سیدنا عبداللہ بن عمر رضی اللہ عنہما فرماتے ہیں کہ میں نبی اکرم صلی اللہ علیہ وسلم کی مسجد میں رات بسر کیا کرتا تھا، میں نوجوان کنوارہ شخص تھا، کتے مسجد میں آیا جایا کرتے تھے اور پیشاب کیا کرتے تھے اور ان کے پیشاب پر کوئی چیز نہیں چھڑکی جاتی تھی۔ (امام ابن حبان رحمہ اللہ فرماتے ہیں:) سیدنا عبداللہ بن عمر رضی اللہ عنہما کا یہ کہنا کہ کتے پیشاب کر دیا کرتے تھے، اس سے مراد یہ ہے کہ مسجد کے باہر ایسا کرتے تھے اور پھر مسجد میں آتے جاتے تھے، لیکن ان کے آنے جانے کی وجہ سے مسجد میں پانی نہیں چھڑکا جاتا تھا۔ [صحیح ابن حبان/كتاب الصلاة/حدیث: 1656]

سیدنا عبداللہ بن حارث رضی اللہ عنہ بیان کرتے ہیں: ہم لوگ نبی اکرم صلی اللہ علیہ وسلم کے زمانہ اقدس میں مسجد میں ہی روٹی اور گوشت کھا لیا کرتے تھے، پھر نماز پڑھ لیا کرتے تھے، ہم از سرِ نو وضو نہیں کرتے تھے۔ [صحیح ابن حبان/كتاب الصلاة/حدیث: 1657]

سیدنا مالک بن حویرث رضی اللہ عنہ بیان کرتے ہیں کہ ہم نبی اکرم صلی اللہ علیہ وسلم کی خدمت میں حاضر ہوئے، ہم نوجوان اور ہم عمر لوگ تھے، ہم نے آپ کے پاس بیس دن قیام کیا، جب آپ کو یہ اندازہ ہوا کہ ہمیں اپنے گھر والوں کی یاد ستا رہی ہے تو آپ نے ہم سے دریافت کیا کہ ہم اپنے گھر والوں کے لیے کیا چھوڑ کر آئے ہیں؟ ہم نے آپ کو اس بارے میں بتایا، نبی اکرم صلی اللہ علیہ وسلم بڑے مہربان اور نرم دل تھے۔ آپ نے فرمایا: ”تم اپنے گھر والوں کے پاس واپس چلے جاؤ، انہیں تعلیم دو، انہیں حکم دو اور تم لوگ اس طرح نماز ادا کرو جس طرح تم نے مجھے نماز ادا کرتے ہوئے دیکھا ہے، جب نماز کا وقت آ جائے تو تم میں سے کوئی ایک شخص اذان دے اور تم میں سے جو شخص عمر میں بڑا ہو وہ تمہاری امامت کرے۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”تم اس طرح نماز ادا کرو جس طرح تم مجھے ادا کرتے دیکھتے ہو“ یہ ایسے حکم کے الفاظ ہیں جو ہر اس چیز پر مشتمل ہیں جن پر نبی اکرم صلی اللہ علیہ وسلم نماز کے دوران عمل کیا کرتے تھے۔ البتہ ان میں سے جن چیزوں کو اجماع یا کسی دوسری حدیث کے ذریعے نفل قرار دیا گیا ہو، تو نماز کے دوران انہیں ترک کرنے والے شخص پر کوئی حرج نہیں ہو گا، لیکن جس چیز کو اجماع یا حدیث نے نفل ہونے کے طور پر مخصوص نہ کیا ہو وہ تمام مخاطب افراد کے لیے لازمی حکم ہو گا جس کو ترک کرنا کسی بھی حال میں جائز نہ ہو گا۔ [صحیح ابن حبان/كتاب الصلاة/حدیث: 1658]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”اگر لوگوں کو یہ پتا چل جائے کہ اذان اور پہلی صف میں (کیا اجر و ثواب) ہے، اور پھر انہیں قرعہ اندازی کے ذریعے اس کا موقع ملے، تو وہ اس کے لیے قرعہ اندازی بھی کر لیں اور اگر انہیں یہ پتا چل جائے کہ عشاء اور فجر (کی نماز باجماعت) میں کیا اجر و ثواب ہے، تو وہ ان دونوں میں ضرور شریک ہوں، اگرچہ وہ گھسٹ کر چل کر آئیں۔“ [صحیح ابن حبان/كتاب الصلاة/حدیث: 1659]

سیدنا عقبہ بن عامر رضی اللہ عنہ بیان کرتے ہیں کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”تمہارا پروردگار بکریوں کے اس چرواہے پر بہت خوش ہوتا ہے جو پہاڑ کی چوٹی پر موجود ہوتا ہے، وہ نماز کے لیے اذان دیتا ہے اور نماز پڑھتا ہے، تو اللہ تعالیٰ فرماتا ہے: میرے اس بندے کی طرف دیکھو، اس نے اذان بھی دی ہے اور نماز بھی ادا کی ہے، یہ مجھ سے ڈرتا ہے، میں نے اپنے بندے کی مغفرت کر دی ہے اور میں اسے جنت میں داخل کروں گا۔“ [صحیح ابن حبان/كتاب الصلاة/حدیث: 1660]

سیدنا عبدالرحمن بن عبداللہ رضی اللہ عنہما اپنے والد کا یہ بیان نقل کرتے ہیں کہ سیدنا ابوسعید خدری رضی اللہ عنہ نے ان سے فرمایا: میں نے دیکھا ہے، تم بھیڑ بکریوں میں رہنے اور دیہاتی زندگی کو پسند کرتے ہو (راوی کو شک ہے یا شاید یہ الفاظ ہیں) یا تم بھیڑ بکریوں میں اور ویرانے میں رہتے ہو، تو جب نماز کی اذان دو تو اپنی آواز کو اذان دیتے ہوئے بلند رکھو، کیونکہ ”مؤذن کی آواز جہاں تک جاتی ہے وہاں اسے جو بھی جن، انسان اور جو بھی چیز سنتی ہے، تو وہ قیامت کے دن اس مؤذن کے حق میں گواہی دے گی۔“ سیدنا ابوسعید خدری رضی اللہ عنہ نے بتایا کہ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے۔ [صحیح ابن حبان/كتاب الصلاة/حدیث: 1661]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب مؤذن اذان دیتا ہے، تو شیطان پیٹھ پھیر کر چلا جاتا ہے اور اس کی ہوا خارج ہو رہی ہوتی ہے، جب مؤذن خاموش ہو جاتا ہے، تو وہ پھر آ جاتا ہے، پھر جب مؤذن اقامت کہتا ہے، تو وہ پھر پیٹھ پھیر کر چلا جاتا ہے، اور اس کی ہوا خارج ہو رہی ہوتی ہے۔ جب مؤذن خاموش ہوتا ہے، تو شیطان آ جاتا ہے، اور آدمی کے دل میں مختلف طرح کے خیالات پیدا کرنا شروع کر دیتا ہے، یہاں تک کہ آدمی کو یہ بھی یاد نہیں رہتا کہ اس نے کتنی نماز ادا کی ہے، جب کسی شخص کو نماز ادا کرتے ہوئے اس طرح کی صورت حال کا سامنا کرنا پڑے تو اسے قعدہ کے دوران دو مرتبہ سجدہ سہو کر لینا چاہیے۔“ [صحیح ابن حبان/كتاب الصلاة/حدیث: 1662]

سیدنا ابوہریرہ رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا ہے: ”جب نماز کے لیے اذان دی جاتی ہے، تو شیطان پیٹھ پھیر کر چلا جاتا ہے، اس کی ہوا خارج ہو رہی ہوتی ہے، وہ اتنی دور چلا جاتا ہے جہاں وہ اذان کی آواز نہ سن سکے، جب اذان مکمل ہوتی ہے، تو شیطان پھر آ جاتا ہے یہاں تک کہ جب اقامت کہی جاتی ہے تو وہ پھر چلا جاتا ہے یہاں تک کہ جب اقامت مکمل ہو جائے، تو وہ پھر آ جاتا ہے، اور آدمی کے دل میں مختلف طرح کے خیالات پیدا کرنا شروع کرتا ہے، وہ کہتا ہے: تم فلاں چیز کو یاد کرو، فلاں چیزوں کو یاد کرو، وہ ان چیزوں کو یاد کرواتا ہے، جو آدمی کو ویسے یاد نہیں آتی تھیں یہاں تک کہ آدمی کا یہ عالم ہو جاتا ہے، اسے یہ یاد نہیں رہتا کہ اس نے کتنی نماز ادا کی ہے۔“ [صحیح ابن حبان/كتاب الصلاة/حدیث: 1663]

سیدنا جابر رضی اللہ عنہ بیان کرتے ہیں کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا: ”شیطان جب اذان سنتا ہے، تو وہ چلا جاتا ہے یہاں تک کہ «الرَّوْحَاءُ» پہنچ جاتا ہے۔“ سلیمان نامی راوی کہتے ہیں: میں نے اپنے استاد سے «الرَّوْحَاءُ» کے بارے میں دریافت کیا، تو انہوں نے فرمایا: یہ مدینہ منورہ سے 37 میل کے فاصلے پر ہے۔ [صحیح ابن حبان/كتاب الصلاة/حدیث: 1664]

سیدنا انس بن مالک رضی اللہ عنہ بیان کرتے ہیں: نبی اکرم صلی اللہ علیہ وسلم نے سفر کے دوران ایک شخص کو سنا جو «اللهُ أَكْبَرُ، اللهُ أَكْبَرُ» کہہ رہا تھا (یعنی وہ اذان دے رہا تھا) نبی اکرم صلی اللہ علیہ وسلم نے فرمایا: ”یہ فطرت پر ہے۔“ پھر اس نے کہا: «أَشْهَدُ أَنْ لَا إِلٰهَ إِلَّا اللهُ» تو نبی اکرم صلی اللہ علیہ وسلم نے فرمایا: ”یہ جہنم پر حرام ہو گیا۔“ ہم لپک کر اس شخص کے پاس گئے تو وہ جانوروں کا چرواہا تھا جسے نماز کا وقت ہو گیا تھا، تو وہ اس کے لیے اذان دے رہا تھا۔ [صحیح ابن حبان/كتاب الصلاة/حدیث: 1665]