سیدہ عائشہ رضی اللہ عنہا بیان کرتی ہیں کہ نبی اکرم صلی اللہ علیہ وسلم ہم میں سے کسی ایک (زوجہ محترمہ) کو، جبکہ وہ حیض کی حالت میں ہوتیں، یہ ہدایت کرتے تھے کہ ”تہبند باندھ لیں“، پھر آپ صلی اللہ علیہ وسلم اس خاتون کے ساتھ مباشرت کر لیتے تھے۔ [صحیح ابن حبان/كتاب الطهارة/حدیث: 1367]

سیدہ عائشہ رضی اللہ عنہا بیان کرتی ہیں: نبی اکرم صلی اللہ علیہ وسلم جب اپنی کسی زوجہ محترمہ کے ساتھ لیٹتے اور اس وقت وہ حیض کی حالت میں ہوتیں، تو آپ صلی اللہ علیہ وسلم اسے یہ حکم دیتے تھے کہ ”وہ تہبند باندھ لے۔“ [صحیح ابن حبان/كتاب الطهارة/حدیث: 1368]

سیدنا حذیفہ رضی اللہ عنہ بیان کرتے ہیں کہ نبی اکرم صلی اللہ علیہ وسلم کی مجھ سے ملاقات ہوئی، میں اس وقت جنابت کی حالت میں تھا۔ آپ صلی اللہ علیہ وسلم نے میری طرف ہاتھ بڑھایا تو میں نے عرض کی: میں جنابت کی حالت میں ہوں۔ نبی اکرم صلی اللہ علیہ وسلم نے ارشاد فرمایا: ”مسلمان نجس نہیں ہوتا۔“ [صحیح ابن حبان/كتاب الطهارة/حدیث: 1369]

سیدنا حذیفہ رضی اللہ عنہ بیان کرتے ہیں کہ نبی اکرم صلی اللہ علیہ وسلم کی اپنے اصحاب میں سے جب بھی کسی شخص کے ساتھ ملاقات ہوتی تھی، تو آپ صلی اللہ علیہ وسلم اس پر ہاتھ پھیرتے تھے اور اسے دعا دیا کرتے تھے۔ راوی بیان کرتے ہیں کہ ایک دن نبی اکرم صلی اللہ علیہ وسلم کو میں نے صبح کے وقت دیکھا تو ایک طرف ہٹ گیا، پھر دن چڑھ جانے کے بعد میں آپ صلی اللہ علیہ وسلم کی خدمت میں حاضر ہوا تو آپ صلی اللہ علیہ وسلم نے ارشاد فرمایا: ”میں نے تمہیں دیکھا تھا کہ تم (مجھے دیکھ کر) ایک طرف ہٹ گئے تھے“، میں نے عرض کی: میں اس وقت جنابت کی حالت میں تھا، مجھے یہ اندیشہ ہوا کہ کہیں آپ صلی اللہ علیہ وسلم ایسی حالت میں مجھے مس نہ کر لیں، نبی اکرم صلی اللہ علیہ وسلم نے ارشاد فرمایا: ”مسلمان نجس نہیں ہوتا۔“ [صحیح ابن حبان/كتاب الطهارة/حدیث: 1370]

محمد بن سیرین، سیدنا انس بن مالک رضی اللہ عنہ کا یہ بیان نقل کرتے ہیں کہ قربانی کے دن نبی اکرم صلی اللہ علیہ وسلم نے جمرہ کو کنکریاں ماریں، پھر آپ کے حکم کے تحت قربانی کے اونٹوں کو نحر کر دیا گیا۔ سر مونڈنے والا شخص آپ کے پاس بیٹھا ہوا تھا۔ اس دن نبی اکرم صلی اللہ علیہ وسلم نے اپنے دستِ مبارک کے ذریعے اپنے بال سیدھے کیے، پھر نبی اکرم صلی اللہ علیہ وسلم نے بالوں کے دائیں طرف والے حصے کو اپنی مٹھی میں لیا اور حجام سے کہا: ”تم مونڈ دو“ اس نے انہیں مونڈ دیا۔ پھر نبی اکرم صلی اللہ علیہ وسلم نے وہ بال اس دن اپنے پاس موجود افراد میں ایک ایک، دو دو کر کے تقسیم کر دیے، پھر آپ صلی اللہ علیہ وسلم نے اپنے بائیں طرف والے بال مٹھی میں لیے اور حجام سے کہا: ”انہیں مونڈ دو“ تو اس نے وہ مونڈ دیے۔ آپ صلی اللہ علیہ وسلم نے سیدنا ابوطلحہ انصاری رضی اللہ عنہ کو بلایا اور وہ انہیں دے دیے۔ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کے اپنے اصحاب کے درمیان اپنے بال تقسیم کرنا اس بات کا واضح بیان ہے کہ انسان کا بال پاک ہوتا ہے کیونکہ صحابہ کرام رضی اللہ عنہم نے نبی اکرم صلی اللہ علیہ وسلم کے موئے مبارک حاصل کیے تھے تاکہ اس کے ذریعے برکت حاصل کریں، تو کسی نے اسے اپنے تہبند میں رکھ لیا، کسی نے اسے اپنے ہاتھ میں پکڑ لیا، کسی نے گریبان میں رکھ لیا اور وہ لوگ ان کے سمیت نماز ادا کرتے تھے اور وہ اپنی ضروریات پوری کیا کرتے تھے اور موئے مبارک ان کے ساتھ ہوتے تھے۔ یہاں تک کہ ان میں سے زیادہ تر نے وصیت کی کہ ان موئے مبارک کو ان کے کفن میں رکھا جائے۔ اگر یہ بال ناپاک ہوتے تو نبی اکرم صلی اللہ علیہ وسلم یہ ناپاک چیز لوگوں میں تقسیم نہ کرتے، جبکہ آپ صلی اللہ علیہ وسلم کو اس بات کا علم بھی تھا کہ وہ اس طرح سے برکت حاصل کریں گے جس طریقے کا ہم نے ذکر کیا ہے، تو جب نبی اکرم صلی اللہ علیہ وسلم کے حوالے سے یہ بات مستند طور پر ثابت ہے، تو آپ کی امت کے حوالے سے بھی یہ بات مستند ہو گی کیونکہ یہ بات ناممکن ہے کہ ایک چیز نبی اکرم صلی اللہ علیہ وسلم کے وجود سے پاک ہو اور آپ کی امت کی طرف سے وہی چیز بعینہ ناپاک ہو۔ [صحیح ابن حبان/كتاب الطهارة/حدیث: 1371]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم کی خدمت میں بچوں کو لایا جاتا تھا، آپ صلی اللہ علیہ وسلم انہیں گھٹی دیتے تھے۔ ایک بچے کو لایا گیا تو اس نے آپ صلی اللہ علیہ وسلم پر پیشاب کر دیا، آپ صلی اللہ علیہ وسلم نے اس پر پانی چھڑک دیا اور اس جگہ کو دھویا نہیں۔ [صحیح ابن حبان/كتاب الطهارة/حدیث: 1372]

سیدہ ام قیس بنت محصن اسدیہ رضی اللہ عنہا بیان کرتی ہیں: میں اپنے بچے کو لے کر نبی اکرم صلی اللہ علیہ وسلم کی خدمت میں حاضر ہوئی جو کچھ کھاتا نہیں تھا۔ اس نے آپ پر پیشاب کر دیا تو نبی اکرم صلی اللہ علیہ وسلم نے پانی منگوا کر اس پر چھڑک دیا۔ [صحیح ابن حبان/كتاب الطهارة/حدیث: 1373]

سیدہ ام قیس بنت محصن اسدیہ رضی اللہ عنہا جو سیدنا عکاشہ بن محصن رضی اللہ عنہ کی بہن ہیں اور ان مہاجر خواتین میں سے ایک ہیں، جنہوں نے نبی اکرم صلی اللہ علیہ وسلم کے دست اقدس پر بیعت کی تھی، وہ بیان کرتی ہیں: میں اپنے بچے کو لے کر نبی اکرم صلی اللہ علیہ وسلم کی خدمت میں حاضر ہوئی جو کچھ کھاتا نہیں تھا، نبی اکرم صلی اللہ علیہ وسلم نے اسے پکڑا اور گود میں بٹھا لیا۔ اس نے نبی اکرم صلی اللہ علیہ وسلم کے کپڑوں پر پیشاب کر دیا۔ نبی اکرم صلی اللہ علیہ وسلم نے پانی لیا اور اس جگہ پر چھڑک دیا۔ آپ صلی اللہ علیہ وسلم نے اسے دھویا نہیں۔ ابن شہاب کہتے ہیں: اس کے بعد یہ رواج چل پڑا کہ بچے کے پیشاب کو دھویا نہیں جاتا جب تک وہ کچھ کھانے کے قابل نہیں ہو جاتا، جب وہ کھانے لگے گا، تو اس کے پیشاب کو دھویا جائے گا۔ [صحیح ابن حبان/كتاب الطهارة/حدیث: 1374]

سیدنا علی بن ابی طالب رضی اللہ عنہ بیان کرتے ہیں کہ نبی اکرم صلی اللہ علیہ وسلم نے دودھ پیتے بچے کے پیشاب کے بارے میں یہ فرمایا ہے: ”لڑکے کے پیشاب پر پانی چھڑک دیا جائے گا، اور لڑکی کے پیشاب کو دھویا جائے گا۔“ [صحیح ابن حبان/كتاب الطهارة/حدیث: 1375]

سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم کی مانگ میں موجود مشک کی چمک کا منظر آج بھی میری نگاہ میں ہے، آپ صلی اللہ علیہ وسلم اس وقت احرام باندھے ہوئے تھے۔ [صحیح ابن حبان/كتاب الطهارة/حدیث: 1376]