سیدنا انس بن مالک رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں کہ جب آپ صلی اللہ علیہ وسلم بیت الخلاء میں تشریف لے جاتے تھے، تو یہ پڑھتے تھے: «اللَّهُمَّ إِنِّي أَعُوذُ بِكَ مِنَ الْخُبُثِ وَالْخَبَائِثِ» ”اے اللہ! میں مذکر شیاطین اور مؤنث شیاطین سے تیری پناہ مانگتا ہوں۔“ (امام ابن حبان رحمہ اللہ فرماتے ہیں:) (الخبث اور الخبائث یہ مذکر اور مؤنث شیاطین کی جمع ہیں۔ ایک مذکر شیطان کے لیے لفظ خبیث استعمال ہوتا ہے اور دو کے لیے خبیثان استعمال ہوتا ہے اور تین کے لیے خبائث استعمال ہوتا ہے۔ نبی اکرم صلی اللہ علیہ وسلم مذکر اور مؤنث دونوں طرح کے شیاطین سے پناہ مانگتے تھے اور یہ کہتے تھے: ”اے اللہ! میں مذکر اور مؤنث شیاطین سے تیری پناہ مانگتا ہوں۔“) [صحیح ابن حبان/كتاب الطهارة/حدیث: 1407]

سیدنا زید بن ارقم رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”قضائے حاجت کے مقام پر شیاطین آ جاتے ہیں، تو جب کوئی شخص وہاں جائے، تو اسے یہ پڑھ لینا چاہیے: «اللَّهُمَّ إِنِّي أَعُوذُ بِكَ مِنَ الْخُبُثِ وَالْخَبَائِثِ» ”اے اللہ! میں مذکر شیاطین اور مؤنث شیاطین سے تیری پناہ مانگتا ہوں“۔“ (امام ابن حبان رحمہ اللہ فرماتے ہیں:) خبث مذکر شیاطین کی جمع ہے اور خبائث مؤنث شیاطین کی جمع ہے، یہ کہا جاتا ہے کہ: [صحیح ابن حبان/كتاب الطهارة/حدیث: 1408]

سیدہ عائشہ صدیقہ رضی اللہ عنہا بیان کرتی ہیں کہ سیدہ سودہ بنت زمعہ رضی اللہ عنہا بھاری جسم والی خاتون تھیں، وہ جب رات کے وقت قضائے حاجت کے لیے جاتی تھیں تو خواتین کے درمیان نمایاں ہوتی تھیں۔ ایک مرتبہ سیدنا عمر بن خطاب رضی اللہ عنہ نے انہیں دیکھا اور بولے: آپ اس بات کا جائزہ لیں کہ آپ کیسی حالت میں باہر آئی ہیں، اللہ کی قسم! جب آپ باہر آتی ہیں تو ہم سے پوشیدہ نہیں رہتی ہیں۔ سیدہ سودہ رضی اللہ عنہا نے اس بات کا تذکرہ نبی اکرم صلی اللہ علیہ وسلم سے کیا۔ اس وقت نبی اکرم صلی اللہ علیہ وسلم کے دستِ مبارک میں ایک بوٹی تھی، ابھی نبی اکرم صلی اللہ علیہ وسلم نے اسے اپنے دستِ مبارک سے واپس نہیں رکھا تھا یہاں تک کہ وحی مکمل ہو گئی۔ آپ صلی اللہ علیہ وسلم نے ارشاد فرمایا: ”اللہ تعالیٰ نے تم خواتین کے لیے یہ رخصت دی ہے، تم قضائے حاجت کے لیے گھر سے باہر نکل سکتی ہو۔“ [صحیح ابن حبان/كتاب الطهارة/حدیث: 1409]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے فرمایا: ”(استنجا کرتے ہوئے) جو شخص پتھر استعمال کرتا ہے اسے طاق تعداد میں استعمال کرنے چاہییں، اگر وہ ایسا کرتا ہے تو اچھی بات ہے، اور جو شخص قضائے حاجت کے لیے جائے اسے پردہ کر لینا چاہیے، اگر اسے پردہ کرنے کے لیے صرف ریت کا ٹیلہ ملتا ہے (تو اس سے ہی پردہ کرنا چاہیے)، کیونکہ شیطان اولادِ آدم کی شرم گاہوں سے کھیلتا ہے۔“ [صحیح ابن حبان/كتاب الطهارة/حدیث: 1410]

سیدنا عبداللہ بن جعفر رضی اللہ عنہما بیان کرتے ہیں کہ نبی اکرم صلی اللہ علیہ وسلم اس بات کو پسند کرتے تھے کہ آپ کسی ٹیلے یا کھجوروں کے جھنڈ کی اوٹ میں قضائے حاجت کریں۔ [صحیح ابن حبان/كتاب الطهارة/حدیث: 1411]

سیدنا عبداللہ بن جعفر رضی اللہ عنہ بیان کرتے ہیں کہ نبی اکرم صلی اللہ علیہ وسلم اپنے خچر پر سوار ہوئے اور آپ نے مجھے بھی اپنے پیچھے بٹھا لیا۔ نبی اکرم صلی اللہ علیہ وسلم جب قضائے حاجت کے لیے تشریف لے جاتے تو آپ کو یہ بات پسند تھی کہ آپ کسی ٹیلے کی اوٹ میں قضائے حاجت کریں، یا کھجوروں کے جھنڈ کی اوٹ میں کریں۔ راوی بیان کرتے ہیں کہ پھر نبی اکرم صلی اللہ علیہ وسلم ایک انصاری کے باغ میں تشریف لے گئے۔ [صحیح ابن حبان/كتاب الطهارة/حدیث: 1412]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم جب قضائے حاجت کے لیے تشریف لے جاتے تھے تو اپنی انگوٹھی اتار دیتے تھے۔ [صحیح ابن حبان/كتاب الطهارة/حدیث: 1413]

سیدنا انس بن مالک رضی اللہ عنہ بیان کرتے ہیں: نبی اکرم صلی اللہ علیہ وسلم کی انگوٹھی پر نقش بنا ہوا تھا جو تین سطروں میں تھا؛ لفظ «مُحَمَّدٌ» ایک سطر میں، لفظ «رَسُولُ» ایک سطر میں اور لفظ «اللّٰهِ» ایک سطر میں۔ [صحیح ابن حبان/كتاب الطهارة/حدیث: 1414]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”بہت زیادہ لعنت کرنے والی دو چیزوں سے بچو۔“ لوگوں نے عرض کی: بہت زیادہ لعنت کرنے والی دو چیزیں کیا ہیں؟ نبی اکرم صلی اللہ علیہ وسلم نے ارشاد فرمایا: ”یہ کہ کوئی شخص لوگوں کے راستے میں، یا ان کے (گھروں کی) عمارت کے پاس قضائے حاجت کرے۔“ [صحیح ابن حبان/كتاب الطهارة/حدیث: 1415]

سیدنا ابوایوب انصاری رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”جب کوئی شخص قضائے حاجت کے لیے آئے، تو وہ پاخانہ یا پیشاب کرتے ہوئے قبلہ کی طرف رخ یا پیٹھ نہ کرے بلکہ (مدینہ منورہ کے حساب سے) مشرق یا مغرب کی طرف رخ کرے۔“ سیدنا ابوایوب انصاری رضی اللہ عنہ بیان کرتے ہیں: جب ہم شام آئے، تو وہاں ہمیں ایسے بیت الخلا ملے جو قبلہ کی سمت میں بنائے ہوئے تھے، تو ہم لوگ ان میں تھوڑا مڑ کر بیٹھا کرتے تھے اور اللہ تعالیٰ سے مغفرت طلب کیا کرتے تھے۔ [صحیح ابن حبان/كتاب الطهارة/حدیث: 1416]