سیدہ عائشہ صدیقہ رضی اللہ عنہا بیان کرتی ہیں: ہم نبی اکرم صلی اللہ علیہ وسلم کے ساتھ ایک سفر میں شریک تھے، ہم ”بیداء“ یا شاید ”ذات الجیش“ کے مقام پر پہنچے تو ہار گر گیا۔ نبی اکرم صلی اللہ علیہ وسلم نے ہار کی تلاش میں وہاں پڑاؤ کر لیا اور لوگ بھی آپ کے ساتھ وہاں رک گئے۔ وہاں آس پاس پانی نہیں تھا اور لوگوں کے پاس بھی پانی نہیں تھا۔ کچھ لوگ سیدنا ابوبکر صدیق رضی اللہ عنہ کے پاس آئے اور بولے: کیا آپ نے یہ ملاحظہ فرمایا ہے کہ سیدہ عائشہ صدیقہ رضی اللہ عنہا نے کیا کیا ہے؟ انہوں نے نبی اکرم صلی اللہ علیہ وسلم اور لوگوں کو یہاں رکنے پر مجبور کر دیا ہے حالانکہ یہاں آس پاس پانی نہیں ہے اور لوگوں کے پاس بھی پانی نہیں ہے۔ سیدنا ابوبکر صدیق رضی اللہ عنہ نے (سیدہ عائشہ رضی اللہ عنہا پر) ناراضگی کا اظہار کیا اور جو اللہ کو منظور تھا وہ کہا، وہ اپنا ہاتھ میرے پہلو پر مارتے رہے، لیکن میں نے حرکت اس لیے نہیں کی تھی کیونکہ نبی اکرم صلی اللہ علیہ وسلم (میری گود) میں سر رکھ کر سو رہے تھے۔ پھر جب نبی اکرم صلی اللہ علیہ وسلم بیدار ہوئے تو صبح کا وقت ہو گیا تھا اور پانی موجود نہیں تھا، تو اللہ تعالیٰ نے تیمم کے حکم سے متعلق آیت نازل کر دی تو لوگوں نے تیمم کیا۔ اس پر سیدنا اسید بن حضیر رضی اللہ عنہ، جو نقباء میں سے ایک ہیں، انہوں نے یہ کہا: اے آلِ ابوبکر! یہ آپ کی پہلی برکت نہیں ہے۔ سیدہ عائشہ رضی اللہ عنہا بیان کرتی ہیں: جس اونٹ پر میں سوار تھی جب ہم نے اس کو اٹھایا تو اس کے نیچے سے ہمیں ہار مل گیا۔ [صحیح ابن حبان/كتاب الطهارة/حدیث: 1317]

ابو یعفور بیان کرتے ہیں: میں نے سیدنا انس بن مالک رضی اللہ عنہ سے موزوں پر مسح کرنے کے بارے میں دریافت کیا، تو انہوں نے بتایا کہ نبی اکرم صلی اللہ علیہ وسلم موزوں پر مسح کیا کرتے تھے۔ [صحیح ابن حبان/كتاب الطهارة/حدیث: 1318]

زر بن حبیش رحمہ اللہ بیان کرتے ہیں: میں سیدنا صفوان بن عسال رضی اللہ عنہ کی خدمت میں حاضر ہوا تاکہ ان سے موزوں پر مسح کرنے کے بارے میں دریافت کروں۔ انہوں نے دریافت کیا: تم کیوں آئے ہو؟ میں نے جواب دیا: علم کے حصول کے لیے۔ انہوں نے فرمایا: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”طالب علم کے عمل سے راضی ہو کے فرشتے اپنے پر اس کے لیے بچھا دیتے ہیں۔“ میں نے ان سے موزوں پر مسح کے بارے میں دریافت کیا، تو انہوں نے بتایا کہ اللہ کے رسول صلی اللہ علیہ وسلم نے یہ حکم دیا تھا: ”جب ہم سفر کر رہے ہوں، تو تین روز اور جب ہم مقیم ہوں، تو ایک دن رات تک مسح کر سکتے ہیں۔ ہم پاخانہ یا پیشاب یا سونے (کی وجہ سے وضو کرتے ہوئے) انہیں نہیں اتاریں گے، البتہ جنابت (کی صورت میں انہیں اتار کر پاؤں کو دھویا جائے گا)۔“ [صحیح ابن حبان/كتاب الطهارة/حدیث: 1319]

زر بن حبیش بیان کرتے ہیں: میں سیدنا صفوان بن عسال مرادی رضی اللہ عنہ کی خدمت میں حاضر ہوا۔ میں نے عرض کی: موزوں پر مسح کرنے کے بارے میں میرے ذہن میں کچھ الجھن ہے، کیا آپ نے نبی اکرم صلی اللہ علیہ وسلم کو موزوں پر مسح کرنے کے بارے میں ارشاد فرماتے ہوئے سنا ہے؟ انہوں نے جواب دیا: جی ہاں! اللہ کے رسول صلی اللہ علیہ وسلم نے ہمیں یہ حکم دیا تھا: ”جب ہم سفر کی حالت میں ہوں (راوی کہتے ہیں شاید یہ الفاظ ہیں) جب ہم مسافر ہوں، تو پاخانہ یا پیشاب کرنے کے بعد (وضو کرتے ہوئے) تین دن اور تین راتوں تک اپنے موزے الگ نہ کریں (راوی کو شک ہے شاید یہ الفاظ ہیں) اتاریں نہیں، البتہ جنابت کا حکم مختلف ہے۔“ [صحیح ابن حبان/كتاب الطهارة/حدیث: 1320]

زر بن حبیش بیان کرتے ہیں کہ میں سیدنا صفوان بن عسال مرادی رضی اللہ عنہ کی خدمت میں حاضر ہوا، انہوں نے دریافت کیا: ”تم کیوں آئے ہو؟“ میں نے جواب دیا: ”علم کے حصول کے لیے۔“ انہوں نے فرمایا: ”طالب علم کی طلب سے راضی ہو کر فرشتے اپنے پر اس کے لیے بچھا دیتے ہیں۔“ میں نے عرض کی: ”پاخانہ اور پیشاب کرنے کے بعد (وضو کرتے ہوئے) موزوں پر مسح کرنے کے بارے میں میرے ذہن میں کچھ الجھن ہے، آپ صحابیِ رسول ہیں، میں آپ کی خدمت میں اس بارے میں دریافت کرنے کے لیے حاضر ہوا ہوں، کیا آپ نے نبی اکرم صلی اللہ علیہ وسلم کی زبانی اس بارے میں کچھ سنا ہے؟“ تو انہوں نے جواب دیا: ”جی ہاں، نبی اکرم صلی اللہ علیہ وسلم ہمیں یہ حکم دیتے تھے کہ جب ہم سفر کی حالت میں ہوں (راوی کو شک ہے، شاید یہ الفاظ ہیں) جب ہم مسافر ہوں، تو تین دن اور تین راتوں تک اپنے موزے نہ اتاریں، البتہ جنابت کا حکم مختلف ہے، تاہم پاخانہ، پیشاب یا نیند کی (صورت میں وضو ٹوٹنے پر وضو کرتے ہوئے ہم انہیں نہیں اتاریں گے)۔“ میں نے ان سے دریافت کیا: ”کیا آپ نے نبی اکرم صلی اللہ علیہ وسلم کو خواہش کے بارے میں کوئی چیز ذکر کرتے ہوئے سنا ہے؟“ انہوں نے جواب دیا: ”جی ہاں، ایک مرتبہ ہم سفر کر رہے تھے، ایک دیہاتی نے نبی اکرم صلی اللہ علیہ وسلم کو بلند آواز میں پکارا: ”اے سیدنا محمد صلی اللہ علیہ وسلم !“ تو نبی اکرم صلی اللہ علیہ وسلم نے اس کے کلام کی مانند (بلند آواز میں) اسے جواب دیا اور فرمایا: ”آگے آ جاؤ۔“ ہم نے (اس دیہاتی) سے کہا: ”تمہارا ستیاناس ہو! تم اپنی آواز کو پست کرو، تمہیں اس بات سے منع کیا گیا ہے (کہ تم نبی اکرم صلی اللہ علیہ وسلم کے سامنے اونچی آواز میں بات کرو)۔“ اس شخص نے عرض کی: ”ایسے شخص کے بارے میں آپ کی کیا رائے ہے جو کسی قوم سے محبت رکھتا ہے، لیکن ان کے ساتھ شامل نہیں ہوتا؟“ نبی اکرم صلی اللہ علیہ وسلم نے فرمایا: ”وہ قیامت کے دن اس کے ساتھ ہوگا جس سے وہ محبت رکھتا ہے۔“ (راوی بیان کرتے ہیں) اس کے بعد نبی اکرم صلی اللہ علیہ وسلم مسلسل ہمارے ساتھ بات چیت کرتے رہے، یہاں تک کہ آپ صلی اللہ علیہ وسلم نے یہ بات ارشاد فرمائی: ”مغرب کی سمت میں ایک دروازہ ہے، جس کی چوڑائی چالیس برس کی مسافت جتنی ہے، اللہ تعالیٰ نے جس دن زمینوں اور آسمانوں کو پیدا کیا، اس دن اسے توبہ کے لیے پیدا کیا تھا اور وہ اسے اس وقت تک بند نہیں کرے گا، جب تک سورج اس (مغرب کی) طرف سے طلوع نہیں ہوگا۔““ [صحیح ابن حبان/كتاب الطهارة/حدیث: 1321]

سیدنا علی رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ہمیں یہ رخصت دی تھی کہ ”مسافر تین دن تک اور مقیم شخص ایک دن اور ایک رات تک موزوں پر مسح کر سکتا ہے۔“ [صحیح ابن حبان/كتاب الطهارة/حدیث: 1322]

سیدنا اسامہ بن زید رضی اللہ عنہما بیان کرتے ہیں: سیدنا بلال رضی اللہ عنہ اور نبی اکرم صلی اللہ علیہ وسلم بازار تشریف لائے، پھر نبی اکرم صلی اللہ علیہ وسلم قضائے حاجت کے لیے تشریف لے گئے، سیدنا اسامہ بن زید رضی اللہ عنہما بیان کرتے ہیں: میں نے سیدنا بلال رضی اللہ عنہ سے دریافت کیا: نبی اکرم صلی اللہ علیہ وسلم نے کیا کیا؟ سیدنا بلال رضی اللہ عنہ نے بتایا: نبی اکرم صلی اللہ علیہ وسلم قضائے حاجت کے لیے تشریف لے گئے، پھر آپ صلی اللہ علیہ وسلم نے وضو کرتے ہوئے چہرے اور دونوں بازوؤں کو دھویا، آپ صلی اللہ علیہ وسلم نے سر پر مسح کیا اور دونوں موزوں پر مسح کیا، پھر آپ صلی اللہ علیہ وسلم نے نماز ادا کی۔ [صحیح ابن حبان/كتاب الطهارة/حدیث: 1323]

عبدالرحمن بن ابوبکرہ اپنے والد (رضی اللہ عنہ) کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں: ”مسافر شخص کو تین دن اور تین راتوں تک اور مقیم کو ایک دن اور ایک رات تک (موزوں پر مسح کرنے) کی رخصت دی ہے، جب آدمی وضو کرنے کے بعد موزوں کو پہن لے، تو وہ ان پر مسح کر سکتا ہے۔“ [صحیح ابن حبان/كتاب الطهارة/حدیث: 1324]

زر بن حبیش بیان کرتے ہیں کہ میں صفوان بن عسال مرادی رضی اللہ عنہ کی خدمت میں حاضر ہوا، انہوں نے دریافت کیا: تم کیوں آئے ہو؟ میں نے جواب دیا: علم حاصل کرنے کے لیے۔ انہوں نے فرمایا: میں نے نبی اکرم صلی اللہ علیہ وسلم کو یہ بات فرماتے ہوئے سنا ہے: ”جو بھی شخص علم کے حصول کے لیے گھر سے نکلتا ہے، تو فرشتے اس کے اس عمل سے راضی ہو کر اپنے پر اس کے لیے بچھا دیتے ہیں۔“ زر نے کہا: میں اس لیے آیا ہوں تاکہ موزوں پر مسح کے بارے میں دریافت کروں، تو انہوں نے فرمایا: جی ہاں، ہم ایک لشکر میں تھے جسے نبی اکرم صلی اللہ علیہ وسلم نے روانہ کیا تھا، تو آپ صلی اللہ علیہ وسلم نے ہمیں یہ ہدایت فرمائی: ”جب تم موزوں کو طہارت کی حالت میں (یعنی وضو کر کے) پہن لو تو سفر کے دوران تین دن تک ان پر مسح کر سکتے ہو، اور پاخانہ یا پیشاب کرنے کے بعد (وضو کرتے ہوئے) انہیں نہیں اتارو گے۔“ [صحیح ابن حبان/كتاب الطهارة/حدیث: 1325]

عروہ بن مغیرہ بن شعبہ اپنے والد (سیدنا مغیرہ بن شعبہ رضی اللہ عنہ) کا یہ بیان نقل کرتے ہیں کہ میں نے نبی اکرم صلی اللہ علیہ وسلم کو دیکھا، آپ صلی اللہ علیہ وسلم نے وضو کیا، آپ صلی اللہ علیہ وسلم نے اپنے چہرے اور دونوں بازوؤں کو دھویا، پھر آپ صلی اللہ علیہ وسلم نے اپنے موزوں پر مسح کر لیا۔ میں نے کہا: یا رسول اللہ! کیا آپ اپنے موزوں پر مسح کر رہے ہیں؟ آپ صلی اللہ علیہ وسلم نے فرمایا: ”میں نے اپنے پاؤں باوضو حالت میں ان میں داخل کیے تھے۔“ [صحیح ابن حبان/كتاب الطهارة/حدیث: 1326]