عبیداللہ بن عبداللہ اپنے والد کا یہ بیان نقل کرتے ہیں کہ میں پوچھنا چاہتا تھا اور مجھے اس بات کی شدید خواہش تھی کہ مجھے کوئی ایسا شخص مل جائے جو مجھے بتائے کہ نبی اکرم صلی اللہ علیہ وسلم نے چاشت کی نماز ادا کی ہے، تو مجھے ایسا کوئی شخص نہیں ملا جو مجھے اس بارے میں بتاتا، صرف سیدہ ام ہانی بنت ابوطالب رضی اللہ عنہا نے یہ بات بتائی۔ انہوں نے بتایا کہ فتح مکہ کے دن وہ دن چڑھ جانے کے بعد نبی اکرم صلی اللہ علیہ وسلم کی خدمت میں حاضر ہوئیں۔ نبی اکرم صلی اللہ علیہ وسلم کے حکم کے تحت آپ صلی اللہ علیہ وسلم کے لیے پردہ تان دیا گیا، آپ صلی اللہ علیہ وسلم نے غسل کیا پھر آپ صلی اللہ علیہ وسلم نے اٹھ کر آٹھ رکعات ادا کیں۔ مجھے یہ اندازہ نہیں ہو سکا کہ ان رکعات میں آپ صلی اللہ علیہ وسلم کا قیام زیادہ طویل تھا یا رکوع زیادہ طویل تھا یا سجدہ زیادہ طویل تھا یا یہ سب ایک دوسرے کے قریب قریب تھے۔ سیدہ ام ہانی رضی اللہ عنہا بیان کرتی ہیں: میں نے اس سے پہلے یا اس کے بعد نبی اکرم صلی اللہ علیہ وسلم کو یہ نوافل ادا کرتے ہوئے نہیں دیکھا۔ [صحیح ابن حبان/كتاب الطهارة/حدیث: 1187]

سیدہ ام ہانی بنت ابوطالب رضی اللہ عنہا بیان کرتی ہیں: میں فتح مکہ کے موقع پر نبی اکرم صلی اللہ علیہ وسلم کی خدمت میں حاضر ہوئی تو میں نے آپ کو غسل کرتے ہوئے پایا۔ آپ کی صاحب زادی سیدہ فاطمہ رضی اللہ عنہا نے کپڑے کے ذریعے پردہ تان رکھا تھا۔ سیدہ ام ہانی رضی اللہ عنہا بیان کرتی ہیں: میں نے سلام کیا، تو نبی اکرم صلی اللہ علیہ وسلم نے دریافت کیا: ”کون ہے؟“ میں نے عرض کی: ام ہانی بنت ابوطالب۔ نبی اکرم صلی اللہ علیہ وسلم نے فرمایا: ”ام ہانی کو خوش آمدید۔“ پھر جب آپ غسل کر کے فارغ ہوئے، تو آپ نے کھڑے ہو کر آٹھ رکعات نماز ادا کی جس میں آپ نے ایک ہی کپڑے کو «الْتِحَاف» کے طور پر لپیٹا ہوا تھا۔ جب آپ نے نماز مکمل کر لی تو میں نے آپ کی خدمت میں عرض کی: یا رسول اللہ! میرے ماں جائے سیدنا علی بن ابوطالب رضی اللہ عنہ یہ کہتے ہیں، وہ ایک ایسے شخص کو قتل کر دیں گے، جسے میں پناہ دے چکی ہوں یعنی فلاں بن ہبیرہ، تو نبی اکرم صلی اللہ علیہ وسلم نے ارشاد فرمایا: ”اے ام ہانی! جسے تم نے پناہ دی اسے ہم بھی پناہ دیتے ہیں۔“ (سیدہ ام ہانی رضی اللہ عنہا) بیان کرتی ہیں، یہ چاشت کے وقت کی بات ہے۔ [صحیح ابن حبان/كتاب الطهارة/حدیث: 1188]

سیدہ ام ہانی رضی اللہ عنہا بیان کرتی ہیں کہ نبی اکرم صلی اللہ علیہ وسلم مکہ مکرمہ کے بالائی حصے میں پڑاؤ کیے ہوئے تھے۔ میں آپ کی خدمت میں حاضر ہوئی تو سیدنا ابوذر غفاری رضی اللہ عنہ ایک بڑے برتن میں پانی لے کر آپ کی خدمت میں حاضر ہوئے۔ سیدہ ام ہانی رضی اللہ عنہا بیان کرتی ہیں: میں نے اس برتن میں آٹے کا نشان دیکھا۔ سیدہ ام ہانی رضی اللہ عنہا بیان کرتی ہیں کہ پھر سیدنا ابوذر غفاری رضی اللہ عنہ نے آپ کے لیے پردہ تان لیا، پھر آپ نے غسل کیا، پھر نبی اکرم صلی اللہ علیہ وسلم نے سیدنا ابوذر غفاری رضی اللہ عنہ کے لیے پردہ تان لیا، پھر انہوں نے غسل کیا، پھر نبی اکرم صلی اللہ علیہ وسلم نے آٹھ رکعات نماز ادا کی۔ یہ چاشت کے وقت کی بات ہے۔ (امام ابن حبان رحمہ اللہ فرماتے ہیں:) اس بات کا امکان موجود ہے کہ فتح مکہ کے دن جب نبی اکرم صلی اللہ علیہ وسلم نے غسل کیا تھا، تو آپ کی صاحبزادی سیدہ فاطمہ رضی اللہ عنہا اور سیدنا ابوذر رضی اللہ عنہ دونوں نے پردہ تان لیا ہو، جو ایک ہی کپڑے کے ذریعے ہو، تو سیدہ ام ہانی رضی اللہ عنہا کے غلام ابو مرہ نے وہ روایت نقل کر دی جس میں صرف سیدہ فاطمہ رضی اللہ عنہا کا ذکر ہے اور مطلب بن حنطب نے وہ روایت نقل کر دی جس میں صرف سیدنا ابوذر غفاری رضی اللہ عنہ کا ذکر ہے۔ اس صورت میں ان دونوں روایات میں کوئی تضاد اور اختلاف نہیں رہتا؛ کیونکہ اس دن نبی اکرم صلی اللہ علیہ وسلم نے صرف ایک ہی مرتبہ غسل کیا تھا۔ یہی وجہ ہے کہ جب سیدنا ابوذر غفاری رضی اللہ عنہ نے غسل کرنے کا ارادہ کیا، تو نبی اکرم صلی اللہ علیہ وسلم نے ان کے لیے پردہ تان لیا تھا۔ سیدہ فاطمہ رضی اللہ عنہا نے ایسا نہیں کیا تھا۔ [صحیح ابن حبان/كتاب الطهارة/حدیث: 1189]

سیدنا عبداللہ بن عباس رضی اللہ عنہما بیان کرتے ہیں کہ میری خالہ سیدہ میمونہ رضی اللہ عنہا نے مجھے یہ بات بتائی، وہ بیان کرتی ہیں: میں نے نبی اکرم صلی اللہ علیہ وسلم کے لیے غسلِ جنابت کے لیے پانی رکھا۔ سیدہ میمونہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے اپنے دونوں ہاتھ دو مرتبہ یا تین مرتبہ دھوئے، پھر آپ صلی اللہ علیہ وسلم نے اپنا دایاں ہاتھ پانی میں داخل کیا، پھر آپ صلی اللہ علیہ وسلم نے اپنی شرم گاہ کو صاف کیا، پھر آپ صلی اللہ علیہ وسلم نے اپنے بائیں ہاتھ پر پانی انڈیل کر اسے دھویا، آپ صلی اللہ علیہ وسلم نے نماز کے وضو کی طرح وضو کیا۔ پھر آپ صلی اللہ علیہ وسلم نے اپنا بایاں ہاتھ زمین پر رکھ کر اسے اچھی طرح ملا، پھر آپ صلی اللہ علیہ وسلم نے نماز کے وضو کی طرح وضو کیا، پھر آپ صلی اللہ علیہ وسلم نے اپنے سر پر دونوں ہاتھ ملا کر پانی بہایا، پھر آپ صلی اللہ علیہ وسلم اپنی جگہ سے ایک طرف ہٹ گئے، پھر آپ صلی اللہ علیہ وسلم نے اپنے دونوں پاؤں دھو لیے، پھر میں رومال لے کر آپ صلی اللہ علیہ وسلم کی خدمت میں حاضر ہوئی تو آپ صلی اللہ علیہ وسلم نے اسے قبول نہیں کیا۔ [صحیح ابن حبان/كتاب الطهارة/حدیث: 1190]

ابوسلمہ بن عبدالرحمن بیان کرتے ہیں کہ سیدہ عائشہ رضی اللہ عنہا نے نبی اکرم صلی اللہ علیہ وسلم کے غسل جنابت کا طریقہ بیان کیا، وہ بیان کرتی ہیں کہ نبی اکرم صلی اللہ علیہ وسلم اپنے دونوں ہاتھ تین مرتبہ دھوتے تھے، اپنے دائیں ہاتھ کے ذریعے اپنے بائیں ہاتھ پر پانی بہاتے تھے اور اپنی شرم گاہ پر لگی چیز کو دھوتے تھے۔ پھر آپ صلی اللہ علیہ وسلم تین مرتبہ کلی کرتے تھے، ناک میں پانی ڈالتے تھے، پھر اپنے بازوؤں اور چہرے کو تین تین مرتبہ دھوتے تھے۔ پھر آپ صلی اللہ علیہ وسلم اپنے سر پر پانی بہاتے تھے، پھر آپ صلی اللہ علیہ وسلم اپنے پورے جسم پر پانی بہا لیتے تھے۔ [صحیح ابن حبان/كتاب الطهارة/حدیث: 1191]

معاذہ عدویہ رحمہا اللہ بیان کرتی ہیں: میں نے سیدہ عائشہ رضی اللہ عنہا سے دریافت کیا: کیا کوئی عورت اپنے شوہر کے ہمراہ ایک ہی برتن کے ساتھ غسل جنابت کر سکتی ہے، جبکہ وہ دونوں ایک ساتھ غسل کریں؟ سیدہ عائشہ رضی اللہ عنہا نے جواب دیا: ”جی ہاں، پانی پاک ہوتا ہے، اسے جنابت لاحق نہیں ہوتی، میں اور نبی اکرم صلی اللہ علیہ وسلم ایک ہی برتن میں غسل کیا کرتے تھے۔ میں پہلے آپ صلی اللہ علیہ وسلم کے ہاتھ پر پانی بہاتی تھی، اس سے پہلے کہ آپ صلی اللہ علیہ وسلم اپنا ہاتھ پانی میں داخل کریں۔“ [صحیح ابن حبان/كتاب الطهارة/حدیث: 1192]

سیدہ عائشہ رضی اللہ عنہا بیان کرتی ہیں: میں اور نبی اکرم صلی اللہ علیہ وسلم ایک ہی برتن سے غسل جنابت کیا کرتے تھے، ہم اس میں سے ایک ساتھ غسل شروع کرتے تھے۔ [صحیح ابن حبان/كتاب الطهارة/حدیث: 1193]

سیدہ عائشہ رضی اللہ عنہا بیان کرتی ہیں: میں اور نبی اکرم صلی اللہ علیہ وسلم ایک ہی برتن سے غسلِ جنابت کیا کرتے تھے، ہم دونوں اس میں سے چلو سے پانی لیا کرتے تھے۔ [صحیح ابن حبان/كتاب الطهارة/حدیث: 1194]

سیدہ عائشہ رضی اللہ عنہا بیان کرتی ہیں: میں اور نبی اکرم صلی اللہ علیہ وسلم ایک برتن سے غسل کیا کرتے تھے، آپ صلی اللہ علیہ وسلم آغاز کرتے ہوئے فرماتے تھے: «أَبْقِي لِي، أَبْقِي لِي» ”میرے لیے بھی باقی رہنے دینا، میرے لیے بھی باقی (پانی) رہنے دینا۔“ [صحیح ابن حبان/كتاب الطهارة/حدیث: 1195]

سیدہ عائشہ رضی اللہ عنہا بیان کرتی ہیں: نبی اکرم صلی اللہ علیہ وسلم جب غسل جنابت کرتے تھے، تو سب سے پہلے دونوں ہاتھ دھوتے تھے پھر وضو کرتے تھے جس طرح آپ صلی اللہ علیہ وسلم نماز کے لیے وضو کرتے تھے، پھر آپ صلی اللہ علیہ وسلم اپنا ہاتھ پانی میں داخل کرتے تھے اس کے ذریعے اپنے بالوں کی جڑوں کا خلال کرتے تھے، پھر آپ صلی اللہ علیہ وسلم اپنے سر پر تین لپ پانی کے بہا لیتے تھے، پھر آپ صلی اللہ علیہ وسلم اپنے پورے جسم پر پانی بہا لیتے تھے۔ [صحیح ابن حبان/كتاب الطهارة/حدیث: 1196]