عبد اللہ بن بحینہ رضی اللہ عنہ بھی نبی کریم صلی اللہ علیہ وآلہ وسلم سے اسی طرح کی روایت بیان کرتے ہیں۔ [الفتح الربانی/أبواب صفة الصلاة/حدیث: 1580]

محمد بن ابی عائشہ نبی صلی اللہ علیہ وآلہ وسلم کے صحابہ میں سے ایک آدمی سے روایت کرتے ہیں: انہوں نے فرمایا: نبی صلی اللہ علیہ وآلہ وسلم نے فرمایا: شاید امام پڑھ رہا ہوتا ہے تو تم امام کے پیچھے قراءت کرتے ہو؟ وہ کہنے لگے: اے اللہ کے رسول! ہم تو ضرور (قراءت)کرتے ہیں۔ آپ صلی اللہ علیہ وآلہ وسلم نے فرمایا: تم میں سے کوئی ایک ام القرآن یا فرمایا: فاتحۃ الکتاب کے پڑھنے کے علاوہ (قراءت نہ کرو)۔ [الفتح الربانی/أبواب صفة الصلاة/حدیث: 1581]

سیّدنا عبد اللہ بن ابی قتادہ اپنے باپ سے وہ نبی صلی اللہ علیہ وآلہ وسلم سے اسی طرح روایت کرتے ہیں۔ [الفتح الربانی/أبواب صفة الصلاة/حدیث: 1582]

سیّدناعبد اللہ (بن مسعود) رضی اللہ عنہ کہتے ہیں: لوگ نبی کریم صلی اللہ علیہ وآلہ وسلم کے پیچھے قراءت کرتے تھے، آپ صلی اللہ علیہ وآلہ وسلم نے ان کو فرمایا: تم نے مجھ پر قرآن کو خلط ملط کردیاہے۔ [الفتح الربانی/أبواب صفة الصلاة/حدیث: 1583]

کثیر بن مرۃ حضرمی کہتے ہیں: سیّدنا ابو درداء رضی اللہ عنہ سے مروی ہے، وہ کہتے ہیں کہ انھوں نے رسول اللہ صلی اللہ علیہ وآلہ وسلم سے سوال کیا کہ کیا ہر نماز میں قراءت ہے؟ آپ صلی اللہ علیہ وآلہ وسلم نے فرمایا: ہاں ایک انصاری آدمی کہنے لگا: اب یہ (قراءت تو)واجب ہوگئی ہے۔ لیکن سیّدنا ابو درداء رضی اللہ عنہ میری طرف متوجہ ہوئے، جبکہ میں لوگوں میں سب سے زیادہ ان کے قریب تھا اور کہا:میرے بھتیجے! میرا خیال تو یہ ہے کہ جب امام لوگوں کی امامت کرواتا ہے تو (قراءت میں بھی) وہی ان کو کفایت کرتا ہے۔ [الفتح الربانی/أبواب صفة الصلاة/حدیث: 1584]

سیّدنا عمران بن حصین رضی اللہ عنہ سے مروی ہے کہ رسول اللہ صلی اللہ علیہ وآلہ وسلم نے نماز ظہر پڑھائی،ایک آدمی نے آپ کے پیچھے سَبِّحِ اسْمَ رَبِّکَ الْأَعْلٰی۔ سورت کی تلاوت کی،جب آپ صلی اللہ علیہ وآلہ وسلم نے نماز پڑھ لی تو پوچھا: تم میں سے کس نے سَبِّحِ اسْمَ رَبِّکَ الْأَ عْلٰی۔ پڑھی ہے؟ اس آدمی نے کہا: میں نے(پڑھی ہے)، آپ صلی اللہ علیہ وآلہ وسلم نے فرمایا: میں نے پہچان لیا تھا کہ تم میں سے کسی نے مجھ پر اس (کی قراءت) کو الجھا دیا ہے۔ [الفتح الربانی/أبواب صفة الصلاة/حدیث: 1585]

سیدنا علی رضی اللہ عنہ سے روایت ہے کہ رسول اللہ صلی اللہ علیہ وآلہ وسلم نے منع فرمایا کہ آدمی عشاء سے پہلے اور اس کے بعد بلند آواز سے قراءت کرے اور نماز پڑھنے والے ساتھیوں کو غلطیوں میں ڈال دے۔ [الفتح الربانی/أبواب صفة الصلاة/حدیث: 1586]

۔ (دوسری سند)رسول اللہ صلی اللہ علیہ وآلہ وسلم نے منع فرمایاکہ لوگ مغرب اور عشا کے درمیان ایک دوسرے پر قرآن کی بلند آواز سے قراءت کریں۔ [الفتح الربانی/أبواب صفة الصلاة/حدیث: 1587]

سیدنا ابن عمر رضی اللہ عنہ سے روایت ہے کہ نبی کریم صلی اللہ علیہ وآلہ وسلم اعتکاف بیٹھے ہوئے تھے اور لوگوں کو ایک خطبہ دیا، جس میں یہ بھی فرمایا: خبر دار!یقینا جب تم میں سے کوئی نماز میں کھڑا ہوتا ہے تو وہ اپنے رب سے سرگوشی کر رہا ہوتا ہے، اس لیے اسے چاہیے کہ وہ اس سرگوشی (کے کلمات) کو سمجھے جو وہ اپنے رب سے کر رہا ہوتا ہے، اور (یہ بھی یاد رکھو کہ) کوئی بھی نماز میں قراءت کی آواز کو دوسروں پر بلند نہ کرے۔ [الفتح الربانی/أبواب صفة الصلاة/حدیث: 1588]

سیدنا ابوہریرہ رضی اللہ عنہ سے روایت ہے کہ سیدنا عبد اللہ بن حذافہ سہمی رضی اللہ عنہ نماز پڑھ رہے تھے اور بلند آواز سے قراءت کر رہے تھے، نبی ٔ کریم صلی اللہ علیہ وآلہ وسلم نے ان کو فرمایا: ابن حذافہ! مجھے نہ سناؤ، اپنے رب کو سناؤ۔ [الفتح الربانی/أبواب صفة الصلاة/حدیث: 1589]