حضرت زید بن ثاب سے روایت ہے کہ جب نبی کریم صلی اللہ علیہ وآلہ وسلم اُحد کی طرف نکلے تو کچھ (منافق) لوگ آپ صلی اللہ علیہ وآلہ وسلم کے ساتھ نکلے پھر واپس آگئے۔ راوی کہتے ہیں: رسول اللہ صلی اللہ علیہ وآلہ وسلم کے صحابہ، ایسے لوگوں کے بارے میں دو گروہوں میں بٹ گئے۔ ایک جماعت نے کہا۔ ہم ان سے قتال کریں گے۔ اور دوسری جماعت نے کہا۔ ہم ان سے قتال نہیں کریں گے۔ اس پر یہ آیت نازل ہوئی: { فَمَا لَکُمْ فِی الْمُنَافِقِینَ فِئَتَیْنِ وَاللَّہُ أَرْکَسَہُمْ بِمَا کَسَبُوا } راوی کہتے ہیں: آپ صلی اللہ علیہ وآلہ وسلم نے ارشاد فرمایا: یہ طیبہ ہے اور یہ خباثت کو یوں ختم کردیتا ہے۔ جیسا کہ آگ چاندی کی گندگی کو ختم کردیتی ہے۔ [مصنف ابن ابي شيبه/كتاب المغازي/حدیث: 39553]

حضرت جابر سے روایت ہے کہ جب حضرت معاویہ نے چشمہ جاری فرمایا تو ہمارے احد کے شہداء بارے میں فریاد ہوئی پس ہم نے انھیں چالیس سال (کا عرصہ گزرنے) کے بعد نکالا۔ ان کے جسم نرم تھے اور ان کے اعضاء مڑ رہے تھے۔ [مصنف ابن ابي شيبه/كتاب المغازي/حدیث: 39554]

حضرت ابو طلحہ سے روایت ہے کہ میں نے احد کے دن سر اوپر کر کے دیکھنا شروع کیا۔ تو مجھے صحابہ میں سے کوئی ایک بھی نظر نہ آیا مگر یہ کہ وہ اونگھ کی وجہ سے اپنی ڈھال کے نیچے جھٹکے کھا رہا تھا۔ [مصنف ابن ابي شيبه/كتاب المغازي/حدیث: 39555]

حضرت ابن ابزی سے روایت ہے کہ احد کے دن حضرت علی رضی اللہ عنہ نے بنی شیبہ میں سے طلحہ اور مسافع کے ساتھ مبارزت کی۔ راوی کہتے ہیں: ایک اور آدمی کا نام بھی (استاد) نے لیا تھا۔ راوی کہتے ہیں: پس حضرت علی رضی اللہ عنہ نے جو عام لوگوں (کفار) کو قتل کیا تھا ان کے سوا ان تینوں کو بھی قتل کردیا۔ پھر جب آپ واپس تشریف لائے تو حضرت فاطمہ سے کہا۔ بغیر مذمت کے تلوار کو پکڑو۔ تو نبی کریم صلی اللہ علیہ وآلہ وسلم نے ارشاد فرمایا: اگر تم نے عمدگی سے قتال کیا ہے تو فلاں انصاری نے بھی اور فلاں انصاری نے بھی اور فلاں انصاری نے بھی بہترین قتال کیا ہے۔ یہاں تک کہ اپنی جان ختم کردی یا جان ختم کرنے کے قریب ہوگئے۔ [مصنف ابن ابي شيبه/كتاب المغازي/حدیث: 39556]

حضرت حکم سے روایت ہے کہ جب احد کے دن نبی کریم صلی اللہ علیہ وآلہ وسلم کا سامنے والا دندان مبارک شہید ہوگیا تو آپ صلی اللہ علیہ وآلہ وسلم نے فرمایا: تین لوگوں پر اللہ کا غضب شدید ہے۔ اس آدمی پر جو خود کو بادشاہوں کا بادشاہ گمان کرتا ہے۔ اور اس آدمی پر بھی اللہ کا غضب شدید ہے جس نے رسول اللہ صلی اللہ علیہ وآلہ وسلم کے دندان کو شہید کیا اور آپ صلی اللہ علیہ وآلہ وسلم کے چہرہ کو زخمی کیا۔ اور خدا کا غضب اس آدمی پر بھی شدید ہے جو یہ گمان کرتا ہے کہ خدا کا بیٹا ہے۔ [مصنف ابن ابي شيبه/كتاب المغازي/حدیث: 39557]

ایک آدمی روایت کرتے ہیں کہ احد کے دن نبی کریم صلی اللہ علیہ وآلہ وسلم کے سر مبارک پر خود ٹوٹ گئی اور آپ صلی اللہ علیہ وآلہ وسلم کے دندان شہید ہوگئے اور آپ صلی اللہ علیہ وآلہ وسلم کا چہرہ مبارک زخمی ہوگیا اور آپ صلی اللہ علیہ وآلہ وسلم کو جلی ہوئی چٹائی کے ذریعہ دوا کی گئی۔ اور علی رضی اللہ عنہ بن ابی طالب، آپ صلی اللہ علیہ وآلہ وسلم کے پاس ڈھال میں پانی لا رہے تھے۔ [مصنف ابن ابي شيبه/كتاب المغازي/حدیث: 39558]

حضرت ایوب سے روایت ہے کہ عبد الرحمان بن ابی بکر نے حضرت ابوبکر سے کہا۔ میں نے احد کے دن آپ کو دیکھا تھا لیکن میں نے آپ سے اعراض کیا۔ راوی کہتے ہیں: حضرت ابوبکر نے فرمایا: لیکن اگر میں تمہیں دیکھتا تو میں تم سے اعراض نہ کرتا۔ [مصنف ابن ابي شيبه/كتاب المغازي/حدیث: 39559]

حضرت عائشہ رضی اللہ عنہا سے روایت ہے کہ میں خندق کے دن، لوگوں کے آثار قدم کی پیروی کرتے ہوئے باہر نکلی۔ پس میں نے اپنے پیچھے لوگوں کی آہٹ سُنی۔ میں نے توجہ کی تو وہ سعد بن معاذ تھے اور ان کے ساتھ ان کے بھتیجے حارث بن اوس تھے۔ جنہوں نے اپنی ڈھال اٹھائی ہوئی تھی۔ پس میں زمین پر بیٹھ گئی۔ فرماتی ہیں: پس حضرت سعد گزر گئے اور انہوں نے زرہ پہنی ہوئی تھی۔ اور ان کے اعضاء اس سے باہر نکلے ہوئے تھے۔ اور مجھے حضرت سعد کے اعضاء کے بارے میں خوف آ رہا تھا۔ فرماتی ہیں: یہ صاحب لوگوں میں سے بڑے جثہ والے اور لمبے تھے۔ فرماتی ہیں: پھر وہ رجز پڑھتے ہوئے اور یہ کہتے ہوئے گزر گئے۔ ”تھوڑی دیر ٹھہر جاؤ، حمل بھی جنگ میں آ ملے گا۔ جب وقت مقرر آجائے تو موت کتنی اچھی ہوتی ہے۔“ 2۔ فرماتی ہیں۔ پھر میں کھڑی ہوئی اور ایک باغیچہ میں گھس گئی تو وہاں مسلمانوں کے چند افراد تھے۔ جن میں عمر بن خطاب بھی تھے اور ان میں ایک آدمی وہ بھی تھا جس پر خود تھی۔ راوی کہتے ہیں - حضرت عمر نے کہا: عجیب بات ہے! تمہیں کیا چیز لے آئی ہے؟ عجیب بات ہے! تمہیں کیا چیز لے آئی ہے؟ بخدا! تم بہت جری ہو۔ تمہیں کس چیز نے فرار اور آزمائش سے مامون کردیا ہے؟ عائشہ رضی اللہ عنہا فرماتی ہیں: حضرت عمر مجھے مسلسل ملامت کرتے رہے یہاں تک کہ میں نے تمنا کی کہ زمین شق ہوجائے اور میں اس میں داخل ہو جاؤں۔ فرماتی ہیں۔ پھر (دوسرے) آدمی نے اپنے چہرے سے خود اتاری تو وہ طلحہ بن عبید اللہ تھے۔ راوی کہتے ہیں: انہوں نے کہا: اے عمر! تم پر افسوس ہے آج تم نے بہت زیادہ ملامت کی ہے۔ پسپائی یا فرار اللہ کے سوا کس کی طرف ہوسکتا ہے۔ 3۔ عائشہ رضی اللہ عنہا فرماتی ہیں۔ مشرکین قریش میں سے ایک آدمی نے، جس کو حبان بن العرقۃ کہا جاتا تھا۔ حضرت سعد کو تیر مارا اور کہا۔ اس کو لے لو۔ میں ابن العرقۃ ہوں۔ وہ تیر حضرت سعد کی بازو کی رگ میں لگا اور اس نے وہ رگ کاٹ دی۔ سعد نے اللہ سے دعا کی۔ اے اللہ! تو مجھے موت نہ دینا یہاں تک کہ تو بنو قریظہ سے میری آنکھوں کو ٹھنڈا کر دے۔ یہ لوگ سعد کے جاہلیت میں حلیف اور ساتھی تھے۔ عائشہ رضی اللہ عنہا کہتی ہیں۔ پھر ان کے زخم کا خون بند ہوگیا۔ اور اللہ تعالیٰ نے مشرکین پر ہوا بھیج دی۔ وکفی اللّٰہ المؤمنین القتال وکان اللّٰہ قویاً عزیزاً۔ پس ابو سفیان تہامہ کے علاقہ کے ساتھ جا ملا اور عیینہ بن بدر بن حصن اور اس کے ساتھی نجد کے علاقہ کے ساتھ جا ملے اور بنو قریظہ واپس ہوگئے اور اپنے قلعوں میں قلعہ بند ہوگئے اور رسول اللہ صلی اللہ علیہ وآلہ وسلم مدینہ کی طرف واپس تشریف لے آئے اور حکم دیا تو حضرت سعد کے لئے مسجد میں خیمہ لگایا گیا اور آپ صلی اللہ علیہ وآلہ وسلم نے اسلحہ وغیرہ رکھ دیا۔ 4۔ حضرت عائشہ رضی اللہ عنہا فرماتی ہیں۔ پھر آپ صلی اللہ علیہ وآلہ وسلم کے پاس حضرت جبرائیل آئے اور عرض کیا۔ کیا آپ نے اسلحہ اتار دیا ہے؟ بخدا! فرشتوں نے تو اسلحہ نہیں اتارا۔ پس آپ بنو قریظہ کی طرف چلئے اور ان سے قتال کیجئے۔ تو نبی کریم صلی اللہ علیہ وآلہ وسلم نے کوچ کا حکم دیا اور آپ صلی اللہ علیہ وآلہ وسلم نے اپنا سامانِ حرب زیب تن فرمایا اور نکل پڑے۔ اور (جب) آپ صلی اللہ علیہ وآلہ وسلم بنو غنم کے پاس سے گزرے - یہ لوگ مسجد کے پڑوسی تھے - تو پوچھا: کون تمہارے پاس سے گزرا ہے؟ انہوں نے جواباً عرض کیا۔ ہمارے پاس سے حضرت دحیہ کلبی گزرے ہیں۔ حضرت دحیہ کی داڑھی اور چہرے کی شکل حضرت جبرائیل سے مشابہ تھی پھر نبی کریم صلی اللہ علیہ وآلہ وسلم، بنو قریظہ کے پاس پہنچے اور آپ صلی اللہ علیہ وآلہ وسلم نے پچیس دن تک ان کا محاصرہ فرمایا۔ پس جب بنو قریظہ کا محاصرہ شدید ہوگیا اور ان پر مصیبت سخت ہوگئی تو انہیں کہا گیا۔ رسول اللہ صلی اللہ علیہ وآلہ وسلم کے فیصلہ پر تسلیم ہو جاؤ۔ انہوں نے ابو لبابہ سے مشورہ کیا تو انہوں نے اپنے ہاتھ سے انہیں یہ اشارہ کیا کہ فیصلہ تو ذبح کا ہے۔ بنو قریظہ نے کہا۔ ہم ابن معاذ کے فیصلہ پر اترتے ہیں۔ آپ صلی اللہ علیہ وآلہ وسلم نے فرمایا: تم سعد بن معاذ کے فیصلہ پر (ہی) اُتر آؤ۔ پس وہ لوگ اتر آئے۔ 5۔ رسول اللہ صلی اللہ علیہ وآلہ وسلم نے حضرت سعد کی طرف کسی کو بھیجا اور انہیں گدھے پر سوار کیا گیا جس پر کھجور کی چھال کا پالان تھا اور ان کی قوم نے انہیں گھیر لیا۔ اور یہ کہنے لگے۔ اے ابو عمرو! (یہ لوگ) تیرے حلیف اور تیرے ساتھی ہیں۔ اور جنگ میں دشمن پر سخت لوگ ہیں اور تیری پہچان کے لوگ ہیں۔ عائشہ رضی اللہ عنہا کہتی ہیں۔ حضرت سعد نے ان کو کچھ جواب نہیں دیا۔ یہاں تک کہ جب سعد ان کے گھروں کے پاس پہنچے تو اپنی قوم کی طرف متوجہ ہو کر فرمایا: اب سعد کے لئے وہ وقت آپہنچا ہے کہ سعد، اللہ کے بارے میں کسی ملامت کرنے والے کی ملامت کی پروا نہ کرے۔ 6۔ پھر جب وہ رسول اللہ صلی اللہ علیہ وآلہ وسلم کے سامنے ہوئے ابو سعید کہتے ہیں۔ آپ صلی اللہ علیہ وآلہ وسلم نے فرمایا: اپنے سردار کے لئے کھڑے ہو جاؤ اور اس کو اتارو۔ حضرت عمر نے کہا: ہمارے سردار تو اللہ ہیں۔ آپ صلی اللہ علیہ وآلہ وسلم نے فرمایا: انہیں اتارو۔ پس انہوں نے انہیں اتارا۔ رسول اللہ صلی اللہ علیہ وآلہ وسلم نے ان سے فرمایا: ان کے بارے میں فیصلہ کرو۔ انہوں نے کہا: میں ان کے بارے میں یہ فیصلہ کرتا ہوں کہ ان کے لڑنے والوں کو قتل کیا جائے، ان کی اولاد کو قیدی بنایا جائے اور ان کے اموال تقسیم کیے جائیں۔ رسول اللہ صلی اللہ علیہ وآلہ وسلم نے فرمایا: تم نے ان کے بارے میں اللہ اور اس کے رسول کے حکم کے مطابق فیصلہ کیا ہے۔ 7۔ راوی کہتے ہیں: پھر حضرت سعد نے اللہ سے دعا کی اور کہا: اے اللہ! اگر تو نے اپنے نبی پر قریش کی جنگ میں سے کچھ باقی رکھا ہے تو مجھے اس کے لئے باقی رکھ اور اگر تو نے ان کے اور قریش کے درمیان جنگ ختم کردی ہے تو مجھے اپنے پاس بلا لے۔ راوی کہتے ہیں: پھر ان کا زخم پھٹ گیا حالانکہ وہ ٹھیک ہوچکا تھا یہاں تک کہ اس میں سے بالی جیسے نشان کے سوا کچھ باقی نہیں رہا تھا۔ حضرت عائشہ رضی اللہ عنہا فرماتی ہیں: پھر رسول اللہ صلی اللہ علیہ وآلہ وسلم واپس تشریف لے آئے اور حضرت سعد اپنے اس خیمے میں لوٹ آئے جو رسول اللہ صلی اللہ علیہ وآلہ وسلم نے ان کے لئے لگوایا تھا۔ فرماتی ہیں: پھر رسول اللہ صلی اللہ علیہ وآلہ وسلم، حضرت ابوبکر اور حضرت عمر ان کے پاس آئے۔ فرماتی ہیں: اس ذات کی قسم جس کے ہاتھ میں میری جان ہے! میں اپنے حجرے میں ہوتے ہوئے ابوبکر کے رونے کو عمر کے رونے سے پہچان لیتی تھی۔ اور یہ حضرات ویسے ہی تھے جیسا کہ اللہ تعالیٰ نے فرمایا: { رُحَمَاءُ بَیْنَہُمْ } علقمہ کہتے ہیں: میں نے عرض کیا: اے امی جان! رسول اللہ صلی اللہ علیہ وآلہ وسلم کیا کرتے تھے؟ فرمایا: آپ صلی اللہ علیہ وآلہ وسلم کی آنکھ کسی پر آنسو نہیں بہاتی تھی لیکن جب آپ صلی اللہ علیہ وآلہ وسلم کو غم ہوتا تو آپ صلی اللہ علیہ وآلہ وسلم اپنی داڑھی مبارک پکڑ لیتے تھے۔ [مصنف ابن ابي شيبه/كتاب المغازي/حدیث: 39560]

حضرت عاصم بن عمر بن قتادہ سے روایت ہے کہ جب رات ہوئی تو نبی کریم صلی اللہ علیہ وآلہ وسلم سو گئے تو آپ صلی اللہ علیہ وآلہ وسلم کے پاس جبرائیل آئے یا فرمایا: کوئی فرشتہ آیا اور پوچھا: آپ کی امت میں سے کون سا آدمی آج رات وفات پا گیا ہے۔ آسمان والوں کو اس کی موت پر خوشی ہے۔ آپ صلی اللہ علیہ وآلہ وسلم نے فرمایا: نہیں، الا یہ کہ وہ سعد ہوں کیونکہ آج شام وہ سخت بیمار تھے۔ سعد کے ساتھ کیا ہوا؟ صحابہ نے بتایا۔ یا رسول اللہ صلی اللہ علیہ وآلہ وسلم! وہ فوت ہوگیا ہے۔ اور ان کی قوم والے آئے تھے اور انہیں اپنے محلہ کی طرف لے گئے ہیں۔ راوی کہتے ہیں۔ پس آپ صلی اللہ علیہ وآلہ وسلم نے نماز فجر پڑھی اور پھر آپ صلی اللہ علیہ وآلہ وسلم چل نکلے اور لوگ بھی (آپ صلی اللہ علیہ وآلہ وسلم کے ساتھ) چل نکلے۔ آپ صلی اللہ علیہ وآلہ وسلم نے لوگوں کو (تیز) چلا کر تھکا دیا۔ یہاں تک کہ لوگوں کے تسمے ان کے پاؤں سے گرگئے اور ان کی چادریں ان کے کندھوں سے گرگئیں۔ ایک آدمی نے عرض کیا۔ یا رسول اللہ صلی اللہ علیہ وآلہ وسلم! آپ نے لوگوں کو (تیز) چلا کر تھکا دیا ہے؟ آپ صلی اللہ علیہ وآلہ وسلم نے ارشاد فرمایا: مجھے اس بات کا ڈر تھا کہ کہیں فرشتے سعد کی طرف ہم سے سبقت نہ کر جائیں جیسا کہ وہ حنظلہ کی طرف ہم سے سبقت کر گئے تھے۔ [مصنف ابن ابي شيبه/كتاب المغازي/حدیث: 39561]

محمد کہتے ہیں مجھے اشعث بن اسحاق نے بتایا کہ پھر رسول اللہ صلی اللہ علیہ وسلم اس کے پاس پہنچے جبکہ انہیں غسل دیا جا رہا تھا۔ راوی کہتے ہیں: پھر رسول اللہ صلی اللہ علیہ وسلم نے اپنے گھٹنے سمیٹ لیے اور فرمایا: ایک فرشتہ آیا ہے اور اس کے لئے بیٹھنے کی جگہ نہیں تھی پس میں نے اس کے لئے جگہ کشادہ کی ہے۔ حضرت سعد کی والدہ رو رہی تھیں اور کہہ رہی تھیں: ”ہائے سعد کی ماں، سعد پر! ان کی برتری اور سنجیدگی پر، ان کے احسانات اور بزرگی کے بعد، وہ پیش رو جس سے خلا پر کیا جاتا تھا۔“ رسول اللہ صلی اللہ علیہ وسلم نے فرمایا: تمام رونے والیاں جھوٹ بولتی ہیں سوائے ام سعد کے۔ محمد کہتے ہیں: ہمارے ساتھیوں میں سے بعض لوگوں نے بتایا کہ جب رسول اللہ صلی اللہ علیہ وسلم حضرت سعد کے جنازہ کے لئے نکلے تو منافقین میں سے بعض لوگوں نے کہا: سعد کا تختہ کتنا ہلکا ہے! یا کہا: سعد کا جنازہ کتنا ہلکا ہے! [مصنف ابن ابي شيبه/كتاب المغازي/حدیث: 39562]