شقیق بیان کرتے ہیں: میں سیدنا عبداللہ بن مسعود اور سیدنا ابوموسیٰ اشعری رضی اللہ عنہما کے ساتھ موجود تھا، تو سیدنا ابوموسیٰ اشعری رضی اللہ عنہ نے فرمایا: عبدالرحمن! ایک شخص کو جنابت لاحق ہو گئی اور اسے پانی نہیں ملتا تو کیا وہ نماز ادا کرے گا؟ پھر سیدنا ابوموسیٰ اشعری رضی اللہ عنہ نے فرمایا: کیا آپ نے سیدنا عمار بن یاسر رضی اللہ عنہ کا قول سنا تھا جو انہوں نے سیدنا عمر رضی اللہ عنہ سے کہا تھا کہ نبی اکرم صلی اللہ علیہ وسلم نے مجھے اور آپ کو ایک مہم پر روانہ کیا تھا۔ میں جنابت کا شکار ہو گیا۔ میں مٹی میں لوٹ پوٹ ہو گیا، پھر میں نبی اکرم صلی اللہ علیہ وسلم کی خدمت میں حاضر ہوا اور آپ کو اس بارے میں بتایا تو آپ نے فرمایا: ”تمہارے لیے اس طرح کر لینا کافی تھا“ پھر آپ نے اپنے چہرے اور دونوں بازوؤں کا ایک مرتبہ مسح کیا۔ اس پر سیدنا عبداللہ بن مسعود رضی اللہ عنہ نے فرمایا: میں نے سیدنا عمر رضی اللہ عنہ کو نہیں دیکھا کہ انہوں نے اس بات پر قناعت کی ہو، تو سیدنا ابوموسیٰ اشعری رضی اللہ عنہ نے کہا: پھر آپ اس آیت ﴿فَلَمْ تَجِدُوا مَاءً فَتَيَمَّمُوا صَعِيدًا طَيِّبًا﴾ [سورة المائدة: 6] ”اور تمہیں پانی نہیں ملتا تم پاک مٹی کے ذریعے تیمم کر لو“ کے بارے میں کیا کہیں گے؟ تو سیدنا عبداللہ بن مسعود رضی اللہ عنہ نے فرمایا: اگر ہم لوگوں کو اس بارے میں رخصت دینا شروع کر دیں تو ان میں سے کسی ایک کو اگر پانی ٹھنڈا لگے گا، تو وہ مٹی سے مسح کر لیا کرے گا۔ اعمش نامی راوی کہتے ہیں: میں نے شقیق سے کہا: کیا وہ (سیدنا ابن مسعود رضی اللہ عنہ) اس وجہ سے اسے ناپسند کرتے تھے؟ [صحیح ابن حبان/كتاب الطهارة/حدیث: 1307]

سیدنا عمار بن یاسر رضی اللہ عنہ بیان کرتے ہیں: میں نے نبی اکرم صلی اللہ علیہ وسلم سے تیمم کے بارے میں دریافت کیا، تو آپ صلی اللہ علیہ وسلم نے مجھے ”چہرے اور دونوں بازوؤں کے لیے ایک ضرب (زمین پر) لگانے“ کا حکم دیا۔ قتادہ رحمہ اللہ اس کے مطابق فتویٰ دیتے ہیں۔ [صحیح ابن حبان/كتاب الطهارة/حدیث: 1308]

سیدنا عبدالرحمن بن ابزی رضی اللہ عنہ بیان کرتے ہیں کہ ایک شخص سیدنا عمر بن خطاب رضی اللہ عنہ کی خدمت میں حاضر ہوا اور بولا: مجھے جنابت لاحق ہو گئی ہے، مجھے پانی نہیں ملا تو انہوں نے فرمایا: تم نماز نہ پڑھو، تو سیدنا عمار رضی اللہ عنہ نے کہا: اے امیر المؤمنین! کیا آپ کو یہ بات یاد نہیں ہے، جب میں اور آپ ایک مہم میں شریک تھے، ہمیں جنابت لاحق ہو گئی اور ہمیں پانی نہیں ملا، تو آپ نے نماز ادا نہیں کی اور میں نے مٹی میں لوٹ پوٹ ہو کر نماز پڑھ لی، جب ہم نبی اکرم صلی اللہ علیہ وسلم کی خدمت میں حاضر ہوئے، تو میں نے آپ صلی اللہ علیہ وسلم کے سامنے اس بات کا تذکرہ کیا، تو آپ صلی اللہ علیہ وسلم نے فرمایا: ”تمہارے لیے یہ کافی تھا۔“ نبی اکرم صلی اللہ علیہ وسلم نے اپنا دستِ مبارک زمین پر مارا، دونوں ہاتھوں پر پھونک ماری، پھر ان دونوں کو چہرے اور دونوں بازوؤں پر پھیر لیا۔ (امام ابن حبان رحمہ اللہ فرماتے ہیں:) روایت کے الفاظ محمد بن اسحاق (یعنی امام امام ابن خزیمہ) کے نقل کردہ ہیں۔ [صحیح ابن حبان/كتاب الطهارة/حدیث: 1309]

سیدنا عمار بن یاسر رضی اللہ عنہما بیان کرتے ہیں: ہم نے نبی اکرم صلی اللہ علیہ وسلم کے ہمراہ کندھوں تک تیمم کیا ہے۔ (امام ابن حبان رحمہ اللہ فرماتے ہیں:) یہ اس وقت کی بات ہے، جب تیمم کے حکم کے حوالے سے آیت نازل ہو گئی تھی لیکن نبی اکرم صلی اللہ علیہ وسلم نے ابھی سیدنا عمار رضی اللہ عنہ کو تیمم کا طریقہ تعلیم نہیں دیا تھا۔ پھر اس کے بعد آپ صلی اللہ علیہ وسلم نے انہیں تعلیم دیتے ہوئے بتایا، ”چہرے اور دونوں ہاتھوں کے لیے ایک ہی مرتبہ ضرب لگائی جائے گی۔“ اس وقت جب سیدنا عمار رضی اللہ عنہ نے نبی اکرم صلی اللہ علیہ وسلم سے تیمم کے بارے میں سوال کیا تھا۔ [صحیح ابن حبان/كتاب الطهارة/حدیث: 1310]

سیدنا ابوذر غفاری رضی اللہ عنہ بیان کرتے ہیں کہ نبی اکرم صلی اللہ علیہ وسلم کے پاس کچھ بکریاں اکٹھی ہو گئیں تو نبی اکرم صلی اللہ علیہ وسلم نے ارشاد فرمایا: ”اے ابوذر! تم ان کے ہمراہ دیہات میں رہو۔“ سیدنا ابوذر رضی اللہ عنہ کہتے ہیں کہ میں انہیں لے کر ربذہ کے مقام پر آ گیا، پھر مجھے جنابت لاحق ہو گئی اور میں پانچ یا چھ دن تک اسی حالت میں رہا، پھر میں نبی اکرم صلی اللہ علیہ وسلم کی خدمت میں حاضر ہوا تو آپ صلی اللہ علیہ وسلم نے فرمایا: ”ابوذر!“ میں خاموش رہا، پھر آپ صلی اللہ علیہ وسلم نے فرمایا: ”اے ابوذر! تمہاری ماں تم پر روئے!“ پھر میں نے آپ صلی اللہ علیہ وسلم کو اس بارے میں بتایا تو نبی اکرم صلی اللہ علیہ وسلم نے ایک سیاہ فام کنیز کو بلوایا، وہ پانی کا ایک برتن لے کر آئی اور اس نے میرے لیے پردہ تان دیا، میں سواری کی اوٹ میں ہو گیا اور میں نے غسل کیا تو مجھے یوں محسوس ہوا کہ میں نے اپنے اوپر سے پہاڑ اتار دیا ہے، پھر نبی اکرم صلی اللہ علیہ وسلم نے ارشاد فرمایا: ”پاک مٹی مسلمان کے لیے طہارت کا ذریعہ ہے، اگرچہ اسے دس سال تک (پانی) نہ ملے، پھر جب تمہیں پانی مل جائے تو اسے اپنی جلد سے مس کرو (یعنی غسل کر لو)، یہ زیادہ بہتر ہے۔“ [صحیح ابن حبان/كتاب الطهارة/حدیث: 1311]

سیدنا ابوذر غفاری رضی اللہ عنہ بیان کرتے ہیں کہ نبی اکرم صلی اللہ علیہ وسلم کے پاس صدقے کی بکریوں میں سے کچھ بکریاں اکٹھی ہو گئیں تو نبی اکرم صلی اللہ علیہ وسلم نے فرمایا: ”اے ابوذر! تم بدویت کی زندگی بسر کرو۔“ راوی کہتے ہیں کہ میں انہیں لے کر ربذہ کے مقام پر آ گیا۔ راوی بیان کرتے ہیں کہ میں پانچ یا چھ دن تک جنابت کی حالت میں رہا، مجھے بہت الجھن محسوس ہوتی تھی۔ میں نبی اکرم صلی اللہ علیہ وسلم کی خدمت میں حاضر ہوا، اس وقت آپ حجرے کے ساتھ ٹیک لگا کر بیٹھے ہوئے تھے۔ جب آپ نے مجھے ملاحظہ کیا، تو دریافت کیا: ”اے ابوذر! تجھے کیا ہوا ہے؟“ راوی بیان کرتے ہیں کہ میں بیٹھ گیا، نبی اکرم صلی اللہ علیہ وسلم نے دریافت کیا: ”اے ابوذر! کیا ہوا ہے؟ تیری ماں تجھے روئے۔“ میں نے عرض کی: یا رسول اللہ! مجھے جنابت لاحق ہو گئی ہے۔ راوی بیان کرتے ہیں کہ پھر نبی اکرم صلی اللہ علیہ وسلم نے ایک سیاہ کنیز کو حکم دیا، وہ پانی کا برتن لے کر آئی۔ میں نے اونٹ کی اوٹ میں کپڑے کا پردہ کیا اور غسل کر لیا، تو مجھے یوں محسوس ہوا جیسے میں نے اپنے اوپر سے پہاڑ اتار دیا ہے۔ نبی اکرم صلی اللہ علیہ وسلم نے فرمایا: ”آگے آ جاؤ! پاک مٹی مسلمان کے لیے طہارت کے حصول کا ذریعہ ہے، اگرچہ دس سال گزر جائیں، پھر جب وہ پانی پا لے تو اسے اپنی جلد پر پانی لگا لینا چاہیے۔ (یعنی غسل کر لینا چاہیے)“ [صحیح ابن حبان/كتاب الطهارة/حدیث: 1312]

سیدنا ابوذر غفاری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”پاک مٹی مسلمان کے لیے طہارت کے حصول کا ذریعہ ہے، اگرچہ اسے دس سال تک پانی نہ ملے۔“ [صحیح ابن حبان/كتاب الطهارة/حدیث: 1313]

سیدنا عبداللہ بن عباس رضی اللہ عنہما بیان کرتے ہیں کہ ایک آدمی سردی کے موسم میں جنابت کا شکار ہو گیا، اس نے مسئلہ دریافت کیا تو اسے غسل کرنے کی ہدایت کی گئی (غسل کرنے کی وجہ سے اس کا انتقال ہو گیا)، اس بات کا تذکرہ نبی اکرم صلی اللہ علیہ وسلم کے سامنے کیا گیا تو آپ صلی اللہ علیہ وسلم نے ارشاد فرمایا: ”لوگوں نے اس کو کیوں مروا دیا، اللہ تعالیٰ ان لوگوں کو برباد کرے!“ یہ بات آپ صلی اللہ علیہ وسلم نے تین مرتبہ ارشاد فرمائی (اور پھر فرمایا): ”اللہ تعالیٰ نے مٹی کو (راوی کو شک ہے شاید یہ الفاظ ہیں) تیمم کو طہارت کے حصول کا ذریعہ بنایا ہے۔“ روایت کے الفاظ میں یہ شک سیدنا عبداللہ بن عباس رضی اللہ عنہما کو ہے، اس کے بعد انہوں نے اسے شک کے بغیر ذکر کیا۔ [صحیح ابن حبان/كتاب الطهارة/حدیث: 1314]

ابوقیس، جو سیدنا عمرو بن العاص رضی اللہ عنہ کے غلام ہیں، بیان کرتے ہیں: سیدنا عمرو بن العاص رضی اللہ عنہ بھی ایک مہم پر تھے۔ لوگوں کو اتنی شدید سردی کا سامنا کرنا پڑا کہ اس طرح کی سردی انہوں نے پہلے کبھی نہیں دیکھی تھی۔ سیدنا عمرو بن العاص رضی اللہ عنہ صبح کی نماز کے لیے تشریف لائے اور فرمایا: گزشتہ رات مجھے احتلام ہو گیا تھا، تو انہوں نے اپنی شرم گاہ کو دھویا اور نماز کے وضو کی طرح وضو کر کے لوگوں کو نماز پڑھا دی۔ جب وہ نبی اکرم صلی اللہ علیہ وسلم کی خدمت میں حاضر ہوئے، تو نبی اکرم صلی اللہ علیہ وسلم نے اپنے اصحاب سے دریافت کیا: ”تم نے عمرو اور اس کے ساتھیوں کو کیسا پایا؟“ تو لوگوں نے ان کی تعریف کی اور یہ بات کہی: یا رسول اللہ! انہوں نے جنابت کی حالت میں ہمیں نماز پڑھا دی، تو نبی اکرم صلی اللہ علیہ وسلم نے سیدنا عمرو بن العاص رضی اللہ عنہ کو بلوایا اور ان سے دریافت کیا، تو سیدنا عمرو بن العاص رضی اللہ عنہ نے آپ صلی اللہ علیہ وسلم کو بتایا اور جس سردی کا سامنا کرنا پڑا اس کے بارے میں بتایا: انہوں نے عرض کی: یا رسول اللہ! اللہ تعالیٰ نے یہ بات ارشاد فرمائی ہے: ﴿وَلَا تَقْتُلُوا أَنْفُسَكُمْ﴾ [سورة النساء: 29] ”تم اپنے آپ کو قتل نہ کرو“ اگر میں غسل کر لیتا تو میں مر جاتا۔ نبی اکرم صلی اللہ علیہ وسلم سیدنا عمرو بن العاص رضی اللہ عنہ کی اس بات پر ہنس پڑے۔ [صحیح ابن حبان/كتاب الطهارة/حدیث: 1315]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم قضائے حاجت کر کے تشریف لائے، بئر جمل کے قریب آپ کا سامنا ایک شخص سے ہوا، اس نے آپ کو سلام کیا، تو نبی اکرم صلی اللہ علیہ وسلم نے اسے سلام کا جواب نہیں دیا۔ آپ دیوار کے پاس تشریف لائے، آپ نے اپنا دستِ مبارک دیوار پر رکھا، پھر آپ نے اپنے چہرے اور دونوں بازوؤں پر ہاتھ پھیرا (یعنی تیمم کیا اور) پھر نبی اکرم صلی اللہ علیہ وسلم نے اس شخص کے سلام کا جواب دیا۔ [صحیح ابن حبان/كتاب الطهارة/حدیث: 1316]