سیدہ عائشہ صدیقہ رضی اللہ عنہا بیان کرتی ہیں: میں نبی اکرم صلی اللہ علیہ وسلم کے قربانی کے جانوروں کے لیے ہار تیار کیا کرتی تھی، نبی اکرم صلی اللہ علیہ وسلم انہیں بھجوا دیتے تھے اور پھر اس کے بعد نبی اکرم صلی اللہ علیہ وسلم ایسی کسی چیز سے اجتناب نہیں کرتے تھے جس سے محرم شخص اجتناب کرتا ہے۔ [صحیح ابن حبان/كتاب الحج/حدیث: 4012]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم مدینہ منورہ سے قربانی کا جانور بھجوا دیتے تھے، میں آپ صلی اللہ علیہ وسلم کی قربانی کے جانوروں کے لیے ہار تیار کرتی تھی، پھر نبی اکرم صلی اللہ علیہ وسلم ایسی کسی چیز سے اجتناب نہیں کرتے تھے جس سے محرم شخص اجتناب کرتا ہے۔ [صحیح ابن حبان/كتاب الحج/حدیث: 4013]

سیدنا ابوہریرہ رضی اللہ عنہ بیان کرتے ہیں کہ ایک شخص اپنے قربانی کے اونٹ کو ساتھ لے کر جا رہا تھا اور اس کے گلے میں ہار موجود تھے۔ نبی اکرم صلی اللہ علیہ وسلم نے اس سے فرمایا: ”تم اس پر سوار ہو جاؤ۔“ اس نے عرض کی: یا رسول اللہ صلی اللہ علیہ وسلم ! یہ قربانی کا جانور ہے۔ نبی اکرم صلی اللہ علیہ وسلم نے فرمایا: «وَيْلَكَ» ”تمہارا ستیاناس ہو، تم اس پر سوار ہو جاؤ۔“ [صحیح ابن حبان/كتاب الحج/حدیث: 4014]

سیدنا جابر رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”تم لوگ مناسب طور پر قربانی کے جانور پر سوار ہو جاؤ، اس وقت تک جب تک تمہیں (سواری کے لیے) کوئی جانور نہیں ملتا۔“ [صحیح ابن حبان/كتاب الحج/حدیث: 4015]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ایک شخص کو دیکھا جو قربانی کے جانور کو ساتھ لے کر جا رہا تھا، نبی اکرم صلی اللہ علیہ وسلم نے فرمایا: ”تم اس پر سوار ہو جاؤ۔“ اس نے عرض کی: یا رسول اللہ صلی اللہ علیہ وسلم ! یہ قربانی کا جانور ہے، نبی اکرم صلی اللہ علیہ وسلم نے فرمایا: ”تم اس پر سوار ہو جاؤ۔“ اس نے عرض کی: یا رسول اللہ صلی اللہ علیہ وسلم ! یہ قربانی کا جانور ہے، نبی اکرم صلی اللہ علیہ وسلم نے فرمایا: ”تم اس پر سوار ہو جاؤ۔“ تیسری یا چوتھی مرتبہ نبی اکرم صلی اللہ علیہ وسلم نے یہ فرمایا: ”تمہارا ستیاناس ہو، تم اس پر سوار ہو جاؤ۔“ [صحیح ابن حبان/كتاب الحج/حدیث: 4016]

سیدنا جابر رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”مناسب طور پر تم لوگ اس وقت تک قربانی کے جانور پر سواری کر لو جب تک تمہیں (سواری کے لیے) جانور نہیں ملتا۔“ [صحیح ابن حبان/كتاب الحج/حدیث: 4017]

امام جعفر صادق رحمہ اللہ اپنے والد (امام باقر رحمہ اللہ) کے حوالے سے سیدنا جابر رضی اللہ عنہ کا یہ بیان نقل کرتے ہیں کہ نبی اکرم صلی اللہ علیہ وسلم اپنے ساتھ قربانی کے ایک سو اونٹ لے کر گئے تھے، جب آپ صلی اللہ علیہ وسلم قربان گاہ تشریف لائے تو آپ صلی اللہ علیہ وسلم نے 63 اونٹ اپنے دست مبارک کے ذریعے قربان کیے اور باقی بچ جانے والے سیدنا علی رضی اللہ عنہ کو دے دیے (تاکہ وہ انہیں ذبح کریں)۔ [صحیح ابن حبان/كتاب الحج/حدیث: 4018]

سیدنا انس رضی اللہ عنہ بیان کرتے ہیں: نبی اکرم صلی اللہ علیہ وسلم جب مکہ تشریف لائے تو آپ صلی اللہ علیہ وسلم نے لوگوں کو یہ حکم دیا کہ ”وہ احرام کھول دیں، ماسوائے ان لوگوں کے جن کے ساتھ قربانی کے جانور موجود تھے۔“ راوی کہتے ہیں: نبی اکرم صلی اللہ علیہ وسلم نے اپنے دستِ مبارک کے ذریعے سات جانور کھڑے کر کے ذبح کیے۔ [صحیح ابن حبان/كتاب الحج/حدیث: 4019]

امام جعفر صادق رحمہ اللہ اپنے والد (امام محمد باقر رحمہ اللہ) کے حوالے سے سیدنا جابر رضی اللہ عنہ کا یہ بیان نقل کرتے ہیں کہ نبی اکرم صلی اللہ علیہ وسلم نے قربانی کے جانوروں کے بارے میں حکم دیا: ”ان میں سے ہر جانور کا کچھ گوشت لے کر ان سب کا گوشت ایک ہنڈیا میں پکایا جائے،“ نبی اکرم صلی اللہ علیہ وسلم نے ان کا گوشت کھایا اور ان کا شوربہ پیا۔ [صحیح ابن حبان/كتاب الحج/حدیث: 4020]

سیدنا علی بن ابی طالب رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ان کے ہمراہ قربانی کے جانوروں کو بھیجا اور انہیں حکم دیا کہ ”وہ ان جانوروں کے گوشت، کھال اور اس کی جھول کو صدقہ کر دیں۔“ [صحیح ابن حبان/كتاب الحج/حدیث: 4021]