سیدنا جابر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”بیشک جن چیزوں کی طرف سوار ہو کر سفر کیا جاتا ہے ان میں سب سے بہتر میری یہ مسجد (یعنی مسجد نبوی) ہے اور بیتِ عتیق (یعنی مسجد حرام) ہے۔“ [صحیح ابن حبان/كتاب الصلاة/حدیث: 1616]

سیدنا ابوسعید خدری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”صرف تین مساجد کی طرف سفر کیا جائے: مسجدِ حرام، مسجدِ اقصیٰ اور میری یہ مسجد۔“ [صحیح ابن حبان/كتاب الصلاة/حدیث: 1617]

سیدنا عبداللہ بن عمر رضی اللہ عنہما بیان کرتے ہیں: نبی اکرم صلی اللہ علیہ وسلم سوار ہو کر اور پیدل قبا آیا کرتے تھے۔ [صحیح ابن حبان/كتاب الصلاة/حدیث: 1618]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”صرف تین مساجد کی طرف سفر کیا جائے: مسجد حرام، میری یہ مسجد اور مسجد اقصیٰ۔“ [صحیح ابن حبان/كتاب الصلاة/حدیث: 1619]

سیدنا عبداللہ بن زبیر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”میری اس مسجد میں ایک نماز ادا کرنا اس کے علاوہ اور کسی بھی جگہ پر ایک ہزار نمازیں ادا کرنے سے زیادہ فضیلت رکھتا ہے، البتہ مسجدِ حرام کا معاملہ مختلف ہے، وہاں ایک نماز ادا کرنا یہاں ایک سو نمازیں ادا کرنے سے زیادہ فضیلت رکھتا ہے۔“ (راوی کہتے ہیں) اس سے مراد مدینہ منورہ کی مسجد ہے۔ [صحیح ابن حبان/كتاب الصلاة/حدیث: 1620]

سیدنا ابوہریرہ رضی اللہ عنہ بیان کرتے ہیں: ”اللہ کے رسول کی مسجد میں ایک نماز ادا کرنا اس کے علاوہ اور کسی بھی جگہ پر ایک ہزار نمازیں ادا کرنے سے زیادہ فضیلت رکھتا ہے۔ البتہ مسجد حرام کا معاملہ مختلف ہے۔ اس کی وجہ یہ ہے، نبی اکرم صلی اللہ علیہ وسلم آخری نبی ہیں اور آپ کی مسجد آخری مسجد ہے۔ (یعنی جو کسی نبی سے منسوب ہو گی)“ ابوسلمہ اور ابوعبداللہ نامی راوی بیان کرتے ہیں: ہمیں اس بارے میں کوئی شک نہیں ہے، سیدنا ابوہریرہ رضی اللہ عنہ نبی اکرم صلی اللہ علیہ وسلم کی حدیث کے طور پر یہ بات بیان کیا کرتے تھے لیکن ہم اس وجہ سے اس حدیث کو بیان کرنے سے رکے رہے، تاکہ پہلے ہم سیدنا ابوہریرہ رضی اللہ عنہ سے اس حدیث کی تصدیق کر لیں، یہاں تک کہ جب سیدنا ابوہریرہ رضی اللہ عنہ کا انتقال ہو گیا، تو ہم آپس میں اس روایت کا تذکرہ کیا کرتے تھے اور ایک دوسرے کو ملامت کیا کرتے تھے کہ ہم نے اس روایت کے بارے میں سیدنا ابوہریرہ رضی اللہ عنہ کے ساتھ بات چیت کیوں نہیں کی تاکہ وہ اس کی نسبت نبی کریم صلی اللہ علیہ وسلم کی طرف کر دیتے اگر انہوں نے یہ حدیث نبی اکرم صلی اللہ علیہ وسلم سے سنی تھی۔ ایک مرتبہ ہم اسی حالت میں عبداللہ بن ابراہیم کے پاس بیٹھے ہوئے تھے ہم نے اس حدیث کا تذکرہ کیا اور اس بارے میں ہم سے جو کوتاہی ہوئی تھی کہ سیدنا ابوہریرہ رضی اللہ عنہ کی حتمی رائے ہم نے نہیں لی تھی۔ اس کا بھی تذکرہ کیا، تو عبداللہ بن ابراہیم نے ہمیں کہا: میں اس بات کی گواہی دیتا ہوں کہ میں نے سیدنا ابوہریرہ رضی اللہ عنہ کو یہ بیان کرتے ہوئے سنا ہے نبی اکرم صلی اللہ علیہ وسلم نے یہ بات ارشاد فرمائی ہے: ”میں آخری نبی ہوں اور یہ آخری مسجد ہے (جو کسی نبی کی طرف منسوب ہو گئی)۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان ”یہ مساجد میں سے آخری ہے“ اس سے آپ کی مراد یہ ہے کہ یہ انبیاء سے متعلق مساجد میں سے آخری ہے کیونکہ مدینہ منورہ کی یہ مسجد اس حوالے سے آخری مسجد ہے، جو دنیا میں بنائی گئی ہے۔ [صحیح ابن حبان/كتاب الصلاة/حدیث: 1621]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص اپنے گھر سے نکل کر میری اس مسجد کی طرف آتا ہے، تو (اس کے) ہر ایک قدم پر اس کے لیے نیکی لکھی جاتی ہے، اور دوسرے قدم پر اس کے گناہ کو ختم کر دیا جاتا ہے (ایسا اس وقت تک ہوتا رہتا ہے)، جب تک وہ واپس نہیں آتا۔“ [صحیح ابن حبان/كتاب الصلاة/حدیث: 1622]

سیدنا ابوسعید خدری رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ایک شخص کو رخصت کرتے ہوئے دریافت فرمایا: ”تم کہاں جانا چاہتے ہو؟“ اس نے عرض کی: میں بیت المقدس جانا چاہتا ہوں، تو نبی اکرم صلی اللہ علیہ وسلم نے ارشاد فرمایا: ”اس مسجد (یعنی مسجد نبوی میں) ایک نماز ادا کرنا اس کے علاوہ اور کسی بھی جگہ پر ایک سو نمازیں ادا کرنے سے زیادہ فضیلت رکھتا ہے، البتہ مسجد حرام کا معاملہ مختلف ہے۔“ [صحیح ابن حبان/كتاب الصلاة/حدیث: 1623]

سیدنا ابوسعید خدری رضی اللہ عنہ بیان کرتے ہیں: نبی اکرم صلی اللہ علیہ وسلم نے ایک شخص کو رخصت کرتے ہوئے دریافت کیا: ”تم کہاں جانا چاہتے ہو؟“ اس نے عرض کی: میں بیت المقدس جانا چاہتا ہوں۔ نبی اکرم صلی اللہ علیہ وسلم نے فرمایا: ”اس مسجد (یعنی مسجد نبوی) میں ایک نماز ادا کرنا اس کے علاوہ کسی بھی جگہ پر ایک سو نمازیں ادا کرنے سے زیادہ فضیلت رکھتا ہے البتہ مسجد حرام کا معاملہ مختلف ہے۔“ عثمان بن ابوشیبہ نامی راوی کہتے ہیں: امام احمد بن حنبل رحمہ اللہ نے مجھ سے اس روایت کے بارے میں دریافت کیا تھا۔ [صحیح ابن حبان/كتاب الصلاة/حدیث: 1624]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”میری اس مسجد میں ایک نماز ادا کرنا اس کے علاوہ اور کسی بھی جگہ پر ایک ہزار نمازیں ادا کرنے سے زیادہ فضیلت رکھتا ہے، البتہ مسجد حرام کا معاملہ مختلف ہے۔“ [صحیح ابن حبان/كتاب الصلاة/حدیث: 1625]