عبدالرحمن بن ابزی بیان کرتے ہیں: ایک شخص نے سیدنا عمر رضی اللہ عنہ سے سوال کیا، اس نے کہا: میں جنابت کا شکار ہو جاتا ہوں، مجھے پانی نہیں ملتا (تو مجھے کیا کرنا چاہیے) سیدنا عمر رضی اللہ عنہ نے فرمایا تم نماز نہ پڑھو (جب تک پانی نہیں مل جاتا) سیدنا عمار رضی اللہ عنہ نے کہا: کیا آپ کو یہ بات یاد نہیں ہے، نبی اکرم صلی اللہ علیہ وسلم کے زمانہ اقدس میں، میں اور آپ نبی اکرم صلی اللہ علیہ وسلم کے ساتھ ایک جنگی مہم میں شریک ہوئے تھے (تو میں مٹی میں لوٹ پوٹ ہو گیا تھا) اس بات کا تذکرہ نبی اکرم صلی اللہ علیہ وسلم سے کیا گیا، تو آپ صلی اللہ علیہ وسلم نے ارشاد فرمایا: ”تمہارے لیے اتنا ہی کافی تھا“ پھر آپ صلی اللہ علیہ وسلم نے اپنا دست مبارک زمین پر مارا اور آپ صلی اللہ علیہ وسلم نے اپنی ہتھیلیوں پر پھونک ماری اور اپنے چہرے اور دونوں بازوؤں پر مسح کر لیا۔ (امام ابن حبان رحمہ اللہ فرماتے ہیں: نبی اکرم صلی اللہ علیہ وسلم کا تیمم کی تعلیم دیتے ہوئے چہرے اور دونوں ہاتھوں کے لیے ایک ہی ضرب پر اکتفاء کرنا اس بات کا واضح بیان ہے کہ ایک مرتبہ میں جس کے ذریعے فرض کو ادا کیا گیا ہو اس کے ذریعے دوسرے فرض کو ادا کرنا جائز ہے۔ اس کی صورت یوں ہے کہ تیمم کرنے والے شخص پر یہ بات لازم ہے کہ وہ چہرے اور دونوں ہاتھوں کا مسح کرے۔ نبی اکرم صلی اللہ علیہ وسلم نے تیمم میں دونوں ہاتھوں کے لیے اس چیز کو جائز قرار دیا ہے، جو اس کی ہتھیلی پر چہرے کے فرض کو ادا کرنے کے بعد بچا رہنے والا (غبار ہے) تو یہ بات درست ہو گی کہ وہ مٹی جس کے ذریعے ایک ضرب کے فرض کو ادا کیا گیا ہے، یہ بات جائز ہے کہ اس کے ذریعے دوسری مرتبہ میں دوسرے عضو کے فرض کو ادا کیا جائے، تو جب یہ بات تیمم میں درست ہو گی تو وضو میں بھی درست ہو گی)۔ [صحیح ابن حبان/كتاب الطهارة/حدیث: 1267]

عون بن ابو جحیفہ رضی اللہ عنہ اپنے والد کا یہ بیان نقل کرتے ہیں کہ میں نے نبی اکرم صلی اللہ علیہ وسلم کو ایک سرخ خیمے میں دیکھا، میں نے سیدنا بلال رضی اللہ عنہ کو دیکھا کہ وہ نبی اکرم صلی اللہ علیہ وسلم کے وضو کا بچا ہوا پانی لے کر باہر آئے۔ میں نے لوگوں کو دیکھا کہ وہ وضو کے بچے ہوئے پانی کی طرف تیزی سے لپکے اور وہ اسے (اپنے جسم) پر ملنے لگے، پھر سیدنا بلال رضی اللہ عنہ ایک نیزہ لے کر باہر آئے۔ انہوں نے اسے گاڑ دیا، پھر نبی اکرم صلی اللہ علیہ وسلم سرخ رنگ کے سیرانی حلے میں باہر تشریف لائے، آپ صلی اللہ علیہ وسلم نے اس نیزے کی طرف رخ کر کے نماز پڑھی جبکہ اس کے دوسری طرف سے لوگ اور جانور گزر رہے تھے۔ [صحیح ابن حبان/كتاب الطهارة/حدیث: 1268]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم کی ایک زوجہ محترمہ نے ایک ٹب میں (پانی) سے غسل کیا، پھر نبی اکرم صلی اللہ علیہ وسلم تشریف لائے اور اس کے بچے ہوئے پانی سے وضو یا شاید غسل کرنے لگے، خاتون نے عرض کی: یا رسول اللہ! میں جنبی تھی، تو نبی اکرم صلی اللہ علیہ وسلم نے ارشاد فرمایا: ”پانی کو کوئی چیز نجس نہیں کرتی ہے۔“ [صحیح ابن حبان/كتاب الطهارة/حدیث: 1269]

سیدنا ابوحمید ساعدی رضی اللہ عنہ بیان کرتے ہیں: میں دودھ لے کر نبی اکرم صلی اللہ علیہ وسلم کی خدمت میں حاضر ہوا جو ڈھانپا ہوا نہیں تھا، آپ صلی اللہ علیہ وسلم اس وقت ”نقیع“ (کے مقام) پر موجود تھے۔ آپ صلی اللہ علیہ وسلم نے ارشاد فرمایا: ”تم نے اسے ڈھانپ کیوں نہیں دیا؟ خواہ اس پر ایک لکڑی ہی رکھ دیتے۔“ سیدنا ابوحمید رضی اللہ عنہ بیان کرتے ہیں: ہمیں برتنوں کے بارے میں اس بات کا حکم دیا گیا تھا کہ رات کے وقت ان کا منہ بند کر دیا کریں اور دروازوں کے بارے میں یہ حکم دیا تھا کہ رات کے وقت انہیں بند کر دیا کریں۔ [صحیح ابن حبان/كتاب الطهارة/حدیث: 1270]

سیدنا جابر بن عبداللہ رضی اللہ عنہما، نبی اکرم صلی اللہ علیہ وسلم کا یہ فرمان نقل کرتے ہیں: ”(رات کو سوتے وقت) دروازے بند کر دو، مشکیزوں کا منہ بند کر دو، برتنوں کو ڈھانپ دو، چراغ بجھا دو، کیونکہ شیطان بند دروازوں کو کھولتا نہیں ہے، بند منہ والے مشکیزوں کو کھولتا نہیں ہے، برتن پر سے چیز کو ہٹاتا نہیں ہے، اور چوہا بعض اوقات لوگوں کے گھر کو آگ لگا دیتا ہے۔“ [صحیح ابن حبان/كتاب الطهارة/حدیث: 1271]

سیدنا جابر بن عبداللہ رضی اللہ عنہما، نبی اکرم صلی اللہ علیہ وسلم کا یہ فرمان نقل کرتے ہیں: ”اللہ کا نام لے کر دروازوں کو بند کر دو، کیونکہ شیطان بند دروازوں کو کھولتا نہیں ہے۔ اللہ کا نام لے کر اپنے چراغ کو بجھا دو اور اللہ کا نام لے کر اپنے مشکیزوں کا منہ بند کر دو۔ اللہ کا نام لے کر اپنے برتن کو ڈھانپ دو خواہ اس پر کوئی لکڑی ہی رکھ دو۔“ [صحیح ابن حبان/كتاب الطهارة/حدیث: 1272]

سیدنا جابر رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ہمیں چار باتوں کا حکم دیا اور آپ صلی اللہ علیہ وسلم نے پانچ باتوں سے منع کیا (آپ صلی اللہ علیہ وسلم نے یہ فرمایا تھا): ”جب تم سونے لگو تو اپنے دروازے کو بند کر دو، اپنے مشکیزے کا منہ بند کر دو، اپنے برتن کو ڈھانپ دو اور اپنے چراغ کو بجھا دو، کیونکہ شیطان بند دروازے کو کھولتا نہیں ہے، بند منہ والے مشکیزے کو کھولتا نہیں ہے، برتن پر پڑی ہوئی چیز کو ہٹاتا نہیں ہے، اور چوہا بعض اوقات گھر والوں سمیت گھر کو آگ لگا دیتا ہے، اور تم اپنے بائیں ہاتھ کے ذریعے نہ کھاؤ، اپنے بائیں ہاتھ کے ذریعے نہ پیو، صرف ایک جوتا پہن کر نہ چلو، «اِشْتِمَالُ الصَّمَّاءِ» (کے طور پر کپڑے کو نہ پہنو) اور گھر میں «اِحْتِبَاء» کے طور پر اس طرح کپڑا نہ پہنو کہ شرم گاہ ظاہر ہوتی ہو۔“ [صحیح ابن حبان/كتاب الطهارة/حدیث: 1273]

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم یہ ارشاد فرماتے تھے: ”مشکیزوں کا منہ بند کر دو جب تم رات کے وقت سونے لگو، اور کھانے پینے کی چیزوں کو ڈھانپ دو، کیونکہ شیطان آتا ہے، اگر اسے دروازہ بند نہیں ملتا تو وہ اندر آ جاتا ہے، اور اگر اسے مشکیزے کا منہ بند نہیں ملتا تو وہ اس میں سے پی لیتا ہے، لیکن اگر اسے دروازہ بند ملتا ہے اور مشکیزے کا منہ بند ملتا ہے، تو وہ مشکیزے کے بند منہ کو کھول نہیں سکتا اور بند دروازے کو کھول نہیں سکتا اور اگر کسی شخص کو اپنے اس برتن جس میں اس کا مشروب موجود ہے اسے ڈھانپنے کے لیے کوئی چیز نہیں ملتی، تو وہ اس پر لکڑی ہی رکھ دے۔“ [صحیح ابن حبان/كتاب الطهارة/حدیث: 1274]

سیدنا جابر رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ہم سے یہ فرمایا: ”تم اپنے دروازے بند کر دو اور اپنے مشکیزے کے منہ بند کر دو اور اپنے برتنوں کو ڈھانپ دو اور اپنے چراغوں کو بجھا دو، کیونکہ شیطان (بند دروازوں) کو کھولتا نہیں ہے، اور بند مشکیزے کو کھولتا نہیں ہے، اور ڈھانپی ہوئی چیز کو ہٹاتا نہیں ہے، اور چوہا بعض اوقات گھر والوں سمیت گھر کو آگ لگا دیتا ہے، تم اپنے مویشیوں اور گھر والوں کو سورج غروب ہونے کے قریب گھر میں روکے رکھو یہاں تک کہ رات کا ابتدائی حصہ گزر جائے۔“ [صحیح ابن حبان/كتاب الطهارة/حدیث: 1275]

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”تم اپنے مویشیوں کو (گھر میں) بند کر کے رکھو یہاں تک کہ رات کا ابتدائی حصہ گزر جائے، کیونکہ یہ ایک ایسی گھڑی ہے، جس میں شیطان آگ لگاتا ہے۔“ [صحیح ابن حبان/كتاب الطهارة/حدیث: 1276]