سیدنا عبداللہ بن عمر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”پانچ (جانور) ایسے ہیں جو شخص انہیں قتل کر دے، جبکہ وہ احرام کی حالت میں ہو، تو اس پر کوئی گناہ نہیں ہو گا، ان میں بچھو، چوہا، پاگل کتا، کوا اور چیل (شامل ہیں)۔“ [صحیح ابن حبان/كتاب الحج/حدیث: 3962]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ارشاد فرمایا ہے: ”گرگٹ چھوٹا فاسق ہے۔“ [صحیح ابن حبان/كتاب الحج/حدیث: 3963]

سیدنا جابر بن عبداللہ رضی اللہ عنہما بیان کرتے ہیں: نبی اکرم صلی اللہ علیہ وسلم سے بجو کے بارے میں دریافت کیا گیا تو آپ صلی اللہ علیہ وسلم نے ارشاد فرمایا: ”یہ شکار ہے اور (اسے مارنے کا کفارہ) مینڈھا ہو گا۔“ [صحیح ابن حبان/كتاب الحج/حدیث: 3964]

عبدالرحمٰن بن ابوعمار، سیدنا جابر رضی اللہ عنہ کے بارے میں نقل کرتے ہیں: میں نے ان سے بجو کے بارے میں دریافت کیا: کیا میں اسے کھا سکتا ہوں؟ انہوں نے جواب دیا: جی ہاں۔ (راوی کہتے ہیں) اس کی مراد یہ تھی کہ کیا یہ شکار ہے؟ انہوں نے جواب دیا: جی ہاں۔ میں نے دریافت کیا: کیا یہ بات نبی اکرم صلی اللہ علیہ وسلم سے منقول ہے؟ انہوں نے جواب دیا: جی ہاں۔ [صحیح ابن حبان/كتاب الحج/حدیث: 3965]

عبداللہ بن ابی قتادہ کہتے ہیں کہ سیدنا ابو قتادہ رضی اللہ عنہ احرام والے افراد کے ساتھ تھے، جبکہ سیدنا ابو قتادہ رضی اللہ عنہ نے خود احرام نہیں باندھا ہوا تھا۔ ان حضرات کے سامنے ایک حمارِ وحشی (زیبرہ) آیا، تو سیدنا ابو قتادہ رضی اللہ عنہ کے ساتھیوں نے انہیں اس بارے میں نہیں بتایا، یہاں تک کہ سیدنا ابو قتادہ رضی اللہ عنہ نے خود اسے دیکھ لیا۔ وہ اس وقت بیٹھے ہوئے تھے، انہوں نے ان حضرات کی لاٹھی لی، اس پر حملہ کیا اور اسے مار دیا؛ وہ اسے لے کر اپنے ساتھیوں کے پاس آئے، تو انہوں نے اس کا گوشت کھا لیا اور انہوں نے اپنے ساتھ بھی اسے رکھ لیا۔ جب یہ لوگ نبی اکرم صلی اللہ علیہ وسلم کی خدمت میں حاضر ہوئے اور آپ صلی اللہ علیہ وسلم سے اس بارے میں دریافت کیا، تو نبی اکرم صلی اللہ علیہ وسلم نے دریافت فرمایا: ”کیا تم میں سے کسی شخص نے (احرام کی حالت میں) اس کی طرف اشارہ کیا تھا؟“ ان لوگوں نے جواب دیا: ”جی نہیں۔“ نبی اکرم صلی اللہ علیہ وسلم نے فرمایا: ”پھر تم اسے کھا لو۔“ [صحیح ابن حبان/كتاب الحج/حدیث: 3966]

سیدنا عبداللہ بن عباس رضی اللہ عنہما، سیدنا صعب بن جثامہ رضی اللہ عنہ کا یہ بیان نقل کرتے ہیں: انہوں نے نبی اکرم صلی اللہ علیہ وسلم کی خدمت میں ”ابواء“ یا شاید ”ودان“ کے مقام پر حمار وحشی (یعنی زیبرے) کا گوشت پیش کیا، تو نبی اکرم صلی اللہ علیہ وسلم نے اسے قبول نہیں کیا، میرے لیے یہ بات پریشانی کا باعث بنی، جب نبی اکرم صلی اللہ علیہ وسلم نے میرے چہرے پر (پریشانی) کے آثار دیکھے تو آپ صلی اللہ علیہ وسلم نے ارشاد فرمایا: ”ہم یہ تمہیں واپس نہ کرتے، لیکن ہم احرام کی حالت میں ہیں۔“ [صحیح ابن حبان/كتاب الحج/حدیث: 3967]

سیدنا عبداللہ بن عباس رضی اللہ عنہما بیان کرتے ہیں میں نے سیدنا زید بن ارقم رضی اللہ عنہ سے دریافت کیا: ”کیا آپ کے علم میں یہ بات ہے کہ نبی اکرم صلی اللہ علیہ وسلم کی خدمت میں شکار کا ایک عضو تحفے کے طور پر پیش کیا گیا، نبی اکرم صلی اللہ علیہ وسلم اس وقت احرام کی حالت میں تھے، تو نبی اکرم صلی اللہ علیہ وسلم نے اسے واپس کر دیا تھا (یعنی قبول نہیں کیا تھا)؟“ تو سیدنا زید رضی اللہ عنہ نے جواب دیا: ”جی ہاں۔“ [صحیح ابن حبان/كتاب الحج/حدیث: 3968]

سیدنا عبداللہ بن عباس رضی اللہ عنہما، سیدنا صعب بن جثامہ لیثی رضی اللہ عنہ کے حوالے سے یہ بات نقل کرتے ہیں کہ انہوں نے نبی اکرم صلی اللہ علیہ وسلم کی خدمت میں حمارِ وحشی (یعنی زیبرہ) کا گوشت پیش کیا، نبی اکرم صلی اللہ علیہ وسلم اس وقت ابواء یا شاید ودان کے مقام پر موجود تھے، نبی اکرم صلی اللہ علیہ وسلم نے اسے قبول نہیں کیا، جب نبی اکرم صلی اللہ علیہ وسلم نے میرے چہرے پر (پریشانی یا افسوس) کے آثار دیکھے تو آپ صلی اللہ علیہ وسلم نے ارشاد فرمایا: ”ہم نے اسے صرف اس لیے واپس کیا ہے کیونکہ ہم حالتِ احرام میں ہیں۔“ [صحیح ابن حبان/كتاب الحج/حدیث: 3969]

سیدنا عبداللہ بن عباس رضی اللہ عنہما بیان کرتے ہیں: سیدنا صعب بن جثامہ رضی اللہ عنہ نے قدید کے مقام پر نبی اکرم صلی اللہ علیہ وسلم کی خدمت میں «حِمَارَ وَحْشٍ» (یعنی زیبرا) کی پچھلی ران پیش کی، نبی اکرم صلی اللہ علیہ وسلم اس وقت حالتِ احرام میں تھے، تو نبی اکرم صلی اللہ علیہ وسلم نے اسے قبول نہیں کیا۔ [صحیح ابن حبان/كتاب الحج/حدیث: 3970]

سیدنا جابر بن عبداللہ رضی اللہ عنہما بیان کرتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”خشکی کا شکار (احرام والے شخص کے لیے) حلال ہے جب تک تم نے اسے شکار نہ کیا ہو یا اسے تمہارے لیے شکار نہ کیا گیا ہو۔“ [صحیح ابن حبان/كتاب الحج/حدیث: 3971]