سیدنا عبداللہ بن عباس رضی اللہ عنہما بیان کرتے ہیں کہ ایک شخص نبی اکرم صلی اللہ علیہ وسلم کی خدمت میں حاضر ہوا، اس نے عرض کی: میرے والد کا انتقال ہو گیا ہے، انہوں نے حج نہیں کیا تھا، تو کیا میں ان کی طرف سے حج کر لوں؟ نبی اکرم صلی اللہ علیہ وسلم نے دریافت فرمایا: ”تمہارا کیا خیال ہے، اگر تمہارے والد کے ذمے قرض ہوتا تو کیا تم اسے ادا کر دیتے؟“ اس نے عرض کی: جی ہاں۔ نبی اکرم صلی اللہ علیہ وسلم نے فرمایا: ”پھر تم اپنے والد کی طرف سے حج کر لو۔“ [صحیح ابن حبان/كتاب الحج/حدیث: 3992]

سیدنا عبداللہ بن عباس رضی اللہ عنہما بیان کرتے ہیں کہ ایک شخص نبی اکرم صلی اللہ علیہ وسلم کی خدمت میں حاضر ہوا، اس نے عرض کی: میری بہن کا انتقال ہو گیا ہے اور اس نے حج نہیں کیا تھا، کیا میں اس کی طرف سے حج کر لوں؟ نبی اکرم صلی اللہ علیہ وسلم نے فرمایا: ”تمہارا کیا خیال ہے اگر اس عورت کے ذمے قرض ہوتا تو کیا تم اسے ادا کر دیتے؟ اللہ تعالیٰ ادا کیے جانے کا سب سے زیادہ حق دار ہے۔“ [صحیح ابن حبان/كتاب الحج/حدیث: 3993]

سیدنا عبداللہ بن عباس رضی اللہ عنہما بیان کرتے ہیں کہ ایک شخص نبی اکرم صلی اللہ علیہ وسلم کی خدمت میں حاضر ہوا، اس نے عرض کی: یا رسول اللہ صلی اللہ علیہ وسلم ! میرے والد بوڑھے عمر رسیدہ شخص ہیں، وہ حج کرنے کی استطاعت نہیں رکھتے، کیا میں ان کی طرف سے حج کر لوں؟ نبی اکرم صلی اللہ علیہ وسلم نے فرمایا: ”جی ہاں! تم اپنے باپ کی جگہ حج کر لو۔“ [صحیح ابن حبان/كتاب الحج/حدیث: 3994]

سیدنا عبداللہ بن عباس رضی اللہ عنہما بیان کرتے ہیں کہ خثعم قبیلے سے تعلق رکھنے والی ایک خاتون نے عرض کی: یا رسول اللہ صلی اللہ علیہ وسلم ! اللہ تعالیٰ نے جو حج فرض کیا ہے وہ میرے بوڑھے عمر رسیدہ والد پر بھی لازم ہو گیا ہے، جو سواری پر بیٹھنے کی استطاعت نہیں رکھتے تو کیا میں ان کی طرف سے ادائیگی کر دوں (راوی کو شک ہے شاید یہ الفاظ ہیں) کیا میں ان کی طرف سے حج کر لوں؟ نبی اکرم صلی اللہ علیہ وسلم نے اس خاتون سے فرمایا: ”جی ہاں۔“ [صحیح ابن حبان/كتاب الحج/حدیث: 3995]

سیدنا عبداللہ بن عباس رضی اللہ عنہما بیان کرتے ہیں کہ سیدنا فضل بن عباس رضی اللہ عنہ نبی اکرم صلی اللہ علیہ وسلم کے پیچھے سواری پر بیٹھے ہوئے تھے، خثعم قبیلے سے تعلق رکھنے والی ایک خاتون مسئلہ دریافت کرنے کے لیے نبی اکرم صلی اللہ علیہ وسلم کی خدمت میں حاضر ہوئی۔ سیدنا فضل رضی اللہ عنہ نے اس کی طرف دیکھنا شروع کر دیا اور اس نے سیدنا فضل رضی اللہ عنہ کی طرف دیکھنا شروع کر دیا، تو نبی اکرم صلی اللہ علیہ وسلم نے سیدنا فضل رضی اللہ عنہ کا چہرہ دوسری طرف کر دیا۔ اس خاتون نے عرض کی: یا رسول اللہ صلی اللہ علیہ وسلم ! اللہ تعالیٰ نے اپنے بندوں پر جو حج فرض کیا ہے وہ میرے بوڑھے عمر رسیدہ والد پر بھی فرض ہو گیا ہے، جو سواری پر بیٹھنے کی استطاعت نہیں رکھتے، کیا میں ان کی طرف سے حج کر لوں؟ نبی اکرم صلی اللہ علیہ وسلم نے ارشاد فرمایا: ”جی ہاں۔“ (راوی کہتے ہیں) یہ حجۃ الوداع کے موقع کی بات ہے۔ [صحیح ابن حبان/كتاب الحج/حدیث: 3996]

سیدنا عبداللہ بن عباس رضی اللہ عنہما بیان کرتے ہیں: ایک شخص نبی اکرم صلی اللہ علیہ وسلم کی خدمت میں حاضر ہوا اور عرض کی: یا رسول اللہ! میرے والد بوڑھے عمر رسیدہ شخص ہیں، جو حج (کے لیے سفر) کرنے کی استطاعت نہیں رکھتے، کیا میں ان کی طرف سے حج کر لوں؟ راوی بیان کرتے ہیں: تو نبی اکرم صلی اللہ علیہ وسلم نے ارشاد فرمایا: ”جی ہاں! تم اپنے والد کی طرف سے حج کر لو۔“ [صحیح ابن حبان/كتاب الحج/حدیث: 3997]

نافع بیان کرتے ہیں کہ جس سال حجاج نے سیدنا عبداللہ بن زبیر رضی اللہ عنہ پر حملہ کیا تھا، اس سال سیدنا عبداللہ بن عمر رضی اللہ عنہما نے حج کرنے کا ارادہ کیا، تو ان سے کہا گیا: لوگوں کے درمیان جنگ ہونے لگی ہے، ہمیں اس بات کا اندیشہ ہے کہ وہ آپ کو (مکہ) تک نہیں جانے دیں گے، تو سیدنا عبداللہ بن عمر رضی اللہ عنہما نے فرمایا: (ارشاد باری تعالیٰ ہے) ﴿لَقَدْ كَانَ لَكُمْ فِي رَسُولِ اللَّهِ أُسْوَةٌ حَسَنَةٌ﴾ [سورة الأحزاب: 21] ”تمہارے لیے اللہ کے رسول کے طریقے میں بہترین نمونہ ہے“، (سیدنا ابن عمر رضی اللہ عنہما نے فرمایا): اس صورت میں، میں اسی طرح کروں گا جس طرح نبی اکرم صلی اللہ علیہ وسلم نے کیا تھا، میں تم لوگوں کو گواہ بنا کر یہ بات کہتا ہوں کہ میں نے عمرہ (اپنے اوپر) لازم کر لیا ہے، پھر سیدنا عبداللہ بن عمر رضی اللہ عنہما روانہ ہوئے، یہاں تک کہ جب وہ بیداء کے مقام پر پہنچے تو انہوں نے فرمایا: حج اور عمرے کا طریقہ ایک ہی جیسا ہے، تو میں تم لوگوں کو گواہ بنا کر یہ بات کہتا ہوں کہ میں نے اپنے عمرے کے ہمراہ حج کو بھی لازم کر لیا ہے اور میں قربانی کا جانور ساتھ لے کر جاؤں گا جو میں قدید کے مقام سے خرید چکا ہوں، اس کے بعد سیدنا عبداللہ بن عمر رضی اللہ عنہما ان دونوں (یعنی حج اور عمرہ) کا تلبیہ پڑھتے ہوئے روانہ ہو گئے، یہاں تک کہ وہ مکہ آئے، بیت اللہ اور صفا و مروہ کا طواف کیا، انہوں نے اس سے زیادہ اور کچھ نہیں کیا، نہ انہوں نے قربانی کی، نہ سر منڈوایا، نہ بال چھوٹے کروائے اور نہ ہی ایسی کسی چیز سے حلال ہوئے جو احرام کی پابندیوں میں شامل ہو، یہاں تک کہ جب قربانی کا دن آ گیا تو انہوں نے قربانی کی، سر منڈوایا اور انہوں نے یہ سمجھا کہ جب انہوں نے پہلی مرتبہ طواف کیا تھا تو اس کے ذریعے انہوں نے حج اور عمرے دونوں کے طواف کو ادا کر دیا تھا، انہوں نے یہ بات بیان کی کہ نبی اکرم صلی اللہ علیہ وسلم نے بھی اسی طرح کیا تھا۔ [صحیح ابن حبان/كتاب الحج/حدیث: 3998]

سیدنا جابر رضی اللہ عنہ بیان کرتے ہیں کہ وہ لوگ نبی اکرم صلی اللہ علیہ وسلم کے ہمراہ مدینہ منورہ میں موجود تھے، نبی اکرم صلی اللہ علیہ وسلم نے قربانی کے جانور کو بھجوا دیا، تو ہم میں سے جس شخص نے چاہا اس نے مؤخر کر دیا اور جس نے چاہا اس نے ترک کر دیا۔ [صحیح ابن حبان/كتاب الحج/حدیث: 3999]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم جب ذوالحلیفہ تشریف لائے، تو آپ صلی اللہ علیہ وسلم نے قربانی کے جانور کی کوہان کے بائیں طرف نشان لگایا، پھر آپ صلی اللہ علیہ وسلم نے خون کو صاف کیا اور اس جانور کے گلے میں جوتوں کا ہار پہنا دیا، پھر آپ صلی اللہ علیہ وسلم اپنی سواری پر سوار ہوئے، جب وہ سواری ”بیداء“ کے مقام پر کھڑی ہوئی تو نبی اکرم صلی اللہ علیہ وسلم نے احرام شروع کیا اور حج کا تلبیہ پڑھنا شروع کیا۔ [صحیح ابن حبان/كتاب الحج/حدیث: 4000]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم جب ذوالحلیفہ پہنچے تو آپ صلی اللہ علیہ وسلم نے قربانی کے جانور کی کوہان کی دائیں طرف نشان لگایا، آپ صلی اللہ علیہ وسلم نے اس کے خون کو صاف کیا، اسے جوتوں کا ہار پہنایا، پھر آپ صلی اللہ علیہ وسلم اپنی سواری پر سوار ہوئے، جب بیداء کے مقام پر آپ صلی اللہ علیہ وسلم کی سواری کھڑی ہوئی تو آپ صلی اللہ علیہ وسلم نے احرام باندھا اور حج کا تلبیہ پڑھنا شروع کیا۔ [صحیح ابن حبان/كتاب الحج/حدیث: 4001]