سیدنا جابر بن عبداللہ رضی اللہ عنہما بیان کرتے ہیں: ہم لوگ شدید گرمی کے موسم میں نبی اکرم صلی اللہ علیہ وسلم کی اقتدا میں نماز ادا کرتے تھے، تو ہم میں سے کوئی ایک شخص مٹھی میں کنکریاں رکھ لیتا تھا، وہ اپنے اس ہاتھ میں انہیں رکھتا تھا پھر اس ہاتھ میں رکھتا تھا، جب وہ ٹھنڈی ہو جاتی تھیں تو ان پر سجدہ کرتا تھا۔ [صحیح ابن حبان/كتاب الصلاة/حدیث: 2276]

سیدنا عبدالرحمن بن شبل انصاری رضی اللہ عنہ بیان کرتے ہیں کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”آپ صلی اللہ علیہ وسلم نے نماز کے دوران تین کام کرنے سے منع فرمایا ہے: کوے کی طرح ٹھونگا مارنے سے، درندے کی طرح پاؤں بچھانے سے اور یہ کہ آدمی اپنے بیٹھنے کے لیے کسی جگہ کو یوں مقرر کر لے جس طرح اونٹ اپنے بیٹھنے کی جگہ کو مقرر کرتا ہے۔“ [صحیح ابن حبان/كتاب الصلاة/حدیث: 2277]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص نماز ادا کرنے کے لیے یا اللہ کا ذکر کرنے کے لیے مسجد میں ٹھہر جاتا ہے، تو اللہ تعالیٰ اس پر یوں خوش ہوتا ہے، جس طرح (طویل عرصے سے) غائب شخص کے گھر والے اس کے واپس آنے پر خوش ہوتے ہیں۔“ [صحیح ابن حبان/كتاب الصلاة/حدیث: 2278]

سعید بن ابوسعید مقبری اپنے والد کا یہ بیان نقل کرتے ہیں کہ انہوں نے سیدنا ابورافع رضی اللہ عنہ کو دیکھا جو نبی اکرم صلی اللہ علیہ وسلم کے آزاد کردہ غلام تھے، ایک مرتبہ سیدنا حسن بن علی رضی اللہ عنہما نماز ادا کر رہے تھے، انہوں نے اپنے بالوں کو گدی پر باندھا ہوا تھا تو سیدنا ابورافع رضی اللہ عنہ نے ان بالوں کو کھول دیا، سیدنا حسن رضی اللہ عنہ غصے کے عالم میں ان کی طرف متوجہ ہوئے تو سیدنا ابورافع رضی اللہ عنہ نے کہا: ”آپ اپنی نماز جاری رکھیے اور غصہ نہ کیجیے کیونکہ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”یہ شیطان کا حصہ ہے۔““ نبی اکرم صلی اللہ علیہ وسلم فرماتے ہیں (یا سیدنا ابورافع رضی اللہ عنہ نے یہ فرمایا): ”یہ شیطان کے بیٹھنے کی جگہ ہے۔“ یعنی وہ جگہ جہاں بال باندھے گئے تھے۔ (امام ابن حبان رحمہ اللہ فرماتے ہیں:) عمران بن موسیٰ نامی راوی عمران بن موسیٰ بن عمرو بن سعید العاص ہے، یہ ایوب بن موسیٰ کا بھائی ہے۔ [صحیح ابن حبان/كتاب الصلاة/حدیث: 2279]

سیدنا عبداللہ بن عباس رضی اللہ عنہما سے روایت ہے کہ انہوں نے عبداللہ بن حارث کو دیکھا، انہوں نے اپنے پیچھے اپنے بال باندھے ہوئے تھے، تو وہ ان کے پیچھے آ کر کھڑے ہوئے اور انہیں کھولنے لگے جبکہ دوسرے صاحب انہیں پہلی حالت پر برقرار رکھنے لگے، جب انہوں نے نماز مکمل کی تو وہ سیدنا عبداللہ بن عباس رضی اللہ عنہما کی طرف متوجہ ہوئے اور بولے: آپ کا میرے سر کے ساتھ کیا واسطہ ہے؟ تو سیدنا عبداللہ بن عباس رضی اللہ عنہما نے بتایا: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”اس شخص کی مثال یوں ہے جیسے وہ اس حالت میں نماز ادا کر رہا ہو کہ اس کے ہاتھ بندھے ہوئے ہوں۔“ [صحیح ابن حبان/كتاب الصلاة/حدیث: 2280]

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”(نماز کے دوران) اپنی نگاہ کو آسمان کی طرف نہ اٹھاؤ ایسا نہ ہو اسے اچک لیا جائے۔“ (راوی کہتے ہیں) یعنی نماز کے دوران ایسا نہ کرو۔ [صحیح ابن حبان/كتاب الصلاة/حدیث: 2281]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جو شخص امام سے پہلے اپنا سر (رکوع یا سجدے) سے اٹھا لیتا ہے، کیا وہ اس بات سے نہیں ڈرتا کہ اللہ تعالیٰ اس کے سر کو گدھے کے سر میں تبدیل کر دے؟“ [صحیح ابن حبان/كتاب الصلاة/حدیث: 2282]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص امام سے پہلے (رکوع یا سجدے سے) سر کو اٹھا لیتا ہے، کیا وہ اس بات سے نہیں ڈرتا کہ اللہ تعالیٰ اس کے سر کو کتے کے سر میں تبدیل کر دے؟“ [صحیح ابن حبان/كتاب الصلاة/حدیث: 2283]

سیدنا انس رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”لوگوں کو کیا ہو گیا ہے، وہ نماز کے دوران اپنی نگاہیں آسمان کی طرف بلند کر لیتے ہیں۔“ نبی اکرم صلی اللہ علیہ وسلم نے اس بارے میں شدید تاکید کرتے ہوئے یہ بات ارشاد فرمائی: ”لوگ یا تو اس سے باز آ جائیں، یا ان کی نگاہ کو اچک لیا جائے گا۔“ [صحیح ابن حبان/كتاب الصلاة/حدیث: 2284]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے اس بات سے منع کیا ہے کہ ”آدمی اپنی کوکھ (پہلو) پر ہاتھ رکھ کر نماز ادا کرے۔“ [صحیح ابن حبان/كتاب الصلاة/حدیث: 2285]