سیدنا ابوسعید خدری رضی اللہ عنہ بیان کرتے ہیں کہ دو آدمیوں کے درمیان اس مسجد کے بارے میں بحث ہو گئی ﴿جس کی بنیاد تقویٰ پر رکھی گئی ہے﴾ [سورة التوبة: 108] ، ایک شخص نے یہ کہا کہ اس سے مراد مسجدِ قبا ہے، دوسرے شخص نے کہا کہ اس سے مراد نبی اکرم صلی اللہ علیہ وسلم کی مسجد ہے، تو نبی اکرم صلی اللہ علیہ وسلم نے ارشاد فرمایا: ”اس سے مراد میری یہ مسجد ہے۔“ (امام ابوحاتم فرماتے ہیں:) اس کے دونوں طرق محفوظ ہیں۔ [صحیح ابن حبان/كتاب الصلاة/حدیث: 1606]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص نماز ادا کرنے کے لیے یا اللہ تعالیٰ کا ذکر کرنے کے لیے مسجد کو وطن بنا لیتا ہے (یعنی وہاں ٹھہرا رہتا ہے) تو اللہ تعالیٰ اس شخص پر اتنا خوش ہوتا ہے جتنا خوش کسی غائب شخص کے واپس آنے پر اس کے اہل خانہ ہوتے ہیں۔“ (امام ابن حبان رحمہ اللہ فرماتے ہیں:) عرب جب ایک دوسرے سے مختلف چیزوں کی تشبیہ کے طور پر صفت بیان کرنے کا ارادہ کرتے ہیں، تو ان دونوں میں سے کسی ایک کے لفظ کے ہمراہ ان دونوں کو استعمال کر لیتے ہیں اگرچہ حقیقت کے اعتبار سے ان دونوں کا معنی ایک دوسرے سے مختلف ہو جیسا کہ سیدنا ابوہریرہ رضی اللہ عنہ نے یہ کہا ہے کہ نبی اکرم صلی اللہ علیہ وسلم کے زمانہ اقدس میں ہماری خوراک دو سیاہ چیزیں ہوتی تھیں: کھجور اور پانی، تو یہاں انہوں نے ان دونوں کے لیے ان دونوں میں سے ایک لفظ استعمال کیا ہے، جبکہ وہ دو چیزیں ہیں اور یہ اسی طرح ہوگا، جس طرح یہ دو عمروں کے برابر ہے، تو یہاں ان دونوں میں سے ایک کے لفظ کے ذریعے ان دونوں کو استعمال کیا گیا ہے، تو آدمی کا نماز اور بھلائی کے لیے مسجد میں اپنی جگہ کو مقرر کر لینے کی وجہ سے اللہ تعالیٰ کا بندے سے خوش ہونا، اس سے مراد یہ ہے کہ اللہ تعالیٰ اپنی مہربانی، رحمت اور محبت کے ذریعے اس کی طرف نظر کرتا ہے، جو اس کے فعل کی وجہ سے ہوتی ہے۔ اس کی مثال نبی اکرم صلی اللہ علیہ وسلم کے اس فرمان کے مانند ہے، جو آپ نے اللہ تعالیٰ کے فرمان کے طور پر نقل کیا ہے: ”جو شخص ایک بالشت میرے قریب ہوتا ہے میں ایک ذراع اس کے قریب ہوتا ہوں۔“ اس سے مراد یہ ہے کہ جو شخص ایک بالشت اطاعت اور بھلائی کے ذریعے میرا قرب حاصل کرتا ہے، تو میں مہربانی اور رحمت کے ہمراہ ایک ذراع اس کے قریب ہوتا ہوں، اس کی مثالیں بہت زیادہ ہیں جنہیں ہم عنقریب اس کے مخصوص مقام سے متعلق باب میں نقل کریں گے، اگر اللہ تعالیٰ نے اس کو آسان کیا اور اسے سہل فرمایا۔ [صحیح ابن حبان/كتاب الصلاة/حدیث: 1607]

سیدنا عمر بن خطاب رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”جو شخص مسجد تعمیر کرتا ہے، جس میں اللہ کا نام ذکر کیا جائے، تو اللہ تعالیٰ اس کے لیے جنت میں گھر بنا دیتا ہے۔“ [صحیح ابن حبان/كتاب الصلاة/حدیث: 1608]

سیدنا عثمان غنی رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”جو شخص مسجد بناتا ہے، اللہ تعالیٰ اس کے لیے اس (مسجد) کی مانند جنت میں گھر بنا دیتا ہے۔“ بکیر نامی راوی کہتے ہیں: میرا خیال ہے روایت میں یہ الفاظ بھی ہیں: ”اللہ تعالیٰ کی رضا کے حصول کے لیے (مسجد بناتا ہے)۔“ [صحیح ابن حبان/كتاب الصلاة/حدیث: 1609]

سیدنا ابوذر غفاری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص اللہ تعالیٰ کے لیے مسجد بناتا ہے، اگرچہ وہ «قَطَاةٍ» ”قطاۃ“ کے گھونسلے جتنی ہو، تو اللہ تعالیٰ اس کے لیے جنت میں گھر بنا دیتا ہے۔“ [صحیح ابن حبان/كتاب الصلاة/حدیث: 1610]

سیدنا ابوذر غفاری رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص اللہ تعالیٰ کی رضا کے لیے مسجد بناتا ہے، اگرچہ وہ «قَطَاة» کے گھونسلے جتنی ہو، تو اللہ تعالیٰ اس کے لیے جنت میں گھر بنا دیتا ہے۔“ [صحیح ابن حبان/كتاب الصلاة/حدیث: 1611]

سیدنا محمود بن ربیع انصاری رضی اللہ عنہ بیان کرتے ہیں: سیدنا عتبان بن مالک رضی اللہ عنہ اپنی قوم کی امامت کیا کرتے تھے، وہ نابینا تھے، انہوں نے نبی اکرم صلی اللہ علیہ وسلم کی خدمت میں عرض کی: بعض اوقات تاریکی زیادہ ہوتی ہے یا بارش ہوئی ہوتی ہے یا راستے میں پانی آ جاتا ہے، تو میں ایک نابینا شخص ہوں۔ یا رسول اللہ! آپ میرے گھر میں کسی جگہ نماز ادا کر لیجئے میں اس جگہ کو جائے نماز بنا لوں گا۔ راوی بیان کرتے ہیں: نبی اکرم صلی اللہ علیہ وسلم ان کے ہاں تشریف لائے، آپ صلی اللہ علیہ وسلم نے دریافت کیا: ”کون سی جگہ کے بارے میں تم یہ چاہتے ہو کہ میں وہاں نماز ادا کروں؟“ تو انہوں نے اپنے گھر کے ایک حصے کی طرف اشارہ کیا، نبی اکرم صلی اللہ علیہ وسلم نے وہاں نماز ادا کی۔ [صحیح ابن حبان/كتاب الصلاة/حدیث: 1612]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم نے اس بات سے منع فرمایا ہے کہ ”لوگ ایک دوسرے کے مقابلے میں فخر کا اظہار کرنے کے لیے مساجد بنائیں۔“ [صحیح ابن حبان/كتاب الصلاة/حدیث: 1613]

سیدنا انس رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”قیامت اس وقت تک قائم نہیں ہوگی جب تک لوگ مساجد کی تعمیر کے حوالے سے ایک دوسرے کے مقابلے میں فخر نہیں کریں گے۔“ [صحیح ابن حبان/كتاب الصلاة/حدیث: 1614]

سیدنا عبداللہ بن عباس رضی اللہ عنہما روایت کرتے ہیں: نبی اکرم صلی اللہ علیہ وسلم نے ارشاد فرمایا ہے: ”مجھے مساجد کو آراستہ کرنے کا حکم نہیں دیا گیا ہے۔“ سیدنا عبداللہ بن عباس رضی اللہ عنہما فرماتے ہیں: ”تم لوگ ان مساجد کو اسی طرح آراستہ کرو گے جس طرح یہودیوں اور عیسائیوں نے (اپنی عبادت گاہوں کو) آراستہ کیا۔“ ابوفزارہ نامی راوی راشد بن کیسان ہے، اور یہ کوفہ سے تعلق رکھنے والے ”ثقہ“ اور ثبت راویوں میں سے ایک ہے۔ [صحیح ابن حبان/كتاب الصلاة/حدیث: 1615]