سیدنا جابر رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جب کوئی شخص نماز ادا کر رہا ہو، تو وہ اپنے سامنے کی طرف یا دائیں طرف نہ تھوکے، وہ اپنے بائیں طرف یا اپنے بائیں پاؤں کے نیچے تھوکے۔“ [صحیح ابن حبان/كتاب الصلاة/حدیث: 2266]

سیدنا انس بن مالک رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص نماز ادا کر رہا ہو، تو وہ اپنے دائیں طرف یا سامنے کی طرف نہ تھوکے کیونکہ وہ اپنے پروردگار کی بارگاہ میں مناجات کر رہا ہوتا ہے، بلکہ اپنے بائیں طرف یا اپنے پاؤں کے نیچے تھوکے۔“ [صحیح ابن حبان/كتاب الصلاة/حدیث: 2267]

سیدنا ابوہریرہ اور سیدنا ابوسعید خدری رضی اللہ عنہما بیان کرتے ہیں کہ نبی اکرم صلی اللہ علیہ وسلم نے قبلہ کی سمت میں (دیوار پر) بلغم لگا ہوا دیکھا تو آپ صلی اللہ علیہ وسلم نے ایک کنکری لے کر اس کے ذریعے اس کو کھرچ دیا، پھر آپ صلی اللہ علیہ وسلم نے ارشاد فرمایا: ”کوئی بھی شخص قبلہ کی طرف ہرگز نہ تھوکے اور اپنے دائیں طرف بھی نہ تھوکے۔ اسے اپنے بائیں طرف یا اپنے بائیں پاؤں کے نیچے تھوکنا چاہیے۔“ [صحیح ابن حبان/كتاب الصلاة/حدیث: 2268]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص نماز ادا کرنے کے لیے کھڑا ہو، تو وہ اپنے سامنے کی سمت میں نہ تھوکے، کیونکہ وہ جب تک نماز ادا کر رہا ہوتا ہے، تو اپنے پروردگار کی بارگاہ میں مناجات کر رہا ہوتا ہے اور وہ اپنے دائیں طرف بھی نہ تھوکے، کیونکہ اس کے دائیں طرف فرشتہ ہوتا ہے، اسے اپنے بائیں طرف یا اپنے پاؤں کے نیچے تھوک کر اسے دفن کر دینا چاہیے۔“ [صحیح ابن حبان/كتاب الصلاة/حدیث: 2269]

سیدنا ابوسعید خدری رضی اللہ عنہ بیان کرتے ہیں کہ نبی اکرم صلی اللہ علیہ وسلم کو ہاتھ میں چھڑی رکھنا پسند تھا، ایک دن آپ صلی اللہ علیہ وسلم مسجد میں داخل ہوئے اور ایک چھڑی آپ کے ہاتھ میں تھی، آپ نے مسجد کے قبلہ کی سمت (والی دیوار) پر بلغم لگی ہوئی دیکھی تو آپ نے اسے کھرچ کر اچھی طرح صاف کیا، پھر آپ صلی اللہ علیہ وسلم غضب کی حالت میں لوگوں کی طرف متوجہ ہوئے اور ارشاد فرمایا: ”تم میں سے کوئی ایک شخص اس بات کو پسند کرے گا کہ کوئی شخص اس کے سامنے آئے اور اس کے چہرے کی طرف منہ کر کے تھوک دے؟ جب آدمی نماز پڑھنے کے لیے کھڑا ہوتا ہے، تو اس کا پروردگار اس کے مدمقابل ہوتا ہے اور فرشتہ اس کے دائیں طرف ہوتا ہے، اس لیے اسے اپنے سامنے کی طرف یا دائیں طرف نہیں تھوکنا چاہیے، بلکہ اپنے بائیں طرف اپنے بائیں پاؤں کے نیچے تھوکنا چاہیے اور اگر تھوک تیزی سے آ جائے، تو اسے اس طرح کرنا چاہیے“ یعنی اپنے کپڑے میں تھوک کر اسے مل دے۔ [صحیح ابن حبان/كتاب الصلاة/حدیث: 2270]

سیدنا ابوسعید خدری رضی اللہ عنہ بیان کرتے ہیں کہ نبی اکرم صلی اللہ علیہ وسلم کو چھڑی رکھنا پسند تھا، آپ اسے اپنے دستِ اقدس میں رکھتے تھے۔ ایک دن آپ صلی اللہ علیہ وسلم مسجد میں داخل ہوئے تو آپ کے دستِ مبارک میں چھڑی تھی، آپ نے اس کے ذریعے اسے کھرچ دیا (راوی کی مراد یہ ہے کہ مسجد میں قبلہ کی سمت میں لگے ہوئے بلغم کو کھرچ دیا) اور آپ صلی اللہ علیہ وسلم نے اس بات سے منع فرمایا کہ آدمی اپنے سامنے کی طرف یا اپنے دائیں طرف تھوکے۔ آپ صلی اللہ علیہ وسلم نے ارشاد فرمایا: ”اسے بائیں طرف یا اپنے بائیں پاؤں کے نیچے تھوکنا چاہیے اور اگر تھوک تیزی سے آ رہا ہو، تو اسے اپنے کپڑے میں پھینک دینا چاہیے اور پھر اس طرح کر دینا چاہیے۔“ سفیان نے اپنی انگلیوں کے ذریعے آستین کے کنارے کو مل کر اشارہ کر کے بتایا۔ [صحیح ابن حبان/كتاب الصلاة/حدیث: 2271]

ابوالعلاء بن شخیر رحمہ اللہ اپنے والد رضی اللہ عنہ کا یہ بیان نقل کرتے ہیں کہ انہوں نے نبی اکرم صلی اللہ علیہ وسلم کی اقتدا میں نماز ادا کی، آپ صلی اللہ علیہ وسلم نے تھوک پھینکا تو اسے اپنے بائیں جوتے کے ذریعے مل دیا۔ [صحیح ابن حبان/كتاب الصلاة/حدیث: 2272]

سیدنا ابوذر غفاری رضی اللہ عنہ بیان کرتے ہیں کہ انہیں نبی اکرم صلی اللہ علیہ وسلم کے اس فرمان کا پتہ چلا ہے: ”جب کوئی شخص نماز ادا کر رہا ہو، تو کنکریوں پر ہاتھ نہ پھیرے کیونکہ رحمت اس کے مدمقابل ہوتی ہے۔“ [صحیح ابن حبان/كتاب الصلاة/حدیث: 2273]

ابواحوص نے سعید بن مسیب رحمہ اللہ کی محفل میں یہ بات بیان کی، اس وقت سعید بن مسیب رحمہ اللہ بھی وہاں بیٹھے ہوئے تھے، ابواحوص نے بتایا کہ انہوں نے سیدنا ابوذر غفاری رضی اللہ عنہ کو یہ بیان کرتے ہوئے سنا ہے، نبی اکرم صلی اللہ علیہ وسلم نے یہ بات ارشاد فرمائی ہے: ”جب کوئی شخص نماز ادا کرنے کے لیے کھڑا ہوتا ہے، تو رحمت اس کے مد مقابل ہوتی ہے، اس لیے (نماز ادا کرتے ہوئے) وہ کنکریوں کو حرکت نہ دے (راوی کو شک ہے، شاید یہ الفاظ ہیں:) کنکریوں کو چھوئے نہیں۔“ [صحیح ابن حبان/كتاب الصلاة/حدیث: 2274]

سیدنا معیقیب رضی اللہ عنہ بیان کرتے ہیں: میں نے نبی اکرم صلی اللہ علیہ وسلم سے نماز کے دوران کنکریوں پر ہاتھ پھیرنے کے بارے میں دریافت کیا تو آپ صلی اللہ علیہ وسلم نے ارشاد فرمایا: ”اگر تم نے ضرور ایسا کرنا ہو، تو صرف ایک مرتبہ ایسا کرو۔“ [صحیح ابن حبان/كتاب الصلاة/حدیث: 2275]