حسن سے روایت ہے وہ کہتے ہیں کہ حضرت صفوان بن محرز فرماتے تھے۔ میں جب ایک روٹی کھا لوں جس کے ذریعہ اپنی کمر کو سیدھا رکھوں اور پانی کا ایک کوزہ پی لوں تو پھر دنیا اور اہل دنیا پر خاک۔ [مصنف ابن ابي شيبه/كتاب الزهد/حدیث: 37884]

حضرت غیلان بن جریر، حضرت صفوان بن محرز کے بارے میں روایت کرتے ہیں۔ کہتے ہیں کہ حضرت صفوان اور ان کے بھائی اکٹھے ہوتے اور باہم گفتگو کرتے۔ لیکن وہ رقت کے آثار نہ دیکھتے۔ راوی کہتے ہیں۔ پھر لوگ کہتے۔ اے صفوان! آپ اپنے ساتھیوں سے کوئی گفتگو کریں۔ راوی کہتے ہیں۔ حضرت صفوان کہتے۔ الحمد للہ۔ اس پر لوگوں پر رقت طاری ہوجاتی اور ان کے آنسو یوں بہہ پڑتے۔ گویا کہ مشکیزوں کے منہ ہیں۔ [مصنف ابن ابي شيبه/كتاب الزهد/حدیث: 37885]

حضرت صفوان بن محرز کے بارے میں روایت ہے کہ وہ جب یہ آیت پڑھتے تو روپڑتے یہاں تک کہ میں سمجھتا کہ ان کے سینے کی ہڈیاں چور ہوگئی ہیں۔ ”اور ظالم لوگ عن قریب جان لیں گے کہ وہ کس جگہ لوٹ کر جائیں گے۔“ [مصنف ابن ابي شيبه/كتاب الزهد/حدیث: 37886]

حضرت ثابت سے روایت ہے کہ حضرت صفوان بن محرز کا کانے کا ایک کمرہ تھا جس میں شہتیر تھا۔ پھر شہتیر ٹوٹ گیا تو ان سے کہا گیا۔ آپ اس کو درست کیوں نہیں کرلیتے؟ انہوں نے فرمایا: تم اس کو چھوڑو۔ کیونکہ میں نے بھی کل مرجانا ہے۔ [مصنف ابن ابي شيبه/كتاب الزهد/حدیث: 37887]

حضرت صفوان بن محرز سے ارشادِ خداوندی: {إنَّا أَنْشَأْنَاہُنَّ إنْشَائً فَجَعَلْنَاہُنَّ أَبْکَارًا عُرُبًا أَتْرَابًا } کے بارے میں روایت ہے وہ کہتے ہیں۔ خدا کی قسم! ان میں سے کچھ گھسٹ کر چلنے والی بوڑھیاں ہوں گی۔ انہیں اللہ تعالیٰ ایسا کردے گا جیسا کہ تم نے سنا۔ [مصنف ابن ابي شيبه/كتاب الزهد/حدیث: 37888]

حضرت معلی بن زیاد رحمہ اللہ کہتے ہیں کہ حضرت صفوان بن محرز کا ایک تہہ خانہ تھا۔ جس میں وہ رویا کرتے تھے۔ اور فرمایا کرتے تھے اگر نفس چاہے تو میں شہادت کا مکان دیکھ سکتا ہوں۔ [مصنف ابن ابي شيبه/كتاب الزهد/حدیث: 37889]

حضرت طلق بن حبیب سے روایت ہے وہ کہتے ہیں چار چیزیں ایسی ہیں کہ وہ جس کو دی جائیں تو اس کو دنیا، آخرت کی خیر دی گئی۔ جس آدمی کو ذکر کرنے والی زبان اور شکر کرنے والا دل اور مصائب پر صبر کرنے والا جسم اور ایسی صاحب ایمان بیوی ملے جو اپنے بارے میں شوہر کے ساتھ کوئی خیانت نہ کرے۔ [مصنف ابن ابي شيبه/كتاب الزهد/حدیث: 37890]

حضرت طلق بن حبیب سے روایت ہے وہ کہتے ہیں کہ بیشک اللہ تعالیٰ کے حقوق اس سے وزنی ہیں کہ بندے ان کو قائم کریں اور خدا کی نعمتیں اس سے زیادہ ہیں کہ بندے ان کو شمار کریں۔ لہٰذا تم صبح کو بھی توبہ کرو اور شام کو بھی توبہ کرو۔ [مصنف ابن ابي شيبه/كتاب الزهد/حدیث: 37891]

حضرت کلثوم بن جبر کہتے ہیں کہ بصرہ میں تمنا کرنے والا کہتا تھا۔ طلق بن حبیب کی عبادت اور مسلم بن یسار کا حلم۔ [مصنف ابن ابي شيبه/كتاب الزهد/حدیث: 37892]

حضرت عاصم سے روایت ہے وہ کہتے ہیں کہ ہم نے حضرت طلق بن حبیب سے کہا آپ ہمیں تقویٰ کے بارے میں بتائیں۔ فرمایا: تقویٰ خدا کی فرمانبرداری کا عمل ہے۔ اس کی رحمت کی امید پر اور اس کے نور کی روشنی میں اور تقویٰ خدا کی نافرمانی کو خدا کے خوف سے خدائی نور کی وجہ سے ترک کرنے کا نام ہے۔ [مصنف ابن ابي شيبه/كتاب الزهد/حدیث: 37893]