سیدنا جابر رضی اللہ عنہ بیان کرتے ہیں کہ نبی اکرم صلی اللہ علیہ وسلم نے لوگوں کو گندنا کھانے سے منع کیا لیکن لوگ اس سے باز نہیں آئے، ان کے لیے اس کو کھائے بغیر کوئی چارہ نہ تھا۔ نبی اکرم صلی اللہ علیہ وسلم کو اس کی بو محسوس ہوئی تو آپ صلی اللہ علیہ وسلم نے فرمایا: ”کیا میں نے تمہیں اس خبیث سبزی (راوی کو شک ہے شاید یہ الفاظ ہیں) اس بودار سبزی سے منع نہیں کیا تھا؟ جو شخص اسے کھا لے وہ ہماری مساجد میں نہ آئے، کیونکہ فرشتوں کو اس چیز سے تکلیف ہوتی ہے جس سے انسانوں کو تکلیف ہوتی ہے۔“ [صحیح ابن حبان/كتاب الصلاة/حدیث: 1646]

سفیان کہتے ہیں میں نے عمرو بن دینار سے دریافت کیا: اے ابومحمد! کیا آپ نے سیدنا جابر رضی اللہ عنہ کو یہ بیان کرتے ہوئے سنا ہے کہ نبی اکرم صلی اللہ علیہ وسلم نے مسجد میں سے تیر لے کر گزرنے والے شخص سے یہ فرمایا تھا: ”اس کی دھار کی طرف سے اسے پکڑ کر رکھو“؟ تو انہوں نے جواب دیا: جی ہاں۔ [صحیح ابن حبان/كتاب الصلاة/حدیث: 1647]

سیدنا جابر رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ایک شخص کو، جو مسجد سے تیر لے کر گزر رہا تھا، یہ حکم دیا کہ ”وہ وہاں سے گزرتے ہوئے اس کی دھار سے اسے پکڑ کر رکھے۔“ [صحیح ابن حبان/كتاب الصلاة/حدیث: 1648]

سیدنا ابوموسیٰ اشعری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جب کوئی شخص تیر لے کر ہمارے بازار میں سے یا مسجد میں سے گزرے تو اسے اس تیر کو پھل کی طرف سے پکڑنا چاہیے تاکہ وہ کسی مسلمان کو نہ لگ جائے۔“ [صحیح ابن حبان/كتاب الصلاة/حدیث: 1649]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا ہے: ”جب تم کسی شخص کو مسجد میں خرید و فروخت کرتے ہوئے دیکھو تو یہ کہو: «لَا أَرْبَحَ اللَّهُ تِجَارَتَكَ» ”اللہ تعالیٰ تمہاری تجارت میں فائدہ نہ دے۔““ [صحیح ابن حبان/كتاب الصلاة/حدیث: 1650]

سیدنا ابوہریرہ رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”جو شخص کسی کو مسجد میں گمشدہ چیز کا اعلان کرتے ہوئے سنے تو یہ کہے: «لَا رَدَّهَا اللهُ عَلَيْكَ» ”اللہ تعالیٰ یہ چیز تمہیں واپس نہ کرے“، کیونکہ مساجد اس مقصد کے لیے نہیں بنائی گئی ہیں۔“ [صحیح ابن حبان/كتاب الصلاة/حدیث: 1651]

سلیمان بن بریدہ اپنے والد (بریدہ رضی اللہ عنہ) کا یہ بیان نقل کرتے ہیں کہ نبی اکرم صلی اللہ علیہ وسلم نے نماز ادا کر لی تو ایک شخص نے کہا: کون شخص سرخ اونٹ کی طرف میری رہنمائی کرے گا؟ تو نبی اکرم صلی اللہ علیہ وسلم نے فرمایا: ” «لَا وَجَدْتَ، إِنَّمَا بُنِيَتِ الْمَسَاجِدُ لِمَا بُنِيَتْ لَهُ» ”(اللہ کرے) وہ تمہیں نہ ملے، یہ مساجد اپنے مخصوص مقصد کے لیے بنائی گئی ہیں۔“” [صحیح ابن حبان/كتاب الصلاة/حدیث: 1652]

سیدنا ابوہریرہ رضی اللہ عنہ بیان کرتے ہیں کہ سیدنا عمر رضی اللہ عنہ، سیدنا حسان بن ثابت رضی اللہ عنہ کے پاس سے گزرے جب وہ مسجد میں شعر سنا رہے تھے۔ سیدنا عمر رضی اللہ عنہ نے انہیں جھڑکا تو سیدنا حسان بن ثابت رضی اللہ عنہ نے کہا: میں یہاں اس وقت شعر سنایا کرتا تھا جب یہاں وہ ہستی موجود ہوتی تھی جو آپ سے بہتر تھی، پھر سیدنا حسان رضی اللہ عنہ، سیدنا ابوہریرہ رضی اللہ عنہ کی طرف متوجہ ہوئے اور بولے: میں آپ کو اللہ کی قسم دے کر دریافت کرتا ہوں کہ کیا آپ نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: «أَجِبْ عَنِّي، اللَّهُمَّ أَيِّدْهُ بِرُوحِ الْقُدُسِ» ”(اے حسان!) تم میری طرف سے جواب دو، اے اللہ! تو روح القدس کے ذریعے اس کی تائید کر۔“ تو سیدنا ابوہریرہ رضی اللہ عنہ نے فرمایا: جی ہاں۔ نبی اکرم صلی اللہ علیہ وسلم کی طرف سے دفاع کرنے کا حکم ایک ایسا حکم ہے جس کا مخصوص پس منظر ہے۔ نبی اکرم صلی اللہ علیہ وسلم نے یہ حکم تو سیدنا حسان بن ثابت رضی اللہ عنہ کو دیا تھا لیکن اس سے مراد یہ ہے کہ ہر وہ شخص جو نبی اکرم صلی اللہ علیہ وسلم پر لگائے جانے والے جھوٹے الزام، آپ کی طرف منسوب کیے جانے والے جھوٹ اور آپ پر ہونے والے اعتراضات کے حوالے سے آپ کی طرف سے دفاع کرنے کی صلاحیت رکھتا ہو، ایسا کرنا اس پر لازم ہے۔ ایسی صورت میں اسلام (کے احکام) کو قائم کرنے اور دین کو بربادی سے روکنے کی صورت پائی جاتی ہے۔ [صحیح ابن حبان/كتاب الصلاة/حدیث: 1653]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم اپنے اصحاب کے پاس تشریف لائے، وہ لوگ اس وقت مسجد میں حلقے بنا کر بیٹھے ہوئے تھے، تو نبی اکرم صلی اللہ علیہ وسلم نے فرمایا: ”کیا وجہ ہے، میں تمہیں مختلف ٹولیوں میں دیکھ رہا ہوں؟“ [صحیح ابن حبان/كتاب الصلاة/حدیث: 1654]

سیدہ عائشہ صدیقہ رضی اللہ عنہا بیان کرتی ہیں کہ کسی عرب (قبیلے) کی ایک کنیز تھی، ان لوگوں نے اسے آزاد کر دیا تو وہ کنیز ان لوگوں کے ساتھ ہی رہی۔ ایک مرتبہ اس قبیلے والوں کی ایک بچی نکلی جس نے چمڑے اور جواہرات سے بنا ہوا سرخ ہار پہنا ہوا تھا، اس لڑکی نے اس ہار کو ایک جگہ رکھا۔ اس کے پاس سے چیل گزری، وہ ہار وہاں رکھا ہوا تھا، چیل یہ سمجھی کہ شاید یہ گوشت ہے، اس نے اسے اُچک لیا۔ وہ کنیز بیان کرتی ہے کہ لوگوں نے اس ہار کو تلاش کیا، جب وہ انہیں نہیں ملا تو انہوں نے مجھ پر الزام لگایا اور انہوں نے میری پوری تلاشی لی، یہاں تک کہ انہوں نے میری شرم گاہ کی بھی تلاشی لی۔ وہ کنیز بیان کرتی ہے: ”اللہ کی قسم! میں ان کے پاس ہی کھڑی ہوئی تھی، اسی دوران وہ چیل وہاں سے گزری، اس نے اس ہار کو پھینکا جو ان کے درمیان آ کر گرا۔“ وہ کنیز کہتی ہے کہ میں نے کہا: ”یہ ہے وہ جس کی وجہ سے تم نے مجھ پر الزام عائد کیا تھا، تم لوگوں کا یہ گمان تھا اور میں اس سے بری تھی، یہ رہا وہ ہار۔“ وہ کنیز بیان کرتی ہے کہ پھر وہ نبی اکرم صلی اللہ علیہ وسلم کی خدمت میں حاضر ہوئی اور اس نے اسلام قبول کر لیا۔ سیدہ عائشہ صدیقہ رضی اللہ عنہا بیان کرتی ہیں کہ اس کنیز کے لیے مسجد میں ایک خیمہ لگایا گیا تھا۔ سیدہ عائشہ رضی اللہ عنہا بیان کرتی ہیں کہ وہ کنیز میرے پاس آیا کرتی تھی اور میرے ساتھ بات چیت کیا کرتی تھی۔ سیدہ عائشہ رضی اللہ عنہا فرماتی ہیں کہ وہ جب بھی میرے پاس آ کر بیٹھتی تھی تو یہی شعر کہا کرتی تھی: ”ہار والا دن میرے پروردگار کی حیران کن نشانیوں میں سے ایک تھا، بے شک اس نے مجھے کفر کی سرزمین سے نجات دی ہے۔“ سیدہ عائشہ رضی اللہ عنہا فرماتی ہیں کہ میں نے اس کنیز سے دریافت کیا: ”کیا وجہ ہے، جب تم میرے پاس آ کر بیٹھتی ہو، تو یہ شعر کہتی ہو؟“ سیدہ عائشہ رضی اللہ عنہا بیان کرتی ہیں کہ پھر اس کنیز نے مجھے یہ پورا واقعہ سنایا۔ [صحیح ابن حبان/كتاب الصلاة/حدیث: 1655]