سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم کے احرام باندھنے سے پہلے اور آپ صلی اللہ علیہ وسلم کے طوافِ افاضہ کرنے سے پہلے احرام کھولنے کے وقت میں نے نبی اکرم صلی اللہ علیہ وسلم کو خوشبو لگائی تھی۔ [صحیح ابن حبان/كتاب الحج/حدیث: 3772]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے سیدہ ضباعہ رضی اللہ عنہا سے یہ فرمایا تھا: ”تم حج کرو اور یہ شرط عائد کرو کہ جہاں میں آگے جانے کے قابل نہ رہی وہاں احرام کھول دوں گی۔“ [صحیح ابن حبان/كتاب الحج/حدیث: 3773]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم سیدہ ضباعہ بنت زبیر بن عبدالمطلب رضی اللہ عنہا کے ہاں تشریف لے گئے، وہ بیمار تھیں۔ نبی اکرم صلی اللہ علیہ وسلم نے ان سے فرمایا: ”تم (حج کا احرام باندھ لو) اور یہ شرط عائد کرو کہ جہاں میں آگے جانے کے قابل نہ رہی وہاں احرام کھول دوں گی۔“ [صحیح ابن حبان/كتاب الحج/حدیث: 3774]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم سیدہ ضباعہ رضی اللہ عنہا کے ہاں تشریف لے گئے وہ بیمار تھیں، انہوں نے عرض کی: میں حج کرنا چاہتی ہوں اور میں بیمار ہوں، نبی اکرم صلی اللہ علیہ وسلم نے فرمایا: ”تم حج (کا احرام باندھ لو) اور یہ شرط عائد کرو کہ جہاں میں آگے جانے کے قابل نہ رہی وہاں احرام کھول دوں گی۔“ [صحیح ابن حبان/كتاب الحج/حدیث: 3775]

سیدنا انس بن مالک رضی اللہ عنہ بیان کرتے ہیں کہ سیدنا علی رضی اللہ عنہ یمن سے تشریف لائے تھے، نبی اکرم صلی اللہ علیہ وسلم نے ان سے دریافت کیا: ”تم نے کیا احرام باندھا ہے (یعنی کیا نیت کی ہے)؟“ انہوں نے جواب دیا کہ میں نے وہی احرام باندھا ہے، جو اللہ کے نبی صلی اللہ علیہ وسلم نے باندھا ہے، تو نبی اکرم صلی اللہ علیہ وسلم نے ارشاد فرمایا: ”اگر میرے ساتھ قربانی کا جانور ہوتا تو میں احرام کھول دیتا۔“ [صحیح ابن حبان/كتاب الحج/حدیث: 3776]

سیدنا علی بن ابوطالب رضی اللہ عنہ بیان کرتے ہیں: نبی اکرم صلی اللہ علیہ وسلم حج کے لیے مدینہ منورہ سے روانہ ہوئے۔ میں یمن سے روانہ ہوا۔ میں نے (نیت کی) کہ میں اسی احرام کے ہمراہ حاضر ہوں جو نبی اکرم صلی اللہ علیہ وسلم نے باندھا ہے، تو نبی اکرم صلی اللہ علیہ وسلم نے ارشاد فرمایا: ”میں نے حج اور عمرے دونوں کا ایک ساتھ احرام باندھا ہے۔“ [صحیح ابن حبان/كتاب الحج/حدیث: 3777]

صفوان بن یعلیٰ اپنے والد (سیدنا یعلیٰ رضی اللہ عنہ) کا یہ بیان نقل کرتے ہیں کہ ایک شخص نبی اکرم صلی اللہ علیہ وسلم کی خدمت میں حاضر ہوا، اس نے عمرے کا احرام باندھا ہوا تھا اور جبہ پہنا ہوا تھا اور خوشبو لگائی ہوئی تھی۔ نبی اکرم صلی اللہ علیہ وسلم نے اسے یہ ہدایت کی کہ ”وہ جبہ اتار دے اور اسے دو یا تین مرتبہ دھوئے۔“ نبی اکرم صلی اللہ علیہ وسلم نے ارشاد فرمایا: ”جو کچھ تم حج میں کرتے ہو وہی عمرے میں کرو (یعنی اسی طرح کا احرام باندھو)۔“ [صحیح ابن حبان/كتاب الحج/حدیث: 3778]

سیدنا صفوان بن یعلیٰ رضی اللہ عنہ اپنے والد کا یہ بیان نقل کرتے ہیں کہ ایک شخص نبی اکرم صلی اللہ علیہ وسلم کی خدمت میں حاضر ہوا، آپ صلی اللہ علیہ وسلم اس وقت جعرانہ کے مقام پر موجود تھے، اس شخص نے جبہ پہنا ہوا تھا اور اس جبے پر خوشبو لگائی ہوئی تھی (راوی کو شک ہے کہ شاید یہ الفاظ ہیں) اس پر زرد رنگ کا نشان موجود تھا، اس نے دریافت کیا: آپ مجھے کیا ہدایت کرتے ہیں کہ میں اپنے عمرے میں کیا کروں؟ راوی بیان کرتے ہیں کہ نبی اکرم صلی اللہ علیہ وسلم پر وحی نازل ہونا شروع ہوئی اور آپ صلی اللہ علیہ وسلم کو کپڑے میں چھپا دیا گیا، سیدنا یعلیٰ رضی اللہ عنہ بیان کرتے ہیں کہ میری یہ خواہش تھی کہ میں نبی اکرم صلی اللہ علیہ وسلم کو ایسی حالت میں دیکھوں کہ جب آپ صلی اللہ علیہ وسلم پر وحی نازل ہو رہی ہو، وہ بیان کرتے ہیں کہ سیدنا عمر رضی اللہ عنہ نے کپڑے کا کنارہ ہٹایا تو میں نے نبی اکرم صلی اللہ علیہ وسلم کو دیکھا کہ آپ صلی اللہ علیہ وسلم خراٹے لے رہے تھے، جب یہ کیفیت ختم ہوئی تو آپ صلی اللہ علیہ وسلم نے ارشاد فرمایا: ”عمرہ کے بارے میں دریافت کرنے والا شخص کہاں ہے؟ تم اپنے اوپر سے زرد رنگ کے نشان کو دھو لو (راوی کو شک ہے کہ شاید یہ الفاظ ہیں) خوشبو کو دھو لو اور اپنے جبے کو اتار دو اور اپنے عمرے میں بھی وہی کرو جو تم حج میں کرتے ہو۔“ (یعنی اسی طرح کا احرام باندھو)۔ [صحیح ابن حبان/كتاب الحج/حدیث: 3779]

حماد بن زید بیان کرتے ہیں: میں مکہ میں امام ابوحنیفہ رحمہ اللہ کے پاس بیٹھا ہوا تھا، ایک شخص ان کے پاس آیا اور بولا: میں نے احرام کے دوران موزے پہن لیے ہیں (راوی کو شک ہے کہ شاید یہ الفاظ ہیں) میں نے شلوار پہن لی جبکہ میں نے احرام باندھا ہوا تھا۔ یہ شک ابراہیم نامی راوی کو ہے، تو امام ابوحنیفہ رحمہ اللہ نے اس کو فرمایا: تم پر دم دینا لازم ہوگا۔ حماد بن زید کہتے ہیں: میں نے اس شخص سے دریافت کیا: کیا تمہارے پاس جوتے ہیں؟ کیا تمہارے پاس تہبند ہے؟ اس نے جواب دیا: جی نہیں۔ میں نے کہا: اے ابوحنیفہ! یہ شخص تو یہ کہتا ہے کہ اس کے پاس تو وہ ہے ہی نہیں، تو امام ابوحنیفہ رحمہ اللہ نے فرمایا: یہ حکم برابر ہے خواہ وہ اس کے پاس ہو یا اس کے پاس نہ ہو۔ [صحیح ابن حبان/كتاب الحج/حدیث: 3780]

تو میں نے کہا: عمرو بن دینار نے جابر بن زید کے حوالے سے سیدنا عبداللہ بن عباس رضی اللہ عنہما کا یہ بیان نقل کیا ہے، وہ کہتے ہیں: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”شلوار وہ شخص پہن سکتا ہے، جسے تہبند میسر نہ ہو، اور موزے وہ شخص پہن سکتا ہے، جسے جوتے میسر نہ ہوں۔“ [صحیح ابن حبان/كتاب الحج/حدیث: 3781]