سیدنا سہل بن سعد رضی اللہ عنہ کا بیان ہے کہ ”ہم لوگ جمعہ کے بعد ہی کھانا کھاتے اور قیلولہ کرتے تھے۔“ [سنن ابي داود/تفرح أبواب الجمعة /حدیث: 1086]

سیدنا سائب بن یزید رضی اللہ عنہ بیان کرتے ہیں کہ ”جمعہ کے روز (جمعہ کی) پہلی اذان امام کے منبر پر بیٹھنے کے وقت کہی جاتی تھی۔ عہدِ نبوت صلی اللہ علیہ وسلم ، خلافتِ ابی بکر رضی اللہ عنہ اور عمر رضی اللہ عنہ میں یہی معمول رہا۔ جب سیدنا عثمان رضی اللہ عنہ کی خلافت آئی اور لوگ بھی بہت ہو گئے، تو سیدنا عثمان رضی اللہ عنہ نے جمعہ کے روز تیسری اذان کا حکم دیا جو کہ زوراء مقام پر دی جاتی تھی اور معاملہ اسی پر قائم رہا۔“ [سنن ابي داود/تفرح أبواب الجمعة /حدیث: 1087]

سیدنا سائب بن یزید رضی اللہ عنہ بیان کرتے ہیں کہ ”جمعہ کے روز جب رسول اللہ صلی اللہ علیہ وسلم منبر پر بیٹھ جاتے تو آپ صلی اللہ علیہ وسلم کے سامنے مسجد کے دروازے کے پاس اذان کہی جاتی تھی اور سیدنا ابوبکر و عمر رضی اللہ عنہما کے دور میں بھی ایسے ہی ہوتا تھا۔“ اور (گزشتہ) حدیث یونس کی مانند بیان کیا۔ [سنن ابي داود/تفرح أبواب الجمعة /حدیث: 1088]

سیدنا سائب رضی اللہ عنہ بیان کرتے ہیں کہ ”رسول اللہ صلی اللہ علیہ وسلم کا ایک ہی مؤذن تھا، یعنی بلال“ اور (ابن اسحاق نے) سابقہ حدیث کے ہم معنی بیان کیا۔ [سنن ابي داود/تفرح أبواب الجمعة /حدیث: 1089]

سیدنا سائب بن یزید رضی اللہ عنہ نے ان کو خبر دی کہ ”رسول اللہ صلی اللہ علیہ وسلم کا ایک ہی مؤذن تھا۔“ صالح نے یہ حدیث بیان کی، مگر کامل نہیں ہے۔ [سنن ابي داود/تفرح أبواب الجمعة /حدیث: 1090]

جناب عطاء بن ابی رباح، سیدنا جابر رضی اللہ عنہ سے روایت کرتے ہیں کہ (ایک بار) جمعہ کے روز جب رسول اللہ صلی اللہ علیہ وسلم (منبر پر) برابر (تشریف فرما) ہو گئے تو فرمایا: ”بیٹھ جاؤ!“ اسے سیدنا ابن مسعود رضی اللہ عنہ نے سنا تو مسجد کے دروازے ہی پر بیٹھ گئے۔ رسول اللہ صلی اللہ علیہ وسلم نے ان کو دیکھا تو فرمایا: ”اے عبداللہ بن مسعود! آگے آ جاؤ۔“ امام ابوداؤد رحمہ اللہ فرماتے ہیں: ”اس حدیث کا مرسل ہونا معروف ہے۔ محدثین کی ایک جماعت اسے عطاء (تابعی) سے، وہ نبی کریم صلی اللہ علیہ وسلم سے روایت کرتے ہیں۔ (یعنی درمیان میں صحابی کا واسطہ متروک ہے) اور مخلد ”شیخ“ ہے۔ (یعنی اس کی حدیث لکھی جاتی ہے۔)“ [سنن ابي داود/تفرح أبواب الجمعة /حدیث: 1091]

نافع سیدنا عبداللہ بن عمر رضی اللہ عنہما سے بیان کرتے ہیں کہ ”نبی کریم صلی اللہ علیہ وسلم دو خطبے ارشاد فرمایا کرتے تھے۔ آپ صلی اللہ علیہ وسلم جب منبر پر تشریف لاتے تو بیٹھ جاتے، حتیٰ کہ مؤذن اذان سے فارغ ہو جاتا۔ پھر آپ صلی اللہ علیہ وسلم کھڑے ہوتے اور خطبہ دیتے، پھر بیٹھ جاتے اور کلام نہ کرتے، پھر کھڑے ہوتے اور (دوسرا) خطبہ دیتے۔“ [سنن ابي داود/تفرح أبواب الجمعة /حدیث: 1092]

سیدنا جابر بن سمرہ رضی اللہ عنہ سے روایت ہے کہ ”رسول اللہ صلی اللہ علیہ وسلم کھڑے ہو کر خطبہ دیا کرتے تھے (یعنی پہلا خطبہ)، پھر بیٹھ جاتے، پھر (دوسرے کے لیے) کھڑے ہوتے اور کھڑے ہو کر ہی خطبہ دیتے تھے، اور جو شخص تمہیں یہ بتائے کہ آپ صلی اللہ علیہ وسلم بیٹھ کر خطبہ دیتے تھے اس نے جھوٹ کہا، اللہ کی قسم! میں نے آپ صلی اللہ علیہ وسلم کے ساتھ دو ہزار سے زیادہ نمازیں پڑھی ہیں۔“ [سنن ابي داود/تفرح أبواب الجمعة /حدیث: 1093]

سیدنا جابر بن سمرہ رضی اللہ عنہ بیان کرتے ہیں کہ ”رسول اللہ صلی اللہ علیہ وسلم کے دو خطبے ہوا کرتے تھے۔ آپ ان دونوں کے درمیان میں بیٹھا کرتے تھے۔ آپ قرآن پڑھتے اور لوگوں کو وعظ و نصیحت فرمایا کرتے تھے۔“ [سنن ابي داود/تفرح أبواب الجمعة /حدیث: 1094]

سیدنا جابر بن سمرہ رضی اللہ عنہ بیان کرتے ہیں کہ ”میں نے نبی کریم صلی اللہ علیہ وسلم کو دیکھا کہ کھڑے ہو کر خطبہ ارشاد فرماتے، پھر مختصر سا بیٹھ جاتے اور اس دوران میں کوئی گفتگو نہ کرتے تھے“ اور حدیث بیان کی۔ [سنن ابي داود/تفرح أبواب الجمعة /حدیث: 1095]