سیدنا ابوہریرہ رضی اللہ عنہ بیان کرتے ہیں: نبی اکرم صلی اللہ علیہ وسلم نے ہمیں شام کی ایک نماز پڑھائی۔ ابن سیرین نامی راوی بیان کرتے ہیں: سیدنا ابوہریرہ رضی اللہ عنہ نے ہمارے سامنے (اس نماز کا) نام لیا تھا لیکن میں اسے بھول گیا ہوں، (سیدنا ابوہریرہ رضی اللہ عنہ فرماتے ہیں) نبی اکرم صلی اللہ علیہ وسلم نے ہمیں دو رکعات پڑھانے کے بعد سلام پھیر دیا، پھر آپ صلی اللہ علیہ وسلم مسجد میں رکھی ہوئی لکڑی کے ساتھ کھڑے ہو گئے۔ آپ صلی اللہ علیہ وسلم نے اپنا دایاں دست مبارک بائیں پر رکھا اور اپنی انگلیوں کو ایک دوسرے میں پیوست کر دیا۔ آپ صلی اللہ علیہ وسلم نے غضب کے عالم میں اس لکڑی کے ساتھ ٹیک لگائی۔ راوی بیان کرتے ہیں: جلد باز لوگ (مسجد سے) نکل گئے، وہ یہ کہہ رہے تھے: نماز مختصر ہو گئی ہے۔ حاضرین میں سیدنا ابوبکر اور سیدنا عمر رضی اللہ عنہما بھی موجود تھے لیکن انہیں نبی اکرم صلی اللہ علیہ وسلم سے بات کرنے کی جرات نہیں ہوئی۔ حاضرین میں ایک صاحب موجود تھے جن کے ہاتھ کچھ لمبے تھے، انہیں ذوالیدین کہا جاتا تھا۔ انہوں نے عرض کی: کیا نماز مختصر ہو گئی ہے یا آپ صلی اللہ علیہ وسلم بھول گئے ہیں؟ نبی اکرم صلی اللہ علیہ وسلم نے ارشاد فرمایا: ”نہ تو نماز مختصر ہوئی ہے اور نہ ہی میں بھولا ہوں۔“ پھر نبی اکرم صلی اللہ علیہ وسلم نے حاضرین سے دریافت کیا: ”کیا اسی طرح ہے، جیسے ذوالیدین کہہ رہا ہے؟“ لوگوں نے عرض کی: جی ہاں، تو نبی اکرم صلی اللہ علیہ وسلم نے وہ نماز ادا کی جو آپ صلی اللہ علیہ وسلم نے چھوڑ دی تھی، پھر آپ صلی اللہ علیہ وسلم نے سلام پھیرا، پھر آپ صلی اللہ علیہ وسلم نے تکبیر کہی اور اپنے عام سجدوں جتنا یا اس سے کچھ طویل سجدہ کیا، پھر آپ صلی اللہ علیہ وسلم نے اپنے سر کو اٹھایا اور تکبیر کہی، پھر آپ صلی اللہ علیہ وسلم نے تکبیر کہی اور اسی کی مانند یا اس سے کچھ طویل سجدہ کیا، پھر آپ صلی اللہ علیہ وسلم نے اپنا سر اٹھایا اور تکبیر کہی۔ راوی کہتے ہیں: (ہمارے استاد سے) بعض لوگ یہ کہتے تھے (روایت میں یہ الفاظ بھی ہیں) پھر انہوں نے سلام پھیر دیا، تو وہ یہ فرماتے تھے: مجھے سیدنا عمران بن حصین رضی اللہ عنہ کے حوالے سے یہ روایت بیان کی گئی ہے، انہوں نے یہ الفاظ بھی نقل کیے ہیں کہ پھر نبی اکرم صلی اللہ علیہ وسلم نے سلام پھیرا۔ روایت کے یہ الفاظ نضر بن شمیل کے ابن عون کے حوالے سے نقل کردہ ہیں۔ [صحیح ابن حبان/كتاب الصلاة/حدیث: 2256]

سیدنا علی رضی اللہ عنہ بیان کرتے ہیں کہ غزوہ بدر کے موقع پر مقداد رضی اللہ عنہ کے علاوہ ہم میں سے اور کوئی گھڑ سوار نہیں تھا اور مجھے یاد ہے، ہم میں سے ہر شخص کھڑا ہوا تھا (یہاں روایت کا لفظ غلط نقل ہوا ہے اصل لفظ یہ ہے، ہم میں سے ہر شخص سویا ہوا تھا) صرف نبی اکرم صلی اللہ علیہ وسلم (جاگتے رہے تھے)، آپ صلی اللہ علیہ وسلم ایک درخت کے نیچے نماز ادا کرتے رہے اور روتے رہے، یہاں تک کہ صبح ہو گئی۔ [صحیح ابن حبان/كتاب الصلاة/حدیث: 2257]

سیدنا عبداللہ بن عمر رضی اللہ عنہما بیان کرتے ہیں: نبی اکرم صلی اللہ علیہ وسلم بنو عمرو بن عوف کی مسجد میں تشریف لائے (راوی کہتے ہیں) یعنی مسجدِ قبا میں تشریف لائے، تو کچھ انصار مسجد میں آئے اور انہوں نے نبی اکرم صلی اللہ علیہ وسلم کو سلام کیا۔ سیدنا عبداللہ بن عمر رضی اللہ عنہما بیان کرتے ہیں: میں نے سیدنا صہیب رضی اللہ عنہ سے دریافت کیا، یہ اس وقت نبی اکرم صلی اللہ علیہ وسلم کے ساتھ تھے، نبی اکرم صلی اللہ علیہ وسلم کو جب نماز کے دوران سلام کیا گیا تو پھر آپ نے کیا کیا تھا؟ تو سیدنا صہیب رضی اللہ عنہ نے بتایا: آپ نے اپنے دستِ اقدس کے ذریعے اشارے (کے ذریعے جواب دیا تھا)۔ [صحیح ابن حبان/كتاب الصلاة/حدیث: 2258]

سیدنا عبداللہ بن عمر رضی اللہ عنہما سیدنا صہیب رضی اللہ عنہ کا یہ بیان نقل کرتے ہیں: میں نبی اکرم صلی اللہ علیہ وسلم کے پاس سے گزرا، آپ صلی اللہ علیہ وسلم اس وقت نماز ادا کر رہے تھے، میں نے آپ صلی اللہ علیہ وسلم کو سلام کیا، تو آپ صلی اللہ علیہ وسلم نے مجھے اشارے سے جواب دیا۔ راوی کہتے ہیں: میرا خیال ہے روایت میں یہ الفاظ بھی ہیں: ”آپ نے انگلی کے اشارے سے جواب دیا۔“ [صحیح ابن حبان/كتاب الصلاة/حدیث: 2259]

سیدنا سہل بن سعد رضی اللہ عنہ بیان کرتے ہیں کہ نبی اکرم صلی اللہ علیہ وسلم بنو عمرو بن عوف کے ہاں تشریف لے گئے تاکہ ان کے درمیان صلح کروائیں، اسی دوران نماز کا وقت ہو گیا۔ سیدنا بلال رضی اللہ عنہ سیدنا ابوبکر صدیق رضی اللہ عنہ کی خدمت میں آئے اور بولے: کیا آپ لوگوں کو نماز پڑھا دیں گے تو میں اقامت کہوں؟ سیدنا ابوبکر رضی اللہ عنہ نے کہا: ٹھیک ہے، پھر سیدنا ابوبکر رضی اللہ عنہ نماز پڑھانے لگے۔ اسی دوران نبی اکرم صلی اللہ علیہ وسلم تشریف لے آئے، لوگ اس وقت نماز پڑھ رہے تھے۔ نبی اکرم صلی اللہ علیہ وسلم آئے اور صف میں آ کر کھڑے ہو گئے۔ لوگوں نے تالیاں بجانی شروع کیں، سیدنا ابوبکر رضی اللہ عنہ نماز کے دوران ادھر ادھر توجہ نہیں دیتے تھے، جب لوگوں نے زیادہ تالیاں بجائیں اور سیدنا ابوبکر رضی اللہ عنہ نے توجہ کی تو انہیں نبی اکرم صلی اللہ علیہ وسلم نظر آئے۔ (نبی اکرم صلی اللہ علیہ وسلم نے انہیں اشارہ کیا): ”تم اپنی جگہ پر رہو“ لیکن سیدنا ابوبکر رضی اللہ عنہ نے اپنے دونوں ہاتھ بلند کیے اور اللہ کے رسول صلی اللہ علیہ وسلم نے انہیں جو یہ حکم دیا تھا، اس پر اللہ تعالیٰ کی حمد بیان کی اور پھر سیدنا ابوبکر رضی اللہ عنہ پیچھے ہٹ گئے، یہاں تک کہ صف میں آ کر کھڑے ہو گئے۔ نبی اکرم صلی اللہ علیہ وسلم آگے بڑھے اور آپ نے نماز پڑھائی، جب آپ نے نماز مکمل کر لی، تو آپ نے دریافت کیا: ”اے ابوبکر! جب میں نے تمہیں حکم دیا تھا تو تم اپنی جگہ پر ٹھہرے کیوں نہیں تھے؟“ سیدنا ابوبکر رضی اللہ عنہ نے عرض کی: ابوقحافہ کے بیٹے کی یہ مجال نہیں ہے کہ وہ اللہ کے رسول صلی اللہ علیہ وسلم کے آگے نماز ادا کرے۔ نبی اکرم صلی اللہ علیہ وسلم نے ارشاد فرمایا: ”کیا وجہ ہے، میں نے تمہیں دیکھا، تم نے بکثرت تالیاں بجائی تھیں؟ جس شخص کو نماز کے دوران (امام کو متوجہ کرنے کے لیے) کوئی ضرورت پیش آ جائے اسے «سُبْحَانَ اللّٰهِ» ”اللہ پاک ہے“ کہنا چاہیے، اگر وہ «سُبْحَانَ اللّٰهِ» کہے گا، تو اس کی طرف توجہ مبذول ہو جائے گی، (نماز کے دوران امام کو متوجہ کرنے کے لیے) تالی بجانے کا حکم خواتین کے لیے ہے۔“ [صحیح ابن حبان/كتاب الصلاة/حدیث: 2260]

سیدنا سہل بن سعد رضی اللہ عنہ بیان کرتے ہیں کہ بنو عمرو بن عوف کے درمیان لڑائی ہو گئی، نبی اکرم صلی اللہ علیہ وسلم ان کے درمیان صلح کروانے کے لیے تشریف لے گئے، ظہر کی نماز کا وقت ہو گیا۔ آپ صلی اللہ علیہ وسلم نے سیدنا بلال رضی اللہ عنہ سے ارشاد فرمایا: ”اگر عصر کا وقت ہو جائے اور میں نہ آ پاؤں، تو ابوبکر سے کہنا لوگوں کو نماز پڑھا دے۔“ جب عصر کی نماز کا وقت ہوا، تو سیدنا بلال رضی اللہ عنہ نے اذان دی اور اقامت کہی اور بولے: اے ابوبکر! آپ آگے بڑھیے، تو سیدنا ابوبکر رضی اللہ عنہ آگے بڑھے، اسی دوران نبی اکرم صلی اللہ علیہ وسلم صفوں کو چیرتے ہوئے تشریف لے آئے، جب لوگوں نے نبی اکرم صلی اللہ علیہ وسلم کو دیکھا تو انہوں نے تالیاں بجانی شروع کر دیں۔ راوی کہتے ہیں: سیدنا ابوبکر رضی اللہ عنہ جب نماز شروع کرتے تھے، تو ادھر ادھر توجہ نہیں کرتے تھے، جب انہوں نے دیکھا کہ مسلسل تالیاں بج رہی ہیں، تو انہوں نے توجہ کی تو انہیں نبی اکرم صلی اللہ علیہ وسلم اپنے پیچھے کھڑے ہوئے نظر آئے۔ نبی اکرم صلی اللہ علیہ وسلم نے انہیں اشارہ کیا: ”تم نماز جاری رکھو“، لیکن سیدنا ابوبکر رضی اللہ عنہ ایڑیوں کے بل الٹے چلتے ہوئے پیچھے آ گئے، جب نبی اکرم صلی اللہ علیہ وسلم نے یہ بات ملاحظہ کی تو آپ صلی اللہ علیہ وسلم آگے بڑھے۔ آپ صلی اللہ علیہ وسلم نے لوگوں کو نماز پڑھائی، جب آپ صلی اللہ علیہ وسلم نے نماز مکمل کی تو آپ صلی اللہ علیہ وسلم نے ارشاد فرمایا: ”اے ابوبکر! کیا وجہ ہے، جب میں نے تمہاری طرف اشارہ کیا تھا تو تم نے نماز کو جاری کیوں نہیں رکھا؟“ سیدنا ابوبکر رضی اللہ عنہ نے عرض کی: ابوقحافہ کے بیٹے کی یہ مجال نہیں ہے کہ وہ اللہ کے رسول کی امامت کرے، پھر نبی اکرم صلی اللہ علیہ وسلم نے لوگوں سے ارشاد فرمایا: ”جب تمہیں نماز کے دوران (امام کو متوجہ کرنے کے لیے) ضرورت پیش آئے تو مردوں کو «سُبْحَانَ اللّٰهِ» ”سبحان اللہ“ کہنا چاہیے اور خواتین کو تالی بجانی چاہیے۔“ [صحیح ابن حبان/كتاب الصلاة/حدیث: 2261]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”(امام کو متوجہ کرنے کے لیے) «سُبْحَانَ اللّٰهِ» ”سبحان اللہ“ کہنے کا حکم مردوں کے لیے ہے اور تالی بجانے کا حکم خواتین کے لیے ہے۔“ [صحیح ابن حبان/كتاب الصلاة/حدیث: 2262]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”(نماز کے دوران امام کو متوجہ کرنے کے لیے) «سُبْحَانَ اللّٰهِ» ”سبحان اللہ“ کہنے کا حکم مردوں کے لیے ہے اور تالی بجانے کا حکم خواتین کے لیے ہے۔“ [صحیح ابن حبان/كتاب الصلاة/حدیث: 2263]

سیدنا انس رضی اللہ عنہ بیان کرتے ہیں: نبی اکرم صلی اللہ علیہ وسلم نماز کے دوران اشارہ کر لیتے تھے۔ [صحیح ابن حبان/كتاب الصلاة/حدیث: 2264]

عبادہ بن ولید بیان کرتے ہیں: ہم لوگ سیدنا جابر بن عبداللہ رضی اللہ عنہما کی خدمت میں ان کی مسجد میں حاضر ہوئے۔ وہ اس وقت ایک کپڑے کو اشتمال کے طور پر لپیٹ کر نماز ادا کر رہے تھے۔ میں لوگوں کی گردنیں پھلانگتا ہوا ان کے اور قبلہ کے درمیان آ کر بیٹھ گیا۔ میں نے کہا: اللہ تعالیٰ آپ پر رحم فرمائے، آپ ایک کپڑے میں نماز ادا کر رہے ہیں حالانکہ آپ کی بڑی چادر آپ کے پہلو میں موجود ہے؟ تو انہوں نے اپنے ہاتھ کے ذریعے میرے سینے پر مارا اور بولے: میں یہ چاہتا تھا کہ تم جیسا احمق آدمی میرے پاس آ کر مجھے دیکھے کہ میں کیا کر رہا ہوں اور پھر وہ اس کی مانند عمل کرے۔ ایک مرتبہ نبی اکرم صلی اللہ علیہ وسلم ہماری اس مسجد میں ہمارے پاس تشریف لائے۔ آپ کے دستِ اقدس میں ایک چھڑی تھی۔ آپ نے مسجد کے قبلہ کی سمت میں بلغم لگا ہوا دیکھا تو آپ اس کی طرف گئے اور اسے چھڑی کے ذریعے کھرچ دیا، پھر آپ ہماری طرف متوجہ ہوئے اور فرمایا: ”تم میں سے کون شخص اس بات کو پسند کرتا ہے کہ اللہ تعالیٰ اس سے منہ پھیر لے؟“ راوی کہتے ہیں: ہم گھبرا گئے، پھر آپ نے ارشاد فرمایا: ”تم میں سے کون شخص اس بات کو پسند کرتا ہے کہ اللہ تعالیٰ اس سے منہ پھیر لے؟“ ہم نے عرض کی: یا رسول اللہ صلی اللہ علیہ وسلم ! ہم میں سے کوئی بھی یہ نہیں چاہتا۔ نبی اکرم صلی اللہ علیہ وسلم نے یہ ارشاد فرمایا: ”تم میں سے کوئی ایک شخص جب کھڑا ہو کر نماز ادا کرتا ہے، تو اللہ تعالیٰ اس کے سامنے کی طرف ہوتا ہے، تو وہ اپنے سامنے کی طرف نہ تھوکے اور اپنے دائیں طرف بھی نہ تھوکے۔ اسے اپنے بائیں طرف اپنے بائیں پاؤں کے نیچے تھوکنا چاہیے اور اگر بلغم تیزی سے آ رہا ہو، تو وہ اپنے کپڑے میں اس طرح کرے۔“ آپ نے اسے مل دیا۔ ”تم لوگ مجھے کوئی خوشبو دو۔“ تو اس قبیلے کا ایک نوجوان تیزی سے اپنے گھر گیا، اور اپنی ہتھیلیوں میں کچھ خوشبو لے کر آیا۔ نبی اکرم صلی اللہ علیہ وسلم نے اسے لیا اور اس چھڑی کے کنارے پر رکھا اور اس کے ذریعے بلغم کے نشان پر مل دیا۔ سیدنا جابر رضی اللہ عنہما بیان کرتے ہیں: یہیں سے لوگوں نے مسجدوں میں خوشبو رکھنا شروع کی۔ [صحیح ابن حبان/كتاب الصلاة/حدیث: 2265]