سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”جس بھی کھال کی دباغت حاصل کر لی جائے، تو وہ پاک ہو جاتی ہے۔“ [صحیح ابن حبان/كتاب الطهارة/حدیث: 1287]

سیدنا عبداللہ بن عباس رضی اللہ عنہما بیان کرتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”جس بھی کھال کی دباغت کر لی جائے وہ پاک ہو جاتی ہے۔“ [صحیح ابن حبان/كتاب الطهارة/حدیث: 1288]

سیدنا عبداللہ بن عباس رضی اللہ عنہما، سیدہ میمونہ رضی اللہ عنہا کا یہ بیان نقل کرتے ہیں کہ نبی اکرم صلی اللہ علیہ وسلم ایک مردار بکری کے پاس سے گزرے تو آپ صلی اللہ علیہ وسلم نے ارشاد فرمایا: ”لوگوں نے اس کی کھال حاصل کر کے اور اس کی دباغت کر کے اس سے نفع حاصل کیوں نہیں کیا؟“ لوگوں نے عرض کی کہ یہ مردار ہے، نبی اکرم صلی اللہ علیہ وسلم نے فرمایا: ”اسے کھانا حرام قرار دیا گیا ہے۔“ [صحیح ابن حبان/كتاب الطهارة/حدیث: 1289]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ارشاد فرمایا ہے: ”مردار کی کھال کی دباغت اسے پاک کر دیتی ہے۔“ [صحیح ابن حبان/كتاب الطهارة/حدیث: 1290]

عبداللہ بن مالک اپنی والدہ سیدہ عالیہ بنت سبیع رضی اللہ عنہا کا یہ بیان نقل کرتے ہیں: میری بکریاں احد پہاڑ کے پاس موجود تھیں، ان میں سے ایک مر گئی تھی، میں سیدہ میمونہ رضی اللہ عنہا کی خدمت میں حاضر ہوئی، میں نے ان کے سامنے اس بات کا تذکرہ کیا، تو سیدہ میمونہ رضی اللہ عنہا نے مجھے فرمایا: تم اس کی کھال لے کر نفع حاصل کر لو۔ وہ خاتون بیان کرتی ہیں (میں نے دریافت کیا:) کیا یہ جائز ہے؟ سیدہ میمونہ رضی اللہ عنہا نے جواب دیا: جی ہاں، ایک مرتبہ نبی اکرم صلی اللہ علیہ وسلم قریش کے کچھ افراد کے پاس سے گزرے جو اپنی بکری کو یوں کھینچ رہے تھے جیسے گدھے کو کھینچا جاتا ہے، نبی اکرم صلی اللہ علیہ وسلم نے ان سے فرمایا: ”تم لوگ اس کی کھال کیوں نہیں حاصل کر لیتے؟“ لوگوں نے عرض کی: یہ مردار ہے، تو نبی اکرم صلی اللہ علیہ وسلم نے ارشاد فرمایا: ” «الْمَاءُ وَالْقَرَظُ» ”پانی اور قرظ کے پتے“ اسے پاک کر دیں گے۔“ [صحیح ابن حبان/كتاب الطهارة/حدیث: 1291]

سیدنا محمود بن ربیع رضی اللہ عنہ بیان کرتے ہیں: مجھے نبی اکرم صلی اللہ علیہ وسلم کے بارے میں یہ بات یاد ہے کہ نبی اکرم صلی اللہ علیہ وسلم نے ان کے گھر میں موجود کنویں سے ڈول میں پانی لے کر اس کے ذریعے کلی کی تھی۔ [صحیح ابن حبان/كتاب الطهارة/حدیث: 1292]

سیدہ عائشہ صدیقہ رضی اللہ عنہا بیان کرتی ہیں: میں حیض کی حالت میں برتن اپنے منہ کے ساتھ لگاتی تھی، پھر میں اسے نبی اکرم صلی اللہ علیہ وسلم کی طرف بڑھا دیتی تھی، تو آپ اپنا منہ مبارک اسی جگہ پر رکھتے تھے جہاں میں نے منہ رکھا ہوتا تھا۔ میں حیض کی حالت میں ہڈی (والا گوشت) لے کر (اسے کھا کے) پھر اسے نبی اکرم صلی اللہ علیہ وسلم کی طرف بڑھا دیتی تھی، تو آپ اپنا منہ اسی جگہ رکھتے تھے جہاں میں نے اپنا منہ رکھا تھا۔ [صحیح ابن حبان/كتاب الطهارة/حدیث: 1293]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جب کتا کسی شخص کے برتن میں منہ ڈال دے، تو تم اسے سات مرتبہ دھو دو۔“ [صحیح ابن حبان/كتاب الطهارة/حدیث: 1294]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا ہے: ”کسی بھی شخص کے برتن کو پاک کرنے کا طریقہ، جب کہ کتے نے اس میں منہ ڈال دیا ہو، یہ ہے کہ اسے سات مرتبہ دھو لیا جائے۔“ [صحیح ابن حبان/كتاب الطهارة/حدیث: 1295]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جب کتا کسی شخص کے برتن میں منہ ڈال دے، تو وہ پانی کو بہا دے پھر اسے سات مرتبہ دھو لے۔“ [صحیح ابن حبان/كتاب الطهارة/حدیث: 1296]