سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم ایک ہی رات میں اپنی تمام ازواج کے پاس تشریف لے جاتے تھے، پھر آپ صلی اللہ علیہ وسلم ایک ہی مرتبہ غسل کرتے تھے۔ [صحیح ابن حبان/كتاب الطهارة/حدیث: 1207]

سیدنا انس بن مالک رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں کہ رات یا دن میں کسی وقت آپ صلی اللہ علیہ وسلم اپنی تمام ازواج کے پاس تشریف لے جایا کرتے تھے، ان ازواج کی تعداد گیارہ تھی۔ راوی کہتے ہیں: میں نے سیدنا انس بن مالک رضی اللہ عنہ سے دریافت کیا: کیا نبی اکرم صلی اللہ علیہ وسلم میں اتنی طاقت تھی؟ تو سیدنا انس رضی اللہ عنہ نے بتایا: ہم لوگ تو یہ بات چیت کیا کرتے تھے کہ آپ کو تیس (30) مردوں جتنی قوت دی گئی ہے۔ [صحیح ابن حبان/كتاب الطهارة/حدیث: 1208]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم ایک ہی رات میں اپنی تمام ازواج کے پاس تشریف لے جایا کرتے تھے، اس وقت آپ کی نو ازواج تھیں۔ (امام ابن حبان رحمہ اللہ فرماتے ہیں:) ہشام دستوائی نے قتادہ کے حوالے سے یہ روایت نقل کی ہے کہ ”ان ازواج کی تعداد گیارہ تھی،“ جبکہ سعید نے قتادہ کے حوالے سے جو روایت نقل کی ہے اس میں یہ مذکور ہے کہ اس وقت آپ کی نو ازواج تھیں۔ (امام ابن حبان رحمہ اللہ فرماتے ہیں:) ہشام دستوائی نے قتادہ کے حوالے سے یہ روایت نقل کی ہے: ”ان ازواج کی تعداد گیارہ تھی،“ جبکہ سعید نے قتادہ کے حوالے سے یہ روایت نقل کی ہے کہ ”اس وقت ان ازواج کی تعداد نو تھی،“ جہاں تک ہشام کی نقل کردہ روایت کا تعلق ہے، تو سیدنا انس رضی اللہ عنہ نے نبی اکرم صلی اللہ علیہ وسلم کے اس فعل کا ذکر اس زمانے کے حساب سے کیا ہے، جب آپ مدینہ منورہ تشریف لائے تھے، اس وقت آپ کی گیارہ ازواج تھیں جبکہ سعید نے قتادہ کے حوالے سے جو روایت نقل کی ہے اس میں سیدنا انس رضی اللہ عنہ نے اس زمانے کا ذکر کیا ہے، جو مدینہ منورہ میں آپ کا آخری زمانہ ہے جب آپ کی نو ازواج تھیں۔ اس کی وجہ یہ ہے کہ نبی اکرم صلی اللہ علیہ وسلم نے یہ فعل کئی مرتبہ کیا ہے، ایسا نہیں ہے کہ اسے صرف ایک مرتبہ کیا ہے۔ [صحیح ابن حبان/كتاب الطهارة/حدیث: 1209]

سیدنا ابوسعید خدری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جب کوئی شخص عورت کو چھو لے (یعنی اس کے ساتھ صحبت کر لے) اور پھر وہ دوبارہ ایسا کرنا چاہے، تو اسے پہلے وضو کر لینا چاہیے۔“ [صحیح ابن حبان/كتاب الطهارة/حدیث: 1210]

سیدنا ابوسعید خدری رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص اپنی بیوی کے ساتھ صحبت کرے، پھر وہ دوبارہ یہ عمل کرنا چاہے، تو اسے پہلے وضو کر لینا چاہیے۔ اس طرح دوبارہ کرنے میں زیادہ لذت ہوگی۔“ (امام ابن حبان رحمہ اللہ فرماتے ہیں:) ان آخری الفاظ کو نقل کرنے میں مسلم بن ابراہیم نامی راوی منفرد ہے۔ [صحیح ابن حبان/كتاب الطهارة/حدیث: 1211]

سیدنا عبداللہ بن عمر رضی اللہ عنہما بیان کرتے ہیں کہ سیدنا عمر رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے، انہوں نے عرض کی: (بعض اوقات) مجھے رات کے وقت جنابت لاحق ہو جاتی ہے، تو میں کیا کروں؟ نبی اکرم صلی اللہ علیہ وسلم نے فرمایا: ”تم اپنی شرم گاہ کو دھو کر پھر وضو کر کے سو جاؤ۔“ [صحیح ابن حبان/كتاب الطهارة/حدیث: 1212]

سیدنا عبداللہ بن عمر رضی اللہ عنہما بیان کرتے ہیں کہ سیدنا عمر بن خطاب رضی اللہ عنہ نے نبی صلی اللہ علیہ وسلم کے سامنے اس بات کا تذکرہ کیا کہ بعض اوقات انہیں رات کے وقت جنابت لاحق ہو جاتی ہے، تو نبی صلی اللہ علیہ وسلم نے ارشاد فرمایا: ”تم وضو کرو، اپنی شرمگاہ کو دھو لو اور پھر سو جاؤ۔“ (امام ابن حبان رحمہ اللہ فرماتے ہیں:) نبی صلی اللہ علیہ وسلم کا یہ فرمان: ”تم وضو کر لو اور اپنی شرمگاہ کو دھو لو“ یہ حکم استحباب کے طور پر ہے اور نبی صلی اللہ علیہ وسلم کا یہ فرمان: ”پھر تم سو جاؤ“ یہ مباح قرار دینے کے لیے حکم ہے، نبی صلی اللہ علیہ وسلم کے اس فرمان: ”تم اپنی شرمگاہ کو دھو لو“ میں اس بات کی دلیل موجود نہیں ہے کہ منی نجس ہوتی ہے کیونکہ شرمگاہ کو دھونے کا حکم اس لیے دیا گیا تھا کہ آدمی جب صحبت کرتا ہے تو اس کی شرمگاہ پر کوئی نجس چیز لگ جاتی ہے، اگر یہ نہ بھی ہو تو غسل کرنے سے پہلے عام طور پر آدمی کو پیشاب کرنا پڑتا ہے، تو اس نجاست کے لگنے کی وجہ سے بھی شرمگاہ کو دھونے کا حکم دیا گیا ہے، اس وجہ سے نہیں دیا گیا کہ منی نجس ہوتی ہے، سیدہ عائشہ رضی اللہ عنہا نبی صلی اللہ علیہ وسلم کے کپڑے سے اسے کھرچ دیا کرتی تھیں اور نبی صلی اللہ علیہ وسلم اس کپڑے میں نماز ادا کر لیا کرتے تھے۔ [صحیح ابن حبان/كتاب الطهارة/حدیث: 1213]

سیدنا عبداللہ بن عمر رضی اللہ عنہما بیان کرتے ہیں کہ سیدنا عمر رضی اللہ عنہ نے نبی اکرم صلی اللہ علیہ وسلم کے سامنے اس بات کا تذکرہ کیا کہ انہیں رات کے وقت جنابت لاحق ہو جاتی ہے، تو نبی اکرم صلی اللہ علیہ وسلم نے انہیں یہ ہدایت کی کہ ”وہ وضو کریں اور اپنی شرم گاہ کو دھو لیں اور پھر سو جائیں۔“ [صحیح ابن حبان/كتاب الطهارة/حدیث: 1214]

سیدنا عبداللہ بن عمر رضی اللہ عنہما بیان کرتے ہیں: سیدنا عمر بن خطاب رضی اللہ عنہ نے نبی اکرم صلی اللہ علیہ وسلم سے دریافت کیا: کیا ہم میں سے کوئی ایک شخص جنابت کی حالت میں سو سکتا ہے؟ نبی اکرم صلی اللہ علیہ وسلم نے فرمایا: ”جی ہاں جب وہ وضو کر لے (تو سو سکتا ہے)۔“ [صحیح ابن حبان/كتاب الطهارة/حدیث: 1215]

سیدنا عبداللہ بن عمر رضی اللہ عنہما سیدنا عمر رضی اللہ عنہ کے بارے میں یہ بات نقل کرتے ہیں کہ انہوں نے نبی اکرم صلی اللہ علیہ وسلم سے دریافت کیا: ”کیا کوئی شخص جنابت کی حالت میں سو سکتا ہے؟“ نبی اکرم صلی اللہ علیہ وسلم نے ارشاد فرمایا: ”جی ہاں! اگر وہ چاہے، تو وضو کر کے (سو) جائے۔“ [صحیح ابن حبان/كتاب الطهارة/حدیث: 1216]