سیدنا ابوہریرہ رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”اپنے آباؤ اجداد سے منہ نہ موڑو، کیونکہ جو شخص اپنے باپ سے منہ موڑتا ہے اس نے کفر کیا۔“ [صحیح ابن حبان/كتاب الصلاة/حدیث: 1466]

سیدنا عبداللہ بن عمرو رضی اللہ عنہما نبی اکرم صلی اللہ علیہ وسلم کے بارے میں یہ بات نقل کرتے ہیں کہ ایک دن آپ صلی اللہ علیہ وسلم نے نماز کا ذکر کرتے ہوئے ارشاد فرمایا: ”جو شخص انہیں باقاعدگی سے ادا کرے گا یہ قیامت کے دن اس کے لیے نور، برہان اور نجات ہوں گی اور جو شخص انہیں باقاعدگی سے ادا نہیں کرے گا، اس کے لیے کوئی برہان، کوئی نور اور کوئی نجات نہیں ہو گی اور وہ شخص قیامت کے دن قارون و ہامان اور اُبی بن خلف کے ساتھ ہو گا۔“ [صحیح ابن حبان/كتاب الصلاة/حدیث: 1467]

سیدنا نوفل بن معاویہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”جس کی ایک نماز فوت ہو جائے گویا اس کے اہل خانہ اور مال برباد ہو گئے۔“ [صحیح ابن حبان/كتاب الصلاة/حدیث: 1468]

سیدنا عبداللہ بن عمر رضی اللہ عنہما، نبی اکرم صلی اللہ علیہ وسلم کا یہ فرمان نقل کرتے ہیں: ”جس شخص کی عصر کی نماز فوت ہو جائے گویا کہ اس کے اہل خانہ اور مال برباد ہو گئے۔“ [صحیح ابن حبان/كتاب الصلاة/حدیث: 1469]

سیدنا بریدہ رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا: ”جب بادل چھایا ہوا ہو، تو عصر کی نماز جلدی ادا کر لو، کیونکہ جو شخص عصر کی نماز کو چھوڑ دے اس کا عمل ضائع ہو جاتا ہے۔“ شیخ بیان کرتے ہیں کہ امام اوزاعی رحمہ اللہ کو اپنے صحیفہ میں یحییٰ بن ابوکثیر کے حوالے سے ابوقلابہ کے حوالے سے اس روایت کو نقل کرنے میں وہم ہوا، انہوں نے یہ کہا ہے کہ یہ ابومہاجر کے حوالے سے منقول ہے حالانکہ اس راوی کا نام ابومہلب ہے، جو ابوقلابہ کے چچا ہیں اور ان کا نام عمرو بن معاویہ بن زید جرمی ہے۔ [صحیح ابن حبان/كتاب الصلاة/حدیث: 1470]

سیدنا ابوبصرہ غفاری رضی اللہ عنہ بیان کرتے ہیں: نبی اکرم صلی اللہ علیہ وسلم نے ہمیں عصر کی نماز پڑھائی، جب آپ صلی اللہ علیہ وسلم نماز پڑھ کر فارغ ہوئے تو آپ صلی اللہ علیہ وسلم نے ارشاد فرمایا: ”یہ نماز تم سے پہلے لوگوں کے سامنے بھی پیش کی گئی تھی، تو انہوں نے اسے ضائع کر دیا اور اسے چھوڑ دیا، تم میں سے جو شخص اسے ادا کرے گا، اسے اس کا دُگنا اجر ملے گا، اور اس کے بعد کوئی نماز ادا نہیں کی جائے گی جب تک شاہد (ستارہ) نظر نہیں آ جاتا۔“ (راوی بیان کرتے ہیں) شاہد سے مراد ستارہ ہے۔ [صحیح ابن حبان/كتاب الصلاة/حدیث: 1471]

سیدنا جابر رضی اللہ عنہ بیان کرتے ہیں: سیدنا جبرائیل علیہ السلام نبی اکرم صلی اللہ علیہ وسلم کی خدمت میں اس وقت حاضر ہوئے، جب سورج ڈھل چکا تھا، انہوں نے کہا: سیدنا محمد صلی اللہ علیہ وسلم ! اٹھ جائیے اور ظہر کی نماز ادا کر لیجیے، تو نبی اکرم صلی اللہ علیہ وسلم کھڑے ہوئے، آپ نے ظہر کی نماز ادا کی، پھر سیدنا جبرائیل علیہ السلام آپ کی خدمت میں اس وقت حاضر ہوئے، جب ہر چیز کا سایہ ایک مثل ہو چکا تھا، انہوں نے گزارش کی: آپ اٹھیے اور عصر کی نماز ادا کر لیجیے، تو نبی اکرم صلی اللہ علیہ وسلم کھڑے ہوئے، پھر آپ نے عصر کی نماز ادا کی، پھر وہ سورج غروب ہو جانے کے بعد آپ کے پاس آئے اور عرض کی: آپ اٹھیے اور مغرب کی نماز ادا کر لیجیے، تو نبی اکرم صلی اللہ علیہ وسلم کھڑے ہوئے اور آپ نے مغرب کی نماز ادا کر لی، پھر کچھ وقت گزر گیا یہاں تک کہ جب شفق رخصت ہو گئی تو وہ آپ کی خدمت میں حاضر ہوئے اور گزارش کی: آپ اٹھیے اور عشاء کی نماز ادا کر لیجیے، نبی اکرم صلی اللہ علیہ وسلم کھڑے ہوئے اور آپ نے یہ نماز ادا کر لی، پھر وہ اس وقت آپ کی خدمت میں حاضر ہوئے، جب صبح صادق ہو چکی تھی، انہوں نے عرض کی: آپ اٹھیے اور نماز ادا کر لیجیے، تو نبی اکرم صلی اللہ علیہ وسلم کھڑے ہوئے اور آپ نے صبح کی نماز ادا کر لی، اگلے دن سیدنا جبرائیل علیہ السلام اس وقت آپ کی خدمت میں حاضر ہوئے، جب ہر چیز کا سایہ ایک مثل ہو چکا تھا، انہوں نے گزارش کی: آپ اٹھیے اور ظہر کی نماز ادا کر لیجیے، تو نبی اکرم صلی اللہ علیہ وسلم کھڑے ہوئے اور آپ نے ظہر کی نماز ادا کر لی، پھر وہ اس وقت آپ کی خدمت میں حاضر ہوئے، جب ہر چیز کا سایہ دو مثل ہو چکا تھا، انہوں نے عرض کی: آپ اٹھیے اور عصر کی نماز ادا کر لیجیے، تو نبی اکرم صلی اللہ علیہ وسلم کھڑے ہوئے، آپ نے عصر کی نماز ادا کر لی، پھر وہ سورج غروب ہو جانے کے بعد آپ کی خدمت میں حاضر ہوئے، یہ ایک ہی وقت ہے اس میں کوئی فرق نہیں آیا، انہوں نے کہا: آپ اٹھیے اور مغرب کی نماز ادا کر لیجیے، تو نبی اکرم صلی اللہ علیہ وسلم کھڑے ہوئے، آپ نے مغرب کی نماز ادا کر لی، پھر وہ عشاء کی نماز کے لیے اس وقت آپ کی خدمت میں حاضر ہوئے، جب ایک تہائی رات رخصت ہو چکی تھی، انہوں نے گزارش کی: آپ اٹھیے اور عشاء کی نماز ادا کیجیے، تو نبی اکرم صلی اللہ علیہ وسلم کھڑے ہوئے، آپ نے عشاء کی نماز ادا کر لی، پھر وہ صبح کی نماز کے لیے اس وقت آپ کی خدمت میں حاضر ہوئے، جب روشنی اچھی طرح پھیل چکی تھی، انہوں نے گزارش کی: آپ اٹھیے اور صبح کی نماز ادا کر لیجیے، تو نبی اکرم صلی اللہ علیہ وسلم کھڑے ہوئے، آپ نے صبح کی نماز ادا کر لی، سیدنا جبرائیل علیہ السلام نے عرض کی: ان دو اوقات کے درمیان تمام نمازوں کا وقت ہے۔ [صحیح ابن حبان/كتاب الصلاة/حدیث: 1472]

سیدنا عبداللہ بن عمرو رضی اللہ عنہما، نبی اکرم صلی اللہ علیہ وسلم کا یہ فرمان نقل کرتے ہیں: ”ظہر کا وقت وہ ہے، جب سورج ڈھل جائے اور آدمی کا سایہ اس کی لمبائی جتنا ہو (یہ اس وقت تک رہتا ہے) جب تک عصر کا وقت شروع نہیں ہو جاتا، اور عصر کا وقت اس وقت تک رہتا ہے، جب تک سورج زرد نہیں ہو جاتا، اور عشاء کا وقت نصف رات تک رہتا ہے (یہاں ایک لفظ کے بارے میں راوی کو شک ہے) اور فجر کا وقت اس وقت تک (رہتا ہے) جب تک سورج نکل نہیں آتا۔“ [صحیح ابن حبان/كتاب الصلاة/حدیث: 1473]

سیدنا عبداللہ بن مسعود رضی اللہ عنہ بیان کرتے ہیں: میں نے نبی اکرم صلی اللہ علیہ وسلم سے سوال کیا کہ کون سا عمل زیادہ فضیلت رکھتا ہے؟ نبی اکرم صلی اللہ علیہ وسلم نے ارشاد فرمایا: ”نمازوں کو ان کے مخصوص اوقات میں ادا کرنا۔“ [صحیح ابن حبان/كتاب الصلاة/حدیث: 1474]

سیدنا عبداللہ بن مسعود رضی اللہ عنہ بیان کرتے ہیں: میں نے نبی اکرم صلی اللہ علیہ وسلم سے سوال کیا: کون سا عمل زیادہ فضیلت رکھتا ہے؟ تو نبی اکرم صلی اللہ علیہ وسلم نے ارشاد فرمایا: ”نماز کو اس کے ابتدائی وقت میں ادا کرنا۔“ [صحیح ابن حبان/كتاب الصلاة/حدیث: 1475]