سیدہ ام سلمہ رضی اللہ عنہا کی صاحب زادی سیدہ زینب رضی اللہ عنہا اپنی والدہ سیدہ ام سلمہ رضی اللہ عنہا کا یہ بیان نقل کرتی ہیں کہ سیدہ ام سلیم رضی اللہ عنہا، جو سیدنا ابوطلحہ انصاری رضی اللہ عنہ کی اہلیہ ہیں، وہ نبی اکرم صلی اللہ علیہ وسلم کی خدمت میں حاضر ہوئیں اور انہوں نے عرض کی: یا رسول اللہ! بے شک اللہ تعالیٰ حق بات سے حیا نہیں کرتا، اگر عورت کو احتلام ہو جائے تو کیا اس پر غسل لازم ہو گا؟ تو نبی اکرم صلی اللہ علیہ وسلم نے ارشاد فرمایا: ”جی ہاں، جب کہ وہ پانی دیکھے۔“ (یعنی اس کی منی خارج ہوئی ہو) [صحیح ابن حبان/كتاب الطهارة/حدیث: 1167]

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: «إِنَّمَا الْمَاءُ مِنَ الْمَاءِ» ”پانی (یعنی منی کے خروج کی وجہ سے) پانی (یعنی غسل) لازم ہوتا ہے“۔ [صحیح ابن حبان/كتاب الطهارة/حدیث: 1168]

سیدنا ابوایوب انصاری رضی اللہ عنہ بیان کرتے ہیں، سیدنا ابی بن کعب رضی اللہ عنہ نے مجھے یہ بات بتائی ہے وہ کہتے ہیں میں نے عرض کی: یا رسول اللہ! ایک شخص اپنی بیوی کے پاس آتا ہے (یعنی اس کے ساتھ صحبت کرتا ہے) اور اس شخص کو انزال نہیں ہوتا، نبی اکرم صلی اللہ علیہ وسلم نے ارشاد فرمایا: ”عورت کی جو رطوبت اسے لگی ہے وہ اسے دھو لے اور وضو کر کے نماز ادا کر لے۔“ [صحیح ابن حبان/كتاب الطهارة/حدیث: 1169]

سیدنا ابوایوب انصاری رضی اللہ عنہ، سیدنا ابی بن کعب رضی اللہ عنہما کے حوالے سے نبی اکرم صلی اللہ علیہ وسلم کے بارے میں یہ بات نقل کرتے ہیں، سیدنا ابی بن کعب رضی اللہ عنہ نے عرض کی: اس مسئلے کے بارے میں آپ کی کیا رائے ہے کوئی شخص اپنی بیوی کے ساتھ صحبت کرتا ہے، اور اسے انزال نہیں ہوتا؟ تو نبی اکرم صلی اللہ علیہ وسلم نے ارشاد فرمایا: ”اسے چاہیے کہ اپنی شرم گاہ کو، اپنے خصیوں کو دھو لے اور وضو کر کے نماز ادا کر لے۔“ [صحیح ابن حبان/كتاب الطهارة/حدیث: 1170]

سیدنا ابوسعید خدری رضی اللہ عنہ بیان کرتے ہیں: ایک دن ہم نبی اکرم صلی اللہ علیہ وسلم کے ہمراہ جا رہے تھے، آپ کا گزر ایک انصاری رضی اللہ عنہ کے گھر کے پاس سے ہوا تو نبی اکرم صلی اللہ علیہ وسلم نے فرمایا: ”فلاں شخص کہاں ہے؟“ راوی کہتے ہیں: پھر نبی اکرم صلی اللہ علیہ وسلم نے اس کو بلوایا، وہ شخص جلدی سے اندر سے باہر آیا، اس کے سر سے پانی ٹپک رہا تھا۔ نبی اکرم صلی اللہ علیہ وسلم نے ارشاد فرمایا: ”شاید ہم نے تمہاری ضرورت کے حوالے سے تمہیں جلدی کرنے پر مجبور کیا ہے۔“ اس شخص نے عرض کی: جی ہاں! اللہ کی قسم! یا رسول اللہ صلی اللہ علیہ وسلم مجھے جلدی کرنی پڑی۔ تو نبی اکرم صلی اللہ علیہ وسلم نے ارشاد فرمایا: ”کسی کو جلدی سے کوئی کام کرنا ہو یا اسے (وقت کی تنگی ہو)، تو اس پر غسل لازم نہیں ہوتا، اس پر وضو کرنا لازم ہوتا ہے۔“ [صحیح ابن حبان/كتاب الطهارة/حدیث: 1171]

سیدنا زید بن خالد رضی اللہ عنہ بیان کرتے ہیں کہ انہوں نے سیدنا عثمان غنی رضی اللہ عنہ سے ایسے شخص کے بارے میں دریافت کیا جو صحبت کرتا ہے اور اسے انزال نہیں ہوتا، تو سیدنا عثمان رضی اللہ عنہ نے بتایا: ”ایسے شخص پر غسل لازم نہیں ہوتا۔“ پھر سیدنا عثمان رضی اللہ عنہ نے یہ بات بتائی: ”میں نے یہ بات نبی اکرم صلی اللہ علیہ وسلم کی زبانی سنی ہے۔“ راوی بیان کرتے ہیں کہ بعد میں، میں نے سیدنا علی بن ابی طالب، سیدنا زبیر بن عوام، سیدنا طلحہ بن عبیداللہ اور سیدنا ابی بن کعب رضی اللہ عنہم سے دریافت کیا، تو ان حضرات نے بھی اسی کی مانند جواب دیا۔ ابوسلمہ نامی راوی بیان کرتے ہیں کہ عروہ بن زبیر رحمہ اللہ نے یہ بات بتائی ہے، انہوں نے سیدنا ابوایوب انصاری رضی اللہ عنہ سے اس بارے میں دریافت کیا، تو انہوں نے بھی نبی اکرم صلی اللہ علیہ وسلم کے حوالے سے اسی کی مانند بات بیان کی۔ [صحیح ابن حبان/كتاب الطهارة/حدیث: 1172]

سیدنا ابی بن کعب رضی اللہ عنہ بیان کرتے ہیں: ” «الْمَاءُ مِنَ الْمَاءِ» (یعنی پانی کے نتیجہ میں پانی، منی کے خروج کی صورت میں غسل لازم ہونے کا حکم) ابتدائے اسلام میں رخصت تھی، پھر اس سے منع کر دیا گیا۔“ (امام ابن حبان رحمہ اللہ فرماتے ہیں:) یہ روایت معمر نے زہری کے حوالے سے نقل کی ہے، جسے غندر نے نقل کیا ہے۔ وہ یہ کہتے ہیں: سیدنا سہل بن سعد رضی اللہ عنہ نے مجھے حدیث بیان کی ہے۔ یہی روایت عمرو بن خالد نے زہری کے حوالے سے نقل کی ہے۔ اس میں وہ یہ کہتے ہیں: مجھے اس شخص نے وہ حدیث بیان کی ہے جس سے میں راضی ہوں اور اس نے سیدنا سہل بن سعد رضی اللہ عنہ کے حوالے سے یہ روایت نقل کی ہے۔ تو اس بات کا امکان موجود ہے کہ زہری نے یہ روایت سیدنا سہل بن سعد رضی اللہ عنہ سے خود سنی ہو جیسا کہ غندر نے یہ بات بیان کی ہے، اور زہری نے یہ روایت کسی ایسے شخص سے سنی ہو جس سے وہ راضی تھے اور اس شخص کے حوالے سے سیدنا سہل بن سعد رضی اللہ عنہ سے سنی ہو۔ تو ایک مرتبہ انہوں نے سیدنا سہل بن سعد رضی اللہ عنہ کے حوالے سے اسے نقل کر دی ہو اور دوسری مرتبہ اس شخص کے حوالے سے سیدنا سہل بن سعد رضی اللہ عنہ سے نقل کیا جس سے وہ راضی تھے۔ میں نے اس روایت کے طرق کی تحقیق کی کہ مجھے کوئی ایسا شخص مل جائے جس نے اس روایت کو سیدنا سہل بن سعد رضی اللہ عنہ کے حوالے سے نقل کیا ہو، تو مجھے دنیا میں کوئی ایسا شخص نہیں ملا، صرف ابوحازم رحمہ اللہ ایسا شخص ہے، تو اس بات کا امکان موجود ہے کہ وہ شخص جس کے بارے میں زہری نے کہا تھا کہ مجھے اس شخص نے وہ حدیث بیان کی ہے جس سے میں راضی ہوں اور اس نے سیدنا سہل بن سعد رضی اللہ عنہ کے حوالے سے یہ حدیث بیان کی ہے، تو وہ شخص ابوحازم رحمہ اللہ ہو جس نے سیدنا سہل بن سعد رضی اللہ عنہ کے حوالے سے یہ روایت نقل کی ہو۔ [صحیح ابن حبان/كتاب الطهارة/حدیث: 1173]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص عورت کے چار شعبوں کے درمیان بیٹھ جائے اور پھر وہ صحبت کرے، تو اس پر غسل لازم ہو گا۔“ [صحیح ابن حبان/كتاب الطهارة/حدیث: 1174]

سیدہ عائشہ صدیقہ رضی اللہ عنہا کے بارے میں یہ بات منقول ہے، ان سے ایسے شخص کے بارے میں دریافت کیا گیا جو صحبت کرتا ہے لیکن اسے انزال نہیں ہوتا، تو سیدہ عائشہ رضی اللہ عنہا نے فرمایا: میں اور نبی اکرم صلی اللہ علیہ وسلم بھی اس طرح کیا کرتے تھے لیکن ہم دونوں اس صورت میں غسل کرتے تھے۔ [صحیح ابن حبان/كتاب الطهارة/حدیث: 1175]

سیدہ عائشہ صدیقہ رضی اللہ عنہا بیان کرتی ہیں: ”جب شرم گاہ شرم گاہ سے مل جاتی ہے، تو غسل لازم ہو جاتا ہے۔“ میں اور نبی اکرم صلی اللہ علیہ وسلم جب اس طرح کرتے تھے، تو ہم غسل کرتے تھے۔ [صحیح ابن حبان/كتاب الطهارة/حدیث: 1176]