سیدنا عبداللہ بن عمر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جمعہ کے دن غسل کرنا ہر بالغ شخص پر اور خواتین میں سے ہر بالغ عورت پر لازم ہے۔“ [صحیح ابن حبان/كتاب الطهارة/حدیث: 1227]

سیدنا ابوسعید خدری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جمعہ کے دن غسل کرنا ہر بالغ شخص پر لازم ہے۔“ [صحیح ابن حبان/كتاب الطهارة/حدیث: 1228]

سیدنا ابوسعید خدری رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”جمعہ کے دن غسل کرنا ہر بالغ شخص پر لازم ہے۔ (یہ غسل) غسل جنابت کی مانند ہے۔“ [صحیح ابن حبان/كتاب الطهارة/حدیث: 1229]

سالم بن عبداللہ اپنے والد (سیدنا عبداللہ بن عمر رضی اللہ عنہما) کا یہ بیان نقل کرتے ہیں کہ ایک مرتبہ سیدنا عمر بن خطاب رضی اللہ عنہ جمعہ کے دن لوگوں کو خطبہ دے رہے تھے، اسی دوران نبی اکرم صلی اللہ علیہ وسلم کے اصحاب میں سے ایک صاحب اندر آئے۔ سیدنا عمر رضی اللہ عنہ نے ان سے بلند آواز میں دریافت کیا: یہ کون سا وقت ہے؟ انہوں نے جواب دیا: میں آج مصروف تھا، میں اپنے گھر اس وقت گیا جب میں نے اذان کی آواز سنی، پھر میں نے وضو کے علاوہ کچھ نہیں کیا (یعنی فوراً یہاں آ گیا ہوں)۔ سیدنا عمر رضی اللہ عنہ بولے: (صرف) وضو کرنا بھی (غلطی) ہے، جبکہ آپ یہ بات جانتے ہیں کہ نبی اکرم صلی اللہ علیہ وسلم (جمعہ کے) دن (غسل) کرنے کا حکم دیتے تھے۔ (امام ابن حبان رحمہ اللہ فرماتے ہیں:) اس روایت میں اس بات کی صحیح دلیل موجود ہے کہ جو شخص جمعہ میں شرکت کے لیے آتا ہے اس پر غسل کرنا واجب نہیں ہے، کیونکہ سیدنا عمر بن خطاب رضی اللہ عنہ خطبہ دے رہے تھے، اسی دوران سیدنا عثمان غنی رضی اللہ عنہ مسجد میں آئے اور انہوں نے سیدنا عمر رضی اللہ عنہ کو یہ بتایا کہ انہوں نے صرف وضو کیا ہے اور وہ مسجد میں آ گئے ہیں، تو سیدنا عمر رضی اللہ عنہ اور کسی صحابی نے بھی انہیں جمعہ کے لیے غسل کر کے آنے کو نہیں کہا؛ تو صحابہ کرام رضی اللہ عنہم کا اس بات پر اجماع کر لینا جس کا ہم نے ذکر کیا ہے، اس بات کا واضح بیان ہے کہ نبی اکرم صلی اللہ علیہ وسلم کا جمعہ کے لیے غسل کرنے کا حکم دینا استحباب کے طور پر ہے، لازمی طور پر نہیں ہے۔ [صحیح ابن حبان/كتاب الطهارة/حدیث: 1230]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا ہے: ”جو شخص جمعہ کے روز وضو کرے، اچھی طرح وضو کرے، پھر جمعہ کے لیے آئے (امام کے قریب ہو) اور خاموش رہے اور غور سے (خطبہ) سنے، اللہ تعالیٰ اس شخص کے اس جمعے اور اس سے آئندہ جمعے تک کے اور مزید تین دن کے گناہ معاف کر دیتا ہے۔“ [صحیح ابن حبان/كتاب الطهارة/حدیث: 1231]

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”ہر مسلمان پر اللہ تعالیٰ کا یہ حق ہے، وہ مسلمان ہفتے میں ایک دن غسل کرے اور اگر اس کے پاس خوشبو موجود ہو تو وہ بھی لگائے۔“ [صحیح ابن حبان/كتاب الطهارة/حدیث: 1232]

عبدالرحمن بن ابوسعید خدری اپنے والد (سیدنا ابوسعید خدری رضی اللہ عنہ) کا یہ بیان نقل کرتے ہیں کہ نبی اکرم صلی اللہ علیہ وسلم نے یہ بات ارشاد فرمائی ہے: ”جمعہ کے دن غسل کرنا ہر بالغ شخص پر لازم ہے، اور مسواک کرنا اور اگر اسے میسر ہو، تو خوشبو لگانا (بھی لازم ہے)۔“ روایت کے یہ الفاظ سعید بن ابوہلال نامی راوی کے ہیں۔ [صحیح ابن حبان/كتاب الطهارة/حدیث: 1233]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”ہر مسلمان پر یہ بات لازم ہے، وہ ہفتے میں ایک بار غسل کرے اور اگر اسے دستیاب ہو، تو خوشبو لگائے۔“ [صحیح ابن حبان/كتاب الطهارة/حدیث: 1234]

سیدنا ابوبردہ بن ابوموسیٰ اشعری رحمہ اللہ اپنے والد سیدنا ابوموسیٰ اشعری رضی اللہ عنہ کا یہ بیان نقل کرتے ہیں: مجھے اپنے بارے میں یہ بات یاد ہے ہم لوگ نبی اکرم صلی اللہ علیہ وسلم کے پاس ہوتے تھے اور اگر ہم پر بارش ہو جاتی، تو ہمارے اندر سے تمہیں بھیڑوں کی سی بو آتی ہوئی محسوس ہوتی تھی۔ [صحیح ابن حبان/كتاب الطهارة/حدیث: 1235]

سیدہ عائشہ صدیقہ رضی اللہ عنہا بیان کرتی ہیں کہ پہلے لوگ اپنے کام کاج خود ہی کیا کرتے تھے، پھر وہ اسی حالت میں جمعہ کے لیے آ جایا کرتے تھے (جس کی وجہ سے بدبو پھیل جاتی تھی)، تو ان سے یہ کہا گیا: ”اگر تم غسل کر لو (تو یہ مناسب ہو گا)“۔ [صحیح ابن حبان/كتاب الطهارة/حدیث: 1236]