حضرت طارق بن شہاب سے روایت ہے کہ جب رسول اللہ صلی اللہ علیہ وآلہ وسلم کی روح مبارک قبض ہوئی تو ام ایمن نے رونا شروع کیا۔ ان سے کہا گیا۔ اے ام ایمن! تم کیوں رو رہی ہو؟ انہوں نے جواب دیا۔ میں اس بات پر رو رہی ہوں کہ آسمانی خبریں (اب) ہم پر منقطع ہوگئی ہیں۔ [مصنف ابن ابي شيبه/كتاب المغازي/حدیث: 39803]

حضرت ثابت سے روایت ہے کہ جب رسول اللہ صلی اللہ علیہ وآلہ وسلم وفات پا گئے تو حضرت ابوبکر نے حضرت عمر سے کہا یا حضرت عمر نے حضرت ابوبکر سے کہا۔ ہمارے ساتھ ام ایمن کے پاس چلو تاکہ ہم ان کو دیکھیں۔ پس وہ دونوں ان کے پاس گئے تو وہ رونے لگیں۔ شیخین نے ام ایمن سے کہا۔ اے ام ایمن! جو کچھ اللہ تعالیٰ کے پاس اپنے رسول (صلی اللہ علیہ وآلہ وسلم) کے لئے ہے وہ بہتر ہے۔ اس پر ام ایمن نے کہا۔ یقینا مجھے بھی اس بات کا علم ہے کہ جو کچھ اللہ تعالیٰ کے پاس ہے وہ رسول اللہ صلی اللہ علیہ وآلہ وسلم کے لئے زیادہ بہتر ہے لیکن میں تو اس بات پر رو رہی ہوں کہ ہم سے آسمان کی خبریں منقطع ہوگئیں۔ پس ام ایمن نے حضرت ابوبکر و عمر کو بھی رونے پر ابھار دیا چناچہ وہ دونوں حضرات بھی ان کے ساتھ رونے لگے۔ [مصنف ابن ابي شيبه/كتاب المغازي/حدیث: 39804]

حضرت جعفر اپنے والد سے روایت کرتے ہیں کہ حضرت نبی کریم صلی اللہ علیہ وآلہ وسلم جب فوت ہوگئے تو حضرت صفیہ باہر آئیں اور اپنے کپڑے سے اشارہ کرتی ہوئی فرما رہی تھیں۔ ”تحقیق آپ صلی اللہ علیہ وآلہ وسلم کے بعد بہت سی باتیں اور شدید معاملات ہوئے ہیں۔ اگر آپ ان کو دیکھتے تو مصائب کثیر نہ ہوتے۔“ [مصنف ابن ابي شيبه/كتاب المغازي/حدیث: 39805]

حضرت سعید بن مسیب سے روایت ہے کہ تمام لوگوں میں سے جن کو نبی کریم صلی اللہ علیہ وآلہ وسلم کا دفن کرنا اور قبر میں اتارنا سونپا گیا تھا وہ چار لو گ تھے۔ حضرت علی رضی اللہ عنہ، حضرت عباس، حضرت فضل اور نبی کریم صلی اللہ علیہ وآلہ وسلم کے آزاد کردہ غلام صالح۔ چناچہ ان لوگوں نے آپ صلی اللہ علیہ وآلہ وسلم کے لئے لحد بنائی اور آپ صلی اللہ علیہ وآلہ وسلم پر کچی اینٹیں نصب کیں۔ [مصنف ابن ابي شيبه/كتاب المغازي/حدیث: 39806]

حضرت عامر سے روایت ہے کہ نبی کریم صلی اللہ علیہ وآلہ وسلم کی قبر میں حضرت علی رضی اللہ عنہ، حضرت فضل اور حضرت اسامہ داخل ہوئے۔ [مصنف ابن ابي شيبه/كتاب المغازي/حدیث: 39807]

حضرت شعبی کہتے ہیں۔ مجھے مرحب یا ابن ابی مرحب نے بیان کیا کہ حضرت عبد الرحمان بن عوف رضی اللہ عنہ بھی ان کے ساتھ قبر میں داخل ہوئے تھے۔ [مصنف ابن ابي شيبه/كتاب المغازي/حدیث: 39808]

حضرت شعبی سے روایت ہے کہ نبی کریم صلی اللہ علیہ وآلہ وسلم کو حضرت علی رضی اللہ عنہ، حضرت فضل اور حضرت اسامہ نے غسل دیا تھا۔ [مصنف ابن ابي شيبه/كتاب المغازي/حدیث: 39809]

راوی کہتے ہیں۔ مجھے ابن ابی مرحب نے بیان کیا کہ حضرت عبد الرحمان بن عوف رضی اللہ عنہ بھی ان کے ساتھ قبر میں داخل ہوئے تھے۔ [مصنف ابن ابي شيبه/كتاب المغازي/حدیث: 39810]

راوی کہتے ہیں: حضرت شعبی ارشاد فرماتے ہیں: میت کے ولی اس کے اہل ہی ہوتے ہیں۔ [مصنف ابن ابي شيبه/كتاب المغازي/حدیث: 39811]

ابن ادریس کی حدیث میں ابن ابی خالد کے حوالہ سے نقل ہے کہ حضرت علی رضی اللہ عنہ کہنے لگے۔ میرے ماں، باپ آپ پر قربان ہوں آپ زندگی میں بھی خوشبو دار تھے اور موت کے بعد بھی خوشبودار ہیں۔ [مصنف ابن ابي شيبه/كتاب المغازي/حدیث: 39812]