حضرت ضحاک فرماتے ہیں کہ اگر قرآن پاک کی تلاوت نہ ہوتی تو میں مریض بننا زیادہ پسند کرتا۔ [مصنف ابن ابي شيبه/كتاب الزهد/حدیث: 38234]

حضرت ضحاک اللہ تعالیٰ کے ارشاد { فِی مَقَامٍ أَمِینٍ } کی تفسیر میں فرماتے ہیں کہ وہ لوگ مرنے سے اور بڑھاپے سے محفوظ ہوں گے اور نہ تو ان کو بھوک لگے گی اور نہ ہی وہ برہنہ ہوں گے۔ [مصنف ابن ابي شيبه/كتاب الزهد/حدیث: 38235]

حضرت ضحاک رحمہ اللہ اللہ کے ارشاد {إنَّک کَادِحٌ إِلَی رَبِّکَ کَدْحًا } کی تفسیر میں فرماتے ہیں کہ تو اپنے رب کی طرف عمل کرنے والا ہے۔ [مصنف ابن ابي شيبه/كتاب الزهد/حدیث: 38236]

حضرت ضحاک قرآن پاک کی آیت { لَہُمُ الْبُشْرَی فِی الْحَیَاۃِ الدُّنْیَا } کی تفسیر میں فرماتے ہیں کہ وہ یہ جان لے کہ موت سے قبل اس کا ٹھکانہ کہاں ہے۔ [مصنف ابن ابي شيبه/كتاب الزهد/حدیث: 38237]

حضرت ضحاک بن مزاحم اللہ تعالیٰ کے ارشاد { فَاسْتَبِقُوا الْخَیْرَاتِ إِلَی اللہِ مَرْجِعُکُمْ } کی تفسیر میں فرماتے ہیں کہ اس سے مراد امت محمدیہ کا ہر اچھا اور برا فرد ہے۔ [مصنف ابن ابي شيبه/كتاب الزهد/حدیث: 38238]

حضرت ابوالفیض رحمہ اللہ حضرت ضحاک سے نقل کرتے ہیں کہ اللہ تعالیٰ کے قول {إنَّمَا یَتَقَبَّلُ اللَّہُ مِنَ الْمُتَّقِینَ } سے مراد وہ لوگ ہیں جو شرک سے بچتے ہیں۔ [مصنف ابن ابي شيبه/كتاب الزهد/حدیث: 38239]

حضرت وہب بن منبہ فرماتے ہیں کہ ہارون علیہ السلام وہ شخص تھے جو کنیسوں میں خوشبو کی دھونی دیا کرتے تھے۔ [مصنف ابن ابي شيبه/كتاب الزهد/حدیث: 38240]

حضرت مسلم بن یسار کا ارشاد ہے کہ مجھے نہیں معلوم کہ اس شخص کے ایمان کا کیا درجہ ہوگا کہ جو ایسی چیزوں کو نہیں چھوڑتا کہ جن کو اللہ ناپسند کرتے ہیں۔ [مصنف ابن ابي شيبه/كتاب الزهد/حدیث: 38241]

حضرت مسلم بن یسار فرماتے ہیں کہ اسلاف میں سے جب کوئی بیماری سے صحت یاب ہوتا تو اسے کہا جاتا تھا: بیماری سے پاک ہونا تمہارے لیے راحت کا سبب بنے۔ [مصنف ابن ابي شيبه/كتاب الزهد/حدیث: 38242]

حضرت حماد فرماتے ہیں کہ ثابت نے بتایا ہے کہ ابوبکر یہ شعر بطور مثال پڑھا کرتے تھے: ”تو ہمیشہ اپنے محبوب کی موت پر نوحہ کرتا رہے گا۔ یہاں تک کہ تو خود بھی اسی جیسا ہوجائے گا، اور کبھی انسان ایسی چیز کی خواہش کرتا ہے کہ اس کے حصول سے قبل اس کو موت آجاتی ہے۔ [مصنف ابن ابي شيبه/كتاب الزهد/حدیث: 38243]