سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ذوالحلیفہ میں ظہر کی نماز ادا کی، پھر آپ صلی اللہ علیہ وسلم نے قربانی کے اونٹ کو منگوایا، آپ صلی اللہ علیہ وسلم نے اس کی کوہان کے دائیں طرف نشان لگایا، پھر آپ صلی اللہ علیہ وسلم نے اس کا خون بہایا اور اسے جوتوں کا ہار پہنایا، پھر آپ صلی اللہ علیہ وسلم کی سواری لائی گئی، آپ صلی اللہ علیہ وسلم اس پر تشریف فرما ہوئے، جب میدان میں آپ صلی اللہ علیہ وسلم کی سواری کھڑی ہوئی تو آپ صلی اللہ علیہ وسلم نے تلبیہ پڑھنا شروع کر دیا۔ [صحیح ابن حبان/كتاب الحج/حدیث: 4002]

قاسم بن محمد، سیدہ عائشہ رضی اللہ عنہا کے حوالے سے یہ بات نقل کرتے ہیں کہ نبی اکرم صلی اللہ علیہ وسلم نے (قربانی کے جانور پر) نشان لگایا تھا۔ [صحیح ابن حبان/كتاب الحج/حدیث: 4003]

سیدنا جابر رضی اللہ عنہ بیان کرتے ہیں: ہم نے حدیبیہ کے دن ستر اونٹ قربان کیے تھے، ایک اونٹ سات آدمیوں کی طرف سے تھا، نبی اکرم صلی اللہ علیہ وسلم نے ارشاد فرمایا تھا: ”کچھ لوگ ایک قربانی میں حصہ دار بن جائیں۔“ [صحیح ابن حبان/كتاب الحج/حدیث: 4004]

سیدہ عائشہ صدیقہ رضی اللہ عنہا بیان کرتی ہیں کہ ہم لوگ نبی اکرم صلی اللہ علیہ وسلم کے ہمراہ حج کرنے کے لیے روانہ ہوئے، جب ہم ”سرف“ کے مقام پر پہنچے تو مجھے حیض آ گیا، نبی اکرم صلی اللہ علیہ وسلم میرے پاس تشریف لائے تو میں رو رہی تھی، نبی اکرم صلی اللہ علیہ وسلم نے دریافت کیا: ”تمہیں کیا ہوا ہے؟“ میں نے عرض کی: افسوس ہے، میں اس سال حج نہیں کر سکوں گی۔ نبی اکرم صلی اللہ علیہ وسلم نے دوبارہ دریافت کیا: ”تمہیں کیا ہوا ہے؟“ میں نے عرض کی: مجھے حیض آ گیا ہے۔ نبی اکرم صلی اللہ علیہ وسلم نے فرمایا: ”یہ وہ چیز ہے جو اللہ تعالیٰ نے آدم کی بیٹیوں کا نصیب کر دی ہے، تم وہی کچھ کرو جو حاجی کرتے ہیں البتہ تم بیت اللہ کا طواف نہ کرنا۔“ (سیدہ عائشہ رضی اللہ عنہا بیان کرتی ہیں:) جب ہم مکہ آئے، تو نبی اکرم صلی اللہ علیہ وسلم نے ارشاد فرمایا: ”تم لوگ اسے عمرہ میں تبدیل کر لو۔“ تو لوگوں نے ایسا ہی کیا، جو شخص قربانی کا جانور ساتھ نہیں لایا تھا اس نے احرام کھول دیا۔ لیکن نبی اکرم صلی اللہ علیہ وسلم ، سیدنا ابوبکر رضی اللہ عنہ، سیدنا عمر رضی اللہ عنہ اور آپ صلی اللہ علیہ وسلم کے اصحاب میں سے کچھ صاحب حیثیت لوگ اپنے ساتھ قربانی کا جانور لائے تھے، انہوں نے احرام نہیں کھولا، جب قربانی کا دن آیا تو نبی اکرم صلی اللہ علیہ وسلم نے اپنی ازواج کی طرف سے ایک گائے قربان کی، جب میں پاک ہو گئی تو میں نے بیت اللہ کا طواف بھی کیا اور (صفا و مروہ کی) سعی بھی کر لی، پھر میں منیٰ میں واپس نبی اکرم صلی اللہ علیہ وسلم کی خدمت میں حاضر ہوئی، جب ہم لوگ (مدینہ منورہ کی طرف) روانہ ہونے لگے تو نبی اکرم صلی اللہ علیہ وسلم نے مجھے میرے بھائی سیدنا عبدالرحمن بن ابوبکر رضی اللہ عنہما کے ہمراہ ”محصب“ سے بھجوایا، آپ صلی اللہ علیہ وسلم نے فرمایا: ”تم اپنی بہن کو ساتھ بٹھاؤ اور انہیں ”تنعیم“ سے عمرہ کروا دو۔“ انہوں نے مجھے اپنے پیچھے بٹھا لیا، میں نے ”تنعیم“ سے عمرہ کا احرام باندھا، میں نے بیت اللہ کا طواف کیا، پھر میں واپس نبی اکرم صلی اللہ علیہ وسلم کی خدمت میں حاضر ہوئی، تو ہم لوگ (مدینہ منورہ کی طرف) روانہ ہو گئے۔ [صحیح ابن حبان/كتاب الحج/حدیث: 4005]

سیدنا جابر رضی اللہ عنہ بیان کرتے ہیں: حدیبیہ کے موقع پر ہم نے نبی اکرم صلی اللہ علیہ وسلم کے ہمراہ سات آدمیوں کی طرف سے ایک گائے اور سات آدمیوں کی طرف سے ایک اونٹ قربان کیا تھا۔ [صحیح ابن حبان/كتاب الحج/حدیث: 4006]

سیدنا عبداللہ بن عباس رضی اللہ عنہما بیان کرتے ہیں کہ ہم نبی اکرم صلی اللہ علیہ وسلم کے ہمراہ سفر کر رہے تھے، اسی دوران قربانی کا موقع آ گیا تو ہم سات آدمی ایک گائے میں حصہ دار بن گئے اور سات (راوی کو شک ہے شاید یہ الفاظ ہیں) دس آدمی ایک اونٹ میں حصہ دار بن گئے۔ [صحیح ابن حبان/كتاب الحج/حدیث: 4007]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے اپنی ازواج کی طرف سے ایک گائے قربان کی تھی۔ [صحیح ابن حبان/كتاب الحج/حدیث: 4008]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم مدینہ منورہ سے قربانی کا جانور بھجوایا کرتے تھے، میں آپ صلی اللہ علیہ وسلم کی قربانی کے جانوروں کے لیے خود ہار تیار کرتی تھی، اس کے بعد نبی اکرم صلی اللہ علیہ وسلم کسی ایسی چیز سے اجتناب نہیں کرتے تھے جس سے محرم شخص اجتناب کرتا ہے۔ [صحیح ابن حبان/كتاب الحج/حدیث: 4009]

سیدہ عائشہ صدیقہ رضی اللہ عنہا بیان کرتی ہیں: میں نبی اکرم صلی اللہ علیہ وسلم کے قربانی کے جانوروں کے لیے خود ہار تیار کیا کرتی تھی۔ نبی اکرم صلی اللہ علیہ وسلم قربانی کے وہ جانور (مکہ) بھجوا دیتے تھے، آپ صلی اللہ علیہ وسلم خود ہمارے پاس مدینہ منورہ میں مقیم رہتے تھے، پھر آپ صلی اللہ علیہ وسلم احرام کی پابندی نہیں کرتے تھے اور نہ ہی ایسی کسی چیز سے اجتناب کرتے تھے جس سے محرم شخص اجتناب کرتا ہے۔ [صحیح ابن حبان/كتاب الحج/حدیث: 4010]

سیدہ عائشہ صدیقہ رضی اللہ عنہا بیان کرتی ہیں: میں نبی اکرم صلی اللہ علیہ وسلم کی قربانی کی بکریوں کے لیے ہار تیار کیا کرتی تھی، نبی اکرم صلی اللہ علیہ وسلم انہیں بھجوا دیتے تھے اور خود احرام کے بغیر مقیم رہا کرتے تھے۔ [صحیح ابن حبان/كتاب الحج/حدیث: 4011]