سیدہ عائشہ صدیقہ رضی اللہ عنہا بیان کرتی ہیں کہ لوگ نواحی علاقوں سے اپنے گھروں سے جمعہ کی نماز کے لیے آیا کرتے تھے، وہ لوگ عبا پہن کر آتے تھے، انہیں غبار اور پسینہ لاحق ہوتا تھا جس کی وجہ سے ان کے جسم سے بو آتی تھی۔ ان میں سے ایک شخص نبی اکرم صلی اللہ علیہ وسلم کی خدمت میں حاضر ہوا، اس وقت نبی اکرم صلی اللہ علیہ وسلم میرے ہاں موجود تھے، تو نبی اکرم صلی اللہ علیہ وسلم نے ارشاد فرمایا: ”اگر تم اپنے اس دن کے لیے اچھی طرح طہارت حاصل کر لو (یعنی غسل کر لو تو یہ مناسب ہو گا)۔“ [صحیح ابن حبان/كتاب الطهارة/حدیث: 1237]

سیدنا ابوہریرہ رضی اللہ عنہ بیان کرتے ہیں کہ ثمامہ حنفی کو قید کر لیا گیا۔ نبی اکرم صلی اللہ علیہ وسلم ان سے ملنے کے لیے آئے، تو آپ صلی اللہ علیہ وسلم نے دریافت فرمایا: ”اے ثمامہ! تمہارے پاس کیا ہے؟“ اس نے کہا: اگر آپ قتل کر دیتے ہیں، تو پھر ایک خون والے شخص کو قتل کریں گے اور اگر آپ احسان کریں گے تو ایک شکر گزار شخص پر احسان کریں گے اور اگر آپ مال حاصل کرنا چاہتے ہیں، تو جو آپ چاہتے ہیں وہ آپ کو دے دیا جائے گا۔ راوی بیان کرتے ہیں کہ نبی اکرم صلی اللہ علیہ وسلم کے اصحاب نے فدیہ لینے والی صورت کو پسند کیا، انہوں نے کہا: اس کو قتل کر کے ہمیں کیا ملے گا؟ پھر ایک دن نبی کریم صلی اللہ علیہ وسلم اس کے پاس سے گزرے تو اس نے اسلام قبول کر لیا۔ نبی کریم صلی اللہ علیہ وسلم نے اسے سیدنا ابوطلحہ رضی اللہ عنہ کے باغ کی طرف بھیجا اور یہ ہدایت کی کہ وہ غسل کر لے، انہوں نے غسل کر کے دو رکعات نماز ادا کی۔ نبی اکرم صلی اللہ علیہ وسلم نے ارشاد فرمایا: ”تمہارے ساتھی کا اسلام عمدہ ہے۔“ [صحیح ابن حبان/كتاب الطهارة/حدیث: 1238]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے نجد کی سمت میں ایک مہم روانہ کی، وہ لوگ بنو حنیفہ سے تعلق رکھنے والے ایک شخص کو پکڑ کر لے آئے جس کا نام ثمامہ بن اثال تھا، یہ اہل یمامہ کا سردار تھا۔ لوگوں نے اسے مسجد کے ایک ستون کے ساتھ باندھ دیا۔ نبی اکرم صلی اللہ علیہ وسلم ان کے پاس تشریف لے گئے اور آپ صلی اللہ علیہ وسلم نے فرمایا: ”تمہارے من میں کیا ہے، اے ثمامہ؟“ وہ بولا: اے محمد صلی اللہ علیہ وسلم ! میرے پاس بھلائی ہے، اگر آپ مجھے قتل کر دیتے ہیں تو آپ ایک خون والے شخص کو قتل کریں گے اور اگر آپ انعام کرتے ہیں تو آپ ایک شکر گزار شخص پر احسان کریں گے اور اگر آپ مال حاصل کرنا چاہتے ہیں تو آپ مانگیں، جو مانگیں گے آپ کو دیا جائے گا، تو نبی اکرم صلی اللہ علیہ وسلم نے اسے اس کے حال پر چھوڑ دیا، یہاں تک کہ اگلا دن آیا تو نبی اکرم صلی اللہ علیہ وسلم نے اس سے دریافت کیا: ”اے ثمامہ! تمہارے ذہن میں کیا ہے؟“ وہ بولا: وہی ہے جو میں نے آپ کو کہا تھا کہ اگر آپ انعام کریں گے تو ایک شکر گزار پر کریں گے اور اگر قتل کرتے ہیں تو ایک خون والے شخص کو قتل کرتے ہیں اور اگر آپ مال حاصل کرنا چاہتے ہیں تو آپ مانگیے، آپ جو مانگیں گے آپ کو مل جائے گا۔ نبی اکرم صلی اللہ علیہ وسلم نے پھر اسے چھوڑ دیا، پھر اگلا دن آ گیا تو نبی اکرم صلی اللہ علیہ وسلم نے اس سے دریافت کیا: ”اے ثمامہ! تمہارے ذہن میں کیا ہے؟“ وہ بولا: میرے ذہن میں وہی ہے جو میں آپ کو بتا چکا ہوں، اگر آپ انعام کریں گے تو شکر گزار شخص پر انعام کریں گے، اگر آپ قتل کریں گے تو ایک خون والے شخص کو قتل کریں گے اور اگر آپ مال حاصل کرنا چاہتے ہیں تو آپ مانگیے، جو چاہیں وہ آپ کو دیا جائے گا۔ نبی اکرم صلی اللہ علیہ وسلم نے ارشاد فرمایا: ”ثمامہ کو چھوڑ دو۔“ پھر وہ مسجد کے قریب کھجوروں کے باغ میں چلے گئے، انہوں نے وہاں غسل کیا پھر وہ مسجد میں آئے اور بولے: میں اس بات کی گواہی دیتا ہوں کہ اللہ تعالیٰ کے علاوہ اور کوئی معبود نہیں ہے اور بے شک محمد صلی اللہ علیہ وسلم اللہ کے رسول ہیں۔ اے محمد صلی اللہ علیہ وسلم ! اللہ کی قسم! روئے زمین پر کسی بھی شخص کا چہرہ میرے نزدیک آپ کے چہرے سے زیادہ ناپسندیدہ نہیں تھا لیکن اب میری یہ حالت ہے کہ آپ کا چہرہ میرے نزدیک تمام چہروں سے زیادہ محبوب ہے۔ اللہ کی قسم! آپ کے دین سے زیادہ ناپسندیدہ دین اور کوئی نہیں تھا لیکن اب میری یہ حالت ہے کہ آپ کا دین میرے نزدیک تمام ادیان سے زیادہ پسندیدہ ہے۔ اللہ کی قسم! آپ کے شہر سے زیادہ ناپسندیدہ میرے نزدیک اور کوئی شہر نہیں تھا لیکن اب یہ حالت ہے کہ آپ کا شہر میرے نزدیک سب سے زیادہ پسندیدہ ہے۔ آپ کے گھڑ سواروں نے مجھے پکڑ لیا، میں عمرے کے لیے جا رہا تھا اب آپ کی کیا رائے ہے؟ تو نبی اکرم صلی اللہ علیہ وسلم نے اسے خوشخبری دی (مبارک باد دی) اور اسے عمرہ کرنے کی ہدایت کی۔ جب وہ مکہ آیا تو کسی نے اس سے کہا: تم بے دین ہو گئے ہو؟ اس نے جواب دیا: جی نہیں، بلکہ میں نے محمد صلی اللہ علیہ وسلم کے ہمراہ اسلام قبول کیا ہے جو اللہ کے رسول ہیں، اللہ کی قسم! ثمامہ کی طرف سے تمہارے پاس گندم کا ایک دانہ بھی اس وقت تک نہیں آئے گا جب تک اللہ کے رسول صلی اللہ علیہ وسلم اس کی اجازت نہیں دیں گے۔ (امام ابن حبان رحمہ اللہ فرماتے ہیں:) اس روایت میں اس بات کی دلیل موجود ہے کہ پرہیزگار لوگ (مسلمان) حربیوں کے علاقے میں تجارت کر سکتے ہیں۔ [صحیح ابن حبان/كتاب الطهارة/حدیث: 1239]

خلیفہ بن حصین، سیدنا قیس بن عاصم رضی اللہ عنہ کے بارے میں یہ بات نقل کرتے ہیں کہ انہوں نے جب اسلام قبول کیا، تو نبی اکرم صلی اللہ علیہ وسلم نے انہیں یہ ہدایت کی کہ: ”وہ پانی اور بیری کے پتوں کے ذریعے غسل کریں۔“ [صحیح ابن حبان/كتاب الطهارة/حدیث: 1240]

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”پانی کو کوئی چیز ناپاک نہیں کرتی ہے۔“ [صحیح ابن حبان/كتاب الطهارة/حدیث: 1241]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم کی ازواج میں سے ایک خاتون نے غسلِ جنابت کیا، نبی اکرم صلی اللہ علیہ وسلم تشریف لائے اور ان کے بچائے ہوئے پانی سے وضو کرنے لگے، ان خاتون نے آپ کی خدمت میں عرض کی: (یہ ان کے غسل کا بچا ہوا پانی ہے) تو نبی اکرم صلی اللہ علیہ وسلم نے ارشاد فرمایا: ”پانی کو کوئی چیز ناپاک نہیں کرتی ہے۔“ [صحیح ابن حبان/كتاب الطهارة/حدیث: 1242]

سیدنا ابوہریرہ رضی اللہ عنہ بیان کرتے ہیں کہ ایک شخص نے نبی اکرم صلی اللہ علیہ وسلم سے سوال کیا، اس نے عرض کی: ”یا رسول اللہ! ہم سمندری سفر پر جاتے ہیں، ہم اپنے ساتھ بہت تھوڑا سا پانی لے کر جاتے ہیں، اگر ہم اس کے ذریعے وضو کر لیتے ہیں، تو ہم پیاسے رہ جاتے ہیں، کیا ہم سمندری پانی کے ذریعے وضو کر لیا کریں؟“ نبی اکرم صلی اللہ علیہ وسلم نے ارشاد فرمایا: ”اس کا پانی پاک ہے، اور اس کا مردار حلال ہے۔“ [صحیح ابن حبان/كتاب الطهارة/حدیث: 1243]

سیدنا جابر رضی اللہ عنہ بیان کرتے ہیں کہ نبی اکرم صلی اللہ علیہ وسلم سے سمندر کے پانی کے بارے میں دریافت کیا گیا، تو آپ نے ارشاد فرمایا: ”اس کا پانی پاک ہے، اور اس کا مردار حلال ہے۔“ [صحیح ابن حبان/كتاب الطهارة/حدیث: 1244]

سیدہ ام ہانی رضی اللہ عنہا بیان کرتی ہیں کہ سیدہ میمونہ رضی اللہ عنہا اور نبی اکرم صلی اللہ علیہ وسلم نے ایک ہی برتن میں (موجود پانی) سے غسل کیا تھا، جس میں آٹے کا نشان موجود تھا۔ [صحیح ابن حبان/كتاب الطهارة/حدیث: 1245]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جب مکھی کسی برتن میں گر جائے، تو اس مکھی کے ایک پر میں بیماری ہوتی ہے اور دوسرے پر میں شفا ہوتی ہے، وہ اپنے اس پر کو بچا کے رکھتی ہے جس میں بیماری ہوتی ہے، تو آدمی کو چاہیے کہ مکمل طور پر اسے ڈبو کر باہر نکالے۔“ [صحیح ابن حبان/كتاب الطهارة/حدیث: 1246]