سیدنا عبداللہ رضی اللہ عنہ بیان کرتے ہیں: میں نے عرض کی: یا رسول اللہ! کون سا عمل اللہ تعالیٰ کے نزدیک زیادہ پسندیدہ ہے؟ نبی اکرم صلی اللہ علیہ وسلم نے فرمایا: ”نمازوں کو ان کے اوقات میں ادا کرنا۔“ میں نے دریافت کیا: پھر کون سا ہے؟ آپ صلی اللہ علیہ وسلم نے فرمایا: ”پھر والدین کے ساتھ حسن سلوک کرنا ہے۔“ میں نے دریافت کیا: پھر کون سا ہے؟ آپ صلی اللہ علیہ وسلم نے فرمایا: ”پھر جہاد کرنا ہے۔“ (سیدنا عبداللہ رضی اللہ عنہ بیان کرتے ہیں) اگر میں نبی اکرم صلی اللہ علیہ وسلم سے مزید سوال کرتا تو آپ صلی اللہ علیہ وسلم مزید جواب عنایت فرماتے۔ [صحیح ابن حبان/كتاب الصلاة/حدیث: 1476]

ابوعمرو شیبانی بیان کرتے ہیں: اس گھر کے مالک نے ہمیں حدیث بیان کی ہے، انہوں نے سیدنا عبداللہ بن مسعود رضی اللہ عنہ کے گھر کی طرف اشارہ کرتے ہوئے یہ بات بتائی۔ (سیدنا عبداللہ بن مسعود رضی اللہ عنہ فرماتے ہیں) انہوں نے نبی اکرم صلی اللہ علیہ وسلم سے سوال کیا: کون سا عمل اللہ تعالیٰ کے نزدیک زیادہ پسندیدہ ہے؟ نبی اکرم صلی اللہ علیہ وسلم نے فرمایا: ”نماز کو اس کے مخصوص وقت میں ادا کرنا۔“ انہوں نے دریافت کیا: پھر کون سا ہے؟ نبی اکرم صلی اللہ علیہ وسلم نے فرمایا: ”والدین کے ساتھ حسن سلوک کرنا۔“ انہوں نے دریافت کیا: پھر کون سا ہے؟ نبی اکرم صلی اللہ علیہ وسلم نے فرمایا: ”اللہ کی راہ میں جہاد کرنا۔“ سیدنا عبداللہ بن مسعود رضی اللہ عنہ بیان کرتے ہیں: نبی اکرم صلی اللہ علیہ وسلم نے مجھے صرف انہی چیزوں کے بارے میں بتایا تھا، اگر میں آپ سے مزید دریافت کرتا تو آپ مزید جواب عنایت کرتے۔ (امام ابن حبان رحمہ اللہ فرماتے ہیں:) ابوعمرو شیبانی مخضرمین میں سے ہیں، جب کسی شخص نے زمانہ کفر میں ساٹھ سال گزارے ہوں اور زمانہ اسلام میں ساٹھ سال گزارے ہوں، تو اسے مخضرمی کہا جاتا ہے۔ [صحیح ابن حبان/كتاب الصلاة/حدیث: 1477]

سیدنا عبداللہ بن مسعود رضی اللہ عنہ بیان کرتے ہیں: میں نے نبی اکرم صلی اللہ علیہ وسلم سے سوال کیا: ”کون سا عمل زیادہ فضیلت رکھتا ہے؟“ نبی اکرم صلی اللہ علیہ وسلم نے فرمایا: ”نماز کو اس کے مخصوص وقت میں ادا کرنا۔“ [صحیح ابن حبان/كتاب الصلاة/حدیث: 1478]

سیدنا عبداللہ بن مسعود رضی اللہ عنہ بیان کرتے ہیں، میں نے دریافت کیا: اے اللہ کے رسول! کون سا عمل زیادہ فضیلت رکھتا ہے؟ نبی اکرم صلی اللہ علیہ وسلم نے فرمایا: ”نماز کو اس کے ابتدائی وقت میں ادا کرنا۔“ (امام ابن حبان رحمہ اللہ فرماتے ہیں:) نماز کو اس کے ابتدائی وقت میں ادا کرنا یہ الفاظ نقل کرنے میں عثمان بن عمر راوی منفرد ہیں۔ [صحیح ابن حبان/كتاب الصلاة/حدیث: 1479]

سیدنا خباب رضی اللہ عنہ بیان کرتے ہیں: ہم نے نبی اکرم صلی اللہ علیہ وسلم کی خدمت میں گرمی کی شدت کی شکایت کی، تو آپ نے ہماری شکایت کو قبول نہیں کیا۔ (امام ابن حبان رحمہ اللہ فرماتے ہیں:) ابومعمر نامی راوی کا نام عبداللہ بن سخبرہ ہے۔ [صحیح ابن حبان/كتاب الصلاة/حدیث: 1480]

عمرو بن میمون اودی بیان کرتے ہیں: سیدنا معاذ بن جبل رضی اللہ عنہ ہمارے پاس یمن تشریف لائے، انہیں نبی اکرم صلی اللہ علیہ وسلم نے ہماری طرف بھیجا تھا۔ میں نے فجر کے ہمراہ ان کی تکبیر سنی، وہ ایک ایسے شخص تھے جن کی آواز دھیمی تھی، ان کے دل میں میری محبت گھر کر گئی، میں ان سے اس وقت جدا ہوا جب میں نے انہیں شام میں دفن کر دیا۔ پھر میں نے ان کے بعد لوگوں میں سب سے بڑے عالم کا جائزہ لیا، تو میں سیدنا عبداللہ بن مسعود رضی اللہ عنہ کی خدمت میں حاضر ہوا، میں ان کے ساتھ رہا، یہاں تک کہ ان کا بھی انتقال ہو گیا۔ انہوں نے مجھ سے فرمایا: نبی اکرم صلی اللہ علیہ وسلم نے یہ بات ارشاد فرمائی ہے: ”اس وقت تمہارا کیا عالم ہو گا، جب تم پر ایسے امراء مسلط کر دیے جائیں گے جو نماز کو اس کے مخصوص اوقات کے علاوہ ادا کریں گے؟“ میں نے عرض کی: یا رسول اللہ! اگر میں انہیں پاؤں تو آپ صلی اللہ علیہ وسلم اس بارے میں مجھے کیا ہدایت کرتے ہیں؟ نبی اکرم صلی اللہ علیہ وسلم نے ارشاد فرمایا: ”تم نماز کو اس کے مخصوص وقت میں ادا کر لینا اور ان کے ساتھ اپنی نماز کو نفل بنا لینا۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان ”تم ان کے ساتھ اپنی نماز کو نفل بنا لو“ یہ اس بات کی سب سے بڑی دلیل ہے کہ نفل ادا کرنے والے شخص کی نماز ایسے شخص کے پیچھے جائز ہوتی ہے، جو فرض ادا کر رہا ہو۔ یہ بات اس شخص کے موقف کے خلاف ہے جس نے اس کے متضاد کا حکم دیا ہے، اس میں اس بات کی بھی دلیل موجود ہے کہ نفل نماز جماعت کے ساتھ ادا کی جا سکتی ہے۔ [صحیح ابن حبان/كتاب الصلاة/حدیث: 1481]

سیدنا ابوذر غفاری رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”اس وقت تمہارا کیا عالم ہو گا، جب تم ایسے لوگوں میں باقی رہ جاؤ گے جو نمازوں کو ان کے مخصوص وقت سے تاخیر سے ادا کریں گے؟“ سیدنا ابوذر رضی اللہ عنہ نے دریافت کیا: پھر میں کیا کروں؟ نبی اکرم صلی اللہ علیہ وسلم نے فرمایا: ”تم نماز کو اس کے مخصوص وقت میں ادا کر لینا اور اگر تم ان لوگوں کو پاؤ اور انہوں نے ابھی نماز ادا نہیں کی، تو تم ان کے ساتھ بھی نماز ادا کر لینا، تم یہ نہ کہنا کہ میں نماز پڑھ چکا ہوں، اس لیے اب نماز نہیں پڑھوں گا۔“ [صحیح ابن حبان/كتاب الصلاة/حدیث: 1482]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص نماز کی ایک رکعت (اس کے مخصوص وقت میں) پا لے اس نے نماز کو پا لیا۔“ [صحیح ابن حبان/كتاب الصلاة/حدیث: 1483]

سیدنا ابوہریرہ رضی اللہ عنہ نبی کریم صلی اللہ علیہ وسلم کا یہ فرمان نقل کرتے ہیں: ”جو شخص صبح کی نماز کی ایک رکعت سورج نکلنے سے پہلے پا لے، اس کی نماز فوت نہیں ہوئی اور جو شخص عصر کی ایک رکعت سورج غروب ہونے سے پہلے پا لے، اس کی وہ نماز فوت نہیں ہوئی۔“ [صحیح ابن حبان/كتاب الصلاة/حدیث: 1484]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص نماز کی ایک رکعت پا لے اس نے اس مکمل نماز کو پا لیا۔“ [صحیح ابن حبان/كتاب الصلاة/حدیث: 1485]