حضرت ابن ابی اوفی سے روایت ہے کہ رسول اللہ صلی اللہ علیہ وآلہ وسلم نے احزاب (کفار کے لشکروں) پر یہ بددعا فرمائی۔ اے اللہ! کتا ب کو نازل کرنے والی ذات، جلد حساب لینے والی ذات، لشکروں کو شکست دینے والی ذات، ان کو شکست دے اور ان کو ہلا کر رکھ دے۔ [مصنف ابن ابي شيبه/كتاب المغازي/حدیث: 39603]

حضرت یزید بن اصم سے روایت ہے کہ جب اللہ تعالیٰ نے لشکروں کو دور کردیا اور نبی کریم صلی اللہ علیہ وآلہ وسلم، اپنے گھر ی طرف لوٹ گئے اور آپ صلی اللہ علیہ وآلہ وسلم نے اپنا سر مبارک دھونا شروع کیا تو آپ صلی اللہ علیہ وآلہ وسلم کے پاس جبرائیل حاضر ہوئے اور کہا۔ اللہ تعالیٰ آپ سے درگزر فرمائے۔ آپ نے اسلحہ رکھ دیا ہے۔ حالانکہ آسمان کے فرشتوں نے اسلحہ نہیں رکھا؟ آپ ہمارے ساتھ بنو قریظہ کے قلعہ کی طرف تشریف لائیے۔ تو نیا کریم (صلی اللہ علیہ وآلہ وسلم) نے لوگوں میں منادی کروائی کہ بنو قریظہ کے قلعہ پر پہنچو۔ پھر آپ صلی اللہ علیہ وآلہ وسلم نے غسل فرمایا اور آپ صلی اللہ علیہ وآلہ وسلم بھی ان لوگوں کے پاس قلعہ پر تشریف لے گئے۔ [مصنف ابن ابي شيبه/كتاب المغازي/حدیث: 39604]

حضرت ابن عون کہتے ہیں کہ میں نے حضرت نافع کو خط لکھ کر مشرکین کو دعوت دینے کے بارے میں پوچھا تو انہوں نے مجھے لکھا کہ مجھے حضرت عبد اللہ بن عمر رضی اللہ عنہما نے خبر دی کہ نبی کریم صلی اللہ علیہ وآلہ وسلم نے بنو المصطلق پر حملہ کیا جبکہ وہ غافل تھے اور ان کے جانور پانی پر آئے ہوئے تھے اور جویریہ بنت الحارث بھی ان قیدیوں میں سے تھیں جو آپ صلی اللہ علیہ وآلہ وسلم کے ہاتھ آئے اور میں گھوڑ سواروں میں تھا۔ [مصنف ابن ابي شيبه/كتاب المغازي/حدیث: 39605]

حضرت ابن محیریز کہتے ہیں کہ میں اور ابو صرمہ مازنی، حضرت ابو سعید خدری کے پاس حاضر ہوئے اور ہم نے ان سے عزل کے بارے میں پوچھا۔ انہوں نے جواب میں ارشاد فرمایا: ہم نے عرب کی صاحب زادیاں قید کی تھی ہم نے بنو المصطلق کی عورتوں کو قید کیا اور ہم نے (ان کے ساتھ) عزل کا ارادہ کیا اور فدیہ لینے میں رغبت ظاہر کی۔ ہم میں سے بعض لوگوں نے کہا۔ رسول اللہ صلی اللہ علیہ وآلہ وسلم تمہارے درمیان موجود ہیں اور تم عزل کرتے ہو؟ تو ہم آپ صلی اللہ علیہ وآلہ وسلم کی خدمت میں حاضر ہوئے اور ہم نے کہا: یا رسول اللہ صلی اللہ علیہ وآلہ وسلم! ہم نے عرب کی صاحبزادیاں قید کی ہیں۔ ہم نے بنو المصطلق کی عورتیں قیدی بنائی ہیں۔ اور ہم عزل کا ارادہ رکھتے ہیں اور فدیہ لینے میں رغبت رکھتے ہیں۔ نبی کریم صلی اللہ علیہ وآلہ وسلم نے ارشاد فرمایا: تم پر کوئی حرج نہیں کہ تم یہ کام نہ کرو۔ کیونکہ قیامت تک کوئی بھی جان جس کے ہونے کو اللہ تعالیٰ نے لکھ دیا ہے وہ بہر حال ہو کر رہے گی۔ [مصنف ابن ابي شيبه/كتاب المغازي/حدیث: 39606]

حضرت ہشام، اپنے والد سے روایت کرتے ہیں کہ نبی کریم صلی اللہ علیہ وآلہ وسلم کے صحابہ غزوہ بنو المصطلق میں جب منزل پر پہنچے جبکہ وہاں کے لوگ جا چکے تھے، انہوں نے انہیں بھگا دیا تھا اور وہاں مرغیاں باقی رہ گئی تھیں۔ تو مہاجرین اور انصار کے کم عمر لڑکوں میں کوئی جھگڑا ہوگیا۔ مہاجرین کے لڑکوں نے کہا۔ یا للمہاجرین۔ اور انصار کے لڑکوں نے کہا۔ یا للانصار۔ یہ خبر عبد اللہ بن ابی بن سلول کو پہنچی تو اس نے کہا۔ ہاں! بخدا! اگر انصار، مہاجرین پر خرچہ نہ کرتے تو وہ آپ صلی اللہ علیہ وآلہ وسلم کے گرد سے چلے جاتے۔ ہاں! بخدا! اگر ہم مدینہ کی طر ف واپس لوٹ گئے تو البتہ ضرور بالضرور عزت والے مدینہ سے ذلت والوں کو نکال دیں گے۔ پس یہ بات نبی کریم صلی اللہ علیہ وآلہ وسلم کو پہنچی۔ تو آپ صلی اللہ علیہ وآلہ وسلم نے صحابہ کو کوچ کرنے کا حکم دیا۔ گویا کہ آپ صلی اللہ علیہ وآلہ وسلم انہیں مشغول کر رہے تھے۔ پھر آپ صلی اللہ علیہ وآلہ وسلم نے دوران سفر بنو عبد الاشہل میں ایک سوار جماعت کو پایا تو آپ صلی اللہ علیہ وآلہ وسلم نے انہیں فرمایا: تمہیں معلوم نہیں ہے کہ منافق عبد اللہ بن ابی نے کیا کہا ہے؟ انہوں نے پوچھا: یا رسول اللہ صلی اللہ علیہ وآلہ وسلم! اس نے کیا کہا ہیَ آپ صلی اللہ علیہ وآلہ وسلم نے فرمایا: اس نے کہا ہے۔ ہاں! بخدا! اگر تم (انصار) ان (مہاجرین) پر خرچ نہ کرو تو یہ محمد (صلی اللہ علیہ وآلہ وسلم) کے پاس سے چلے جائیں گے۔ ہاں۔ بخدا! اگر ہم مدینہ واپس گئے تو البتہ ضرور بالضرور عزت والے، مدینہ سے ذلت والوں کو باہر نکال دیں گے۔ انہوں نے کہا: یا رسول اللہ! سچ کہا۔ پس بخدا! آپ ہی عزت والے ہیں جبکہ وہ ذلیل ہے۔ [مصنف ابن ابي شيبه/كتاب المغازي/حدیث: 39607]

حضرت انس سے آیت مبارکہ {إنَّا فَتَحْنَا لَک فَتْحًا مُبِینًا } کے بارے میں روایت ہے کہ اس سے مراد حدیبیہ ہے۔ [مصنف ابن ابي شيبه/كتاب المغازي/حدیث: 39608]

حضرت ہشام، اپنے والد سے روایت کرتے ہیں۔ کہ رسول اللہ صلی اللہ علیہ وآلہ وسلم حدیبیہ کی طرف چلے۔ واقعہ حدیبیہ ماہ شوال میں پیش آیا تھا۔ راوی کہتے ہیں: پس رسول اللہ صلی اللہ علیہ وآلہ وسلم چل پڑے یہاں تک کہ جب آپ صلی اللہ علیہ وآلہ وسلم عسفان مقام پر پہنچے تو آپ صلی اللہ علیہ وآلہ وسلم کو بنی کعب کا ایک آدمی ملا اور اس نے کہا۔ یا رسول اللہ صلی اللہ علیہ وآلہ وسلم! ہم نے قریش کو اس حالت میں چھوڑا ہے کہ انہوں نے آپ کے لئے اپنے مختلف النسل لوگوں کو جمع کیا ہے اور انہیں خزیر (قیمہ اور آٹا کا مرکب) کھلاتے ہیں۔ ان کا ارادہ یہ ہے کہ وہ آپ کو بیت اللہ سے روک دیں گے۔ پس آپ صلی اللہ علیہ وآلہ وسلم نکل پڑے یہاں تک کہ آپ صلی اللہ علیہ وآلہ وسلم عسفان مقام سے باہر تشریف لائے تو آپ صلی اللہ علیہ وآلہ وسلم کو قریش کے جاسوس خالد بن ولید ملے اور راستہ میں ان کا آپ صلی اللہ علیہ وآلہ وسلم سے آمنا سامنا ہوگیا۔ رسول اللہ صلی اللہ علیہ وآلہ وسلم نے (صحابہ کو) فرمایا: ادھر آ جاؤ! پس آپ صلی اللہ علیہ وآلہ وسلم دو درختوں کے درمیان ہوگئے اور آپ صلی اللہ علیہ وآلہ وسلم ہموار راستہ سے ہٹ گئے یہاں تک کہ آپ صلی اللہ علیہ وآلہ وسلم غمیم پہنچے۔ 2۔ پس جب آپ صلی اللہ علیہ وآلہ وسلم غمیم میں فروکش ہوئے تو آپ صلی اللہ علیہ وآلہ وسلم نے لوگوں کو خطاب فرمایا۔ آپ صلی اللہ علیہ وآلہ وسلم نے اللہ تعالیٰ کی تعریف کی اور اللہ تعالیٰ کے شایان شان، ثنا بیان کی۔ پھر آپ صلی اللہ علیہ وآلہ وسلم نے ارشاد فرمایا: اما بعد! بلاشبہ قریش نے تمہارے لئے اپنے متفرق گروہوں کو جمع کیا ہے اور اس کو خزیر (خاص مرکب غذا) کھلانا شروع کیا ہے۔ اور ان کا ارادہ یہ ہے کہ وہ ہمیں بیت اللہ سے روک ڈالیں۔ تو تم مجھے اپنی رائے سے مطلع کرو؟ تم لوگ سردار (یعنی اہل مکہ) کی طرف (مقابلہ کے لئے) جانا چاہتے ہو یا تم لوگ ان کے معاونین کی طرف (مقابلہ کے لئے) جانا چاہتے ہو تاکہ ہم ان کے پیچھے ان کی عورتوں اور بچوں کی طرف جا پہنچیں۔ پس اگر وہ بیٹھ جائیں گے تو وہ اس حالت میں بیٹھیں گے کہ وہ بےبس اور شکست خوردہ ہوں گے۔ اور اگر وہ ہم سے (مقابلہ کا) مطالبہ کریں گے تو وہ ہم سے ایک کمزور اور نرم مطالبہ کریں گے پھر اللہ تعالیٰ انہیں رسوا کر دے گا۔ 3۔ حضرت ابوبکر نے فرمایا: یا رسول اللہ صلی اللہ علیہ وآلہ وسلم! ہماری رائے تو یہ ہے کہ ہم سردار کی طرف پیش قدمی کرتے ہیں۔ کیونکہ اللہ تعالیٰ آپ صلی اللہ علیہ وآلہ وسلم کے معین ہیں اور آپ کے مددگار ہیں اور آپ کو غالب کرنے والے ہیں۔ حضرت مقداد بن الاسود نے فرمایا، جبکہ وہ اپنے کجاوہ میں تھے، بخدا! یا رسول اللہ صلی اللہ علیہ وآلہ وسلم! ہم آپ سے ایسی بات نہیں کہیں گے جیسا کہ بنی اسرائیل نے اپنے نبی علیہ السلام سے کہی تھی کہ { اذْہَبْ أَنْتَ وَرَبُّکَ فَقَاتِلاَ، إِنَّا ہَاہُنَا قَاعِدُونَ } بلکہ ہم تو کہیں گے۔ آپ اور آپ کا رب جا کر لڑے اور ہم آپ کے ہمراہ لڑیں گے۔ 4۔ پس رسول اللہ صلی اللہ علیہ وآلہ وسلم (وہاں سے) نکلے یہاں تک کہ جب آپ صلی اللہ علیہ وآلہ وسلم حرم کے قریب پہنچے اور اس کی حدود میں داخل ہوئے تو آپ صلی اللہ علیہ وآلہ وسلم کی جدعاء اونٹنی بیٹھ گئی۔ لوگوں نے کہا۔ یہ اونٹنی اڑ گئی ہے۔ آپ صلی اللہ علیہ وآلہ وسلم نے فرمایا: خدا کی قسم! اونٹنی اڑی نہیں ہے اور نہ ہی اڑنا اس کی عادت ہے بلکہ اس کو تو اس ذات نے روکا ہے جس نے ہاتھیوں کو مکہ سے روکا تھا۔ (پھر آپ صلی اللہ علیہ وآلہ وسلم نے فرمایا) (اگر) قریش مجھے تعظیم محارم کے لئے دعوت دیں گے تو وہ اس عمل میں مجھ پر سبقت نہیں پاسکیں گے (آپ صلی اللہ علیہ وآلہ وسلم نے صحابہ سے فرمایا) ادھر آؤ۔ پھر آپ صلی اللہ علیہ وآلہ وسلم نے ذات الحنظل نامی چوٹی کے دائیں جانب کا راستہ پکڑ لیا یہاں تک کہ آپ صلی اللہ علیہ وآلہ وسلم حدیبیہ پر پہنچے۔ پس جب آپ صلی اللہ علیہ وآلہ وسلم نے وہاں پر پڑاؤ ڈالا تو لوگوں نے ایک کنواں سے پانی لینا شروع کیا۔ ابھی تمام لوگ سیراب نہیں ہوئے تھے کہ کنواں خالی ہوگیا۔ لوگوں نے آپ صلی اللہ علیہ وآلہ وسلم کے سامنے اس بات کی شکایت کی۔ تو آپ صلی اللہ علیہ وآلہ وسلم نے لوگوں کو ترکش میں سے ایک تیر نکال کردیا اور فرمایا: اس تیر کو کنویں میں گاڑھ دو۔ لوگوں نے اس تیر کو کنویں میں گاڑا تو کنواں پانی سے ابلنے لگا اور اس کا پانی اوپر آگیا یہاں تک کہ لوگ خوب سیراب ہوگئے۔ 5۔ جب قریش کو اس بات کی خبر ہوئی تو انہوں نے آپ صلی اللہ علیہ وآلہ وسلم کی طرف بنو حلیس کے بھائی کو بھیجا، یہ اس قوم کا فرد تھا جن کے ہاں ہدی کی تعظیم ہوتی تھی، آپ صلی اللہ علیہ وآلہ وسلم نے فرمایا: ہدی کو کھڑا کردو۔ پس جب اس نے ہدی (کے جانور کو دیکھا تو ان سے ایک بات بھی نہ کی اور اپنی جگہ سے ہی قریش کی طرف واپس لوٹ گیا اور کہنے لگا۔ اے میری قوم! قلادے، اونٹ اور ہدی کے جانور! پھر اس نے انہیں ڈرایا اور اس معاملہ کو ان پر بڑا کر کے پیش کیا۔ تو انہوں نے اس کو برا بھلا کہا اور اس سے ترش روئی سے پیش آئے اور کہنے لگے۔ تو تو محض ایک اجڈ دیہاتی ہے۔ ہمیں تجھ پر تعجب نہیں بلکہ ہمیں اپنے آپ پر تعجب ہے کہ ہم نے تجھے بھیجا۔ بیٹھ جا۔ پھر انہوں نے عروہ بن مسعود سے کہا۔ تم محمد (صلی اللہ علیہ وآلہ وسلم) کے پاس جاؤ اور تمہاری طرف سے ہمیں کوئی نقصان نہ پہنچے۔ پس عروہ نکلا یہاں تک کہ آپ صلی اللہ علیہ وآلہ وسلم کے پاس پہنچا اور کہنے لگا۔ اے محمد! میں نے عرب کے کسی آدمی کو نہیں دیکھا جو اس جیسی چیز پر چڑھ آیا ہو جس پر تم چڑھ آئے ہو۔ تم اوباش لوگوں کو لے کر اپنے ہی خاندان اور اپنی ہی اصل پر چڑھ آئے ہو جس سے تم نکلے ہو تاکہ ان کی جماعت کو ختم کر دو۔ تم جانتے ہو کہ میں تمہارے پاس کعب بن لؤی اور عامر بن لؤی کے پاس سے آیا ہوں۔ انہوں نے بچوں والی دودھیل اونٹنیوں کے پاس چیتوں کی کھالیں پہن رکھی ہیں اور وہ اللہ کی قسم کھا رہے ہیں کہ ان کے سامنے کوئی بات پیش نہیں کی جائے گی مگر وہ تمہارے سامنے اس سے زیادہ کڑوی بات پیش کریں گے۔ رسول اللہ صلی اللہ علیہ وآلہ وسلم نے ارشاد فرمایا: ہم لڑائی کے لئے نہیں آئے بلکہ ہمارا ارادہ یہ ہے کہ ہم اپنا عمرہ پورا کریں اور اپنی ہدی کو نحر کریں۔ کیا تم اپنی قوم کے پاس جاؤ گے؟ کیونکہ وہ پالان والے لوگ ہیں اور جنگ نے انہیں خوف زدہ کردیا ہے۔ اور ان کے لئے اس میں کوئی بھلائی نہیں کہ جنگ انہیں اس سے زیادہ کھائے جتنا کھا چکی ہے۔ پس وہ میرے اور بیت اللہ کے درمیان سے ہٹ جائیں تاکہ ہم اپنا عمرہ پورا کریں اور اپنی ہدی کو نحر کریں۔ اور وہ میرے اور اپنے درمیان ایک مدت مقرر کرلیں جس میں ہم ان کی عورتوں کو (نقصان سے) دور رکھیں گے اور جس میں ان کے قافلے مامون رہیں گے۔ اور وہ مجھے اور لوگوں کو کھلا چھوڑ دیں۔ کیونکہ بخدا! میں اس معاملہ پر سرخ و سیاہ سے ضرور لڑوں گا یہاں تک کہ اللہ مجھے غالب کر دے یا میری گردن الگ ہوجائے۔ پس اگر لوگوں نے مجھے پا لیا تو یہی ان کی مراد ہے۔ اور اگر اللہ نے مجھے ان پر غالب کردیا تو انہیں اختیار ہوگا۔ یا تو پوری تیاری کے ساتھ لڑیں اور یا پوری تعداد کے ساتھ صلح میں داخل ہوجائیں۔ راوی کہتے ہیں: پھر عروہ قریش کی طرف واپس گیا اور کہا۔ جان لو! بخدا! روئے زمین پر کوئی قوم مجھے تم سے زیادہ محبوب نہیں ہے۔ تم میرے بھائی ہو اور لوگوں میں مجھے سب سے زیادہ محبوب ہو۔ میں نے مجمعوں میں لوگوں سے تمہارے لئے مدد طلب کی۔ پس جب انہوں نے تمہاری مدد نہ کی تو میں اپنے گھر والوں کو لے کر تمہارے پاس آگیا یہاں تک کہ تمہارے ساتھ آ کر ٹھہرا تاکہ تمہارا ساتھ دوں۔ بخدا! میں تمہارے بعد زندگی کو پسند نہیں کرتا۔ جان لو! اس شخص نے انصاف کی بات پیش کی ہے پس اسے قبول کرلو۔ جان لو! میں بادشاہوں کے پاس گیا ہوں اور بڑے لوگوں کو دیکھا ہے۔ میں اللہ کی قسم کھاتا ہوں کہ میں نے کوئی بادشاہ یا بڑا آدمی نہیں دیکھا جو اپنے ساتھیوں میں اس سے زیادہ بڑا سمجھا جاتا ہو۔ ان میں سے کوئی آدمی اس وقت تک بات نہیں کرتا جب تک اس سے اجازت نہ لے لے۔ پس اگر وہ اسے اجازت دے تو بات کرتا ہے اور اگر اجازت نہ دے تو خاموش رہتا ہے۔ پھر جب وہ وضو کرتا ہے تو وہ اس کے وضو کے پانی کی طرف لپکتے ہیں اور اسے اپنے سروں پر ڈالتے ہیں اور اسے رحمت کا ذریعہ سمجھتے ہیں۔ پس جب انہوں نے اس کی بات سنی تو انہوں نے آپ صلی اللہ علیہ وآلہ وسلم کی طرف سہیل بن عمرو اور مکرز بن حفص کو بھیجا اور کہا۔ محمد (صلی اللہ علیہ وآلہ وسلم) کے پاس جاؤ۔ اگر وہ تمہیں وہ کچھ دے دیں جو عروہ نے ذکر کیا ہے تو تم دونوں ان سے اس بات پر فیصلہ کرلو کہ وہ اس سال ہمارے پاس سے واپس چلے جائیں اور بیت اللہ تک نہ پہنچیں۔ تاکہ عرب میں سے جو کوئی ان کے چلنے کی خبر سنے وہ یہ بھی سن لے کہ ہم نے انہیں روک دیا ہے۔ پس سہیل اور مکرز نکلے یہاں تک کہ آپ صلی اللہ علیہ وآلہ وسلم کے پاس پہنچے اور آپ صلی اللہ علیہ وآلہ وسلم سے یہ بات ذکر کی۔ آپ صلی اللہ علیہ وآلہ وسلم نے انہیں وہ دے دیا جو انہوں نے مانگا تھا اور فرمایا: لکھو! بِسْمِ اللہِ الرَّحْمَن الرَّحِیمِ۔ انہوں نے کہا۔ بخدا! ہم یہ کبھی نہیں لکھیں گے۔ آپ صلی اللہ علیہ وآلہ وسلم نے فرمایا: پھر کیسے؟ انہوں نے کہا۔ ہم لکھیں گے۔ بِاسْمِکَ اللّٰھُمَّ۔ آپ صلی اللہ علیہ وآلہ وسلم نے فرمایا: یہ بھی لکھ لو۔ پس انہوں نے لکھ لیا۔ پھر آپ صلی اللہ علیہ وآلہ وسلم نے فرمایا: لکھو! یہ وہ ہے جس پر محمد رسول اللہ صلی اللہ علیہ وآلہ وسلم نے فیصلہ کیا۔ انہوں نے کہا۔ بخدا! ہمارا اختلاف صرف اسی میں ہے۔ آپ صلی اللہ علیہ وآلہ وسلم نے فرمایا: میں کیا لکھوں؟ انہوں نے کہا۔ اپنا نسب لکھو۔ محمد بن عبد اللہ لکھو۔ آپ صلی اللہ علیہ وآلہ وسلم نے فرمایا: یہ بھی اچھا ہے۔ اسے لکھ لو۔ پس انہوں نے لکھ لیا۔ ان کی شرطوں میں یہ بھی تھا کہ ہمارے درمیان بند گٹھری ہے اور یہ کہ نہ اغلال ہوں گے اور نہ اسلال۔ ابو اسامہ کہتے ہیں: اغلال سے مراد زرہیں ہیں اور اسلال سے مراد تلواریں ہیں۔ اور بند گٹھری سے مراد آپ صلی اللہ علیہ وآلہ وسلم کے صحابہ ہیں جنہیں آپ صلی اللہ علیہ وآلہ وسلم ان سے روکے رکھیں گے۔ اور یہ کہ ہم میں سے جو تمہارے پاس آئے گا تم اسے ہماری طرف واپس کرو گے اور تم میں سے جو ہمارے پاس آئے گا ہم اسے تمہاری طرف واپس نہیں کریں گے۔ رسول اللہ صلی اللہ علیہ وآلہ وسلم نے ارشاد فرمایا: جو میرے ساتھ شامل ہوگا اس کے لئے میری جیسی شرط ہوگی۔ قریش نے کہا۔ جو ہمارے ساتھ شامل ہوگا وہ ہم میں سے ہوگا اور اس کے لئے ہماری جیسی شرط ہوگی۔ بنو کعب نے کہا۔ یا رسول اللہ صلی اللہ علیہ وآلہ وسلم! ہم آپ کے ساتھ ہیں۔ اور بنو بکر نے کہا۔ ہم قریش کے ساتھ ہیں۔ پس اس دوران جبکہ وہ تحریر میں مشغول تھے کہ حضرت ابو جندل بیڑیوں میں گھسٹتے ہوئے آگئے۔ مسلمانوں نے کہا۔ یہ ابو جندل ہیں۔ رسول اللہ صلی اللہ علیہ وآلہ وسلم نے فرمایا: یہ میرا ہے۔ سہیل نے کہا۔ یہ میرا ہے۔ اور سہیل نے کہا۔ تحریر پڑھو۔ تو وہ سہیل کے حق میں تھی۔ حضرت ابو جندل نے کہا۔ یا رسول اللہ! اے مسلمانوں کی جماعت! کیا مجھے مشرکین کی طرف واپس کیا جائے گا؟ حضرت عمر نے فرمایا: اے ابو جندل! یہ تلوار ہے۔ یہ تو بس ایک آدمی کے مقابلہ میں ایک آدمی ہے۔ سہیل نے کہا۔ اے عمر! تم نے میرے خلاف مدد کی۔ رسول اللہ صلی اللہ علیہ وآلہ وسلم نے سہیل سے فرمایا: اسے مجھے دے دو۔ اس نے کہا۔ نہیں۔ آپ صلی اللہ علیہ وآلہ وسلم نے فرمایا: تو میری خاطر اسے پناہ دے دو۔ اس نے کہا۔ نہیں۔ مکرز نے کہا۔ اے محمد! میں نے آپ کی خاطر اسے پناہ دے دی۔ پس اس کو تنگ نہیں کیا گیا۔ [مصنف ابن ابي شيبه/كتاب المغازي/حدیث: 39609]

حضرت مروان سے روایت ہے کہ رسول اللہ صلی اللہ علیہ وآلہ وسلم، جس سال مشرکین نے آپ صلی اللہ علیہ وآلہ وسلم کو روکا، اس سال چلے پس جب آپ صلی اللہ علیہ وآلہ وسلم حدیبیہ تک پہنچے۔ آپ صلی اللہ علیہ وآلہ وسلم نے حِل میں خیمہ لگایا۔ جبکہ آپ صلی اللہ علیہ وآلہ وسلم کی نماز کی جگہ حرم میں تھی۔ پس جب لوگوں نے فیصلہ تحریر کردیا اور اس تحریر سے فارغ ہوگئے تو لوگ اس فیصلہ سے بہت دل برداشتہ ہوئے۔ راوی کہتے ہیں: رسول اللہ صلی اللہ علیہ وآلہ وسلم نے ارشاد فرمایا: اے لوگو! نحر کرو اور حلق کرواؤ اور حلال ہو جاؤ۔ کوئی آدمی بھی کھڑا نہ ہوا۔ آپ صلی اللہ علیہ وآلہ وسلم نے یہ بات دوبارہ ارشاد فرمائی۔ لیکن پھر کوئی آدمی نہ کھڑا ہوا۔ آپ صلی اللہ علیہ وآلہ وسلم حضرت ام سلمہ کے پاس تشریف لائے اور فرمایا: لوگوں کی جو حالت ہوچکی ہے اس میں تمہاری کیا رائے ہے؟ انہوں نے عرض کیا۔ یا رسول اللہ صلی اللہ علیہ وآلہ وسلم! آپ جا کر اپنی ہدی کو نحر کریں اور حلق کروا کر حلال ہوجائیں۔ لوگ بھی حلال ہوجائیں گے۔ پس رسول اللہ صلی اللہ علیہ وآلہ وسلم نے نحر کیا اور آپ صلی اللہ علیہ وآلہ وسلم حلق کروا کر حلال ہوگئے۔ [مصنف ابن ابي شيبه/كتاب المغازي/حدیث: 39610]

حضرت براء سے روایت ہے کہ جب رسول اللہ صلی اللہ علیہ وآلہ وسلم کو بیت اللہ سے روک دیا گیا (تو اس وقت) اہل مکہ نے نبی کریم صلی اللہ علیہ وآلہ وسلم سے اس بات پر مصالحت کرلی کہ آپ صلی اللہ علیہ وآلہ وسلم (آئندہ سال) مکہ میں داخل ہوں گے اور وہاں پر تین دن قیام کریں گے اور مکہ میں صرف اسلحہ کے تھیلے کو، جس میں تلوار اور اس کی نیام ہوگی، لے کر آئیں گے اور اہل مکہ میں سے کسی کو لے کر نہیں جائیں گے اور آپ صلی اللہ علیہ وآلہ وسلم کے ساتھ جو لوگ ہوں گے ان میں سے کسی کو یہاں ٹھہرنے سے آپ منع نہیں کریں گے۔ آپ صلی اللہ علیہ وآلہ وسلم نے حضرت علی رضی اللہ عنہ سے فرمایا: ”ہمارے درمیان معاہدہ تحریر کرو۔ بسم اللّٰہ الرحمان الرحیم۔ یہ وہ شرائط ہیں جن پر محمد رسول اللہ صلی اللہ علیہ وآلہ وسلم نے صلح کی ہے۔“ مشرکین کہنے لگے۔ اگر ہم آپ کو اللہ کا رسول، مانتے تو ہم آپ کے متبع بن جاتے لیکن (چونکہ ہم نہیں مانتے لہٰذا) آپ یوں لکھیں۔ محمد بن عبد اللہ۔ راوی کہتے ہیں: آپ صلی اللہ علیہ وآلہ وسلم نے حضرت علی رضی اللہ عنہ کو حکم دیا کہ پہلی والی عبارت مٹا دو۔ حضرت علی رضی اللہ عنہ فرمانے لگے۔ نہیں! خدا کی قسم! میں اس کو نہیں مٹاؤں گا۔ اس پر آپ صلی اللہ علیہ وآلہ وسلم نے فرمایا: مجھے وہ جگہ دکھاؤ۔ حضرت علی رضی اللہ عنہ نے آپ صلی اللہ علیہ وآلہ وسلم کو وہ جگہ دکھائی تو آپ صلی اللہ علیہ وآلہ وسلم نے اس جملہ کو مٹا دیا۔ اور (اس کی جگہ) لکھا۔ ابن عبد اللہ۔ پھر آپ صلی اللہ علیہ وآلہ وسلم نے (اگلے سال) تین دن مکہ میں قیام فرمایا۔ جب تیسرا دن آیا تو مشرکین نے حضرت علی رضی اللہ عنہ سے کہا۔ یہ تمہارے ساتھی کی شرط کے مطابق آخری دن ہے پس تم ان سے کہو کہ وہ مکہ سے باہر چلے جائیں۔ حضرت علی رضی اللہ عنہ نے یہ بات نبی کریم صلی اللہ علیہ وآلہ وسلم سے بیان کی۔ آپ صلی اللہ علیہ وآلہ وسلم نے فرمایا: ہاں! پھر آپ صلی اللہ علیہ وآلہ وسلم باہر نکل گئے۔ [مصنف ابن ابي شيبه/كتاب المغازي/حدیث: 39611]

حضرت براء بن عازب سے روایت ہے کہ ہم نے (جب) حدیبیہ کے دن پڑاؤ کیا تو ہم نے اس کے کنویں کو اس حال میں پایا کہ (ہم سے) پہلے والے لوگ اس سے پی چکے تھے۔ پس آپ صلی اللہ علیہ وآلہ وسلم کنویں کے منڈیر پر تشریف فرما ہوئے پھر آپ صلی اللہ علیہ وآلہ وسلم نے اس میں سے ایک ڈول منگوایا اور اس میں سے اپنے منہ مبارک میں پانی لیا اور پھر اس پانی کو دوبارہ ڈول میں کلی کردیا اور اللہ سے دعا کی۔ تو اس کنویں کا پانی اتنا زیادہ ہوگیا کہ سارے لوگ اس سے سیراب ہوگئے۔ [مصنف ابن ابي شيبه/كتاب المغازي/حدیث: 39612]