سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم جب جنابت کی حالت میں سونا چاہتے تو آپ صلی اللہ علیہ وسلم سونے سے پہلے نماز کے وضو کی طرح وضو کر لیتے تھے۔ [صحیح ابن حبان/كتاب الطهارة/حدیث: 1217]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم جب جنابت کی حالت میں سونے کا ارادہ کرتے تھے تو آپ صلی اللہ علیہ وسلم اس وقت تک نہیں سوتے تھے جب تک وضو نہیں کر لیتے تھے، اور جب آپ صلی اللہ علیہ وسلم (جنابت کی حالت) میں کچھ کھانے کا ارادہ کرتے تھے تو آپ صلی اللہ علیہ وسلم دونوں ہاتھ دھو کر کھاتے تھے۔ [صحیح ابن حبان/كتاب الطهارة/حدیث: 1218]

سیدنا جابر رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا ہے: ”ہر مسلمان پر سات دنوں میں ایک بار غسل کرنا لازم ہے، اور یہ جمعہ کا دن ہے۔“ [صحیح ابن حبان/كتاب الطهارة/حدیث: 1219]

سیدنا عبداللہ بن عمر رضی اللہ عنہما سیدہ حفصہ رضی اللہ عنہا کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں: ”ہر بالغ شخص کو جمعہ کے لیے جانا لازم ہے، اور جو شخص (جمعہ ادا کرنے کے لیے) جائے اس پر غسل کرنا لازم ہے۔“ (امام ابن حبان رحمہ اللہ فرماتے ہیں:) (اس روایت میں یہ بات مذکور ہے کہ ہر بالغ شخص پر جمعے کی نماز کے لیے آنا فرض ہے، اس میں علت یہ ہے کہ احتلام ہونا بالغ ہونے کا نشان ہے، تو اس کا مطلب یہ ہے کہ جب بچہ بالغ ہو جائے یا عمر کے اعتبار سے پندرہ سال کا ہو جائے، تو وہ بالغ شمار ہو گا، اگرچہ اسے احتلام نہ ہوا ہو۔ اس کے نزدیک اللہ تعالیٰ کا یہ فرمان ہے: ﴿وَإِذَا بَلَغَ الْأَطْفَالُ مِنكُمُ الْحُلُمَ فَلْيَسْتَأْذِنُوا كَمَا اسْتَأْذَنَ الَّذِينَ مِن قَبْلِهِمْ﴾ [سورة النور: 59] ”اور جب تمہارے بچے بالغ ہو جائیں، تو وہ اجازت طلب کریں گے جس طرح ان لوگوں نے اجازت لی جن کا ذکر پہلے ہوا ہے“۔ تو اس آیت میں اللہ تعالیٰ نے اجازت لینے کا حکم اس شخص کو دیا ہے، جو بالغ ہو جاتا ہے کیونکہ یہاں لفظ «الْحُلُمِ» سے مراد بالغ ہونا ہے اور بعض اوقات بچہ احتلام کے بغیر بالغ ہو جاتا ہے اور وہ اجازت لینے کے حکم کا مخاطب بن جاتا ہے جس طرح احتلام کے ہمراہ اس حکم کا مخاطب بنتا ہے)۔ [صحیح ابن حبان/كتاب الطهارة/حدیث: 1220]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”بے شک اسلام کے فطری احکام میں جمعہ کے دن غسل کرنا، مسواک کرنا، مونچھیں چھوٹی رکھنا اور داڑھی بڑی رکھنا شامل ہے، کیونکہ مجوسی اپنی مونچھیں بڑھاتے ہیں اور داڑھی چھوٹی رکھتے ہیں، تو تم لوگ ان کی مخالفت کرو، تم لوگ اپنی مونچھیں چھوٹی رکھو اور داڑھی بڑھاؤ۔“ [صحیح ابن حبان/كتاب الطهارة/حدیث: 1221]

عبداللہ بن ابی قتادہ بیان کرتے ہیں کہ سیدنا ابو قتادہ رضی اللہ عنہ میرے ہاں تشریف لائے، میں نے جمعہ کے دن غسل کیا، تو انہوں نے دریافت کیا: کیا تم نے یہ غسلِ جنابت کیا ہے؟ میں نے جواب دیا: جی ہاں! انہوں نے فرمایا: تم دوبارہ غسل کرو، کیونکہ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جو شخص جمعہ کے دن غسل کرتا ہے وہ آئندہ جمعہ تک طہارت کی حالت میں رہتا ہے۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”وہ شخص اگلے جمعے تک پاک رہتا ہے“ اس سے آپ کی مراد یہ ہے کہ وہ گناہوں سے پاک رہتا ہے کیونکہ جو شخص شرائط کے ہمراہ جمعے کی نماز میں شریک ہوتا ہے، اس کی اس جمعے اور اگلے جمعے کے درمیانی گناہوں کی مغفرت ہو جاتی ہے۔ [صحیح ابن حبان/كتاب الطهارة/حدیث: 1222]

عبداللہ بن دینار بیان کرتے ہیں کہ انہوں نے سیدنا عبداللہ بن عمر رضی اللہ عنہما کو یہ بیان کرتے ہوئے سنا کہ نبی اکرم صلی اللہ علیہ وسلم نے ارشاد فرمایا: ”جب تم جمعہ کے لیے آؤ تو غسل کر لو۔“ [صحیح ابن حبان/كتاب الطهارة/حدیث: 1223]

سیدنا عبداللہ بن عمر رضی اللہ عنہما، نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص جمعہ کے لیے آئے اسے غسل کر لینا چاہیے۔“ [صحیح ابن حبان/كتاب الطهارة/حدیث: 1224]

سیدنا عبداللہ بن عمر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص جمعہ کے لیے آئے اسے غسل کر لینا چاہیے۔“ [صحیح ابن حبان/كتاب الطهارة/حدیث: 1225]

سیدنا عبداللہ بن عمر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”مردوں اور خواتین میں جو جمعہ کے لیے آئے اسے غسل کر لینا چاہیے۔“ [صحیح ابن حبان/كتاب الطهارة/حدیث: 1226]