سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم «الْحِلَابِ» سے غسل فرماتے تھے (اس سے مراد وہ برتن ہے جس میں اونٹنی کا دودھ آ جاتا ہے)، وہ اتنا ہوتا تھا، ابوعاصم رحمہ اللہ نے اپنے دونوں ہاتھوں کے ذریعے اشارہ کر کے یہ بات بتائی، نبی اکرم صلی اللہ علیہ وسلم اپنے دائیں پہلو پر پانی انڈیلتے تھے، پھر آپ صلی اللہ علیہ وسلم دونوں ہاتھوں میں پانی لے کر اسے جسم پر بہا لیتے تھے۔ [صحیح ابن حبان/كتاب الطهارة/حدیث: 1197]

سیدہ ام سلمہ رضی اللہ عنہا بیان کرتی ہیں کہ انہوں نے نبی اکرم صلی اللہ علیہ وسلم کی خدمت میں عرض کی: میں ایسی خاتون ہوں جس نے اپنے بالوں کی مینڈھیاں کی ہوتی ہیں، یا باندھی ہوتی ہیں، تو کیا میں جنابت کے لیے انہیں کھول لیا کروں؟ نبی اکرم صلی اللہ علیہ وسلم نے ارشاد فرمایا: ”تمہارے لیے اتنا کافی ہے، تم اپنے سر پر تین لپ بہا لیا کرو، پھر اپنے پورے جسم پر پانی بہا لو، اس طرح تم پاک ہو جاؤ گی۔“ [صحیح ابن حبان/كتاب الطهارة/حدیث: 1198]

سیدہ عائشہ رضی اللہ عنہا بیان کرتی ہیں: ایک خاتون نبی اکرم صلی اللہ علیہ وسلم کی خدمت میں حاضر ہوئی، اس نے آپ صلی اللہ علیہ وسلم سے غسلِ حیض کے بارے میں دریافت کیا، تو نبی اکرم صلی اللہ علیہ وسلم نے اسے یہ ہدایت کی: ”پانی اور بیری کے پتوں کے ذریعے غسل کرے، پھر وہ روئی لے کر اس کے ذریعے پاکیزگی حاصل کرے“ اس نے عرض کی: میں کیسے پاکیزگی حاصل کروں؟ نبی اکرم صلی اللہ علیہ وسلم نے ارشاد فرمایا: ”تم اس کے ذریعے پاکیزگی حاصل کرو۔“ اس نے عرض کی: میں اس کے ذریعے کیسے پاکیزگی حاصل کروں؟ تو نبی اکرم صلی اللہ علیہ وسلم نے اپنا دستِ مبارک چہرے پر رکھ لیا اور فرمایا: ” «سُبْحَانَ اللّٰهِ» ”سبحان اللہ“ تم اس کے ذریعے پاکیزگی حاصل کرو۔“ سیدہ عائشہ رضی اللہ عنہا بیان کرتی ہیں: میں نے اس عورت کو اپنی طرف کھینچا اور میں نے اسے بتایا کہ تم اس کے ذریعے خون کے نشانات صاف کرو۔ [صحیح ابن حبان/كتاب الطهارة/حدیث: 1199]

سیدہ عائشہ رضی اللہ عنہا بیان کرتی ہیں کہ ایک خاتون نے نبی اکرم صلی اللہ علیہ وسلم سے حیض کے بارے میں دریافت کیا کہ وہ اس کے بعد غسل کیسے کرے گی؟ تو نبی اکرم صلی اللہ علیہ وسلم نے ارشاد فرمایا: ”تم مشک لگا ہوا روئی کا ٹکڑا لو اور اس کے ذریعے وضو کرو۔“ اس نے عرض کی: میں اس کے ذریعے کیسے وضو کروں؟ تو نبی اکرم صلی اللہ علیہ وسلم نے فرمایا: ”تم اس کے ذریعے وضو کرو۔“ سیدہ عائشہ رضی اللہ عنہا بیان کرتی ہیں کہ مجھے نبی اکرم صلی اللہ علیہ وسلم کی مراد کا پتہ چل گیا تھا، اس لیے میں نے اس عورت کو اپنی طرف کھینچا اور اسے طریقہ بتایا۔ [صحیح ابن حبان/كتاب الطهارة/حدیث: 1200]

سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم ایک برتن کے ذریعے غسل کرتے تھے جو «فَرَقٍ» ”فرق“ تھا، آپ غسل جنابت کیا کرتے تھے۔ [صحیح ابن حبان/كتاب الطهارة/حدیث: 1201]

حفصہ بنت عبدالرحمن بن ابوبکر رضی اللہ عنہما، جو منذر بن زبیر کی اہلیہ تھیں، وہ بیان کرتی ہیں کہ سیدہ عائشہ رضی اللہ عنہا نے بتایا کہ وہ اور نبی اکرم صلی اللہ علیہ وسلم ایک ہی برتن میں سے غسل کیا کرتے تھے جس میں تین مد کے قریب پانی آ جاتا تھا۔ [صحیح ابن حبان/كتاب الطهارة/حدیث: 1202]

سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم ایک «مَكُوك» ”مکوک“ کے ذریعے وضو کر لیتے تھے اور پانچ «مَكُوك» ”مکوک“ (پانی) سے غسل کر لیتے تھے۔ ابو خیر سماء نامی راوی بیان کرتے ہیں: یا «مَكُوك» ”مکوک“ سے مراد «مُدّ» ”مد“ ہے۔ [صحیح ابن حبان/كتاب الطهارة/حدیث: 1203]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم ایک «مَكُّوك» (پانی) کے ذریعے وضو کر لیتے تھے اور پانچ «مَكُّوك» (پانی) کے ذریعے غسل کر لیتے تھے۔ [صحیح ابن حبان/كتاب الطهارة/حدیث: 1204]

عبداللہ بن نجی اپنے والد کا یہ بیان نقل کرتے ہیں: میں نے سیدنا علی رضی اللہ عنہ کو نبی اکرم صلی اللہ علیہ وسلم کے حوالے سے نقل کرتے ہوئے سنا ہے، نبی اکرم صلی اللہ علیہ وسلم نے یہ بات ارشاد فرمائی ہے: ”فرشتے ایسے گھر میں داخل نہیں ہوتے جس میں تصویر یا کتا یا جنبی شخص موجود ہو۔“ [صحیح ابن حبان/كتاب الطهارة/حدیث: 1205]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم ایک ہی رات میں اپنی تمام ازواج کے پاس تشریف لے جاتے تھے اور پھر ایک ہی مرتبہ غسل کرتے تھے۔ [صحیح ابن حبان/كتاب الطهارة/حدیث: 1206]