عبداللہ بن ابراہیم بیان کرتے ہیں کہ انہوں نے سیدنا ابوہریرہ رضی اللہ عنہ کو مسجد کی چھت پر وضو کرتے ہوئے پایا، انہوں نے ان سے اس بارے میں دریافت کیا تو سیدنا ابوہریرہ رضی اللہ عنہ نے بتایا کہ میں نے پنیر کے ٹکڑے کھائے تھے، اس وجہ سے میں وضو کر رہا ہوں کیونکہ نبی اکرم صلی اللہ علیہ وسلم نے یہ بات ارشاد فرمائی ہے: ”آگ پر پکی ہوئی چیز کھانے کے بعد وضو کرو۔“ امام ابوحاتم رحمہ اللہ بیان کرتے ہیں کہ یہ روایت ابن قتیبہ نے اسی طرح سنائی ہے اور انہوں نے راوی کا نام عبداللہ بن ابراہیم بیان کیا ہے، جبکہ اس کا نام ابراہیم بن عبداللہ ہے۔ (امام ابن حبان رحمہ اللہ فرماتے ہیں:) اسی طرح یہ روایت ابن قتیبہ نے ہمیں بیان کی ہے، وہ ہمیں یہ کہتے ہیں کہ راوی کا نام عبداللہ بن ابراہیم بن قارظ ہے، حالانکہ اس کا نام ابراہیم بن عبداللہ بن قارظ ہے۔ [صحیح ابن حبان/كتاب الطهارة/حدیث: 1147]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”آگ پر پکی ہوئی چیز کھانے کے بعد وضو کرو۔“ [صحیح ابن حبان/كتاب الطهارة/حدیث: 1148]

سیدنا ابورافع رضی اللہ عنہ بیان کرتے ہیں کہ نبی اکرم صلی اللہ علیہ وسلم کی خدمت میں ایک بکری پیش کی گئی، اس کا پیٹ آپ صلی اللہ علیہ وسلم کے لیے بھون لیا گیا، نبی اکرم صلی اللہ علیہ وسلم نے اسے کھایا، پھر آپ صلی اللہ علیہ وسلم نے اٹھ کر نماز ادا کی اور آپ صلی اللہ علیہ وسلم نے ازسرنو وضو نہیں کیا۔ [صحیح ابن حبان/كتاب الطهارة/حدیث: 1149]

سیدنا عمرو بن امیہ رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو دیکھا کہ آپ نے گوشت کھایا، پھر مؤذن نماز کے لیے بلانے آیا تو نبی اکرم صلی اللہ علیہ وسلم نے ہڈی اور چھری کو ایک طرف رکھ دیا جو آپ کے دستِ اقدس میں موجود تھی، اور آپ نے ازسرنو وضو نہیں کیا۔ اسحاق نامی راوی نے اپنی سند کے ساتھ فضل بن عمرو کے حوالے سے، ان کے والد کے حوالے سے یہ روایت نقل کی ہے۔ انہوں نے سیدنا عمرو بن امیہ ضمری رضی اللہ عنہ کا نام ذکر نہیں کیا اور انہوں نے یہ الفاظ ذکر کیے ہیں: ”آپ ہڈی کا گوشت نوچ کر کھا رہے تھے پھر نماز کے لیے بلاوا آ گیا۔“ اس راوی نے یہ الفاظ بھی نقل کیے ہیں: ”آپ نے اپنے ہاتھ میں سے (چھری) کو رکھ دیا، اور نماز ادا کی اور ازسرنو وضو نہیں کیا۔“ [صحیح ابن حبان/كتاب الطهارة/حدیث: 1150]

سیدنا ابوہریرہ رضی اللہ عنہ بیان کرتے ہیں، انہوں نے نبی اکرم صلی اللہ علیہ وسلم کو دیکھا، آپ نے پنیر کے ٹکڑے کھانے کے بعد وضو کیا، پھر انہوں نے نبی اکرم صلی اللہ علیہ وسلم کو دیکھا، آپ نے بکری کے شانے کا گوشت کھایا اور نماز ادا کر لی اور ازسرنو وضو نہیں کیا۔ [صحیح ابن حبان/كتاب الطهارة/حدیث: 1151]

سیدنا سوید بن نعمان رضی اللہ عنہ بیان کرتے ہیں: ہم لوگ نبی اکرم صلی اللہ علیہ وسلم کے ہمراہ آ رہے تھے، یہاں تک کہ جب ہم خیبر کے ایک مقام روحاء پہنچے تو نبی اکرم صلی اللہ علیہ وسلم نے کھانا منگوایا تو کھانے میں صرف ستو دستیاب ہوئے۔ راوی بیان کرتے ہیں: ہم نے انہیں کھا لیا، نبی اکرم صلی اللہ علیہ وسلم نے پانی منگوایا، پھر نبی اکرم صلی اللہ علیہ وسلم نے کلی کی اور نماز ادا کر لی اور آپ نے ازسرنو وضو نہیں کیا۔ [صحیح ابن حبان/كتاب الطهارة/حدیث: 1152]

سیدنا عبداللہ بن عباس رضی اللہ عنہما بیان کرتے ہیں: میں نے نبی اکرم صلی اللہ علیہ وسلم کو دیکھا کہ آپ نے بکری کا گوشت کھایا پھر آپ نے نماز ادا کی، آپ نے کلی نہیں کی اور پانی کو نہیں چھوا (یعنی ازسرنو وضو نہیں کیا)۔ [صحیح ابن حبان/كتاب الطهارة/حدیث: 1153]

سیدنا جابر بن سمرہ رضی اللہ عنہ بیان کرتے ہیں کہ ایک شخص نے نبی اکرم صلی اللہ علیہ وسلم سے دریافت کیا، اس نے عرض کی: یا رسول اللہ! کیا میں بکری کا گوشت کھانے کے بعد وضو کروں؟ تو آپ صلی اللہ علیہ وسلم نے ارشاد فرمایا: ”اگر تم چاہو تو وضو کر لو اور اگر چاہو تو وضو نہ کرو۔“ اس نے دریافت کیا: کیا میں اونٹ کا گوشت کھانے کے بعد وضو کروں؟ نبی اکرم صلی اللہ علیہ وسلم نے ارشاد فرمایا: ”جی ہاں! تم اونٹ کا گوشت کھانے کے بعد وضو کرو۔“ اس نے دریافت کیا: کیا میں بکریوں کے باڑے میں نماز ادا کر لوں؟ نبی اکرم صلی اللہ علیہ وسلم نے ارشاد فرمایا: ”جی ہاں۔“ اس نے دریافت کیا: کیا میں اونٹوں کے باڑے میں نماز ادا کر لوں؟ نبی اکرم صلی اللہ علیہ وسلم نے ارشاد فرمایا: ”نہیں۔“ [صحیح ابن حبان/كتاب الطهارة/حدیث: 1154]

سیدنا سوید بن نعمان رضی اللہ عنہ بیان کرتے ہیں کہ وہ نبی اکرم صلی اللہ علیہ وسلم کے ہمراہ فتح خیبر کے موقع پر روانہ ہوئے، راوی کہتے ہیں کہ جب ہم صہباء کے مقام پر پہنچے (یہ خیبر کے قریب ایک جگہ ہے) وہاں نبی اکرم صلی اللہ علیہ وسلم نے پڑاؤ کیا اور عصر کی نماز ادا کی، پھر آپ صلی اللہ علیہ وسلم نے کھانا لانے کا حکم دیا تو صرف ستو پیش کیے گئے، نبی اکرم صلی اللہ علیہ وسلم کے حکم کے تحت انہیں پانی میں گھول دیا گیا، پھر نبی اکرم صلی اللہ علیہ وسلم نے انہیں کھا لیا، آپ صلی اللہ علیہ وسلم کے ہمراہ ہم نے بھی کھا لیا، پھر نبی اکرم صلی اللہ علیہ وسلم مغرب کی نماز ادا کرنے کے لیے کھڑے ہوئے تو آپ صلی اللہ علیہ وسلم نے کلی کی، ہم نے بھی کلی کی اور نبی اکرم صلی اللہ علیہ وسلم نے از سرِ نو وضو نہیں کیا۔ [صحیح ابن حبان/كتاب الطهارة/حدیث: 1155]

سیدنا جابر بن سمرہ رضی اللہ عنہ بیان کرتے ہیں کہ ایک شخص نے نبی اکرم صلی اللہ علیہ وسلم سے سوال کرتے ہوئے دریافت کیا: ”یا رسول اللہ! کیا ہم بکری کا گوشت کھا کر وضو کیا کریں؟“ نبی اکرم صلی اللہ علیہ وسلم نے ارشاد فرمایا: ”اگر تم چاہو، تو وضو کر لو اور اگر تم چاہو، تو وضو نہ کرو۔“ اس نے عرض کی: ”کیا میں اونٹ کا گوشت کھا کر وضو کروں؟“ تو نبی اکرم صلی اللہ علیہ وسلم نے ارشاد فرمایا: ”جی ہاں، تم اونٹ کا گوشت کھا کر وضو کرو۔“ میں نے عرض کی: ”کیا میں بکریوں کے باڑے میں نماز ادا کر لوں؟“ تو نبی اکرم صلی اللہ علیہ وسلم نے ارشاد فرمایا: ”جی ہاں۔“ اس نے عرض کی: ”کیا میں اونٹوں کے باڑے میں نماز ادا کر لوں؟“ نبی اکرم صلی اللہ علیہ وسلم نے ارشاد فرمایا: ”جی نہیں۔“ [صحیح ابن حبان/كتاب الطهارة/حدیث: 1156]