حمزہ بن مغیرہ بن شعبہ اپنے والد کا یہ بیان نقل کرتے ہیں کہ نبی اکرم صلی اللہ علیہ وسلم (قافلے سے پیچھے) رہ گئے۔ آپ کے ہمراہ سیدنا مغیرہ بن شعبہ رضی اللہ عنہ بھی پیچھے رہ گئے، جب نبی اکرم صلی اللہ علیہ وسلم نے قضائے حاجت کر لی تو آپ صلی اللہ علیہ وسلم نے دریافت کیا: ”کیا تمہارے پاس پانی ہے؟“ میں نے عرض کی: جی ہاں (ہے)۔ میں پانی کا برتن لے کر آپ صلی اللہ علیہ وسلم کی خدمت میں حاضر ہوا۔ نبی اکرم صلی اللہ علیہ وسلم نے دونوں ہاتھ اور چہرے کو دھو لیا، آپ صلی اللہ علیہ وسلم بازو دھونے لگے تو جبے کی آستین تنگ تھی، تو آپ صلی اللہ علیہ وسلم نے نیچے سے اپنے بازو کو باہر نکالا اور جبے کو اپنے کندھے پر رکھ لیا، پھر آپ صلی اللہ علیہ وسلم نے اپنے دونوں بازو دھوئے، پھر آپ صلی اللہ علیہ وسلم نے اپنے موزوں اور عمامے پر مسح کیا، پھر آپ صلی اللہ علیہ وسلم سوار ہوئے، آپ کے ہمراہ میں بھی سوار ہوا۔ ہم لوگوں تک پہنچے تو سیدنا عبدالرحمن بن عوف رضی اللہ عنہ انہیں ایک رکعت پڑھا چکے تھے۔ جب انہیں نبی اکرم صلی اللہ علیہ وسلم کی تشریف آوری محسوس ہوئی تو وہ پیچھے ہٹنے لگے تو نبی اکرم صلی اللہ علیہ وسلم نے فرمایا: ”تم نماز پڑھتے رہو۔“ جب سیدنا عبدالرحمن بن عوف رضی اللہ عنہ نے نماز مکمل کر لی تو نبی اکرم صلی اللہ علیہ وسلم اور سیدنا مغیرہ رضی اللہ عنہ کھڑے ہوئے اور ان حضرات نے پہلے گزر جانے والی رکعت کو ادا کیا۔ [صحیح ابن حبان/كتاب الطهارة/حدیث: 1347]

سیدہ عائشہ صدیقہ رضی اللہ عنہا بیان کرتی ہیں کہ فاطمہ بنت ابی حبیش کو استحاضہ کی شکایت ہو گئی۔ نبی اکرم صلی اللہ علیہ وسلم نے ارشاد فرمایا: ” «إِنَّ دَمَ الْحَيْضِ دَمٌ أَسْوَدُ يُعْرَفُ» ”حیض کا خون سیاہ ہوتا ہے وہ پہچانا جاتا ہے“، جب یہ ہو، تو تم نماز سے رک جاؤ اور جب دوسری رنگت کا مواد ہو، تو تم وضو کر کے نماز ادا کرنا شروع کر دو۔“ [صحیح ابن حبان/كتاب الطهارة/حدیث: 1348]

سیدہ معاذہ رضی اللہ عنہا بیان کرتی ہیں کہ ایک عورت نے سیدہ عائشہ رضی اللہ عنہا سے دریافت کیا: کیا حیض والی عورت نماز کی قضا کرے گی؟ سیدہ عائشہ رضی اللہ عنہا نے فرمایا: کیا تم حروریہ ہو؟ ہمیں نبی اکرم صلی اللہ علیہ وسلم کے زمانہ میں حیض آیا کرتا تھا، تو ہم نہ تو قضا کرتی تھیں اور نہ ہی ہمیں قضا کرنے کا حکم دیا گیا۔ [صحیح ابن حبان/كتاب الطهارة/حدیث: 1349]

سیدہ عائشہ رضی اللہ عنہا بیان کرتی ہیں: فاطمہ بنت ابی حبیش نے عرض کی: یا رسول اللہ! میں پاک نہیں ہوتی ہوں، تو کیا میں نماز ترک کر دوں؟ سیدہ عائشہ رضی اللہ عنہا بیان کرتی ہیں: نبی اکرم صلی اللہ علیہ وسلم نے ارشاد فرمایا: ”یہ کسی دوسری رگ کا مواد ہے، یہ حیض نہیں ہے؛ جب حیض آئے، تو تم نماز کو ترک کر دو اور جب اس کی مقدار تم سے رخصت ہو جائے (یعنی حیض کے مخصوص دن گزر جائیں) تو تم اپنے جسم سے خون دھو کر نماز ادا کرنا شروع کر دو۔“ [صحیح ابن حبان/كتاب الطهارة/حدیث: 1350]

سیدہ عائشہ صدیقہ رضی اللہ عنہا بیان کرتی ہیں کہ ام حبیبہ بنت جحش رضی اللہ عنہا نبی اکرم صلی اللہ علیہ وسلم کی خدمت میں حاضر ہوئیں، انہیں سات سال تک استحاضہ کی شکایت رہی تھی، انہوں نے نبی اکرم صلی اللہ علیہ وسلم کے سامنے اس بات کا تذکرہ کیا اور آپ صلی اللہ علیہ وسلم سے مسئلہ دریافت کیا، تو نبی اکرم صلی اللہ علیہ وسلم نے انہیں فرمایا: ”یہ حیض نہیں ہے بلکہ کسی دوسری رگ کا مواد ہے، تم غسل کر کے نماز ادا کرو۔“ سیدہ عائشہ رضی اللہ عنہا بیان کرتی ہیں کہ ام حبیبہ بنت جحش رضی اللہ عنہا ہر نماز کے لیے غسل کیا کرتی تھیں، وہ ایک ٹب میں بیٹھ جاتی تھیں تو خون کی سرخی پانی پر غالب آ جاتی تھی، پھر وہ نماز ادا کیا کرتی تھیں۔ [صحیح ابن حبان/كتاب الطهارة/حدیث: 1351]

سیدہ عائشہ صدیقہ رضی اللہ عنہا بیان کرتی ہیں کہ ام حبیبہ بنت جحش رضی اللہ عنہا، سیدنا عبدالرحمن بن عوف رضی اللہ عنہ کی اہلیہ تھیں، انہیں سات سال تک استحاضہ کی شکایت رہی، انہوں نے اس بارے میں نبی اکرم صلی اللہ علیہ وسلم سے مسئلہ دریافت کیا، تو نبی اکرم صلی اللہ علیہ وسلم نے ارشاد فرمایا: ”یہ حیض نہیں ہے بلکہ کسی دوسری رگ کا مواد ہے، تم غسل کر کے نماز ادا کرتی رہو۔“ سیدہ عائشہ رضی اللہ عنہا بیان کرتی ہیں کہ وہ خاتون ہر نماز کے لیے غسل کیا کرتی تھیں، وہ پتھر کے بنے ہوئے ٹب میں بیٹھ جاتی تھیں اور وہ ان کی بہن سیدہ زینب بنت جحش رضی اللہ عنہا کا تھا، یہاں تک کہ خون کی سرخی پانی پر غالب آ جاتی تھی۔ [صحیح ابن حبان/كتاب الطهارة/حدیث: 1352]

سیدہ عائشہ صدیقہ رضی اللہ عنہا بیان کرتی ہیں کہ ام حبیبہ بنت جحش رضی اللہ عنہا کو استحاضہ کی شکایت ہو گئی۔ وہ سیدنا عبدالرحمن بن عوف رضی اللہ عنہ کی اہلیہ تھیں۔ ان کی بہن سیدہ زینب بنت جحش رضی اللہ عنہا (نبی اکرم صلی اللہ علیہ وسلم کی زوجہ محترمہ تھیں)، اس خاتون کو سات سال تک استحاضہ کی شکایت رہی۔ انہوں نے اس بات کی شکایت نبی اکرم صلی اللہ علیہ وسلم سے کی، تو نبی اکرم صلی اللہ علیہ وسلم نے فرمایا: ”یہ حیض نہیں، یہ کسی دوسری رگ کا مواد ہے، تم غسل کر کے نماز ادا کرتی رہو۔“ تو وہ خاتون ہر نماز کے لیے غسل کیا کرتی تھیں۔ وہ اپنی بہن کے ٹب میں بیٹھ جاتی تھیں اور خون کی سرخی پانی پر غالب آ جاتی تھی۔ [صحیح ابن حبان/كتاب الطهارة/حدیث: 1353]

سیدہ عائشہ صدیقہ رضی اللہ عنہا بیان کرتی ہیں کہ فاطمہ بنت ابوحبیش نبی اکرم صلی اللہ علیہ وسلم کی خدمت میں حاضر ہوئیں، انہوں نے عرض کی: یا رسول اللہ! میں ایک دو ماہ تک استحاضہ کا شکار رہتی ہوں، تو نبی اکرم صلی اللہ علیہ وسلم نے ارشاد فرمایا: ”یہ حیض نہیں ہے بلکہ کسی دوسری رگ کا مواد ہے، جب حیض آ جائے، تو تم اپنے ان مخصوص ایام میں نماز کو ترک کر دو جن ایام میں تمہیں پہلے حیض آیا کرتا تھا اور جب وہ دن گزر جائیں تو تم غسل کر کے ہر نماز کے لیے وضو کر لیا کرو۔“ [صحیح ابن حبان/كتاب الطهارة/حدیث: 1354]

سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم سے استحاضہ کا شکار عورت کے بارے میں دریافت کیا گیا، تو آپ صلی اللہ علیہ وسلم نے فرمایا: ”وہ اپنے مخصوص ایام میں نماز کو ترک کر دے گی، پھر ایک ہی مرتبہ غسل کرے گی اور پھر ہر نماز کے وقت وضو کر لیا کرے گی۔“ [صحیح ابن حبان/كتاب الطهارة/حدیث: 1355]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے کنیز سے فرمایا: ”مجھے جائے نماز پکڑاؤ“ نبی اکرم صلی اللہ علیہ وسلم کا ارادہ یہ تھا کہ اس کو بچھا کر اس پر نماز ادا کریں، میں نے عرض کی: وہ حیض کی حالت میں ہے، نبی اکرم صلی اللہ علیہ وسلم نے فرمایا: ”اس کا حیض اس کے ہاتھ میں نہیں ہے۔“ [صحیح ابن حبان/كتاب الطهارة/حدیث: 1356]