سیدہ اسماء بنت ابوبکر رضی اللہ عنہا بیان کرتی ہیں کہ نبی اکرم صلی اللہ علیہ وسلم سے ایسے کپڑے کے بارے میں دریافت کیا گیا جس پر حیض کا خون لگ جاتا ہے، تو نبی اکرم صلی اللہ علیہ وسلم نے ارشاد فرمایا: ”اس عورت کو چاہیے کہ وہ پانی کے ذریعے اسے دھو کر پھر اس پر پانی چھڑک دے اور اس (کپڑے) میں نماز ادا کر لے۔“ [صحیح ابن حبان/كتاب الطهارة/حدیث: 1397]

سیدہ اسماء بنت ابوبکر رضی اللہ عنہما بیان کرتی ہیں، ایک عورت نے عرض کی: یا رسول اللہ صلی اللہ علیہ وسلم ! میرے جس کپڑے پر حیض کا خون لگ جاتا ہے، میں اس کے ساتھ کیا کروں؟ نبی اکرم صلی اللہ علیہ وسلم نے فرمایا: ”تم اسے کھرچ کر پانی کے ذریعے دھو لو اور اس کے ارد گرد کی جگہ پر پانی چھڑک لو۔“ [صحیح ابن حبان/كتاب الطهارة/حدیث: 1398]

سیدنا ابوہریرہ رضی اللہ عنہ بیان کرتے ہیں کہ ایک دیہاتی مسجد میں کھڑا ہوا اور اس نے پیشاب کرنا شروع کیا، تو لوگ اس کی طرف بڑھے تو نبی اکرم صلی اللہ علیہ وسلم نے لوگوں سے فرمایا: ”اسے کرنے دو اور اس کے پیشاب پر پانی کا ایک ڈول بہا دینا، کیونکہ تمہیں آسانی کرنے کے لیے مبعوث کیا گیا ہے اور تنگی کرنے کے لیے نہیں بھیجا گیا ہے۔“ [صحیح ابن حبان/كتاب الطهارة/حدیث: 1399]

سیدنا ابوہریرہ رضی اللہ عنہ بیان کرتے ہیں کہ ایک دیہاتی مسجد میں پیشاب کرنے لگا، لوگ اس کی طرف لپکے تاکہ اس کی پٹائی کریں تو نبی اکرم صلی اللہ علیہ وسلم نے ارشاد فرمایا: ”اسے کرنے دو، اس کے پیشاب پر پانی کا ایک ڈول بہا دینا (راوی کو شک ہے شاید یہ الفاظ ہیں) پانی کا ایک «سَجْلٍ» (ڈول) بہا دینا، تم لوگوں کو آسانی کرنے کے لیے بھیجا گیا ہے، تمہیں تنگی کا شکار کرنے کے لیے نہیں بھیجا گیا ہے۔“ [صحیح ابن حبان/كتاب الطهارة/حدیث: 1400]

اسحاق بن عبداللہ اپنے چچا سیدنا انس بن مالک رضی اللہ عنہ کا یہ بیان نقل کرتے ہیں کہ نبی اکرم صلی اللہ علیہ وسلم مسجد میں تشریف فرما تھے، اس دوران ایک دیہاتی اندر آیا اور بیٹھ کر پیشاب کرنے لگا، نبی اکرم صلی اللہ علیہ وسلم کے اصحاب نے کہا: رکو رکو، تو نبی اکرم صلی اللہ علیہ وسلم نے ارشاد فرمایا: ”تم اس کے پیشاب کرنے کے دوران اسے روکنے کی کوشش نہ کرو۔“ پھر نبی اکرم صلی اللہ علیہ وسلم نے اس شخص کو بلوایا اور ارشاد فرمایا: ”ان مساجد کے اندر گندگی اور قضائے حاجت کرنا مناسب نہیں ہے“، یا جو بھی نبی اکرم صلی اللہ علیہ وسلم نے ارشاد فرمایا: ”یہاں قرآن کی تلاوت کی جاتی ہے یا اللہ کا ذکر کیا جاتا ہے۔“ پھر نبی اکرم صلی اللہ علیہ وسلم نے پانی کا ایک ڈول منگوایا اور اس پر بہا دیا۔ [صحیح ابن حبان/كتاب الطهارة/حدیث: 1401]

سیدنا ابوہریرہ رضی اللہ عنہ بیان کرتے ہیں: ایک دیہاتی مسجد میں داخل ہوا، نبی اکرم صلی اللہ علیہ وسلم اس وقت مسجد میں تشریف فرما تھے۔ اس دیہاتی نے کہا: اے اللہ! تو میری اور سیدنا محمد صلی اللہ علیہ وسلم کی مغفرت کر دے اور ہمارے ساتھ کسی اور کی مغفرت نہ کرنا، نبی اکرم صلی اللہ علیہ وسلم نے ارشاد فرمایا: ”تم نے ایک کھلی چیز کو تنگ کر دیا ہے“، پھر وہ دیہاتی ایک طرف ہٹا اور مسجد کے ایک کونے میں پیشاب کرنے لگا، بعد میں جب اس دیہاتی کو اسلامی تعلیمات کا علم حاصل ہو گیا، تو اس نے یہ کہا: اللہ کے رسول صلی اللہ علیہ وسلم نے اس سے یہ فرمایا تھا: ”یہ مساجد اللہ کا ذکر کرنے اور نماز ادا کرنے کے لیے ہیں، ان میں پیشاب نہ کیا جائے“، پھر نبی اکرم صلی اللہ علیہ وسلم نے پانی کا ایک ڈول منگوا کر اس کے پیشاب پر بہا دیا۔ [صحیح ابن حبان/كتاب الطهارة/حدیث: 1402]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص اپنے جوتے کے ذریعے گندگی کو روند دے، تو مٹی اس (جوتے پر لگنے والی گندگی) کو صاف کر دیتی ہے۔“ [صحیح ابن حبان/كتاب الطهارة/حدیث: 1403]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص اپنے موزوں کے ذریعے گندگی کو روند دے، تو مٹی انہیں صاف کر دیتی ہے۔“ [صحیح ابن حبان/كتاب الطهارة/حدیث: 1404]

سیدنا ابوہریرہ رضی اللہ عنہ بیان کرتے ہیں: نبی اکرم صلی اللہ علیہ وسلم قضائے حاجت کے لیے تشریف لے گئے، میں ایک پیالے یا برتن میں پانی لے کر آپ کے پاس آیا، آپ نے اس کے ذریعے استنجا کیا، پھر آپ نے اپنا بایاں ہاتھ زمین پر پھیرا اور اسے دھو لیا، پھر میں برتن میں (پانی لے کر) آپ کی خدمت میں حاضر ہوا تو آپ نے وضو کیا۔ [صحیح ابن حبان/كتاب الطهارة/حدیث: 1405]

سیدنا زید بن ارقم رضی اللہ عنہ بیان کرتے ہیں کہ نبی اکرم صلی اللہ علیہ وسلم نے یہ بات ارشاد فرمائی ہے: ”(قضائے حاجت کے مقام پر) شیاطین حاضر ہوتے ہیں، تو جب کوئی شخص (قضائے حاجت کی جگہ) داخل ہونے لگے تو اسے یہ پڑھ لینا چاہیے: «أَعُوذُ بِاللَّهِ مِنَ الْخُبُثِ وَالْخَبَائِثِ» ”میں مذکر شیاطین اور مؤنث شیاطین سے اللہ کی پناہ مانگتا ہوں۔““ (امام ابن حبان رحمہ اللہ فرماتے ہیں:) شعبہ اور سعید دونوں کے حوالے سے یہ روایت مشہور ہے اور یہ وہ روایت ہے جسے نقل کرنے میں قتادہ منفرد ہیں۔ [صحیح ابن حبان/كتاب الطهارة/حدیث: 1406]