سیدنا ابوہریرہ رضی اللہ عنہ بیان کرتے ہیں کہ ایک دن نبی اکرم صلی اللہ علیہ وسلم تشریف لائے، نماز کے لیے اقامت کہی جا چکی تھی اور صفیں درست ہو چکی تھیں، یہاں تک کہ جب نبی اکرم صلی اللہ علیہ وسلم اپنی جائے نماز پر کھڑے ہوئے اور ہم آپ کے تکبیر کہنے کے منتظر تھے، تو آپ واپس تشریف لے گئے۔ آپ نے ارشاد فرمایا: ”تم اپنی جگہ پر ٹھہرے رہو۔“ پھر آپ گھر میں تشریف لے گئے، کچھ دیر وہیں ٹھہرے رہے، پھر آپ ہمارے پاس تشریف لائے تو آپ کے سر سے پانی ٹپک رہا تھا، آپ نے غسل کیا تھا۔ (امام ابن حبان رحمہ اللہ فرماتے ہیں:) یہ دونوں فعل دو مختلف مواقع پر سرانجام پائے تھے۔ ایک مرتبہ نبی اکرم صلی اللہ علیہ وسلم تشریف لے گئے تھے، آپ نے تکبیر کہہ دی تھی، پھر آپ کو یہ یاد آیا کہ آپ جنابت کی حالت میں ہیں، پھر آپ باہر چلے گئے، پھر آپ نے غسل کیا، پھر آپ تشریف لائے اور آپ نے نئے سرے سے ان کو نماز پڑھائی۔ جبکہ دوسری مرتبہ آپ تشریف لائے، جب آپ تکبیر کہنے کے لیے کھڑے ہوئے تو آپ کو یہ بات یاد آئی کہ آپ جنابت کی حالت میں ہیں، یہ آپ کو تکبیر کہنے سے پہلے یاد آیا تھا، آپ تشریف لے گئے تھے، آپ نے غسل کیا، پھر آپ واپس تشریف لائے اور آپ نے ان لوگوں کو نماز پڑھائی۔ اس صورت میں ان دونوں روایات کے درمیان کوئی تضاد اور کوئی اختلاف باقی نہیں رہے گا۔ [صحیح ابن حبان/كتاب الصلاة/حدیث: 2236]

سیدنا علی بن طلق حنفی رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جب کسی شخص کی نماز کے دوران ہوا خارج ہو جائے، تو وہ واپس جائے پھر وضو کرے اور دوبارہ نماز ادا کرے اور تم خواتین کے ساتھ ان کی پچھلی شرم گاہ میں صحبت نہ کرو۔“ راوی نے یہ الفاظ نقل نہیں کیے کہ ”پھر وہ اپنی نماز کو دہرائے“ صرف جلیل نامی راوی نے یہ الفاظ نقل کیے ہیں۔ یہ بات امام ابو حاتم رحمہ اللہ نے بیان کی ہے اور اس میں اس بات کی دلیل موجود ہے کہ بے وضو ہونے والے شخص کے لیے نماز پر بنا قائم کرنا جائز نہیں ہے۔ [صحیح ابن حبان/كتاب الصلاة/حدیث: 2237]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ارشاد فرمایا: ”جب کسی شخص کا وضو نماز کے دوران ٹوٹ جائے، تو اسے اپنی ناک کو پکڑ لینا چاہیے اور پلٹ آنا چاہیے۔“ [صحیح ابن حبان/كتاب الصلاة/حدیث: 2238]

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں: ”جب کسی شخص کا وضو نماز کے دوران ٹوٹ جائے، تو اسے اپنی ناک پکڑ لینی چاہیے اور پھر واپس جانا چاہیے۔“ [صحیح ابن حبان/كتاب الصلاة/حدیث: 2239]

سیدنا مسور بن یزید اسدی رضی اللہ عنہ بیان کرتے ہیں: میں اس وقت نبی اکرم صلی اللہ علیہ وسلم کے پاس موجود تھا جب آپ نماز کے دوران تلاوت کر رہے تھے، آپ نے درمیان میں سے کچھ حصہ چھوڑ دیا جس کی آپ نے تلاوت نہیں کی۔ (نماز کے بعد) ایک صاحب نے آپ کی خدمت میں عرض کی: یا رسول اللہ ( صلی اللہ علیہ وسلم )! آپ نے فلاں فلاں آیت کو چھوڑ دیا ہے۔ نبی اکرم صلی اللہ علیہ وسلم نے دریافت فرمایا: ”تم نے اسے مجھے یاد کیوں نہیں کروایا؟“ [صحیح ابن حبان/كتاب الصلاة/حدیث: 2240]

سیدنا مسور بن یزید رضی اللہ عنہ بیان کرتے ہیں: میں اس وقت نبی اکرم صلی اللہ علیہ وسلم کے پاس موجود تھا جب آپ نے نماز کے دوران قرأت کرتے ہوئے ایک آیت کو چھوڑ دیا، (نماز کے بعد) ایک صاحب نے عرض کی: یا رسول اللہ صلی اللہ علیہ وسلم ! آپ نے ایک آیت کو چھوڑ دیا تھا۔ نبی اکرم صلی اللہ علیہ وسلم نے فرمایا: ”تم نے مجھے یاد کیوں نہیں کروایا؟“ اس نے عرض کی: میں نے یہ گمان کیا، شاید یہ منسوخ ہو گئی ہے۔ نبی اکرم صلی اللہ علیہ وسلم نے ارشاد فرمایا: ”وہ منسوخ نہیں ہوئی ہے۔“ [صحیح ابن حبان/كتاب الصلاة/حدیث: 2241]

سالم بن عبداللہ اپنے والد (سیدنا عبداللہ بن عمر رضی اللہ عنہما) کا یہ بیان نقل کرتے ہیں کہ نبی اکرم صلی اللہ علیہ وسلم ایک نماز ادا کر رہے تھے، اس دوران آپ صلی اللہ علیہ وسلم کو شبہ لاحق ہوا، جب آپ صلی اللہ علیہ وسلم نماز پڑھ کر فارغ ہوئے، تو آپ صلی اللہ علیہ وسلم نے میرے والد سے فرمایا: ”کیا تم ہمارے ساتھ (نماز میں) شریک تھے؟“ انہوں نے عرض کی: جی ہاں، نبی اکرم صلی اللہ علیہ وسلم نے فرمایا: ”پھر تم نے مجھے لقمہ کیوں نہیں دیا؟“ [صحیح ابن حبان/كتاب الصلاة/حدیث: 2242]

سیدنا عبداللہ بن مسعود رضی اللہ عنہ بیان کرتے ہیں: پہلے ہم لوگ (نماز کے دوران) نبی اکرم صلی اللہ علیہ وسلم کو سلام کرتے تھے، تو آپ ہمیں سلام کا جواب دیا کرتے تھے۔ راوی کہتے ہیں: یعنی نماز کے دوران ایسا ہوتا تھا، پھر جب ہم حبشہ کی سرزمین سے (مدینہ منورہ) آئے، تو میں نے نبی اکرم صلی اللہ علیہ وسلم کو (آپ کے نماز پڑھنے کے دوران) سلام کیا، تو آپ نے مجھے جواب نہیں دیا۔ مجھے طرح طرح کے اندیشے آنے لگے۔ میں بیٹھ گیا یہاں تک کہ جب نبی اکرم صلی اللہ علیہ وسلم نے نماز مکمل کی تو میں نے آپ کی خدمت میں عرض کی: پہلے، تو آپ ہمیں سلام کا جواب دے دیتے تھے، تو نبی اکرم صلی اللہ علیہ وسلم نے ارشاد فرمایا: ”اللہ تعالیٰ جو چاہے نیا فیصلہ دے سکتا ہے اور اس نے اس بارے میں نیا فیصلہ یہ دیا ہے، تم لوگ نماز کے دوران کلام نہ کرو۔“ [صحیح ابن حبان/كتاب الصلاة/حدیث: 2243]

سیدنا عبداللہ بن مسعود رضی اللہ عنہ بیان کرتے ہیں: پہلے ہم نبی اکرم صلی اللہ علیہ وسلم کو سلام کرتے تھے، اس وقت جب آپ نماز پڑھ رہے ہوتے تھے، تو آپ ہمیں سلام کا جواب دے دیا کرتے تھے، یہ ہمارے حبشہ کی سرزمین سے (مدینہ منورہ) آنے سے پہلے کی بات ہے۔ جب ہم نجاشی کی طرف سے واپس آئے، تو میں آپ کی خدمت میں حاضر ہوا، آپ اس وقت نماز پڑھ رہے تھے، میں نے آپ کو سلام کیا، تو آپ نے مجھے سلام کا جواب نہیں دیا، مجھے طرح طرح کے اندیشے آنے لگے۔ میں آپ کے انتظار میں بیٹھ گیا، جب آپ نے نماز مکمل کی تو میں نے عرض کی: یا رسول اللہ صلی اللہ علیہ وسلم ! میں نے آپ کو سلام کیا تھا، آپ اس وقت نماز پڑھ رہے تھے لیکن آپ نے مجھے سلام کا جواب نہیں دیا۔ (ایک روایت میں یہ الفاظ ہیں) پہلے آپ سلام کا جواب دیا کرتے تھے، تو نبی اکرم صلی اللہ علیہ وسلم نے ارشاد فرمایا: ”اللہ تعالیٰ جو چاہے نیا فیصلہ دے سکتا ہے اور اس نے نیا حکم یہ دیا ہے، ہم نماز کے دوران کلام نہیں کریں گے۔“ [صحیح ابن حبان/كتاب الصلاة/حدیث: 2244]

سیدنا زید بن ارقم رضی اللہ عنہ بیان کرتے ہیں کہ نبی اکرم صلی اللہ علیہ وسلم کے زمانہ اقدس میں پہلے ہم میں سے کوئی ایک شخص نماز کے دوران اپنے ساتھی کے ساتھ اپنی کسی ضرورت کے بارے میں بات چیت کر لیتا تھا، یہاں تک کہ یہ آیت نازل ہوئی: ﴿حَافِظُوا عَلَى الصَّلَوَاتِ وَالصَّلَاةِ الْوُسْطَىٰ وَقُومُوا لِلَّهِ قَانِتِينَ﴾ [سورة البقرة: 238] ”نمازوں کی اور بالخصوص درمیانی نماز کی حفاظت کرو اور اللہ کی بارگاہ میں فرمانبرداری کے ساتھ کھڑے رہو۔“ تو ہمیں (نماز کے دوران) خاموش رہنے کا حکم دیا گیا۔ (امام ابن حبان رحمہ اللہ فرماتے ہیں:) سیدنا زید بن ارقم رضی اللہ عنہ سے منقول یہ الفاظ ”ہم نبی اکرم صلی اللہ علیہ وسلم کے زمانہ اقدس میں یوں ہوتے تھے کہ ہم میں سے کوئی ایک شخص نماز کے دوران اپنے ساتھی سے بات چیت کر لیتا تھا“ اس نے ایک عالم کو اس غلط فہمی کا شکار کیا کہ نماز کے دوران کلام کے منسوخ ہونے کا واقعہ مدینہ منورہ میں پیش آیا تھا، کیونکہ سیدنا زید بن ارقم رضی اللہ عنہ انصار سے تعلق رکھتے ہیں، حالانکہ ایسا نہیں ہے، نماز کے دوران بات چیت کے منسوخ ہونے کا واقعہ مکہ مکرمہ میں پیش آیا تھا اس وقت جب سیدنا عبداللہ بن مسعود رضی اللہ عنہ اور ان کے ساتھی حبشہ سے واپس آئے تھے۔ سیدنا زید بن ارقم رضی اللہ عنہ سے منقول روایت کے دو مفہوم ہو سکتے ہیں: ایک یہ ہو سکتا ہے کہ اس میں اس بات کا احتمال موجود ہو کہ سیدنا زید بن ارقم رضی اللہ عنہ نے نبی اکرم صلی اللہ علیہ وسلم کے مدینہ منورہ تشریف لانے سے پہلے کے اسلام کا ذکر کیا ہو، جب سیدنا مصعب بن عمیر رضی اللہ عنہ ان لوگوں کو قرآن اور دینی احکام کی تعلیم دیا کرتے تھے۔ اس وقت مکہ مکرمہ اور مدینہ منورہ دونوں جگہوں پر نماز کے دوران بات چیت کرنا مباح تھی، تو اس وقت مدینہ منورہ میں کچھ انصار اسلام قبول کر چکے تھے۔ یہ نبی اکرم صلی اللہ علیہ وسلم کے مدینہ منورہ تشریف لانے سے پہلے کی بات ہے، اس وقت ان میں سے کوئی ایک شخص اپنے ساتھی کے ساتھ نماز کے دوران بات چیت کر لیتا تھا۔ یہ نماز کے دوران بات چیت کے منسوخ ہونے سے پہلے کی بات ہے، تو سیدنا زید بن ارقم رضی اللہ عنہ نے ان ایام کے دوران ان لوگوں کی نماز کا واقعہ ذکر کیا۔ اس سے یہ مراد نہیں کہ نماز کے دوران کلام کرنے کے منسوخ ہونے کا واقعہ مدینہ منورہ میں پیش آیا تھا۔ اس کا دوسرا احتمال یہ ہو سکتا ہے کہ ان الفاظ کے ذریعے ان کی مراد انصار اور دیگر حضرات ہوں، جو نماز کے دوران کلام منسوخ ہونے سے پہلے اس طرح کیا کرتے تھے، جیسا کہ کوئی شخص اپنی زبان میں یہ کہتا ہے کہ ”ہم نے یہ کیا“ حالانکہ اس سے مراد یہ ہوتی ہے کہ بعض لوگوں نے ایسا کیا تھا، سب لوگوں نے ایسا نہیں کیا تھا۔ [صحیح ابن حبان/كتاب الصلاة/حدیث: 2245]