سیدنا جابر بن سمرہ رضی اللہ عنہ بیان کرتے ہیں: نبی اکرم صلی اللہ علیہ وسلم سے بکری کا گوشت کھانے کے بعد وضو کرنے کا حکم دریافت کیا گیا، تو نبی اکرم صلی اللہ علیہ وسلم نے فرمایا: ”اگر تم چاہو، تو وضو کر لو“، آپ صلی اللہ علیہ وسلم سے بکریوں کے باڑے میں نماز ادا کرنے کے بارے میں پوچھا گیا، تو آپ صلی اللہ علیہ وسلم نے ارشاد فرمایا: ”اگر تم چاہو، تو (وہاں) نماز ادا کر لو“، آپ صلی اللہ علیہ وسلم سے اونٹ کا گوشت کھا کر وضو کرنے کے بارے میں دریافت کیا گیا، تو آپ صلی اللہ علیہ وسلم نے ارشاد فرمایا: ”تم وضو کرو“، آپ صلی اللہ علیہ وسلم سے اونٹوں کے باڑے میں نماز ادا کرنے کے بارے میں دریافت کیا گیا، تو آپ صلی اللہ علیہ وسلم نے ارشاد فرمایا: ”تم اس (جگہ) پر نماز ادا نہ کرو“۔ [صحیح ابن حبان/كتاب الطهارة/حدیث: 1157]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے دودھ پیا، پھر آپ صلی اللہ علیہ وسلم نے برتن منگوایا اور کلی کی، آپ صلی اللہ علیہ وسلم نے ارشاد فرمایا: ”اس (دودھ) میں چکناہٹ ہوتی ہے۔“ [صحیح ابن حبان/كتاب الطهارة/حدیث: 1158]

سیدنا عبداللہ بن عباس رضی اللہ عنہما بیان کرتے ہیں: نبی اکرم صلی اللہ علیہ وسلم نے دودھ پیا، پھر آپ صلی اللہ علیہ وسلم نے پانی منگوایا اور کلی کی اور ارشاد فرمایا: ”اس میں چکناہٹ ہوتی ہے۔“ [صحیح ابن حبان/كتاب الطهارة/حدیث: 1159]

سیدنا جابر رضی اللہ عنہ بیان کرتے ہیں کہ وہ لوگ ایک ڈھال پر کھجوریں رکھ کر کھا رہے تھے۔ نبی اکرم صلی اللہ علیہ وسلم ہمارے پاس سے گزرے تو ہم نے عرض کی: آپ آگے تشریف لے آئیں، آپ صلی اللہ علیہ وسلم آگے تشریف لائے، آپ صلی اللہ علیہ وسلم نے ہمارے ہمراہ کھجوریں کھائیں اور آپ صلی اللہ علیہ وسلم نے پانی کو نہیں چھوا (یعنی ازسرنو وضو نہیں کیا)۔ [صحیح ابن حبان/كتاب الطهارة/حدیث: 1160]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص میت کو غسل دیتا ہے اسے غسل کرنا چاہیے اور جو شخص میت کو اٹھاتا ہے اسے وضو کرنا چاہیے۔“ (امام ابن حبان رحمہ اللہ فرماتے ہیں:) اس روایت میں یہ بات پوشیدہ ہے، جب ان دونوں کے درمیان کوئی رکاوٹ موجود نہ ہو۔ اس بات کی دلیل کہ اس سے مراد وہ وضو ہے، جس کے بغیر نماز ادا کرنا جائز نہیں ہے۔ (اس کی دلیل یہ ہے) کہ نبی اکرم صلی اللہ علیہ وسلم نے دو ہم جنس چیزوں میں غسل کے ہمراہ وضو کو ذکر کیا ہے۔ [صحیح ابن حبان/كتاب الطهارة/حدیث: 1161]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے شانے کا گوشت تناول کیا، پھر آپ صلی اللہ علیہ وسلم نے اپنے ہاتھ کو نیچے موجود بچھونے سے پونچھ لیا، پھر آپ صلی اللہ علیہ وسلم نے اٹھ کر نماز ادا کی۔ [صحیح ابن حبان/كتاب الطهارة/حدیث: 1162]

سیدنا ابوسعید خدری رضی اللہ عنہ بیان کرتے ہیں کہ نبی اکرم صلی اللہ علیہ وسلم ایک لڑکے کے پاس سے گزرے جو بکری کی کھال اتار رہا تھا۔ آپ صلی اللہ علیہ وسلم نے اس سے فرمایا: ”تم ایک طرف ہٹو میں تمہیں دکھاتا ہوں، کیونکہ میں نے یہ بات نوٹ کی ہے، تم اچھی طرح سے کھال نہیں اتار رہے۔“ راوی بیان کرتے ہیں: پھر نبی اکرم صلی اللہ علیہ وسلم نے اپنا ہاتھ اس کی کھال اور گوشت کے درمیان رکھ لیا۔ آپ صلی اللہ علیہ وسلم اسے اندر لے گئے یہاں تک کہ بغل تک وہ اس میں چھپ گیا، پھر آپ صلی اللہ علیہ وسلم نے ارشاد فرمایا: ”اے لڑکے! تم اس طرح کھال اتارو۔“ پھر نبی اکرم صلی اللہ علیہ وسلم تشریف لے گئے۔ آپ صلی اللہ علیہ وسلم نے نماز ادا کی اور آپ صلی اللہ علیہ وسلم نے ازسرنو وضو نہیں کیا اور پانی کو چھوا نہیں۔ [صحیح ابن حبان/كتاب الطهارة/حدیث: 1163]

سیدنا انس رضی اللہ عنہ بیان کرتے ہیں کہ سیدہ ام سلیم رضی اللہ عنہا نے نبی اکرم صلی اللہ علیہ وسلم سے ایسی خاتون کے بارے میں دریافت کیا جو خواب میں وہی چیز دیکھتی ہے جو مرد دیکھتا ہے (یعنی اس خاتون کو احتلام ہو جاتا ہے)، تو نبی اکرم صلی اللہ علیہ وسلم نے ارشاد فرمایا: ”جب عورت کو انزال ہو جائے، تو اسے غسل کرنا چاہیے۔“ [صحیح ابن حبان/كتاب الطهارة/حدیث: 1164]

سیدہ ام سلمہ رضی اللہ عنہا کی صاحبزادی سیدہ زینب رضی اللہ عنہا (اپنی والدہ) سیدہ ام سلمہ رضی اللہ عنہا کا یہ بیان نقل کرتی ہیں کہ ابوطلحہ رضی اللہ عنہ کی اہلیہ سیدہ ام سلیم رضی اللہ عنہا نبی اکرم صلی اللہ علیہ وسلم کی خدمت میں حاضر ہوئیں اور عرض کی: یا رسول اللہ! بے شک اللہ تعالیٰ حق بات سے حیا نہیں کرتا، اگر عورت کو احتلام ہو جائے تو کیا اس پر غسل لازم ہوگا؟ تو نبی اکرم صلی اللہ علیہ وسلم نے ارشاد فرمایا: ”جی ہاں! جبکہ وہ پانی (یعنی منی) کو دیکھے (یعنی جب اس کی منی خارج ہوئی ہو)۔“ [صحیح ابن حبان/كتاب الطهارة/حدیث: 1165]

عروہ بن زبیر نبی اکرم صلی اللہ علیہ وسلم کی زوجہ محترمہ کے حوالے سے نقل کرتے ہیں کہ سیدہ ام سلیم انصاریہ رضی اللہ عنہا، جو سیدنا انس بن مالک رضی اللہ عنہ کی والدہ ہیں، انہوں نے عرض کی: یا رسول اللہ! بے شک اللہ تعالیٰ حق بات بیان کرنے سے حیا نہیں فرماتا ﴿إِنَّ اللَّهَ لَا يَسْتَحْيِي مِنَ الْحَقِّ﴾ [سورة الأحزاب: 53] ، کیا کسی عورت پر ایسی صورت میں غسل لازم ہو گا جب وہ نیند کے دوران پانی دیکھ لیتی ہے، جس طرح مرد دیکھتا ہے؟ (اس عورت کو احتلام ہو جاتا ہے) تو کیا وہ غسل کرے گی یا نہیں؟ نبی اکرم صلی اللہ علیہ وسلم نے ارشاد فرمایا: ”وہ غسل کرے۔“ نبی اکرم صلی اللہ علیہ وسلم کی زوجہ محترمہ بیان کرتی ہیں: میں اس عورت کی طرف متوجہ ہوئی اور میں نے کہا: تم پر افسوس ہے! کیا کوئی عورت بھی اس طرح کا خواب دیکھتی ہے؟ نبی اکرم صلی اللہ علیہ وسلم کی زوجہ محترمہ بیان کرتی ہیں کہ پھر نبی اکرم صلی اللہ علیہ وسلم ان زوجہ محترمہ کی طرف متوجہ ہوئے اور آپ نے ارشاد فرمایا: ”تمہارے ہاتھ خاک آلود ہوں، پھر (بچے کی ماں) کے ساتھ مشابہت کس وجہ سے ہوتی ہے؟“ [صحیح ابن حبان/كتاب الطهارة/حدیث: 1166]