یہی روایت ایک اور سند کے ہمراہ محمد بن عبداللہ بن محمد کے حوالے سے، سیدنا عبداللہ بن زید رضی اللہ عنہ سے منقول ہے۔ [سنن الدارقطني/ كتاب الصلاة/حدیث: 963]

سیدنا ابوسعید خدری رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”دو دن ایسے ہیں جن میں تم روزے نہ رکھو اور دو گھڑیاں ایسی ہیں جن میں نماز ادا نہ کرو، کیونکہ عیسائی اور یہودی اس وقت (عبادت کے) متلاشی ہوتے ہیں، عید الفطر اور عید الاضحیٰ کا دن (روزہ رکھنے کے لیے منع ہے) اور صبح کی نماز کے بعد سورج طلوع ہونے تک اور عصر کی نماز کے بعد سورج غروب ہونے تک (نماز پڑھنا منع ہے)۔“ [سنن الدارقطني/ كتاب الصلاة/حدیث: 964]

سیدنا عبداللہ بن عمرو رضی اللہ عنہما بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”صبح صادق ہو جانے کے بعد (نوافل میں) صرف دو رکعات (یعنی فجر کی سنتیں) ادا کی جائیں گی۔“ [سنن الدارقطني/ كتاب الصلاة/حدیث: 965]

قاسم بن محمد بیان کرتے ہیں: ہم صبح کی نماز سے پہلے سیدہ عائشہ رضی اللہ عنہا کی خدمت میں حاضر ہوئے۔ ایک دن ہم ان کی خدمت میں حاضر ہوئے تو وہ اس وقت نماز ادا کر رہی تھیں۔ ہم نے ان سے دریافت کیا: ”یہ کون سی نماز ہے؟“ تو انہوں نے جواب دیا: ”میں رات سو گئی تھی، اور کچھ نوافل ادا نہ کر سکی تھی تو میں انہیں ترک نہیں کرنا چاہتی تھی۔“ [سنن الدارقطني/ كتاب الصلاة/حدیث: 966]

عمرو شیبانی بیان کرتے ہیں: ہمیں اس گھر کے مالک نے، انہوں نے سیدنا عبداللہ بن مسعود رضی اللہ عنہ کے گھر کی طرف اشارہ کرتے ہوئے یہ بات کہی ہے، لیکن ان کا نام نہیں لیا، یہ بات بیان کی ہے: میں نے نبی کریم صلی اللہ علیہ وسلم سے دریافت کیا: ”کون سا عمل زیادہ فضیلت رکھتا ہے؟“ آپ صلی اللہ علیہ وسلم نے ارشاد فرمایا: ”نماز کو اس کے ابتدائی وقت میں ادا کرنا۔“ میں نے عرض کیا: ”پھر کون سا؟“ آپ نے فرمایا: ”اللہ کی راہ میں جہاد کرنا۔“ میں نے دریافت کیا: ”پھر کون سا؟“ آپ نے فرمایا: ”والدین کے ساتھ حسن سلوک کرنا۔“ (سیدنا عبداللہ رضی اللہ عنہ فرماتے ہیں) اگر میں آپ سے مزید دریافت کرتا تو آپ مجھے مزید جواب عطا کرتے۔ [سنن الدارقطني/ كتاب الصلاة/حدیث: 967]

ابوعمرو شیبانی، نبی کریم صلی اللہ علیہ وسلم کے ایک صحابی کے حوالے سے یہ بات نقل کرتے ہیں: نبی کریم صلی اللہ علیہ وسلم سے سوال کیا گیا: ”کون سا عمل زیادہ فضیلت رکھتا ہے؟“ تو آپ نے فرمایا: ”سب سے زیادہ فضیلت والا عمل، نماز کو اس کے وقت پر ادا کرنا ہے۔“ ایک روایت میں یہ الفاظ ہیں: ”نماز اس کے ابتدائی وقت پر ادا کرنا ہے۔“ [سنن الدارقطني/ كتاب الصلاة/حدیث: 968]

ابوعمرو شیبانی بیان کرتے ہیں: اس گھر کے مالک نے مجھے یہ حدیث سنائی ہے، ان کی مراد سیدنا عبداللہ بن مسعود رضی اللہ عنہ ہیں۔ وہ فرماتے ہیں: میں نے نبی کریم صلی اللہ علیہ وسلم سے سوال کیا، میں نے عرض کی: ”کون سا عمل زیادہ فضیلت رکھتا ہے؟“ تو آپ نے ارشاد فرمایا: ”نماز کو اس کے ابتدائی وقت میں ادا کرنا۔“ [سنن الدارقطني/ كتاب الصلاة/حدیث: 969]

سیدنا عبداللہ بن عمر رضی اللہ عنہما بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”بہترین عمل نماز کو اس کے ابتدائی وقت میں ادا کرنا ہے۔“ [سنن الدارقطني/ كتاب الصلاة/حدیث: 970]

سیدنا عبداللہ بن عمر رضی اللہ عنہما بیان کرتے ہیں: نبی کریم صلی اللہ علیہ وسلم سے سوال کیا گیا: ”کون سا عمل زیادہ فضیلت رکھتا ہے؟“ تو آپ نے ارشاد فرمایا: ”نماز کو اس کے ابتدائی وقت میں ادا کرنا۔“ محدثین کی ایک جماعت نے اس کے برخلاف نقل کیا ہے۔ [سنن الدارقطني/ كتاب الصلاة/حدیث: 971]

سیدہ ام فروہ رضی اللہ عنہا بیان کرتی ہیں: انہوں نے نبی کریم صلی اللہ علیہ وسلم کو یہ ارشاد فرماتے ہوئے سنا ہے: ”اللہ تعالیٰ کے نزدیک سب سے زیادہ فضیلت والا عمل یہ ہے کہ نماز کو اس کے ابتدائی وقت میں ادا کر لیا جائے۔“ [سنن الدارقطني/ كتاب الصلاة/حدیث: 972]