدیث: 35545]

حضرت ابوہریرہ رضی اللہ عنہ سے مروی ہے کہ نبی کریم صلی اللہ علیہ وسلم نے ارشاد فرمایا: تم سے پہلے سیاہ سروں والی کسی قوم کیلئے غنیمت کا مال حلال نہ تھا۔ آسمان سے آگ آ کر اسے جلا کر راکھ کردیتی تھی۔ پھر غزوہ بدر کے دن لوگوں نے مال غنیمت میں جلد بازی کی تو قرآن کریم کی آیت { لَوْلاَ کِتَابٌ مِنَ اللہِ سَبَقَ لَمَسَّکُمْ فِیمَا أَخَذْتُمْ عَذَابٌ عَظِیمٌ فَکُلُوا مِمَّا غَنِمْتُمْ حَلاَلاً طَیِّبًا } نازل ہوئی۔ [مصنف ابن ابي شيبه/كتاب السير/حدیث: 35546]

حضرت ابن عباس رضی اللہ عنہما سے مروی ہے کہ نبی کریم صلی اللہ علیہ وسلم نے ارشاد فرمایا: میرے لیے غنیمت کو حلال کیا گیا جب کہ مجھ سے قبل کسی کے لیے حلال نہ تھی۔ [مصنف ابن ابي شيبه/كتاب السير/حدیث: 35547]

حضرت ابو بردہ رحمہ اللہ کے والد رضی اللہ عنہ سے بھی اسی طرح مروی ہے۔ [مصنف ابن ابي شيبه/كتاب السير/حدیث: 35548]

حضرت ابو ذر رضی اللہ عنہ سے بھی اسی طرح مروی ہے۔ [مصنف ابن ابي شيبه/كتاب السير/حدیث: 35549]

حضرت ابو ذر رضی اللہ عنہ سے اسی طرح ہی مروی ہے۔ [مصنف ابن ابي شيبه/كتاب السير/حدیث: 35550]