سیدنا عبداللہ بن عباس رضی اللہ عنہما بیان کرتے ہیں: نبی اکرم صلی اللہ علیہ وسلم نے ظہر اور عصر کی نمازیں ایک ساتھ ادا کی تھیں، آپ صلی اللہ علیہ وسلم نے مغرب اور عشاء کی نمازیں ایک ساتھ ادا کی تھیں اور یہ کسی خوف کے بغیر اور سفر کے علاوہ تھا۔ امام مالک رحمہ اللہ فرماتے ہیں: میرا یہ خیال ہے، یہ بارش کے موسم میں ہوا ہو گا۔ [صحیح ابن حبان/كتاب الصلاة/حدیث: 1596]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے مدینہ منورہ میں سات اور آٹھ رکعات یعنی ظہر اور عصر کی نمازیں (ایک ساتھ) اور مغرب و عشاء کی نمازیں ایک ساتھ ادا کی ہیں۔ [صحیح ابن حبان/كتاب الصلاة/حدیث: 1597]

سیدنا ابوذر غفاری رضی اللہ عنہ بیان کرتے ہیں، میں نے عرض کی: یا رسول اللہ! کون سی مسجد سب سے پہلے بنائی گئی؟ نبی اکرم صلی اللہ علیہ وسلم نے ارشاد فرمایا: ”مسجدِ حرام، پھر مسجدِ اقصیٰ۔“ راوی بیان کرتے ہیں، میں نے دریافت کیا: ان دونوں کے درمیان کتنا عرصہ تھا؟ نبی اکرم صلی اللہ علیہ وسلم نے فرمایا: ”ان دونوں کے درمیان چالیس برس کا عرصہ تھا، ویسے تمہیں جہاں بھی نماز کا وقت ہو جائے تم نماز ادا کر لو، وہی (جگہ) مسجد ہو گی۔“ [صحیح ابن حبان/كتاب الصلاة/حدیث: 1598]

سیدنا عبداللہ بن عمر رضی اللہ عنہما بیان کرتے ہیں: ایک شخص نے نبی اکرم صلی اللہ علیہ وسلم سے سوال کیا: زمین کا کون سا حصہ برا ہے؟ نبی اکرم صلی اللہ علیہ وسلم نے فرمایا: ”مجھے نہیں معلوم، میں اس بارے میں جبرائیل سے دریافت کرتا ہوں۔“ پھر نبی اکرم صلی اللہ علیہ وسلم نے سیدنا جبرائیل علیہ السلام سے دریافت کیا، تو انہوں نے بتایا: مجھے نہیں معلوم، میں اس بارے میں سیدنا میکائیل سے دریافت کرتا ہوں؛ پھر وہ آئے اور انہوں نے بتایا: ”زمین کا سب سے بہتر حصہ مساجد ہیں اور سب سے برا حصہ بازار ہیں۔“ [صحیح ابن حبان/كتاب الصلاة/حدیث: 1599]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”اللہ تعالیٰ کے نزدیک سب سے زیادہ پسندیدہ جگہ مساجد ہیں اور اللہ تعالیٰ کے نزدیک سب سے زیادہ ناپسندیدہ جگہ بازار ہیں۔“ [صحیح ابن حبان/كتاب الصلاة/حدیث: 1600]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم کے زمانہ اقدس میں مسجد کچی اینٹوں سے بنائی گئی تھی اور اس کی چھت پر کھجور کی شاخیں رکھی گئی تھیں، اس کے ستون کھجور کے درخت کے تھے، سیدنا ابوبکر رضی اللہ عنہ نے اس میں کوئی اضافہ نہیں کیا، سیدنا عمر رضی اللہ عنہ نے اس میں توسیع کی، انہوں نے اسے نبی اکرم صلی اللہ علیہ وسلم کے زمانے کی بنیادوں کے مطابق دوبارہ کچی اینٹوں اور شاخوں کے ذریعے تعمیر کیا، انہوں نے دوبارہ اس کے ستون لکڑی کے بنائے، پھر سیدنا عثمان رضی اللہ عنہ نے اس میں تبدیلی کی اور اس میں انہوں نے بہت زیادہ توسیع کی، انہوں نے اس کی دیواریں منقش پتھروں سے بنوائیں اور اس کے ستون منقش پتھروں سے بنوائے اور اس کی چھت ساج کی لکڑی سے بنوائی۔ [صحیح ابن حبان/كتاب الصلاة/حدیث: 1601]

قیس بن طلق اپنے والد رضی اللہ عنہ کا یہ بیان نقل کرتے ہیں کہ ہم چھ آدمی وفد کی شکل میں نبی اکرم صلی اللہ علیہ وسلم کی خدمت میں حاضر ہوئے، پانچ کا تعلق بنو حنیفہ سے تھا اور چھٹا شخص ضبیعہ بن ربیعہ قبیلے سے تعلق رکھتا تھا۔ جب ہم نبی اکرم صلی اللہ علیہ وسلم کی خدمت میں حاضر ہوئے تو ہم نے آپ کے دستِ اقدس پر اسلام قبول کر لیا۔ ہم نے آپ کی اقتدا میں نماز ادا کی۔ ہم نے آپ کو بتایا کہ ہمارے علاقے میں ایک گرجا گھر ہے۔ ہم نے آپ سے آپ کے وضو کے بچے ہوئے پانی کو عنایت کرنے کی درخواست کی، تو نبی اکرم صلی اللہ علیہ وسلم نے پانی منگوایا اور اس سے وضو کیا، آپ نے کلی کی، پھر آپ نے ہمارے لیے ایک برتن میں پانی انڈیل دیا، پھر آپ نے ارشاد فرمایا: ”اس پانی کو لے جاؤ، جب تم اپنے علاقے میں پہنچو تو اس گرجے کو توڑ دینا اور اس کی جگہ اس پانی کو چھڑک دینا اور اس کی جگہ مسجد بنا لینا۔“ ہم نے عرض کی: ہمارا علاقہ بہت دور ہے، یہ پانی خشک ہو جائے گا۔ نبی اکرم صلی اللہ علیہ وسلم نے فرمایا: ”تم اس میں اور پانی ملاتے رہنا، کیونکہ اس نتیجے میں اس کی پاکیزگی میں اضافہ ہی ہو گا۔“ راوی کہتے ہیں: ہم روانہ ہوئے، ہم نے اس بارے میں اختلاف کیا کہ پانی کا وہ برتن کون اٹھائے گا، تو نبی اکرم صلی اللہ علیہ وسلم نے ہم میں سے ہر ایک شخص کے لیے ایک دن اور ایک رات کی باری مقرر کر دی۔ ہم اسے ساتھ لے کر روانہ ہوئے یہاں تک کہ ہم اپنے علاقے میں آئے، پھر ہم نے وہ کام کیا جو نبی اکرم صلی اللہ علیہ وسلم نے ہمیں حکم دیا تھا، اس قوم کا راہب طی قبیلے سے تعلق رکھنے والا ایک شخص تھا، جب ہم نے نماز کے لیے اذان دی تو اس راہب نے کہا: یہ حق کی دعوت ہے، پھر وہ بھاگ گیا، اس کے بعد وہ کبھی نظر نہیں آیا۔ [صحیح ابن حبان/كتاب الصلاة/حدیث: 1602]

عمرو بن دینار بیان کرتے ہیں کہ انہوں نے سیدنا جابر بن عبداللہ رضی اللہ عنہما کو یہ بیان کرتے ہوئے سنا ہے کہ جب خانہ کعبہ کی تعمیر کی گئی تو نبی اکرم صلی اللہ علیہ وسلم اور سیدنا عباس رضی اللہ عنہ پتھر منتقل کر رہے تھے۔ سیدنا عباس رضی اللہ عنہ نے نبی اکرم صلی اللہ علیہ وسلم سے کہا: آپ اپنا تہبند اپنے کندھے پر رکھ لیں تاکہ پتھر سے بچاؤ ہو جائے۔ راوی کہتے ہیں: نبی اکرم صلی اللہ علیہ وسلم نے ایسا ہی کیا، تو آپ صلی اللہ علیہ وسلم زمین پر گر گئے، آپ صلی اللہ علیہ وسلم کی آنکھیں آسمان کی طرف چڑھ گئیں، پھر آپ صلی اللہ علیہ وسلم کھڑے ہوئے اور آپ صلی اللہ علیہ وسلم نے فرمایا: ”میرا تہبند، میرا تہبند۔“ پھر آپ صلی اللہ علیہ وسلم نے اپنا تہبند باندھ لیا۔ [صحیح ابن حبان/كتاب الصلاة/حدیث: 1603]

سیدنا سہل بن سعد رضی اللہ عنہ بیان کرتے ہیں کہ دو آدمیوں کے درمیان اس مسجد کے بارے میں اختلاف ہو گیا جس کی بنیاد تقویٰ پر رکھی گئی ہے ﴿لَمَسْجِدٌ أُسِّسَ عَلَى التَّقْوَىٰ﴾ [سورة التوبة: 108] ، ان میں سے ایک کا کہنا تھا اس سے مراد مدینہ منورہ کی مسجد (یعنی مسجد نبوی) ہے، دوسرے کا کہنا تھا اس سے مراد مسجدِ قبا ہے، وہ لوگ نبی اکرم صلی اللہ علیہ وسلم کی خدمت میں حاضر ہوئے، تو آپ صلی اللہ علیہ وسلم نے ارشاد فرمایا: ”اس سے مراد میری یہ مسجد ہے۔“ [صحیح ابن حبان/كتاب الصلاة/حدیث: 1604]

سیدنا سہل بن سعد رضی اللہ عنہ بیان کرتے ہیں کہ دو آدمیوں کے درمیان اس مسجد کے بارے میں اختلاف ہو گیا ﴿جس کی بنیاد تقویٰ پر رکھی گئی ہے﴾ [سورة التوبة: 108] ، ان میں سے ایک کا یہ کہنا تھا کہ (اس سے مراد) مدینہ منورہ کی مسجد (یعنی مسجد نبوی) ہے، اور دوسرے کا یہ کہنا تھا کہ مسجدِ قبا ہے، وہ لوگ نبی اکرم صلی اللہ علیہ وسلم کی خدمت میں حاضر ہوئے، تو آپ صلی اللہ علیہ وسلم نے ارشاد فرمایا: ”اس سے مراد میری یہ مسجد ہے۔“ [صحیح ابن حبان/كتاب الصلاة/حدیث: 1605]