راوی کہتے ہیں: مجھے سعد بن ابراہیم نے بیان کیا کہ جس دن حضرت سعد فوت ہوئے تو رسول اللہ صلی اللہ علیہ وسلم نے ارشاد فرمایا: تحقیق ستر ہزار فرشتے اترے ہیں جو سعد کے جنازہ میں شریک ہوئے ہیں۔ انہوں نے اس دن سے پہلے (کبھی) زمین کو نہیں روندا تھا۔ [مصنف ابن ابي شيبه/كتاب المغازي/حدیث: 39563]

محمد کہتے ہیں: میں نے اسماعیل بن محمد بن سعد کو سنا جبکہ وہ ہمارے پاس خیمہ میں داخل ہوئے اور ہم واقد بن عمرو بن سعد بن معاذ کو دفن کر رہے تھے۔ انہوں نے کہا: کیا میں تمہیں وہ بات نہ بیان کروں جو میں نے اپنے شیوخ سے سنی ہے؟ میں نے اپنے شیوخ کو بیان کرتے سنا کہ رسول اللہ صلی اللہ علیہ وسلم نے حضرت سعد کی وفات کے دن ارشاد فرمایا: تحقیق ستر ہزار فرشتے اترے ہیں جو سعد کے جنازہ میں شریک ہوئے ہیں، انہوں نے اس دن سے پہلے زمین کو نہیں روندا تھا۔ [مصنف ابن ابي شيبه/كتاب المغازي/حدیث: 39564]

محمد کہتے ہیں مجھے میرے والد نے بواسطہ اپنے والد، حضرت عائشہ رضی اللہ عنہا سے بیان کیا کہ مسلمانوں کو رسول اللہ صلی اللہ علیہ وسلم اور آپ کے دو ساتھیوں (ابوبکر و عمر) یا ان میں سے ایک کے جانے کے بعد، حضرت سعد بن معاذ رضی اللہ عنہ سے بڑھ کر کسی کی کمی کا شدت سے احساس نہیں ہوا۔ [مصنف ابن ابي شيبه/كتاب المغازي/حدیث: 39565]

محمد کہتے ہیں: مجھے محمد بن منکدر نے محمد بن شرحبیل کے حوالہ سے بیان کیا کہ ایک شخص نے حضرت سعد کی قبر سے اس دن ایک مٹھی مٹی لے لی اور پھر بعد میں اس کو کھولا تو وہ مشک تھی۔ [مصنف ابن ابي شيبه/كتاب المغازي/حدیث: 39566]

محمد کہتے ہیں: اور مجھے واقد بن عمرو بن سعد نے بیان کیا۔ راوی کہتے ہیں: واقد خوبصورت اور دراز قد لوگوں میں سے تھے۔ واقد کہتے ہیں: میں حضرت انس بن مالک رضی اللہ عنہ کی خدمت میں حاضر ہوا۔ انہوں نے مجھ سے کہا: تم کون ہو؟ میں نے جواب دیا: میں واقد بن عمرو بن سعد بن معاذ ہوں۔ حضرت انس نے فرمایا: اللہ تعالیٰ سعد پر رحم کرے۔ تم تو بلاشبہ سعد کے مشابہ ہو۔ پھر فرمایا: اللہ تعالیٰ سعد پر رحم کرے۔ وہ لوگوں میں سب سے خوبصورت اور دراز قد تھے۔ حضرت انس نے فرمایا: رسول اللہ صلی اللہ علیہ وسلم نے اکیدر دومہ کی طرف (ایک وفد) بھیجا تو اس نے آپ صلی اللہ علیہ وسلم کی طرف ایک ریشمی جبہ بھیجا جس میں سونا بنا ہوا تھا۔ رسول اللہ صلی اللہ علیہ وسلم نے اس جبہ کو زیب تن فرمایا پھر منبر پر کھڑے ہوئے اور پھر بیٹھ گئے لیکن کوئی بات نہیں کی۔ لوگوں نے اس جبہ کو ہاتھ لگانا شروع کیا اور اس پر تعجب کرنے لگے۔ آپ صلی اللہ علیہ وسلم نے پوچھا: کیا تم لوگ اس جبہ پر تعجب کرتے ہو؟ لوگوں نے عرض کیا: یا رسول اللہ! ہم نے اس سے خوبصورت کپڑا نہیں دیکھا۔ آپ صلی اللہ علیہ وسلم نے فرمایا: اس ذات کی قسم جس کے ہاتھ میں میری جان ہے! جنت میں سعد بن معاذ کے رومال اس سے بہتر ہیں جو تم دیکھ رہے ہو۔ [مصنف ابن ابي شيبه/كتاب المغازي/حدیث: 39567]

حضرت براء سے روایت ہے کہ نبی کریم صلی اللہ علیہ وآلہ وسلم کو ریشم کا کپڑا ہدیہ دیا گیا تو لوگوں نے اس کی ملائمی کو تعجب سے دیکھنا شروع کیا۔ نبی کریم صلی اللہ علیہ وآلہ وسلم نے ارشاد فرمایا: تم جو کچھ دیکھ رہے ہو، سعد کے جنت کے رومال اس سے بھی زیادہ نرم ہیں۔ [مصنف ابن ابي شيبه/كتاب المغازي/حدیث: 39568]

حضرت ابو اسحاق کہتے ہیں میں نے مہلب بن ابی صفرہ کو …جبکہ وہ حروریہ اور ان کے شب خون کا ذکر کر رہے تھے… کہتے سُنا۔ کہ اصحاب محمد (صلی اللہ علیہ وآلہ وسلم) فرماتے ہیں۔ نبی کریم صلی اللہ علیہ وآلہ وسلم نے خندق والے دن فرمایا: اور (اس وقت) آپ صلی اللہ علیہ وآلہ وسلم کو خوف تھا کہ ابو سفیان شب خون مارے گا۔ اگر تم پر شب خون مارا جائے تو تم یہ کہنا۔ حم لاَ یُنْصَرُونَ۔ [مصنف ابن ابي شيبه/كتاب المغازي/حدیث: 39569]

حضرت ابن عمر رضی اللہ عنہما سے روایت ہے کہ سعد سے اللہ تعالیٰ کی ملاقات کی محبت میں عرش جھوم گیا۔ یعنی تخت - فرمایا: { وَرَفَعَ أَبَوَیْہِ عَلَی الْعَرْشِ } راوی کہتے ہیں۔ تخت کی لکڑیاں جدا جدا ہوگئیں۔ راوی کہتے ہیں۔ رسول اللہ صلی اللہ علیہ وآلہ وسلم، حضرت سعد کی قبر میں داخل ہوئے اور آپ صلی اللہ علیہ وآلہ وسلم وہاں ٹھہر گئے پھر جب آپ صلی اللہ علیہ وآلہ وسلم باہر تشریف لائے تو لوگوں نے عرض کیا: یا رسول اللہ صلی اللہ علیہ وآلہ وسلم! کس بات کی وجہ سے آپ اندر ٹھہرے؟ آپ صلی اللہ علیہ وآلہ وسلم نے فرمایا: سعد کو قبر میں ایک بار بھینچا گیا تو میں نے اللہ سے اس کیفیت کے ختم ہونے کی دعا کی۔ [مصنف ابن ابي شيبه/كتاب المغازي/حدیث: 39570]

حضرت جابر سے روایت ہے کہ نبی کریم صلی اللہ علیہ وآلہ وسلم نے ارشاد فرمایا: بلاشبہ، سعد بن معاذ کی موت پر عرش جھوم گیا ہے۔ [مصنف ابن ابي شيبه/كتاب المغازي/حدیث: 39571]

حضرت اسماء بنت یزید بن سکن سے روایت ہے کہ جب حضرت سعد کا جنازہ لے کر نکلا گیا تو آپ کی والدہ نے چیخ ماری۔ رسول اللہ صلی اللہ علیہ وآلہ وسلم نے حضرت سعد کی والدہ سے فرمایا: کیا تمہارے آنسو بند نہیں ہوں گے اور تمہارا غم ختم نہیں ہوگا؟ حالانکہ تیرا بیٹا پہلا شخص ہے جس کو دیکھ کر اللہ تعالیٰ نے ضحک فرمایا: اور اس کی وجہ سے عرش جھوم گیا۔ [مصنف ابن ابي شيبه/كتاب المغازي/حدیث: 39572]