سیدنا جابر بن سمرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے یہ ہدایت کی تھی کہ: ”ہم اونٹوں کا گوشت کھا کر وضو کریں اور بکری کا گوشت کھا کر وضو نہ کریں اور ہم بکریوں کے باڑے میں نماز ادا کر لیں اور اونٹوں کے باڑے میں نماز ادا نہ کریں۔“ [صحیح ابن حبان/كتاب الطهارة/حدیث: 1127]

سیدنا براء رضی اللہ عنہ بیان کرتے ہیں کہ نبی اکرم صلی اللہ علیہ وسلم سے دریافت کیا گیا: کیا ہم اونٹوں کے باڑے میں نماز ادا کر لیں؟ تو نبی اکرم صلی اللہ علیہ وسلم نے ارشاد فرمایا: ”جی نہیں۔“ عرض کی گئی: کیا ہم بکریوں کے باڑے میں نماز ادا کر لیں؟ آپ صلی اللہ علیہ وسلم نے ارشاد فرمایا: ”جی ہاں۔“ عرض کی گئی: کیا ہم بکری کا گوشت کھا کر وضو کیا کریں؟ نبی اکرم صلی اللہ علیہ وسلم نے فرمایا: ”جی نہیں۔“ (امام ابن حبان رحمہ اللہ فرماتے ہیں:) سائل کے سوال میں اونٹوں کا گوشت کھانے کے بعد وضو کرنے اور اونٹوں کے باڑے میں نماز ادا کرنے کا تذکرہ ہے، نبی اکرم صلی اللہ علیہ وسلم نے دونوں جوابوں میں فرق کیا ہے، میں یہ سمجھتا ہوں کہ آپ صلی اللہ علیہ وسلم کی مراد وہ وضو ہے جو فرض نماز کے لیے کیا جاتا ہے، اس سے مراد دونوں ہاتھ دھونا نہیں ہے، اس کی وجہ یہ ہے کہ اگر اس سے مراد صرف دونوں ہاتھ دھونا ہوتا تو اس بارے میں اونٹوں کے گوشت اور بکریوں کے گوشت کا حکم برابر ہوتا، پہلے یہ حکم تھا کہ آگ پر پکی ہوئی چیز کھانے سے وضو ٹوٹ جاتا ہے، پھر یہ حکم منسوخ ہو گیا اور اونٹوں کے گوشت کا حکم مستثنیٰ طور پر باقی رہا، جس کا استثنیٰ ان چیزوں سے کیا گیا جنہیں بعد میں مباح قرار دیا گیا تھا، جس کا ذکر ہم پہلے کر چکے ہیں۔ [صحیح ابن حبان/كتاب الطهارة/حدیث: 1128]

سیدنا عبداللہ بن عباس رضی اللہ عنہما بیان کرتے ہیں: نبی اکرم صلی اللہ علیہ وسلم ایک ہنڈیا کے پاس سے گزرے، آپ نے اس میں سے ایک ہڈی والا (گوشت) کھایا، پھر آپ نے نماز ادا کی اور از سرِ نو وضو نہیں کیا۔ امام ابو حاتم رحمہ اللہ بیان کرتے ہیں: سیدنا عبداللہ بن عباس رضی اللہ عنہما کا یہ کہنا کہ ”اسے کھا لیا۔“ اس سے مراد ہڈی پر لگا ہوا گوشت ہے، ہڈی کھانا مراد نہیں ہے۔ (امام ابن حبان رحمہ اللہ فرماتے ہیں:) سیدنا عبداللہ بن عباس رضی اللہ عنہما کا یہ بیان کہ پھر آپ نے اسے کھا لیا، اس سے مراد وہ گوشت جو ہڈیوں پر لگا ہوا تھا، ہڈی کو کھانا مراد نہیں ہے۔ [صحیح ابن حبان/كتاب الطهارة/حدیث: 1129]

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم کی خدمت میں روٹی اور گوشت پیش کیا گیا، آپ صلی اللہ علیہ وسلم نے اسے کھا لیا، پھر آپ صلی اللہ علیہ وسلم نے وضو کا پانی منگوایا اور ظہر کی نماز ادا کی، پھر آپ صلی اللہ علیہ وسلم نے باقی بچے ہوئے کھانے کو منگوا کر اسے کھا لیا، پھر آپ صلی اللہ علیہ وسلم نے عصر کی نماز ادا کی اور ازسرنو وضو نہیں کیا۔ میں سیدنا ابوبکر رضی اللہ عنہ کے ہمراہ آپ صلی اللہ علیہ وسلم کی خدمت میں حاضر ہوا تو آپ صلی اللہ علیہ وسلم نے دریافت کیا: ”کیا کوئی چیز ہے؟“ تو انہیں کوئی چیز نہیں ملی۔ نبی اکرم صلی اللہ علیہ وسلم نے دریافت کیا: ”تمہاری وہ بکری کہاں ہے، جو بچہ دینے والی تھی؟“ پھر آپ صلی اللہ علیہ وسلم نے اس کے بارے میں مجھے حکم دیا، میں نے اسے کھول لیا اور اس کا دودھ دوہ لیا، پھر آپ صلی اللہ علیہ وسلم کے لیے کھانا تیار کروایا گیا، آپ صلی اللہ علیہ وسلم نے اسے کھایا، پھر آپ صلی اللہ علیہ وسلم نے وضو کرنے سے پہلے ہی نماز ادا کر لی۔ میں سیدنا عمر رضی اللہ عنہ کے ساتھ آپ صلی اللہ علیہ وسلم کی خدمت میں حاضر ہوا تو میں نے ایک پیالہ رکھا جس میں روٹی اور گوشت موجود تھا، ہم نے اسے کھا لیا، پھر ہم نے ازسرنو وضو کیے بغیر نماز ادا کی۔ یہی روایت ایک اور سند کے ہمراہ سیدنا جابر رضی اللہ عنہما سے منقول ہے۔ [صحیح ابن حبان/كتاب الطهارة/حدیث: 1130]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے (جانور) کے شانے کا گوشت کھایا (راوی کو شک ہے شاید یہ الفاظ ہیں) پسلی کا گوشت کھایا، آپ صلی اللہ علیہ وسلم نے نماز ادا کی اور ازسرنو وضو نہیں کیا۔ [صحیح ابن حبان/كتاب الطهارة/حدیث: 1131]

سیدنا جابر رضی اللہ عنہ بیان کرتے ہیں: نبی اکرم صلی اللہ علیہ وسلم نے گوشت کھایا، آپ کے ساتھ سیدنا ابوبکر اور سیدنا عمر رضی اللہ عنہما بھی تھے، پھر یہ حضرات صف کی طرف اٹھ گئے، انہوں نے از سر نو وضو نہیں کیا۔ سیدنا جابر رضی اللہ عنہ بیان کرتے ہیں: پھر میں سیدنا ابوبکر صدیق رضی اللہ عنہ کے ساتھ بھی تھا، انہوں نے گوشت کھایا پھر نماز کے لیے کھڑے ہو گئے اور از سر نو وضو نہیں کیا، پھر ایک مرتبہ میں سیدنا عمر رضی اللہ عنہ کے ساتھ بھی موجود تھا، انہوں نے پیالے میں سے کھایا اور اٹھ کر نماز ادا کی اور از سر نو وضو نہیں کیا۔ [صحیح ابن حبان/كتاب الطهارة/حدیث: 1132]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے شانے کا گوشت کھایا اور نماز ادا کر لی اور آپ صلی اللہ علیہ وسلم نے ازسرنو وضو نہیں کیا۔ [صحیح ابن حبان/كتاب الطهارة/حدیث: 1133]

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم سے دو طرح کے معاملات میں سے آخری معاملہ یہ منقول ہے کہ آپ صلی اللہ علیہ وسلم نے آگ پر پکی ہوئی چیز کھانے کے بعد وضو نہیں کیا تھا۔ امام ابوحاتم رحمہ اللہ فرماتے ہیں: یہ ایک مختصر روایت ہے جو ایک طویل حدیث کا حصہ ہے، شعیب بن ابوحمزہ نامی راوی نے اس کا اختصار کیا ہے، انہیں یہ وہم ہوا کہ یہ آگ پر پکی ہوئی چیز کھانے پر وضو لازم ہونے کے منسوخ ہونے کے بارے میں مطلق حدیث ہے، حالانکہ یہ آگ پر پکی ہوئی چیز کھانے کی صورت میں وضو کے لازم ہونے کو اس صورت میں منسوخ کرتی ہے جب وہ پکی ہوئی چیز اونٹ کے گوشت کے علاوہ ہو۔ [صحیح ابن حبان/كتاب الطهارة/حدیث: 1134]

سیدنا جابر رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو دیکھا آپ نے آگ پر پکا ہوا کھانا کھایا، آپ نے ازسرِ نو وضو کرنے سے پہلے ہی نماز ادا کر لی۔ نبی اکرم صلی اللہ علیہ وسلم کے بعد میں نے سیدنا ابوبکر رضی اللہ عنہ کو دیکھا انہوں نے آگ پر پکی ہوئی چیز کھائی پھر ازسرِ نو وضو کرنے سے پہلے نماز ادا کی۔ پھر سیدنا ابوبکر رضی اللہ عنہ کے بعد سیدنا عمر رضی اللہ عنہ کو دیکھا کہ انہوں نے آگ پر پکی ہوئی چیز کھائی اور ازسرِ نو وضو نہیں کیا اور نماز ادا کر لی۔ [صحیح ابن حبان/كتاب الطهارة/حدیث: 1135]

سیدنا جابر رضی اللہ عنہ بیان کرتے ہیں: نبی اکرم صلی اللہ علیہ وسلم نے گوشت کھایا، آپ کے ساتھ سیدنا ابوبکر اور سیدنا عمر رضی اللہ عنہما بھی تھے، پھر یہ حضرات نماز ادا کرنے کے لیے اٹھ گئے اور انہوں نے از سرِ نو وضو نہیں کیا۔ سیدنا جابر رضی اللہ عنہ بیان کرتے ہیں: ایک مرتبہ میں سیدنا ابوبکر رضی اللہ عنہ کے ساتھ موجود تھا (یہ ان کے عہد خلافت کی بات ہے) انہوں نے کھانا کھایا اور نماز ادا کرنے کے لیے اٹھ گئے اور از سرِ نو وضو نہیں کیا۔ پھر ایک مرتبہ میں سیدنا عمر رضی اللہ عنہ کے ساتھ موجود تھا (یہ ان کے عہد خلافت کی بات ہے) انہوں نے ایک پیالے میں سے کھانا کھایا اور پھر اٹھ کر نماز ادا کر لی اور از سرِ نو وضو نہیں کیا۔ [صحیح ابن حبان/كتاب الطهارة/حدیث: 1136]