سالم اپنے والد (سیدنا عبداللہ بن عمر رضی اللہ عنہما) کا بیان نقل کرتے ہیں: سیدنا غیلان بن سلمہ ثقفی رضی اللہ عنہ نے اسلام قبول کیا تو ان کی دس بیویاں تھیں، نبی اکرم صلی اللہ علیہ وسلم نے ان سے فرمایا: ”ان میں سے چار کو اختیار کر لو۔“ سیدنا عمر رضی اللہ عنہ کا عہدِ حکومت آیا تو انہوں نے اپنی ازواج کو طلاق دے دی اور اپنا مال اپنی اولاد کے درمیان تقسیم کر دیا، جب اس بات کی اطلاع سیدنا عمر رضی اللہ عنہ کو ملی تو سیدنا عمر رضی اللہ عنہ ان سے ملے اور بولے: ”میرا یہ خیال ہے شیطان چوری چھپے جو باتیں سنتا ہے، ان میں سے اس نے تمہاری موت کی بات بھی سن لی ہے اور یہ چیز تمہارے ذہن میں ڈال دی ہے، ہو سکتا ہے اب تم تھوڑا عرصہ زندہ رہو۔ اللہ کی قسم! یا تو تم اپنی بیویوں سے رجوع کر لو اور اپنا مال واپس لے لو یا میں ان خواتین کو تمہارا وارث قرار دوں گا اور تمہاری قبر کے بارے میں حکم جاری کروں گا کہ اسے یوں سنگسار کیا جائے، جس طرح ابورغال کی قبر کو سنگسار کیا گیا تھا۔“ [صحیح ابن حبان/كتاب النكاح/حدیث: 4156]

سیدنا عبداللہ بن عمر رضی اللہ عنہما بیان کرتے ہیں کہ سیدنا غیلان ثقفی رضی اللہ عنہ نے اسلام قبول کیا، تو ان کی دس بیویاں تھیں، نبی اکرم صلی اللہ علیہ وسلم نے فرمایا: ”تم چار کو روک لو، باقی سے علیحدگی اختیار کر لو۔“ [صحیح ابن حبان/كتاب النكاح/حدیث: 4157]

سالم اپنے والد (سیدنا عبداللہ بن عمر رضی اللہ عنہما) کا یہ بیان نقل کرتے ہیں کہ سیدنا غیلان بن ثقفی رضی اللہ عنہ نے اسلام قبول کیا تو ان کی دس بیویاں تھیں، نبی اکرم صلی اللہ علیہ وسلم نے انہیں یہ حکم دیا کہ ”وہ ان میں سے چار کو اختیار کر لیں اور باقی کو چھوڑ دیں۔“ [صحیح ابن حبان/كتاب النكاح/حدیث: 4158]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم کے زمانہ اقدس میں ایک خاتون نے اسلام قبول کر لیا، پھر اس کا شوہر آیا اور اس نے عرض کی: ”یا رسول اللہ صلی اللہ علیہ وسلم ! اس عورت نے میرے ساتھ اسلام قبول کیا ہے۔“ نبی اکرم صلی اللہ علیہ وسلم نے اس خاتون کو اس مرد کی طرف لوٹا دیا۔ [صحیح ابن حبان/كتاب النكاح/حدیث: 4159]

سیدنا عبداللہ بن مسعود رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”کوئی عورت کسی دوسری عورت کا تذکرہ اس طرح سے نہ کرے جیسے وہ اپنے شوہر کے سامنے اس کی شکل و صورت کو بیان کر رہی ہو یا اس کی صفت یوں بیان کر رہی ہو کہ مرد کو یوں محسوس ہو کہ جیسے وہ اس عورت کو دیکھ رہا ہو۔“ [صحیح ابن حبان/كتاب النكاح/حدیث: 4160]

سیدنا عبداللہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”کوئی عورت کسی دوسری عورت کا تذکرہ اپنے شوہر کے سامنے یوں نہ کرے جیسے وہ اس کی صفت بیان کر رہی ہے اور یوں لگے جیسے مرد اس عورت کو دیکھ رہا ہے۔“ [صحیح ابن حبان/كتاب النكاح/حدیث: 4161]

سیدنا ابوہریرہ رضی اللہ عنہ بیان کرتے ہیں: نبی اکرم صلی اللہ علیہ وسلم انصار کے ایک باغ میں داخل ہوئے، وہاں دو اونٹوں کی پٹائی ہو رہی تھی اور انہیں جھڑکا جا رہا تھا۔ نبی اکرم صلی اللہ علیہ وسلم ان دونوں کے قریب ہوئے تو انہوں نے اپنی گردنیں زمین پر رکھ دیں۔ نبی اکرم صلی اللہ علیہ وسلم کے ساتھ جو صاحب تھے انہوں نے عرض کی: انہوں نے تو نبی اکرم صلی اللہ علیہ وسلم کو سجدہ کیا ہے۔ نبی اکرم صلی اللہ علیہ وسلم نے ارشاد فرمایا: ”کسی بھی شخص کے لیے یہ مناسب نہیں ہے وہ کسی دوسرے کو سجدہ کرے، اگر کسی کے لیے کسی کو سجدہ کرنا مناسب ہوتا تو میں عورت کو یہ حکم دیتا کہ وہ اپنے شوہر کو سجدہ کرے کیونکہ اللہ تعالیٰ نے شوہر کے حق کو عظیم قرار دیا ہے۔“ [صحیح ابن حبان/كتاب النكاح/حدیث: 4162]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جب کوئی عورت پانچ نمازیں ادا کرے، رمضان کے روزے رکھے، اپنی شرم گاہ کی حفاظت کرے اور اپنے شوہر کی فرماں برداری کرے، تو وہ جنت کے جس بھی دروازے سے چاہے گی جنت میں داخل ہو جائے گی۔“ (امام ابن حبان رحمہ اللہ فرماتے ہیں:) ابوسلمہ کے حوالے سے اس روایت کو نقل کرنے میں عبدالملک بن عمیر منفرد ہیں اور عبدالملک کے حوالے سے یہ روایت صرف ہدیہ بن منہال نے نقل کی ہے اور وہ اہواز سے تعلق رکھنے والے عمر رسیدہ صاحب ہیں۔ [صحیح ابن حبان/كتاب النكاح/حدیث: 4163]

سیدنا ابوسعید خدری رضی اللہ عنہ بیان کرتے ہیں کہ ایک شخص اپنی بیٹی کے ساتھ نبی اکرم صلی اللہ علیہ وسلم کی خدمت میں حاضر ہوا، اس نے عرض کی: یا رسول اللہ صلی اللہ علیہ وسلم ! یہ بیٹی شادی کرنے سے انکار کرتی ہے۔ نبی اکرم صلی اللہ علیہ وسلم نے اس لڑکی سے فرمایا: ”تم اپنے والد کی بات مان لو۔“ اس نے عرض کی: اس ذات کی قسم جس نے آپ صلی اللہ علیہ وسلم کو حق کے ہمراہ مبعوث کیا ہے! میں اس وقت تک شادی نہیں کروں گی جب تک آپ صلی اللہ علیہ وسلم مجھے اس بارے میں بتا نہیں دیتے کہ شوہر کا بیوی پر کیا حق ہوتا ہے؟ نبی اکرم صلی اللہ علیہ وسلم نے ارشاد فرمایا: ”شوہر کا بیوی پر یہ حق ہے کہ اگر شوہر کو کوئی پھوڑا نکلا ہوا ہو اور عورت اسے چاٹ لے تو بھی وہ شوہر کے حق کو ادا نہیں کر سکتی۔“ لڑکی نے عرض کی: اس ذات کی قسم جس نے آپ صلی اللہ علیہ وسلم کو حق کے ہمراہ مبعوث کیا ہے! میں کبھی شادی نہیں کروں گی۔ نبی اکرم صلی اللہ علیہ وسلم نے ارشاد فرمایا: ”ان خواتین کے ساتھ شادی ان کے اہل خانہ سے اجازت لے کر ہی کرو۔“ [صحیح ابن حبان/كتاب النكاح/حدیث: 4164]

قیس بن طلق بیان کرتے ہیں کہ میرے والد (رضی اللہ عنہ) نے مجھے یہ بات بتائی ہے، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”جب کوئی مرد اپنی بیوی کو اپنی حاجت پوری کرنے کے لیے بلائے تو وہ عورت اس کی بات مان لے، اگرچہ وہ تندور پر موجود ہو۔“ [صحیح ابن حبان/كتاب النكاح/حدیث: 4165]