سیدنا عبدالرحمن بن عوف رضی اللہ عنہ روایت کرتے ہیں: نبی کریم صلی اللہ علیہ وسلم نے ارشاد فرمایا: ”جب چور پر حد جاری کر دی جائے، تو اب وہ (چوری شدہ سامان) کا تاوان ادا کرنے کا پابند نہیں ہو گا۔“ [سنن الدارقطني/ كتاب الحدود والديات وغيره/حدیث: 3396]

سیدنا عبدالرحمن بن عوف رضی اللہ عنہ روایت کرتے ہیں: نبی کریم صلی اللہ علیہ وسلم نے ارشاد فرمایا: ”جب چور پر حد جاری کر دی جائے، تو اب وہ (چوری شدہ سامان) کا تاوان ادا کرنے کا پابند نہیں ہو گا۔“ [سنن الدارقطني/ كتاب الحدود والديات وغيره/حدیث: 3397]

یہی روایت بعض دیگر اسناد کے حوالے سے سیدنا عبدالرحمن بن عوف رضی اللہ عنہ سے منقول ہے، جس میں ایک راوی کے بارے میں اختلاف کیا گیا ہے اور اسے مجہول قرار دیا گیا ہے اور اس احتمال کی نشاندہی کی گئی ہے کہ یہ روایت مرسل ہو سکتی ہے۔ [سنن الدارقطني/ كتاب الحدود والديات وغيره/حدیث: 3398]

سیدنا عبدالرحمن بن عوف رضی اللہ عنہ بیان کرتے ہیں: نبی کریم صلی اللہ علیہ وسلم کی خدمت میں ایک چور کو لایا گیا، تو آپ صلی اللہ علیہ وسلم نے اس کا ہاتھ کاٹنے کا حکم دیا اور فرمایا: ”یہ تاوان ادا نہیں کرے گا۔“ اس میں کئی اعتبار سے وہم پایا جاتا ہے۔ [سنن الدارقطني/ كتاب الحدود والديات وغيره/حدیث: 3399]

سیدنا عبدالرحمن بن عوف رضی اللہ عنہ بیان کرتے ہیں: نبی کریم صلی اللہ علیہ وسلم نے ارشاد فرمایا ہے: ”جب چور پر حد جاری کر دی جائے، تو اب وہ (چوری شدہ سامان) کا تاوان ادا کرنے کا پابند نہیں ہو گا۔“ [سنن الدارقطني/ كتاب الحدود والديات وغيره/حدیث: 3400]

نافع بیان کرتے ہیں: ایک شخص جس کا ایک ہاتھ اور ایک پاؤں (چوری کی سزا میں) کٹا ہوا تھا، وہ سیدنا ابوبکر صدیق رضی اللہ عنہ کا مہمان بنا، وہ رات کے وقت نوافل ادا کیا کرتا تھا، سیدنا ابوبکر رضی اللہ عنہ نے اس سے فرمایا: ”تم کسی چور کی طرح رات نہیں گزارتے (تم تو نیک آدمی ہو)۔“ تمہارا ہاتھ کس نے کٹوا دیا؟ اس نے جواب دیا: ”یعلی بن منیہ نے ظلم کے طور پر اس کو کاٹا ہے۔“ تو سیدنا ابوبکر رضی اللہ عنہ نے اس سے فرمایا: ”میں اسے اس بارے میں خط لکھوں گا۔“ سیدنا ابوبکر رضی اللہ عنہ نے اس سے وعدہ کر لیا، اسی دوران (سیدنا ابوبکر رضی اللہ عنہ کی اہلیہ) سیدہ اسماء بنت عمیس کا ایک ہار گم ہو گیا، تو اس شخص نے یہ کہنا شروع کر دیا: ”اے اللہ! اس چور کو پکڑوا دے۔“ راوی بیان کرتے ہیں: وہ ہار ایک سنار کے پاس سے مل گیا، جب اس کی تحقیق کی، تو پتا چلا کہ اسی ہاتھ پاؤں کٹے ہوئے شخص نے اسے فروخت کیا تھا۔ راوی بیان کرتے ہیں: سیدنا ابوبکر رضی اللہ عنہ نے فرمایا: ”اللہ کی قسم! میرے نزدیک اس کی اس حرکت سے زیادہ شدید (ناپسندیدہ) بات یہ ہے کہ وہ اللہ سے یہ دعائیں کر رہا تھا (کہ چور پکڑا جائے)۔“ ”تم لوگ اس کا پاؤں کاٹ دو (تاکہ وہ ہاتھ کے ساتھ کسی کام کے قابل نہ رہے)۔“ تو سیدنا عمر رضی اللہ عنہ نے کہا: ”ہم اس کا ہاتھ کاٹیں گے، جیسا کہ اللہ تعالیٰ نے حکم دیا ہے۔“ تو سیدنا ابوبکر نے فرمایا: ”ٹھیک ہے۔“ [سنن الدارقطني/ كتاب الحدود والديات وغيره/حدیث: 3401]

سیدنا ابن عمر رضی اللہ عنہما بیان کرتے ہیں: سیدنا ابوبکر رضی اللہ عنہ نے اس شخص کا پاؤں کٹوا دیا تھا، جس (کا ہاتھ) یعلی بن امیہ نے کاٹا تھا، اس سے پہلے ہی اس شخص کا ایک ہاتھ کٹا ہوا تھا۔ [سنن الدارقطني/ كتاب الحدود والديات وغيره/حدیث: 3402]

سیدہ عائشہ رضی اللہ عنہا بیان کرتی ہیں: ایک سیاہ فام شخص سیدنا ابوبکر رضی اللہ عنہ کے پاس آیا اور ان کے ساتھ رہنے لگا، سیدنا ابوبکر رضی اللہ عنہ اسے قرآن سکھانے لگے، ایک مرتبہ سیدنا ابوبکر رضی اللہ عنہ (زکوٰۃ وغیرہ کی) وصولی کرنے والے شخص کو بھجوانے لگے (راوی کو شک ہے، شاید یہ الفاظ ہیں) کسی مہم کو روانہ کرنے لگے، تو وہ شخص بولا: ”مجھے بھی اس کے ساتھ بھیج دیں۔“ سیدنا ابوبکر رضی اللہ عنہ نے فرمایا: ”تم ہمارے ساتھ رہو۔“ لیکن اس نے یہ بات نہیں مانی، تو سیدنا ابوبکر رضی اللہ عنہ نے اسے بھی اس (وصولی) کرنے والے کے ساتھ بھیج دیا، اور اسے (اس سیاہ فام) کا خیال رکھنے کی تاکید کی، کچھ عرصے بعد وہ (سیاہ فام) شخص آیا، تو اس کا ہاتھ کٹا ہوا تھا، جب سیدنا ابوبکر رضی اللہ عنہ نے اسے دیکھا، تو ان کی آنکھوں سے آنسو جاری ہو گئے، سیدنا ابوبکر رضی اللہ عنہ نے اس سے دریافت کیا: ”تمہیں کیا ہوا ہے؟“ اس نے جواب دیا: ”اس (سرکاری اہلکار) نے جو کام میرے ذمے لگایا تھا، میں نے اس میں سے ایک فریضہ (یعنی جانور یا کوئی چیز) کی خیانت کی، تو اس نے میرا ہاتھ کاٹ دیا۔“ تو سیدنا ابوبکر رضی اللہ عنہ نے فرمایا: ”جس نے اس کا ہاتھ کاٹا ہے، اس نے خود بیس سے زیادہ فریضوں میں خیانت کی ہوئی ہے، اللہ کی قسم! اگر تم ٹھیک کہہ رہے ہو، تو میں اس وجہ سے اسے قید کر دوں گا۔“ پھر سیدنا ابوبکر رضی اللہ عنہ نے اسے اپنے ساتھ رکھا اور اس کے ساتھ پہلے سا سلوک کرتے رہے، وہ شخص رات کے وقت کھڑا ہو کر (نوافل کے دوران) قرأت کرنے لگا، سیدنا ابوبکر رضی اللہ عنہ نے جب اس کی آواز سنی، تو دعا کی: ”اے اللہ! جس نے اس کا ہاتھ کاٹا ہے، اسے سزا دے۔“ تھوڑے ہی عرصے بعد سیدنا ابوبکر رضی اللہ عنہ کے گھر والوں میں سے کسی کا ہار یا شاید اور کوئی چیز چوری ہو گئی، تو سیدنا ابوبکر رضی اللہ عنہ نے فرمایا: ”گزشتہ رات ہمارے ہاں چوری ہو گئی۔“ وہ ہاتھ کٹا ہوا (سیاہ فام) کھڑا ہوا، اس نے قبلہ کی طرف رخ کیا، اس نے اپنا صحیح ہاتھ اور کٹا ہوا ہاتھ دونوں بلند کیے اور دعا کی: ”اے اللہ! جس نے یہ چوری کی ہے، اسے پکڑوا دے (یا اس کی مانند لفظ استعمال کیے)۔“ معمر نامی راوی نے یہ الفاظ نقل کیے ہیں: ”اے اللہ! اس شخص کو پکڑوا دے، جس نے اس نیک گھرانے کے ہاں چوری کی ہے۔“ راوی بیان کرتے ہیں: اگلا دن ابھی آدھا بھی نہیں گزرا تھا کہ وہ سامان اس شخص کے پاس سے مل گیا، تو سیدنا ابوبکر رضی اللہ عنہ نے اس سے فرمایا: ”تمہارا ستیاناس ہو، تمہیں اللہ تعالیٰ کے بارے میں بہت تھوڑا علم ہے۔“ پھر سیدنا ابوبکر رضی اللہ عنہ کے حکم کے تحت اس شخص کا پاؤں کاٹ دیا گیا۔ [سنن الدارقطني/ كتاب الحدود والديات وغيره/حدیث: 3403]

یہی روایت ایک اور سند کے ہمراہ بھی منقول ہے، تاہم اس میں یہ الفاظ ہیں: جب سیدنا ابوبکر رضی اللہ عنہ نے اس کی آواز سنی، تو فرمایا: ”تم کسی چور کی رات نہیں گزارتے۔“ [سنن الدارقطني/ كتاب الحدود والديات وغيره/حدیث: 3404]

سیدنا ابن عباس رضی اللہ عنہما بیان کرتے ہیں: میں اس بات کی گواہی دیتا ہوں کہ سیدنا عمر رضی اللہ عنہ نے ایک ایسے شخص کا پاؤں کٹوا دیا تھا، جس نے تیسری مرتبہ چوری کی تھی، اس سے پہلے اس کا ایک ہاتھ اور ایک پاؤں کاٹا جا چکا تھا۔ [سنن الدارقطني/ كتاب الحدود والديات وغيره/حدیث: 3405]