سیدنا سائب بن خلاد رضی اللہ عنہ بیان کرتے ہیں کہ ایک شخص اپنی قوم کی امامت کر رہا تھا، اس نے قبلہ کی طرف تھوک دیا، نبی اکرم صلی اللہ علیہ وسلم اس کی طرف دیکھ رہے تھے، نبی اکرم صلی اللہ علیہ وسلم نے اس کے فارغ ہونے کے بعد ارشاد فرمایا: ”اس نے تم لوگوں کو نماز نہیں پڑھائی ہے۔“ اس کے بعد اس شخص نے ان لوگوں کو نماز پڑھانے کا ارادہ کیا، تو لوگوں نے اسے منع کر دیا اور اسے نبی اکرم صلی اللہ علیہ وسلم کے فرمان کے بارے میں بتایا، اس نے اس بات کا تذکرہ نبی اکرم صلی اللہ علیہ وسلم کے سامنے کیا، تو آپ صلی اللہ علیہ وسلم نے ارشاد فرمایا: ”جی ہاں۔“ (راوی کہتے ہیں) میرا خیال ہے کہ نبی اکرم صلی اللہ علیہ وسلم نے یہ بات بھی ارشاد فرمائی: ”تم نے اللہ تعالیٰ کو تکلیف پہنچائی ہے۔“ [صحیح ابن حبان/كتاب الصلاة/حدیث: 1636]

سیدنا انس رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”مسجد میں تھوکنا غلطی ہے، اور اس کا کفارہ اسے دفن کرنا ہے۔“ [صحیح ابن حبان/كتاب الصلاة/حدیث: 1637]

سیدنا عبداللہ بن عمر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”(مسجد میں) قبلہ کی سمت میں تھوکنے والا شخص جب قیامت کے دن آئے گا، تو وہ تھوک اس کے چہرے پر لگا ہوا ہو گا۔“ [صحیح ابن حبان/كتاب الصلاة/حدیث: 1638]

سیدنا حذیفہ بن یمان رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص قبلہ کی سمت میں تھوک دیتا ہے، جب وہ قیامت کے دن آئے گا، تو اس کا تھوک اس کی دونوں آنکھوں کے درمیان ہوگا۔“ [صحیح ابن حبان/كتاب الصلاة/حدیث: 1639]

سیدنا ابوذر غفاری رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”میرے سامنے میری امت کے تمام اچھے اور برے اعمال پیش کیے گئے، تو میں نے ان کے اچھے اعمال میں یہ چیز دیکھی کہ وہ گندگی جو راستے سے ہٹا دی جاتی ہے، اور ان کے برے اعمال میں یہ چیز دیکھی کہ مسجد میں تھوک پھینکا گیا اور اسے دفن نہیں کیا گیا۔“ [صحیح ابن حبان/كتاب الصلاة/حدیث: 1640]

سیدنا ابوذر غفاری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”میرے سامنے میری امت کے اچھے اور برے اعمال پیش کیے گئے، تو میں نے ان کے اچھے اعمال میں راستے میں سے تکلیف دہ چیز ہٹانے کو بھی پایا اور ان کے برے اعمال میں اس تھوک کو پایا جو مسجد میں تھی، اور اسے دفن نہیں کیا گیا تھا۔“ [صحیح ابن حبان/كتاب الصلاة/حدیث: 1641]

سیدنا عبداللہ بن بریدہ اپنے والد (سیدنا بریدہ رضی اللہ عنہ) کا یہ بیان نقل کرتے ہیں کہ نبی اکرم صلی اللہ علیہ وسلم نے ارشاد فرمایا: ”انسان میں تین سو ساٹھ جوڑ ہوتے ہیں۔ آدمی پر یہ بات لازم ہے کہ وہ ان میں سے ہر ایک جوڑ کی طرف سے ایک صدقہ کرے۔“ لوگوں نے عرض کی: یا رسول اللہ! کون شخص اس کی طاقت رکھتا ہے؟ نبی اکرم صلی اللہ علیہ وسلم نے ارشاد فرمایا: ”وہ تھوک جو تم مسجد میں دیکھتے ہو اور پھر اسے دفن کر دیتے ہو یا وہ (تکلیف دہ) چیز جسے تم راستے سے ہٹا دیتے ہو (یہ صدقہ ہے)، اور اگر تمہیں یہ چیز نہیں ملتی، تو چاشت کے وقت ادا کی جانے والی دو رکعات تمہارے لیے کافی ہوں گی۔“ (امام ابن حبان رحمہ اللہ فرماتے ہیں:) یہ وہ حدیث ہے جسے نقل کرنے میں اہل مرو اور اہل بصرہ منفرد ہیں۔ [صحیح ابن حبان/كتاب الصلاة/حدیث: 1642]

سیدنا حذیفہ رضی اللہ عنہ نبی کریم صلی اللہ علیہ وسلم کا یہ فرمان نقل کرتے ہیں: ”جو شخص اس «الشَّجَرَةِ الْخَبِيثَةِ» ”خبیث پھل“ کو کھا لے وہ ہماری مسجد کے قریب ہرگز نہ آئے۔“ یہ بات آپ صلی اللہ علیہ وسلم نے تین مرتبہ ارشاد فرمائی۔ اسحاق نامی راوی کہتے ہیں: اس سے مراد «الثُّومُ» ”لہسن“ ہے۔ [صحیح ابن حبان/كتاب الصلاة/حدیث: 1643]

سیدنا جابر بن عبداللہ رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص اس سبزی یعنی لہسن، پیاز یا گندنے کو کھا لے، تو وہ ہماری مساجد میں نہ آئے، کیونکہ فرشتوں کو اس چیز سے تکلیف ہوتی ہے جس سے انسانوں کو تکلیف ہوتی ہے۔“ [صحیح ابن حبان/كتاب الصلاة/حدیث: 1644]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص اس درخت میں سے کھا لے وہ ہماری محافل میں ہمیں تکلیف ہرگز نہ پہنچائے۔“ نبی اکرم صلی اللہ علیہ وسلم کی مراد لہسن تھی۔ [صحیح ابن حبان/كتاب الصلاة/حدیث: 1645]